1. O roma salikaka iraay ko mafalahay a paro no lomaˈ, samanay ko harateng nangra hani?

IRAAY ko mafalahay no kasakopang a paro no lomaˈ iso han? Ano iraay, maedeng tada masomaday kiso. O cecay fafahiyan salikaka ci Sieta * sanay: “Padadotocay ko faˈinay ako madimadi ci Yihofaan, kawra mararamod kami 41 miheca ikor mapatayayto cingra, itini hakelong no kaˈorip ako tada kararoman a demak konini sanay ko harateng ako itiya. Kawra miliyas ko faˈinayan wawa ako to kasakopang, mifalah to fafahi ato wawa i, tada pakidemay ko kasomad ako, o pisetiˈ ikakaay ko taˈangay to kapatay no faˈinay.”

2-3. Mikitini ˈOlic 78:40, 41, o cecay tamdaw miliyas ci Yihofaan i, samanay ko piharateng ni Yihofa hani?

² Haratengen hena, itini kakarayan a wawa ni Yihofa mitowakang Cingranan i, maedeng tada masomaday Cingra! (Yuta 6) Kanonoˈan ningra a Israil tamdaw misaliyaliyaw mitowakang Cingranan, tada pakasomaday Cingranan. (ˈOsien ko ˈOlic 78:40, 41.) Wa ngaˈay kiso pakasoˈlin, maˈaraw no sidaˈitay a Wama ita i kakarayan miliyas ko paro no lomaˈ iso Cingranan i, mahecaday a masomad. Cipinangay Cingra hakowaay ko pisemsem iso, patadoay a siniˈada tisowanan, pafeli tisowanan to sapakalalok ato sadama.

³ Oniya lalakaw wa milengo, ano miliyas ko salawina to soˈlinay kimad i, samaan ko demak ita ngaˈay milifok to sadama ni Yihofa. Mamananamho ita to sasamaan padama to iraay ko hatiniay a pasangaray a salikaka. Dotoc salakaten ita minengneng, ano miliyas ko paro no lomaˈ ci Yihofaan, o laliyasen ita ko manan a mafasaway a harateng.

4. Ano miliyas ko wawa ci Yihofaan i, ˈalomanay a wama wina samanay ko harateng hani?

⁴ ˈAlomanay wama wina maˈaraw ko wawa miliyas ci Yihofaan, tocerid cowa ka ngaˈay ko pipasifanaˈ no niyah to wawa saan ko harateng. O cecay faˈinayan salikaka ci Luke, ikor no mafalah ko wawa ningra, sanay cingra: “Miceriday kako miloloh to niyah, tatiihay ko mitiihan. Latekay, cowato pakaˈemet a tomangic kako, tada adadaay ko falocoˈ.” O wawa ni Ilisapay malecaday mafalahay, miceriday cingra miharateng: “Tada tatiihay a wina kako hokira? Itini pipasifanaˈ to wawa minanam to soˈlinay kimad, maedeng cowa ka ngaˈay ko demak ako.”

5. Ano miliyas ko cecay tamdaw ci Yihofaan, o nima a ˈinorong hani?

⁵ Haratengen ita, pafeliay ci Yihofa to kahacecay tamdaw to pasalatay a harateng, ngaˈay kita mipiliˈ to mamidofdof Cingranan hokira. O roma kapah tamdaw cowa ka ngaˈay ko kaˈorip no paro no lomaˈ, kawra mipiliˈay cangra midoko ci Yihofaan, hanaca padotocay mitafo to madimadi. O roma wama wina no kapah misarocoday mitoor to safalod no Fangcalay Cudad palahad cangranan, kawra ikorto mipiliˈay cangra miliyas to soˈlinay kimad. Sakoniya sowal, mamidoko ci Yihofaan ono tekedan a saˈosi konini. (Yosuwa 24:15) Mihaenay i, o wama wina, soˈlin miliyas ko wawa to soˈlinay kimad pakasomaday tamowanan, kawra hamaan o kamo ko mararaway saan ko harateng.

6. Maˈaraw no wawa ko piliyas no wama wina to Kawas, samanay ko harateng hani?

⁶ Latekay, o wama wina ko miliyasay to soˈlinay kimad anca mifalah to paro no lomaˈ. (ˈOlic 27:10) Oya ngaˈayay a taˈarawan ako ko wama wina saan ko pinengneng a wawa, mikiriwiˈay ko taˈangay no pidokaˈ. Mafalahay ko wama ni Ayste, sanay cingra: “Miceriday kako tomangic, samanen mafanaˈay kako cowa ko fahal saan malahdaw ko pakasoˈlinay falocoˈ no wama, ao niyah ko mipiliˈay miliyas ci Yihofaan. Tada maolahay kako to wama, ikor no mafalah cingra, miceriday kako calemcem to ngaˈayay ko kaˈorip ningra hokira, latekay fahal sanay marawraw ko harateng.”

7. Ano mafalah ko wama wina no cecay kaemangay tamdaw, samanay ko harateng ni Yihofa hani?

⁷ Kaemangay tamdaw, ano mafalahay ko wama anca wina iso, patadoay kami tisowanan a masomad! Aka calemcem, tada cipinangay ci Yihofa to hakowaay ko pisemsem iso. Tada maolahay Cingra tisowanan, padadotoc kiso madimadi pakahemekay Cingranan, o salikaka pakayniay tisowanan a maliko. Haratengenho iso, miliyas ko wama wina to soˈlinay kimad caay ko raraw iso. Malecad i fafekangay a lalakaw, pairaan ni Yihofa ko pasalat no kahacecay tamdaw mipiliˈ to mamidoko Cingranan hokira. O kahacecay patafangay to tireng, micadaay to paputisem a Krisciyang, wa ‘mitamorong to ˈinorong no niyah.’—Kalatiya 6:5 roma pihongyak.

8. Itini pitala to paro no lomaˈ patikol tayra i tatihi ni Yihofa i, sasamaan ko demak iso hani? (Nengnengen ko sapatongal lalakaw “ Patikol Tayni Tatihi ni Yihofa.”)

⁸ Ano miliyas ko paro no lomaˈ iso ci Yihofaan, wa makalim kiso cingranan ira ko cecay romiˈad patikol tayra i tatihi ni Yihofa. Itini pitalaan a tatokian, ngaˈay kiso midemak to manan hani? Ngaˈay kiso misaˈicel mitafo to tanektekay a pakasoˈlinay falocoˈ, mihaen ngaˈay kiso patireng to ngaˈayay taˈarawan no paro no lomaˈ, anca taˈarawan noya mafalahay a paro no lomaˈ, wa malifok  iso ko ˈicel miremo to masomaday a falocoˈ. Ihkalen ko sowal, sasamaan ko hademak iso hani?

9. Samaan ko demak iso ngaˈ malifok ko sapafeli ni Yihofa a ˈicel hani? (Nengnengen ko sapatongal lalakaw “ Ano Miliyas ko Paro no Lomaˈ ci Yihofaan, o Maamaan a Sinael Ngaˈay Mihinom Tisowanan.”)

⁹ Ka pisaˈicel mitafo to ngaˈayay nanaman, padotoc patanektek to pakasoˈlin no niyah ato paro no lomaˈ, kalimlaan mihaen to demak. Wa samaan ko pidemak iso hani? Micerid miasip ato midotim to lalakaw no Fangcalay Cudad, miceridho mirienang to saˈopo, mihaen o papafelien ni Yihofa kiso to ˈicel. O wama ato fafahiyan kaka ni Ciyawanna miliyasay to soˈlinay kimad, sanay cingra: “Ano maˈosi ako ko nalifetan ni Apikail, Istir, Yopu, Yosif aci Yis i Fangcalay Cudad i, rihadayayto ko falocoˈ ako. O ngaˈayay a taˈarawan nangra padamaay takowanan tawlik ko harateng, cowato pakidem ko kasomad ako. Micerid mitengil to JW Tilifi Radiw taˈangayay ko sapadama takowanan.”

10. Ano tada misemsemay kita i, ˈOlic 32:6-8 pakalalokay kitanan samaan ko demak hani?

¹⁰ Eminen a pasowal ci Yihofa to cariraw iso. Soˈlin tada misemsemay ko falocoˈ iso, aka paselaˈ mitolon i Cingranan. Cangacangen ko sidaˈitay a Kawas padama tisowanan tano harateng Ningra minengneng to demak, ngitangiten Cingra “pahapinang tisowanan to demak, pasifanaˈ tisowanan to rarakaten a lalan.” (ˈOsien ko ˈOlic 32:6-8.) Manaokaniw, pasowal to soˈliˈlinay a harateng iso tada pakarorayay to falocoˈ iso alatek. Kawra tada cipinangay ci Yihofa to nafalocoˈan iso, tangongolay ko olah Ningra tisowanan, pakalalokay tisowanan mifowah to nafalocoˈan a harateng i Cingranan.—Kasadakan 34:6; ˈOlic 62:7, 8.

11. Mikitini Hipray 12:11, hano papakasoˈlinen ita ko pirikec ni Yihofa hani? (Nengnengen ko sapatongal lalakaw “ O Mifalahay a Limasmas Patalahkalay to Olah ni Yihofa.”)

¹¹ Damaen ko saˈosi no malohemay malitengay.  O mifalahay o mikitiniay i olah ni Yihofa a pirikec, oniya limasmas wa ngaˈay padama to mararaway tamdaw pasasiyor, o sakangaˈay no romaroma tamdaw. (ˈOsien ko Hipray 12:11.) O roma tamdaw malikafay to saˈosi no malohemay malitengay, kawra aka mapawan, o mahaenay tamdaw cowa ka pihadak to o maanan ko mararaway noya mafalahay a tamdaw. Ano cowa ka fanaˈ kita to polong a demak, o papakasoˈlin to misawkitay a malohemay malitengay, samanen misawkit cangra “pakayniay ci Yihofaan,” hanaca misarocoday a mitoor to safalod no Fangcalay Cudad a midemak.—2 Rayray 19:6.

12. O roma salikaka midama to pakayniay mifalahay a limasmas, iraay ko maanan ngaˈayay a minaroˈan?

¹² Midama kiso to saˈosi no malohemay malitengay, o ngangaˈay padama to mafalahay a paro no lomaˈ patikol i tatihi ni Yihofa. O masowalay i fafekang ci Ilisapay sanay: “Hawad saan micawmaˈ to mafalahay a wawa tada pasangarayto, kawra patikolto ko wawa i tatihi ni Yihofa i, mihaiay to matatodongay mafalah ko niyah, ikor somowalay cingra adihayay ko mananamay a sapasifanaˈ. Pahapinangay konini takowanan sahtoay o matatodongay ko sarikec ni Yihofa.” Sanay ko faˈinay ningra ci Make: “Mataˈlif ko cecay liyad, pasowalay ko wawa takowanan, o cecay lalangian ningra sapinokayaw pakayniay ka eca picawmaˈ niyam cingranan. Tada mahemekay kako to pipadama ni Yihofa tamiyanan mitoor to saali Ningra a midemak.”

13. O manan ko ngangaˈay padama tisowanan milowa to pisemsem no falocoˈ hani?

¹³ Oya mafanaˈay patado miharateng a tamdaw ko fowahen to nafalocoˈan, oyaan matenesay, ngaˈayay padama tisowanan tawlik a salikaka ko cawmaˈen. (Taneng 12:25; 17:17) O masowalay i fafekang ci Ciyawanna sanay: “Ano matoˈolen kako i, masasowal to ngaˈayay pakasoˈlinen a widang, masayaray ko harateng.” Kawra o sowal no salikaka cowa pihinom tisowanan, mitongalay to somad iso, sasamaanto hani?

14. Misamanay hano ‘papadotoc a masasihepol, mikifalocoˈ a masasisodod’ kita hani?

¹⁴ Paihkalen to mihadidiay ko salikaka. Hamaan mitokel kita sahtosaan o matatodongay ko hasowal no tao. (Yakop 3:2) Soˈlin cowa ko malefotay kita, o roma salikaka cowa ka fanaˈ o manan ko hasowal anca cowa ka fanaˈ to midokaˈay kitanan, cowa ko kafahkaˈan konini. Haratengen ko sapalimoˈot no tarokos ci Pawlo, sanay cingra: “Ano iraira ko katatiihan no falocoˈ no nima namo i cimaanan i, kasasihepol, mikifalocoˈ masasisodod.” (Kolosay 3:13) O salawina no cecay fafahiyan salikaka mafalahay, sanay cingra: “O roma salikaka sapidemakaw to matatodongay a demak, kawra mararaway ko pakayraan. Padamaay ci Yihofa takowanan misodod cangranan.” Mihaenay, o kasakopangay a tamdaw wa ngaˈay samaan padama to iraay ko mafalahay a paro no lomaˈ a salikaka hani?

15. Ano ira ko mafalahay ko paro no lomaˈ a salikaka, wa ngaˈay kita samaan a ciharateng cangranan?

¹⁵ Ka ciharateng to iraay ko mafalahay ko paro no lomaˈ a salikaka, padihkoen ko falocoˈ  nangra. Mafalah ko faˈinayan a safa ni Miliyamo i, matalaway a mirienang to saˈopo, sanay cingra: “Matalaway kako, caka fanaˈ to sasamaan ko sowal no tao. Kawra ˈalomanay salikaka patadoay takowanan a masomad, hanaca cowa pasowal to pakayniay i safa a tatiihay sowal. Tada ngaˈayay ira cangra kalacafay takowanan, soˈlin masomaday kako, kawra cowa ka matoˈol.” Roma fafahiyan salikaka sanay: “Ikor no mafalah ko wawa, ˈalomanay ciolahay a salikaka tayniay mihinom takowanan ato faˈinay ako. Sowal no roma tamdaw cowa ka fanaˈ to o maanan ko hasowal, kawra kalacafayay cangra takowanan a tomangic, mitilidayho to pakalalokay takowanan a sowal. Tada taˈangayay ko sapadama nangra takowanan!

16. O kasakopang samaan padadotoc midama to iraay ko mafalahay ko paro no lomaˈ a salikaka hani?

¹⁶ Ka padadotoc a midama to iraay ko mafalahay paro no lomaˈ a salikaka, mikikakaay ko pisaali nangra nohatini to kaciharateng ato pakalalok ita. (Hipray 10:24, 25) Latekay, miraayay ko kasakopang cangranan sanay ko hatiniay salikaka miharateng, hato malecaday o mafalahay cangra. Caay ka olah kita ira ko mahaenay harateng nangra! Mangalef koya mafalahay ko wama wina a kaemangay tamdaw, kakiriwiˈen ita pakalalok ato pakahemek cangranan. Tiya mafalah ko faˈinay ni Mariya i, miliyasayho to paro no lomaˈ, sanay cingra: “O roma widang tayniay i lomaˈ patado takowanan mitangtang, malacafayayho takowanan pasifanaˈ to wawa to Fangcalay Cudad. Palecaday cangra takowanan a masomad, kalacafay takowanan a tomangic. Ano ira ko miyakayakay to tatiihay sowal i, patadoay cangra takowanan a somowal, tada padamaay cangra takowanan miliyaw a talifak!”—Loma 12:13, 15.

17. O malohemay malitengay samaan mihinom to iraay ko miliyasay ci Yihofaan a paro no lomaˈ a salikaka hani?

¹⁷ O malohemay malitengay, wa mikiriwiˈ kamo a mihinom to iraay ko miliyasay ci Yihofaan a paro no lomaˈ a salikaka, misaka dademak to kahacecay a toki pakalalok cangranan. (1 Tisalonika 5:14) Ngaˈay kiso itini ˈayaw ato ikor no saˈopo talaˈayaw masasowal cangranan, ciharateng cangranan, ngaˈayho milisoˈ cangranan, patado cangranan mitolon. Ngaˈayho kiso kalacafay cangranan mitosil, anca tahidangen cangra mirienang to pakalomaˈay a pidoko iso. O lopayˈay a siri ni Yihofa tahalifa to taˈangayay a pidokaˈ, o pakaenay tamdaw no kasakopang wa misongilaˈ a midimokos cangranan, pafeli to siniˈadaay, olah ato kaciharateng i cangranan.—1 Tisalonika 2:7, 8.

18. Pakayni 2 Pitiro 3:9, makalimay ci Yihofa to miliyasay to soˈlinay kimad a tamdaw samaan ko demak hani?

¹⁸ Ci Yihofa ‘caay ci harateng malaˈafo ko cecay tamdaw, makalimay pasasiyor ko kahacecay tamdaw.’ (ˈOsien ko 2 Pitiro 3:9.) Soˈlin pakidem ko raraw no cecay tamdaw, pakaynien ci Yihofaan kamayan kalimlaan ko ˈorip ningra. Haratengen, sapilidongaw to ciraraway tamdaw hakowaay ko mihadakan ni Yihofa a sapiˈaca, oniya sapiˈaca o ˈorip no kaolahan Ningra a wawa. Matomesay to olah ci Yihofa, misaˈicelay padama to miliyasay Cingranan a tamdaw patikol i tatihi Ningra, makalimayho makahi cangra mihaen to demak, mikitini misowalan ni Yis malafelay wawa a sapatinako mahapinangay konini. (Luka 15:11-32) ˈAlomanay na miliyasay to soˈlinay kimad a tamdaw, ikor patikolay i tatihi no sidaˈitay a kakarayan Wama, o salikaka i kasakopang mihamhamay cangranan a minokay. Masowalay i fafekang ci Ilisapay mahemekay pakaˈaraw miliyaw a cadaen no kasakopang ko wawa, tikolen miharateng ko nalifetan i saˈayaw, sanay cingra: “Tada miakoˈiday kako to salikaka pakalalok tamiyanan aka pisawad to hatokel!”

19. Hano papadadotoc kita mitadiˈec ci Yihofaan hani?

¹⁹ Wa ngaˈay kita tahadaˈoc mitadiˈec ci Yihofaan, o sapafeli Ningra kitaanan a sakayat cowa ko papaira to saka dokaˈ no mita. O matomesay to damsayay ato makahiay padama to tamdaw a Wama i kakarayan Cingra, maolahay to polong maolahay Cingranan, midokoay Cingranan a tamdaw. Aka calemcem, itini pisemseman iso a tatokian cowa ko mamifalah ci Yihofa tisowanan. (Hipray 13:5, 6) Masowalay i fafekang ci Make sanay: “Cowa piliyas ci Yihofa kitaanan, itini tahalifa to pasangaray a tatokian ita, itiniay Cingra i tatihi ita a padama kitaanan.” Wa padadotoc ci Yihofa pafeli tisowanan to ‘kasapaan a ˈicel.’ (2 Korinto 4:7) Soˈlin miliyas ci Yihofaan ko kaolahan iso a tamdaw, oha ngangaˈay kiso mitafo to madimadiay, eca pisawad to hatokel!