1-2. Ikor no micada to paputisem papadadotocho kita samaan ko pidemak hani? Tadtaden.

 HAKOWAAY ko kararid iso miasik to lomaˈ no niyah hani? Alatek itini kalinahan iso a tatokian misongilaˈay a miasik, kawra ikor cato ka piliyaw miasik kiso i, sasamaanto hani? Mafanaˈay kita, madoloay a mataling ko alafoh no lomaˈ. Pakayni sapadotocaw makapah makorac ko lomaˈ no niyah, o mamararid kiso a miasik.

² Malecaday, o papadadotoc kita mihadak to ˈicel, misafaeloh to harateng no niyah, misalof to capeling no niyah. Manaokaniw, pakayni ‘sapikoracaw to niyah, mifalah to masakenaay pakaditay to tireng ato nafalocoˈan a demak,’ itini ˈayaw no micada to paputisem kita maharekayto misaˈicel a mifalic. (2 Korinto 7:1) Kawra nohatini oha mamidofdofho kita to sapalimoˈot ni Pawlo, sanay cingra: ‘Ka padadotoc kamo misafaeloh to pakayraan a miharateng.’ (Ifiso 4:23) Hano padadotoc misaˈicel mihaen to demak hani? Samanen o tatiihay a pinangan nonini a hekal mahecaday o alafoh, madoloay pakadit kitaanan malo cowato ko makoracay i pinengneng ni Yihofa. Sapiliyasaw to mahaenay a teloc, ato sapadotocaw milifok to pihayda ni Yihofa, o mamicerid kita mikinsa to harateng ato capeling no niyah, hapinangenho iraay ko mararaway harateng no niyah hokira.

3. ‘Sapisafaelohaw to harateng’ sasamaan ko pidemak hani? (Loma 12:2)

³ Wa misamaan kita misafaeloh to harateng, o pifalic to pakayraan no niyah a miharateng hani? (ˈOsien ko Loma 12:2.)  ‘Misafaeloh’ cowa ko pidemak aca to potalay a kafalic, sakoniya sowal, latekay midemak to pina ngaˈayay demak, mihaen cowa ko mitaypiyaway to misafaelohayto ko harateng ita. Oha mamikinsa kita to i kemoday a waywayan no niyah, halo misaˈicel a mifalic, mihaen i, o pakayraan ita maˈorip mamatongalto ko pitoor to ˈakawangay a palinian ni Yihofa. Oha papadadotoc kita mihaen to demak, cowa ka ngaˈay kinacecay aca, ikor sawad sato a midemak.

4. Sasamaan kita eca ka mafiyor nonini a hekal ko piharateng no niyah hani?

⁴ Malo malefotayto a tamdaw kita ikor, itini kihcod a nokaˈorip papakahemekto ci Yihofaan, kawra nohatiniho, sapilifokaw to pihayda ni Yihofa, papadadotoc kita mihadak to ˈicel. Sinanoten ko sowal ni Pawlo itini Loma 12:2, misafaeloh to harateng ato mihapinang to araaw no Kawas, onini tosa a demak iraay ko makelecay a kalaliting. Aka pakoniraen ko niyah mafiyor nonini a hekal. O mamikinsa kita to niyah, mihapinang to misaˈosian ato patosokan no niyah, makayatay no harateng no Kawas, anca makayatay nonini hekal hokira.

5. Sasamaan kita mihapinang, to soˈlinay pakasoˈlin ko niyah to mangataayto ko romiˈad ni Yihofa hani? (Nengnengen ko coka.)

⁵ Patinakoen, mihalamhamay ci Yihofa kitaanan mitala to kaira no romiˈad Ningra, ‘haratengen ko kangata nora romiˈad.’ (2 Pitiro 3:12) Licayen iso ko niyah: “O nokaˈorip ako paihkalay to soˈlinay mahapinang ako ko nika ngata no salikoray romiˈad nonini hekal han? O pipiliˈ ako to picudad ato katayalan, paihkalay to pidoko ci Yihofaan o sakalimlaan a demak no mako han? Pakasoˈlinay kako ci Yihofaan to mamidimokos takowanan ato paro no lomaˈ ako han? Anoca marariday kako calemcemen to sakaˈorip han?” Haratengen hena, maˈaraw ni Yihofa itini kihcod a nokaˈorip misaˈicelay kita mitoor to araaw Ningra  a midemak, hakowa ko kalipahak Ningra saw!—Matay 6:25-27, 33; Filipi 4:12, 13.

6. Sasamaan kita padadotoc a midemak?

⁶ Mamicerid kita mikinsa to harateng no niyah, ano ira ko saali i, o mamifalic. Sowal ni Pawlo to i Korintoay a Krisciyang: ‘Ka padadotoc kamo a mikinsa to niyah mitafoay to pihakelongan hokira, padadotoc mihapinang to masamaanay a tamdaw ko niyah.’ (2 Korinto 13:5) Latelatek mirienang to saˈopo no Krisciyang ato mitosilay a tayal, cowaho ko ‘mitafoay to pihakelongan.’ O mitafoay to pihakelongan milingatay to harateng, to kalim ato mihalakaan no falocoˈ no mita. Mihaenay, papadadotoc kita misafaeloh to harateng no niyah, oha pakayraan i, micekiw to Kimad no Kawas, minanam to pakayraan ni Yihofa a miharateng, hanaca mitoor to araaw Ningra padadotoc misalof.—1 Korinto 2:14-16.

7. Mikitini Ifiso 4:31, 32, mamidemakho kita to maanan? Mihaen to demak hano cowa ko madoloay hani?

⁷ ˈOsien ko Ifiso 4:31, 32. Cowa ko pifalic aca to harateng, oha ‘mamicaˈedongho kita to faelohay capeling.’ (Ifiso 4:24) Tatodong i, o mamidemak kita. Mamisaˈicel a misalof to dangoc no waywayan, ho eca ka ciˈinteh ko falocoˈ, maketer ato mangolaw. Mihaen to demek hano cowa ko madoloay hani? Samanen o dangoc no waywayan ita ˈangongolayto ko lamit i falocoˈ. Tinakoen, sowal no Fangcalay Cudad o roma tamdaw ‘narikayay a maketer’ anca ‘narikayay mangolaw’ sanay. (Taneng 29:22) Toha sapisalofaw tonini kadangocan, ikor no micada to paputisem i, oha papadadotoc kita misaˈicel. Ora ilaenoay tinakoan somowalay toninian.

8-9. O tinakoan ni Setifen samaanay paihkal to papadadotoc kita misawad to matelangay a pinangan hani?

⁸ O cecay faˈinayan salikaka ci Setifen, isaˈayaw pasangaray miˈimer to keter cingra, sanay ko sowal ningra: “Mipaputisemto kako ikor, haliketerayho. Kinacecayay, itini pitosilan kako i, iraay ko cecay mitakaway to laciyo i paliding no mako, kinafalah sa kako a milepel, maˈaraw nora mitakaway kako milepel cingranan i, sakaliki sanay mifahkol to laciyo i sera, ikor milaliwayto. Pasowalan ako ko cafay mitosil to samaanan ako mipatikol miala koniya laciyo, itiya o cecay malohemay malitengay milicayay takowanan: “Setifenaw, ano malepetay iso kora mitakaway isawni i, sasamanen iso cingra aki?” Itiya talipaˈelal sanayho kako, o papadadotoc kako misongilaˈ miˈimer to keter ngaˈ ngaˈay.” b

⁹ O nalifetan ni Setifen paihkalay, soˈlin masawadayto ko maanan a kadangocan ita, kawra onini dangoc latekay sadak sanay. Ano mahaenay kiso i, aka matoled, aka miharateng to awaay ko kapo a Krisciyang kako saan. Ano ci Pawloto mihaiyay a pasowal: ‘Ano sapidemakaw kako to matatodongay demak i, iraayto ko tatiihay a harateng mifedfed takowanan.’ (Loma 7:21-23) Cowa ko malefotay tamdaw kita, iraayto ko pina kadangocan. Mahecaday o alafoh no lomaˈ, sadasadak sanay. Mihaenay i, toha saka malo makoracay a tamdaw i pinengneng ni Yihofa, papadadotoc kita misaˈicel. Wa misamaan ko pidemak hani?

10. Sasamaan kita misalof to dangoc no niyah? (1 Yohani 5:14, 15)

¹⁰ Ano iraay ko maanan pasangaray salofen a dangoc iso i, ka pasayra ci Yihofaan a mitolon, hanaca pakasoˈlin to papacaˈofen Ningra kiso, padama tisowanan. (ˈOsien ko 1 Yohani 5:14, 15.) Soˈlin cowa pidemak ci Yihofa to kafahkaˈan palasawad to dangoc iso, kawra papafelien Ningra kiso to ˈicel, ho eca ka piliyaw a mararaw. (1 Pitiro 5:10) Hanaca, o demak iso  palecaden to satolon iso, akato midemak to mamikayhid tisowanan a mararaway demak. Tinakoen, pinaˈon a mipiliˈ to minengnengan iso a ika, kamok no tilifi ato miˈosian a cudad, samanen ilalomaˈay a lalakaw latek misakapahay tora misawadanto a katelangan pinangan. Aka a paˈenepen ko falocoˈ no niyah to cowa ka tatodong a coos.—Filipi 4:8; Kolosay 3:2.

11. Sapipadadotocaw micaˈedong to faelohay capeling, sasamaan ko pidemak ita hani?

¹¹ Soˈlin masawadayto iso ko katelangan a pinangan, kawra palahad to faelohay capeling tada masakalimlaan. Sasamaan a mihaen to demak hani? Patirengen ko patosokan, mitodong to makapahay capeling ni Yihofa. (Ifiso 5:1, 2) Patinakoen, ano maˈaraw iso i Fangcalay Cudad to makahiay misodod ci Yihofa to tamdaw i, ngaˈayay licayen ko niyah: “Makahiay kako misodod to tao han?” Ano maˈosi iso to siniˈadaay ci Yihofa to manikaway tamdaw i, ngaˈayay licayen ko niyah: “Iraay ko mahecaday siniˈadaay ako to manikaway salikaka han? Sapipadamaaw kako cangranan han?” Padadotocen misafaeloh ko harateng, micaˈedong to faelohay capeling, hanaca hadidien iso ko pidemak.

12. Samaanay matinako ni Setifen, iraay ko taˈangayay a ˈicel no Fangcalay Cudad mifalic to tamdaw?

¹² I fafekangay masowalay a Setifen ikor palidlidayto micaˈedong to faelohay capeling, sanay cingra: “Na mipaputisem kako tahanini, kinapinaay mafekad ko maanan a demak paketer takowanan. Nohatini mananamay ako samaan miliyas tora paketeray takowanan a tamdaw, mananamayho sasamaan miliyas to sakalapoˈiaw. O fafahi ako ato widang pakahemekay takowanan ngaˈayay ko pidemak ako, cowa ka harateng no mako to damsayayto ko niyah! Mangaˈay ko pinangan ako, cowa kono mako a ˈicel, misawacayay konini iraay ko ˈicel no Fangcalay Cudad, misongilaˈay mifalic to tamdaw.”

13. O maanan ko papadama kitaanan makalim midemak to matatodongay a demak? (Kalatiya 5:16)

¹³ ˈOsien ko Kalatiya 5:16. Toha sapadamaaw kitaanan padadotoc to matatodongay a demak, pafeliay ci Yihofa to fangcalay saocor Ningra i kitaanan. Ano micekiw kita to Fangcalay Cudad i, o micadaayto sakayat no fangcalay saocor. Ano malacafay to salikaka masaˈopo i, mamalifok ko fangcalay saocor. O salikaka milecaday kitaanan misaˈicel midemak to matatodongay demak, kalacafay cangranan mapakalalokay kita. (Hipray 10:24, 25; 13:7) Roma sa i, itini satolon mingitangit ci Yihofaan padama kitaanan micoˈay to maanan a dangoc i, papafeli ci Yihofa to fangcalay saocor kitaanan padadotoc a midemak. Midemak tonini pina a demak cowa ko papalahdaw to mararaway a harateng, kawra papaˈicel kitaanan a micoˈay. Mahaen o sowal itini Kalatiya 5:16, ano tooren ko fangcalay saocor a midemak i, ‘cowato ko mamidemak to mararaway harateng.’

14. Papadadotoc misaˈicel hongaˈ matongal ko kalim no niyah midemak to matatodongay a demak, hano masakalimlaan hani?

¹⁴ Ano mananamto kita mirienang to midokoay a demak ikor, oha papadadotocenho ita konini ngaˈayay a nanaman, hongaˈ matongal ko kalim midemak to matatodongay a demak. Misamaanay hano papadadotoc kita misaˈicel a mihaen hani? Samanen iraay ko cecay ˈada cowa ka pahanhan, onini ˈada i, o mararaway harateng i falocoˈ ita. Soˈlin mipaputisemayto kita, latekay mamasolotho sapidemakaw to cowa ko dadademaken no Krisciyang a demak, tinakoen mipowakiyaw, haliepahay anoca minengneng to makakalonaay a lalakaw. (Ifiso 5:3, 4) Cecay faˈinayan salikaka sanay ko sowal: “Madoloay masolot no faˈinayan tamdaw  kako, micoˈay to matiniay a mararaway harateng tada pasangaran nanay kako. Halafinto wa malahdaw ko mahaenay a harateng sa kako, ˈarawhan pasemsemay takowanan konini a pasangar.” Ano tada pakinaliay ko mahaenay a mararaway harateng i, wa mamisamaan kiso hani?

15. Mafanaˈ to mamilood ko romaroma tamdaw to mararaway harateng, hano mahinomen kita? (Nengnengen ko coka.)

¹⁵ Pakaynien tisowanan ko sowal, o cecay mararaway harateng ano o ciˈicelay a ˈada, cowa kadolo a lowiden, haharatengen, cowa ko kiso aca ko iraay ko mahaenay a pasangar. Sowal no Fangcalay Cudad: ‘Tahalifa kamo to sakayhid i, nao malifaayto no romaroma a tamdaw.’ (1 Korinto 10:13a) O sowal ni Pawlo to i Korintoay a salikaka konini, ilalomaˈay nangra o romaroma tamdaw na midemakay to maˈodangay, hinalasangay ato tongsinlien a waywayan. (1 Korinto 6:9-11) Mipaputisemto cangra ikor cowato ko mamilood to hatiniay mararaway sanay kiso miharateng han? Cowa ka hatira. Soˈlin micadaayto to sapanilnil no fangcalay saocor a Krisciyang cangra, kamayan cowa ko malefotay a tamdaw, marariday cangra micoˈay tonini a mararaway harateng. Mafanaˈ tonini tada mahinomay kita, misamaanay hani? Samanen paihkalay konini, o micoˈayan iso mararaway harateng nohatini sahtoay o na micoˈayanto no tao. Aka marawraw, ‘tatanektekto ko pakasoˈlin no miso, samanen mafanaˈay kamo, itiniay i paro no kakarayan a polong kasacefang a salikaka, tahalifaay to malecaday a sapalifet.’—1 Pitiro 5:9.

16. Aka misamaan ko piharateng ita hani? Misamaanay?

¹⁶ Cowa ko cacipinang ko tao to malifaay iso a pasangar, aka pihaen a miharateng, o mahaenay a harateng papatoled to falocoˈ iso, awato ko ˈicel padadotoc milood to mararaway a harateng. Sowal no Fangcalay Cudad: ‘Madimadiay ko Kawas, cowa ko papasalaten Ningra ko sakayhid mitaˈlif to ka pihadidi namo.  Ano tahalifa kamo to sakayhid i, mamifohat Cingra to halalan, pakahadidito kamo.’ (1 Korinto 10:13b) Mihaenay i, soˈlin ano pakidemto kora mararaway harateng, o ngangaˈay kita madimadi ci Yihofaan, padadotoc midemak to matatodongay a demak. Ira ko sapadama ni Yihofa i, o ngangaˈay malaˈosi kita, caayto sapitooraw to mararaway harateng.

17. Soˈlin cowa ko aawa ko mararaway harateng ita, kawra wa ngaˈay kita samaan ko pidemak hani?

¹⁷ Haratengen, o cowa ka lefot a tamdaw, aawa ko mararaway harateng cowa ka saan. Kawra ano masadak ko mararaway harateng i, ngaˈayay coˈayen iso, malecad ci Yosifan malifa ningra ko pikayhid no fafahi ni Potifar i, tangsolay comikay a milaliw. (Satapangan 39:12) Aka pakiyadi han mitoor ko mararaway harateng iso!

18-19. Itini i pisaˈicel ita misafaeloh to harateng i, ngaˈayay licayen ko niyah to maanan salicay?

¹⁸ Misafaeloh to harateng hananay i, tatodong oha papadadotoc misaˈicel kita, hongaˈ o harateng ato waywayan ita pahecad to araaw ni Yihofa. Mihaenay i, rariden ita milicay ko niyah: “O waywayan ako paihkalay to mahapinangay ako ko nika caloh no demak nonini hekal han? Itini picaˈedong to faelohay capeling, padotocay macakat kako han? Mitooray kako to fangcalay saocor no Kawas, ho pakaˈimer to tireng eca ka sapirenecaw to mararaway harateng han?”

¹⁹ Itini pikinsa to niyahan i, aka halamham to malefot ko midemakan no niyah, ao papakayni i kacakat no niyah a mahemeken. Ano manengneng iso iraay ko sasalofen no niyah i, aka matoled. Tengilen ko sapalimoˈot itini Filipi 3:16, sanay ko sinael: ‘Ano tahacowaay ko nika cakat ita, padadotoc a romakat tonini a lalan, masierod ko nika talaˈayaw.’ Mihaen kiso a misaˈicel i, papakasoˈlinen to papalemeden ni Yihofa kiso, ho ngaˈay kiso padadotoc misafaeloh to harateng.