Milikakawaan no Kawas ko teloc ni Apraham, malo o “Israil” hananay a kitakit, pafelian cangra to rikec Ningra. Pakaynian toniya kitakit, midipotan no Kawas ko soˈlinay a pihakelongan, halo midipot to Kimad Ningra. (ˈOlic 147:19, 20) Mihaenay haw i, polong a kasakitakit a tamdaw, ngangaˈay pakayni to Israil a kitakit milifok to sapalemed.​—ˈOsien ko Satapangan 22:18.

Mipiliˈan no Kawas ko nolitengan a Israil tamdaw, malo misawacayay Ningra. Mikitini to likisi no kitakit, mahapinang ita, midofdof to rikec no Kawas, iraay ko manan a epoc. (Limoˈot 4:6) Mansa, pakayni to Israil tamdaw, mamafanaˈ ko tamdaw to soˈlinay a Kawas.​—ˈOsien ko Isaya 43:10, 12.

Ikor i, cowato ka hemek ko Kawas to Israil kitakit. Mikotayan Ningra to kasakopang no Krisciyang ko Israil. (Matay 21:43; 23:37, 38) Nohatini, o soˈlinay Krisciyang mikotayay to Israil tamdaw malo Misawacayay Tamdaw ni Yihofa.​—ˈOsien ko Dmak 15:14, 17.

Milikakawaan ni Yis ko nisawawaan, palimoˈot cangranan papitosil to tamdamdaw, padama cangranan malo Krisciyang. (Matay 10:7, 11; 24:14; 28:19, 20) Anini i, mangataayto ko pihererekan, ˈifowaay ko mitosilay a demak. Anini, o sakina cecay koni, palisopsopan ni Yihofa ko nai cowacowa pina soˈot ˈofad a tamdaw, palacecay cangranan itini i soˈlinay a pihakelongan. (Paˈarawan 7:9, 10) Likakawaan ko soˈlinay Krisciyang, masasi pakalalok, madadama cangra. Itini paro no kakarayan, itiniay i saˈopo micadaay cangra to malecaday a sapasifanaˈ, minanam to malecaday a kimad no Fangcalay Cudad.​—ˈOsien ko Hipray 10:24, 25.

Isaka 1870 a lalintadan, o cecay mamangay ˈopo a tamdaw misongilaˈ a mikinkiw to Fangcalay Cudad, teloc i, mahapinangay nangra ko pinapina a kimad no Fangcalay Cudad, halafinayto a mararaw a mitadtad. Mafanaˈayto cangra to likakawaan ni Yis ko nisawawaan a papitosil itiyaho, oraanto i, misatapangay cangra mitosil icowacowa a pala, patenak to ngaˈayay lihaf no Hongti Kitakit i polong no cikiw. Isaka 1931 miheca, misaka dademakay cangra to “Misawacayay Tamdaw ni Yihofa” hananay a ngangan.​—ˈOsien ko Dmak 1:8; 2:1, 4; 5:42.

Isaka 1 hahekalan, Kakeridan no kasakopang ci Yis, pakayniay i kasacefang no malohemay malitengay ko mikayatay cangranan. (Dmak 16:4, 5) O aniniay i, iraay ko papina matenesay a malohemay malitengay malo Mikayatay a Malohemay Malitengay i Congpo, palemed to paro no kakarayan a Misawacayay Tamdaw ni Yihofa. O cangra ko mikayatay to demak no icowacowaay a fenpo, mahawpay ko mihongyakay, mitolicay, ato mitepangay to cudad a demak. (Nohatini mataˈlifayto ko 900 a sasowalan ko mihongyakan.) Mihaen i, mataˈlifayto ko 11 ˈofad a kasakopang, micadaay to sakayat ato sapakalalok. To kahacecay a kasakopang, iraay ko citatodongay a faˈinayan malo malohemay malitengay, mitamorong to ˈinorong tano olah a midimokos to siri no Kawas.​—ˈOsien ko 1 Pitiro 5:2, 3.

Milasilay ko Misawacayay Tamdaw ni Yihofa to ngaˈayay lihaf no Hongti Kitakit, padama to tamdaw malo Krisciyang. Mahecaday kita to saka 1 hahekalan a Krisciyang paka lomalomaˈan a mitosil. (Dmak 20:20) Maolahay kita padama to mangalayay tamdaw minanam to Fangcalay Cudad. O Misawacayay Tamdaw ni Yihofa cowa ko likakawa aca, ao taˈangayay a paro no lomaˈ cangra. Iraay ci Yihofa ko ciolahay a Wama ita, iraay ko masasi olaolahay a salikaka ita. (2 Tisalonika 1:3) Malikakawa ko tamdaw ni Yihofa i, o sapidokoaw to Kawas, pakahemek to Kawas, halo padama to tao, mankora oniniya taˈangayay a paro no lomaˈ, o salipahakay a paro no lomaˈ cangra.​—ˈOsien ko ˈOlic 33:12; Dmak 20:35.