Misangaˈ ko Kawas to cikiw oha kitiraan no tamdaw, mala palosayan no tamdamdaw. Nisangaˈan no Kawas a saka cecay mararamoday ci Atam aci Ifa, cowa ka itini i kakarayan a maˈorip, o aitini i fafekang no sera ko aroˈ. O nisangaˈan no Kawas a coyoh ngaˈ itiniay i kakarayan. (Yopu 38:4, 7) Paitinian Ningra ko lalitengan no tamdamdaw ci Atam i “Iting” a makapahay a lakoing pakamaroˈ. (Satapangan 2:15-17) Pafelian ni Yihofa ci Atam ato teloteloc ningra ira ko hatokel, midaˈoc a maˈorip i fafekang no sera.​—ˈOsien ko ˈOlic 37:29; 115:16.

Salakat, edeng ko “Iting” ko lakoing itiya. Ci Atam aci Ifa mamahofoc a palahad to wawa, maedef ko teloteloc nangra itini i polong no cikiw, halo pamatang to sera mala lakoing. (Satapangan 1:28) O cikiw tatahadaˈoc a mala lakoing no tamdamdaw, cowa ko mamalaˈafo.​—ˈOsien ko ˈOlic 104:5.

Nengnengen ko ika Hano Misangaˈ ko Kawas to Cikiw Hani? 

Ci Atam aci Ifa misafelitay to Kawas, milaplapan ni Yihofa cangra masadak nai Iting. Mihaenay a malahdaw ko lakoing. Awaay ko cimacima to ngangaˈay patikol to lakoing. O sowal no Fangcalay Cudad: “Patoroden no Kawas i tatiihay a tamdaw konini a hekal,” sanay.​—Yopu 9:24.​—ˈOsien ko Satapangan 3:23, 24.

Misawadanto ni Yihofa koya isalakatay a araaw Ningra pakayni i tamdamdaw han? Cowa! O Kawas malefotay ko ˈicel, o masadakayho i ngoyos Ningra a sowal, o mamatoor Ningra. (Isaya 45:18) Papalaˈosien no Kawas ko araaw Ningra pakayni i tamdamdaw.​—ˈOsien ko ˈOlic 37:11, 34.

Mikowanto ci Yis toniya cikiw i, o mamiliyaw a mala lakoing koniya cikiw. Ikor, o aaira ko taˈangayay a lalood, o “Armakiton”  hananay, mamikerid ci Yis to coyoh no Kawas, palaˈafo to polong a ˈada no Kawas, halo mirofo ci Akoma Satanan to 1,000 a miheca. O tamdaw no Kawas mamicada to sakayat ato sadipot ni Yis, cowa ko mamalaˈafo cangra. O aitini cangra i fafekang no sera a lakoing, tahadaˈoc a lipahak ko ˈorip.​—ˈOsien ko Paˈarawan 20:1-3; 21:3, 4.

Ano hacowa a palahdawen no Kawas ko tatiihay tamdaw tatiihay demak hani? Pasowalay ci Yis to tahapinangan ano hacowa ira koniya romiˈad. Anini adihay adihay ko pasangar noniya hekal, awaayto ko hakangaˈayan no tamdaw a maˈorip, paihkalay koni to i salikorayto ˈawaled nohatini.​—ˈOsien ko Matay 24:3, 7-14, 21, 22.

Itini pikowan ni Yis to 1,000 a miheca, o papalahdawen ningra ko kihcod a pades no hekal. (Isaya 9:6, 7; 11:9) O roma sa i, o mamalo Sakakaay a Saysi ci Yis mihepol to raraw no tamdaw. Mihaenay haw i, pakaynien no Kawas ci Yisan palahdaw ko adada, liteng, ato patay, o maolahay to Kawas a tamdaw cowato ko mamisemsem.​—ˈOsien ko Isaya 25:8; 33:24.

Polong midofdofay to Kawas a tamdaw mamaˈorip itini toniya lakoing. (1 Yohani 2:17) Ocoran ni Yis ko nisawawaan papikilim to lopayˈay a tamdaw, pasifanaˈ cangranan misamaan ko demak ngaˈ, mahemek ko Kawas. Anini, padamaay ci Yihofa to pina soˈot a ˈofad a tamdaw misaday a maˈorip i Lakoing no ikoran. (Cifaniya 2:3) Itini i Kasaˈopoan no Misawacayay Tamdaw ni Yihofa, maminanam kita malo ngaˈayay a faˈinay ato wama, malo ngaˈayay a fafahi ato wina, malo ngaˈayay a wawa. Faˈinayan, fafahiyan, matoˈasay ato wawa malacafayay cangra minanam to Fangcalay Cudad, midoko to Kawas.​—ˈOsien ko Mika 4:1-4.