Mitahidangay ko Kawas to masakenakenaay a tamdaw malawidang Ningra, mitolon i Cingranan. (ˈOlic 65:2) Nikawrira, ‘maamaan a satolon no tamdaw, mitengilan Ningra a micada,’ cowa ka saan. Tinakoen ko sowal, ano kariˈangen no faˈinay ko fafahi, caay ko tatengilen no Kawas ko satolon ningra. (1 Pitiro 3:7) O nolitengan a Israil tamdaw, ano caka kahi a pasasiyor, padadotoc a midemak to tatiihay i, cowa ka kahi a mitengil ko Kawas to satolon nangra. Mihaenay haw i, mitolon to Kawas o tadamaanay a fadangalan, o sasalimlaen no mita. ˈArawhan, ano pasasiyor ko karetengay ko raraw a tamdaw i, mitengilan no Kawas ko satolon ningra.​—ˈOsien ko Isaya 1:15; 55:7.

Nengnengen ko ika Mitengilan no Kawas ko Maamaan a Satolon no Tamdaw Han?

Ci Yihofa o misangaˈay kitanan a Kawas, o edengan a cecay soˈlinay Kawas, mankora o Cingra aca ko dadokoen ita, pasayra Cingranan a mitolon. (Matay 4:10; 6:9) O roma i, tona cowa ko malefotay tamdaw kita, papakaynien i ngangan ni Yis a mitolon, samanen pakayniay i raraw no mita kinafalah to ˈorip cingra. (Yohani 14:6) Misaaliay ci Yihofa kitanan mikifalocoˈ a mitolon Cingranan, cowa ka hemek Cingra ano saliyaliyaw han ko mahecaday a sowal.​—ˈOsien ko Matay 6:7; Filipi 4:6, 7.

Soˈlin ano caka sadaken ko ngihaˈ a mitolon, matengilay no Kawas. (1 Samuil 1:12, 13) Pakalalokay ko Kawas kitanan ano hacowato ano icowato, tolonen Cingra, to papacem, to dadaya, ano kakomaen, anca ano tahapades i, ngaˈayay mitolon Cingranan.​—ˈOsien ko ˈOlic 55:22; Matay 15:36.

Malawidang no Kawas cowa ko madoloay, samanen ˈalomanay a italiyokay no mita, cowa pakasoˈlin to Kawas. Cowaho  pakasoˈlin to papaira ci Yihofa to dipayalay a hekal, tada katawaan ko matiniay a sowal, sanay cangra. (2 Timoti 3:1, 4; 2 Pitiro 3:3, 13) Mankora, misaaliay kita to sapakalalok no romaroma midokoay to Kawas a tamdaw, ano cangrato i, misaaliay to sapakalalok no mita.​—ˈOsien ko Hipray 10:24, 25.

Macacawmaˈ to maolahay to Kawas a tamdaw, papadama kitanan malawidang no Kawas. Mirienang kiso to saˈopo no Misawacayay Tamdaw ni Yihofa i, mamaˈaraw iso ko noka pakasoˈlin nangra to Kawas, o caciepoc tisowanan koni.​—ˈOsien ko Loma 1:11, 12.

Ano saka ciwidangaw ci Yihofaan, sinanoten a miharateng ko Sowal Ningra. Sahecien a misimsim ko nano demak no Kawas, ato sapalimoˈot ato sakiˈok Ningra. Pakaynien i pidotim ato pitolon, palidlid wa saan kiso mihapinang to tadamaanay a olah no Kawas, o taneng Ningra tada tangongolay.​—ˈOsien ko Yosuwa 1:8; ˈOlic 1:1-3.

Ano mitiˈeray kiso to Kawas, pakasoˈlin Cingranan i, wa ngaˈay malawidang Ningra. O pakasoˈlinay falocoˈ hananay i, malecaday to panay, misaaliay to papananomen, papapoliyawen ngaˈ lomahaday, hatiraay toninian, rariden iso a miharateng hano ngaˈay pakasoˈlinen ko Fangcalay Cudad, wangaˈ lomahad ato tanektek ko pakasoˈlinay no falocoˈ iso.​—ˈOsien ko Matay 4:4; Hipray 11:1, 6.

Ci Yihofa ciharatengay to polong maolahay Cingranan a tamdaw. O mamidipot Cingra kitanan, ho caka lahdaw ko pakasoˈlin no falocoˈ, ato midaˈocay a ˈorip no mita. (ˈOlic 91:1, 2, 7-10) Patalipaˈelalay ko Kawas kitanan, miliyas to tatiihay a demak, ho ngaˈay sakatanoktok ato sakalipahak no mita. Pasifanaˈay ci Yihofa kitanan samaan a ira ko sangaˈayay nokaˈorip.​—ˈOsien ko ˈOlic 73:27, 28; Yakop 4:4, 8.