SAKA 7
O Manan ko Hongti Kitakit no Kawas Hani?
1. O manan ko Hongti Kitakit no Kawas hani?
Misamaanay hano o sangaˈayay a Hongti ci Yis?—MARKO 1:40-42.
O Hongti Kitakit no Kawas hananay i, o nipatirengan no Kawas i kakarayan a sifo, mangataayto mamikotay to polong a mikowanay noni hekal, papalaˈosi to araaw no Kawas i kakarayan ato i sera. Tada misaaliay kita to fangcalay a sifo, o mahaenay a sifo ko Hongti Kitakit no Kawas, itini pikowan noni Hongti a Kitakit, polong a tamdamdaw i sera, o mamakedec a malacecay. Tada o ngaˈayay a lihaf konini.—ˈOsien ko Taniil 2:44; Matay 6:9, 10; 24:14.
O kitakit hananay i, ira ko hongti wangaˈ. Itini i Hongti Kitakit no Kawas, minilnilan ni Yihofa ko Wawa ci Yis Kristo a mala Hongti.—ˈOsien ko Paˈarawan 11:15.
Nengnengen ko ika O Manan ko Hongti Kitakit no Kawas Hani?
2. Misamaanay hano o sangaˈayay a Hongti ci Yis?
Wawa no Kawas ci Yis o sangaˈayay a Hongti, samanen o cisidaˈitay cingra, sahtoay o ngaˈayay ko demak ningra. (Matay 11:28-30) Tona itiniay i kakarayan ci Yis a mikowan to cikiw, mansa iraay ko taˈangayay ˈicel mipadang to tamdamdaw. Ta patikol maˈorip ci Yis tayra kakarayan i, cowa ka tangsol sa mala hongti, ao maroˈayho i kawanan ni Yihofa a mitala. (Hipray 10:12, 13) Ikor ngaˈ, pafelian no Kawas cingra to fadangalan, pala Hongti a mikowan.—ˈOsien ko Taniil 7:13, 14.
3. Cima ko hacafay ni Yis a mikowan?
Oya ‘fangcalay finacadanˈ hananay a tamdaw ko hacafay ni Yis itini i kakarayan a mikowan. (Taniil 7:27) Saˈayaway a mipiliˈan a fangcalay finacadan i, oya madimadiay a tarokos ni Yis. Tahaniniay, ci Yihofa Kawas padadotocayho a mipiliˈ to madimadiay tamdaw mala fangcalay finacadan, ora fangcalay finacadan iraay ko faˈinayan ato fafahiyan. Cangra i, mamatira ci Yisan patikol maˈorip mala noˈadingoan a tatirengan.—ˈOsien ko Yohani 14:1-3; 1 Korinto 15:42-44.
Papinaay kora tatayra i kakarayan a tamdaw hani? O ‘mimingay ˈopoˈ hananay ni Yis cangra. (Luka 12:32) O kaˈaloman nangra i, 144,000 ko tamdaw. O cangra ko hacafay ni Yis itini i kakarayan a mikowan to cikiw.—ˈOsien ko Paˈarawan 14:1.
4. Misatapang ci Yis a mikowan i, mafekaday ko manan a demak hani?
Ci Yis itiniay isaka 1914 a miheca misatapang a mala hongti. * Misatapang ci Yis mikowan i, saˈayaway a demak ningra milaplapan ci Satan atoya mariˈangay a coyoh tayni i fafekang no sera. Taˈangayay ko ngolaw ni Satan, pairaay to pades no hekal. (Paˈarawan 12:7-10, 12) Mikitiya toya mihecaan, malingad malingaday ko pades noniya hekal. Icowacowa iraay ko lalood, kedal, lifong, lonen. O tahapinangan koni to mangataayto ko sapikowanaw no Hongti Kitakit no Kawas toniya cikiw.—ˈOsien ko Luka 21:7, 10, 11, 31.
5. Papalaˈosi to manan a demak ko Hongti Kitakit no Kawas?
Pakaynian to mitosilay a demak i paro no kakarayan, palisopsopan no Hongti Kitakit ko kasakitakit a tamdaw makedec a malacecay. Pinaay soˈot a ˈofad a lopayˈay a tamdaw, micadaay to pikowan ni Yis, mala finawlan ningra. Ano palaˈafoento no Hongti Kitakit ko mariˈangay tamdaw ato tatiihay a demak i, o mamadipot cangra. Ano sapicadaaw to pairaan no Hongti Kitakit a sakaraheker i, hakelongen ci Yis, micada to pikowan ningra.—ˈOsien ko Paˈarawan 7:9, 14, 16, 17.
Itini i 1,000 miheca a noka pikowan no Hongti Kitakit, o mamalaˈosi ko salakatay a araaw no Kawas to tamdaw, mipala lakoing to polong a cikiw. Saikor i, wa patikolen ni Yis ko Hongti Kitakit pafeli i Wamaan. (1 Korinto 15:24-26) Cima ko papasowalen iso tonini a ngaˈayay lihaf no Hongti Kitakit no Kawas hani?—ˈOsien ko ˈOlic 37:10, 11, 29.
^ 6段 To saka cipinangaw to sapairasol no Fangcalay Cudad pakayni 1914 a miheca, asipen ko saka 217-220 fiedac no Mamananam Ita ko Manan Nai Fangcalay Cudad?