Kanonoˈan a Salikaka:

Maolahay kita to Kawas, maolahayho to tao, mansa mahemekay kita malingad mitosil, padama to kalo ngangasaw mala nisawawaan ni Yis Kristo, mipaputisem cangra. (Matay 28:19, 20; Marko 12:28-31) Ciˈicelay ko cowa pisakakinih a olah mitemeray to falocoˈ no tamdaw, mifohat to lalan padama to matatodongay ko harateng a tamdaw, micada to midaˈocay a ˈorip.​—Dmak 13:48.

I saˈayaw mitosil kita i, toor han kora sapisiwkay a sowal, ikor palilam to lalakaw. Kawra nohatini kaciharatengan ita i, o kasasowal to tamdaw. Milengo kita to kaciharatengan no tao a demak, macadaay nangra ko olah ita. Haratengen o manan ko kaciharatengan nangra, makahiay a mifalic to sasowalen ita. Mihaenay, oniya kihpicay a cudad misamaan padama kitanan hani?

Oniya cudad iraay ko 12 fedengan, wa mifolfol to 12 a capeling. Palahad kita to capeling, paihkal kita to tao, padama cangra malo Krisciyang. Fedefedengan wa milengo to maˈoningay no Fangcalay Cudad, mifolfol tona demakan ni Yis anca salakatay a Krisciyang, itini i pitosilan i, samaanay paihkal to makapahay a capeling. O patosokan ita cowa ko pihakelong aca to sapisiwkay a sowal, ao pakayni i masakenakenaay a pakayraan a macada no tao ko olah ita. Soˈlin oniya 12 a capeling, pakayni i salakatay a pitosil, mitikolay milisoˈ ato milengo to Fangcalay Cudad, masakalimlaanto, kawra wa mitadtad kita, ano tahirato i romaroma a pakayraan, paihkal to masamaanay a capeling, o masakalimlaan.

Minanam to cecacecay fedengan i, songilaˈen a miharateng, itini pitosilan a kilac iso, sasamaan paihkal kiso to capeling noniya fedengan, halo tongalen ko olah iso ci Yihofaan ato tao. O mahaenay a olah, ikakaay tono mitosilay a inaneng, ho ngaˈ padama to niyah a malaˈosi ko patosokan, pala Krisciyang to tamdaw.

Malikoay kami malacafay kamowanan a matayal. (Cifaniya 3:9) Misaˈicelay kamo maolah to tao, padama cangranan malo Krisciyang, nanay pafelien ni Yihofa to kadofahay a sapalemed i tamowanan!