1. Ngaˈay kita samaan pangangan ci Yihofaan?

ITINI taˈangayay paro no lomaˈ ni Yihofa iraay ko cima hani? Salakat i ci Yis, ‘itini masangaˈay a maamaan, o salakatay sangaˈen cingra.’ (Kolosay 1:15) Roma i, oniya taˈangayay paro no lomaˈ iraayho ko ˈalomanay coyoh. (ˈOlic 103:20) Itiniho i fafekang no sera ci Yis pasowalay to tamdaw, ngaˈayay cangra pangangan ci Yihofaan to Wama. Sanay ko sowal ni Yis to nisawawaan: ‘Wa minokay kako tayra ci Wamaan ako, o Wama namo.’ (Yohani 20:17) Patafang kita to tireng ci Yihofaan ato micada to paputisem ikor, micomodayto toniya ciolahay a taˈangayay lomaˈ.—Marko 10:29, 30.

2. Wa ngaˈay kita mikitini toniya lalakaw minanam to maanan?

² Kawra, pasangaray ko roma tamdaw palo sidaˈitay a Wama minengneng ci Yihofaan, o roma tamdaw mafokilay to sasamaan paihkal to olah i salikaka. Toniya lalakaw wa mananam ita, papadama ci Yis kitaanan mihapinang to o matomesay to olah a Wama ci Yihofa, o ngangaˈay ingiden ita. Roma i, wa mananamho ita sasamaan mitodong ci Yihofaan, paihkal to olah i salikaka.

3. O taˈarawan ni Yis a satolon hano padama kitanan hato miingiday ci Yihofaan saan ko harateng?

³ O kakarayan Wama ci Yihofa matomesay to olah, mitokelay ci Yis malecad kita cingranan, o madaˈmaˈay a Wama ci Yihofa han ko pinengneng, cowa ko misatakaraway a Kawas. Haratengen ita ko taˈarawan ni Yis a satolon. Itini satapang no satolon ningra sanay: ‘I kakarayan a Wama niyam.’ (Matay 6:9) Na ngangaˈay ci Yis pasifanaˈ kitanan pangangan ci Yihofaan to ‘Malefotay ko ˈIcel’ ‘Misangaˈay a Tapang’ ‘Midaˈocay a Hongti,’ o sapangangan to saaroˈan ni Yihofa i Fangcalay Cudad konini. (Satapangan 49:25; Isaya 40:28; 1 Timoti 1:17) Kawra cowa  pihaen ko demak ni Yis, pasifanaˈay cingra kitanan damsay a pangangan ci Yihofaan to “Wama.”

4. Hano mafanaˈ kita makalimay ci Yihofa miingid kita Cingranan?

⁴ Palo sidaˈitay a Wama ko pinengneng ci Yihofaan pasangaran nanay kiso han? Mahaenay ko piharateng no ˈalomanay. Caayho matinako ita ko olah no wama alatek, mansa pasangar miharateng to samanay ko maolahay midipot to paro no lomaˈ a wama. Masongilaˈay ko kacipinang ni Yihofa to nafalocoˈan ita, mafanaˈayho to hano mahaen ko harateng ita, tada mihinomay konini kitaanan! Mitokelay Cingra malakangaˈay kita Cingranan, mansa mihaen a pakalalok kitaanan i Fangcalay Cudad: ‘Ka piingid kamo to Kawas, wa ingiden no Kawas kamo.’ (Yakop 4:8) Tada maolahay ci Yihofa kitaanan, hanaca mikiˈokay kitaanan o sangaˈayay a Wama Cingra.

5. Mikitini Luka 10:22, ci Yis hano ngaˈay padama kitanan miingid ci Yihofaan?

⁵ Ngaˈayay ci Yis padama kitaanan miingid ci Yihofaan. Tangongolay ko kafanaˈ ningra ci Yihofaan, hanaca malefotay a mitodong to capeling no Wama, mansa saan ko sowal ningra: ‘Pakaˈaraw takowanan, o pakaˈaraway to Wama.’ (Yohani 14:9) Malecaday o kaka ita ci Yis, pasifanaˈ kitaanan mikangodo ato midofdof to Wama, eca pidemak to pasomaday to Wama a demak, pasifanaˈayho cingra kitaanan samaan ko demak ngaˈ milifok to pihayda no Wama. O nalifetan ni Yis i fafekang no sera padamaay kitaanan mihapinang, o sidaˈitay damsayay a Wama ci Yihofa. (ˈOsien ko Luka 10:22.) Nengnengen ita ko pina tinakoan.

6. Tinakoen a mitadtad soˈlinay tengilen ni Yihofa ko satolon ni Yis.

⁶ Tada makahiay ci Yihofa mitengil to sowal no wawa Ningra. Haratengen samanay Cingra micada to sakacecay wawa ci Yisan, itini fafekang no sera ci Yis miceriday mitolon, misongilaˈan ni Yihofa mitengil. (Luka 5:16) ˈAyaw no misaˈosi ci Yis to kalimlaan a satolon matengilay Ningra, tinakoen itiya mamipiliˈ to 12 a tarokos. (Luka 6:12, 13) Itini pasangaray a pakayraan a satolon ni Yis matengilay ni Yihofa.  Tinakoan, ˈayaw no pacakayen ni Yuta ci Yis micangacangay to kakarayan Wama padama cingranan miremo to mamasiˈayaw pakidemay a sapalifet, itiya soˈlinay tengilen ni Yihofa ko satolon ni Yis, miocoray to cecay coyoh mitongal to ˈicel ningra.—Luka 22:41-44.

7. Mafanaˈ to makahiay ci Yihofa mitengil to satolon ita, samanay ko harateng iso hani?

⁷ Anini makahiay ci Yihofa mitengil to satolon ita, hanaca itini matatodongay a tatokian tano matatodongay a pakayraan pacaˈof kitaanan. (ˈOlic 116:1, 2) Itiniay i Intiya fafahiyan salikaka tahatinakoay tonini, iraay ko pakidemay nofalocoˈan a pasangaray ningra, pakayni tonini padadotocay cingra micangacang to sapadama ni Yihofa. Sanay cingra: “O kamok no JW Tilifi i 2019 miheca 5 folad milengoay to sasamaan miremo to macariraway a pasangaray, matatodongay o misaalian ako konini, soˈlinay a pacaˈof ci Yihofa to satolon ako!”

8. Samanay ci Yihofa maolah ato midimokos ci Yisan hani?

⁸ Tada maolahay ci Yihofa kitaanan, malecad o kaolah ato pidimokos Ningra ci Yisan. (Yohani 5:20) Itiniho i fafekang no sera ci Yis i, midimokosan ni Yihofa ko saali ningra, mahawpay ko padama cingranan mitafo to tanektekay pakasoˈlin no falocoˈ, itini kasomadan ningra pakalalok cingranan, ato pafeli to kihcod sakaˈorip. Pasowalanho ni Yihofa ci Yis maolahay cingranan, mihaydaay cingranan. (Matay 3:16, 17) Mafanaˈay ci Yis o tangongolay ko olah a kakarayan Wama itiniay i tatihi padama cingranan, mansa caay ka matoˈol.—Yohani 8:16.

9. Mikitini kita i maanan pakayraan matinakoay ko olah ni Yihofa?

⁹ Malecaday kita ci Yisan itini adihayay pakayraan mitinako to olah ni Yihofa. Haratengen, soloten ni Yihofa kita tayra i tatihi Ningra, pafeli kitaanan to dihkoay a taˈangayay paro no lomaˈ no Krisciyang, tada rahekeray ko harateng ita, hanaca itini katoledan a tatokian milifokay to sapakalalok no salikaka. (Yohani 6:44) Cowa kaketon ko sapafeli ni Yihofa i noˈadingoan a ‘kakaenen’ ita, hanaca midimokosay to sakaˈorip ita to romiˈamiˈad. (Matay 6:31, 32) Songilaˈen ita miharateng ko olah ni Yihofa kitaanan, wa matongal ko olah Cingranan.

10. O papasayra kita ci Yihofaan a minanam to maanan?

¹⁰ Tada maolahay ci Yihofa to salikaka ita, kawra pasangaray kita paihkal to olah i cangranan saan ko harateng alatek. Samanen, mikitiniay i cowa kalecad a serangawan ato lalengawan kita, mararaway maemin, pakesemay anca pakatoleday to tao. Kawra, wa ngaˈay kita misarocod patongal to olah i taˈangayay a lomaˈ no Krisciyang ita, o pakayraan i minanam to pakayraan ni Yihofa a maolah to salikaka ita. (Ifiso 5:1, 2; 1 Yohani 4:19) Nengnengen ita ko taˈarawan ni Yihofa.

11. Samanay ci Yis paihkal to ‘damsayay’ ni Yihofa hani?

¹¹ Ci Yihofa o ‘matomesay to damsayay’ a Kawas. (Luka 1:78) O matomesay to damsayay a tamdaw iraay ko siniˈadaay a falocoˈ, maˈaraw ko tao misemsem masomaday, hanaca mihalakaay a padama ato mihinom to tao. O pakayraan ni Yis micada to tamdaw paihkalay to damsayay ni Yihofa. (Yohani 5:19) Kinacecayay, maˈaraw ni Yis ko taˈangayay ˈopo tamdaw, ‘siniˈadaay cangranan, samanen maroeroay no tamdaw cangra, awaay ko pitiˈeran, malecad o awaay ko pakaenay a lopayˈay siri.’ (Matay 9:36) Cowa ko kasiniˈada aca ni Yis to tao, soˈlinay a midemak padama cangranan. Miadahan ningra ko adadaay tamdaw, hanaca padama to ‘marorayay, karetengay ko ˈinorong a tamdaw’ sinoway ko harateng.—Matay 11:28-30; 14:14.

12. Tinakoen mitadtad sasamaan paihkal to siniˈadaay falocoˈ i salikaka.

¹² Haratengen ita misiˈayaway ko salikaka to manan a pasangaray, wa madolo to paihkal to siniˈadaay a falocoˈ i cangranan. Ano  pakidemay ko adada no cecay fafahiyan salikaka, soˈlin caka pasowal cingra to pasangaray ko niyah, kawra ano ira ko soˈlinay padama cingranan a tamdaw, o mamahemek cingra. Itini pidimokos to paro no lomaˈ pasangaray cingra han? Ngaˈay kita padama cingranan mitangtang, anca padama cingranan miasik to lomaˈ han? Ano malahdaway ko tayal no salikaka, itini ˈayaw no mahela ko faelohay tayal ningra, ngaˈay kita pafeli to miming a payci padama cingranan milakowit to pasangaray han? Wa ngaˈay kita caka pasowal cingranan to o kita ko pafeliay to payci.

13-14. Wa ngaˈay kita samaan mitodong ci Yihofaan makahi a padama to tamdaw?

¹³ Tada makahiay ci Yihofa padama to tamdaw. (Matay 5:45) O mamalecad kita Cingranan talaˈayaw a padama to salikaka, aka mitala to pisaali no tao ngaˈ mihadak to sadama. Haratengen, to romiˈamiˈad pasadakan ni Yihofa ko cidal, caka picangacang kita Cingranan, mihaenay ko demak Ningra. O dihkoay a tedi no cidal cowa ko patedi aca i tireng no miakoˈiday ci Yihofaan a tamdaw, midamaayho to ˈorip no polong tamdaw. Mirenecay ci Yihofa to saali ita, tano mahaenay a pakayraan paihkal to olah kitaanan. Mihaen a sidaˈit Cingra, hinapaladaˈ, tada maolahay kita Cingranan!

¹⁴ ˈAlomanay salikaka mitodongay to kakarayan Wama, talaˈayaway a padama to tao. Tinakoen, itini 2013 miheca o Hayin a taˈangayay faliyos mifekaday i Filiping, awaayto ko pikilomaˈan no ˈalomanay salikaka. Kawra, o salikaka icowacowa kalikiay mihadak to sadama. ˈAlomanay tamdaw pakiyahoay padama to tahapadesay a tayal anca mirienang to patirengay tayal, telocto lalomaˈ no cecay miheca mapatirengay ko 750 a lomaˈ. Roma i, 2019 miheca a kalifongan a tatokian, madadipotay madadamaay ko salikaka. Talaˈayaw kita padama to salikaka, paihkalay to tada maolahay kita cangranan.

15-16. Mikitini Luka 6:36, ano mitodong kita to kakarayan Wama o sasamaan ko pidemak?

¹⁵ Ci Yihofa matomesay to siniˈadaay harateng, makahiay misodod kitaanan. (ˈOsien ko Luka 6:36.) Mararaway kita to romiˈamiˈad, kawra makahiay ci Yihofa misodod kitaanan. (ˈOlic 103:10-14) Malecaday ci Yis, soˈlin cowa ko malefotay ko nisawawaan, kawra siniˈadaay  cingra cangranan, misodod cangranan. Makahiayho kinafalah to ˈorip no niyah, ho ngaˈay masodod ko raraw ita. (1 Yohani 2:1, 2) Kakahaday ko falocoˈ ni Yihofa aci Yis, sidaˈitay micada to tamdaw, coko makalimay kita sapiingidaw cangranan han?

¹⁶ “Mikifalocoˈ misodod” kita to salikaka, o papadihko to taˈangayay lomaˈ no Krisciyang ita. (Ifiso 4:32) Manaokaniw, misodod to tao pasangaray nolatekay, mansa mamihadak kita to adihayay a ˈicel. Miharateng ko cecay fafahiyan salikaka to “mikifalocoˈ masasodod” a cacekiwen lalakaw * taˈangayay ko sapadama cingranan, sanay cingra: “Micekiw toniya lalakaw padamaay takowanan mifalic to harateng, mahapinangay ako misodod to tao iraay ko sakangaˈay no niyah. Mitadtaday ko lalakaw, misodod to tao cowa ko mihaiay to waywayan no tao, anca talimaan saan to pidokaˈ no tao. Tatodong no misodod i, ecato kaketer to tao, parihaday to falocoˈ no niyah.” Mikifalocoˈ kita misodod to salikaka, malecaday o kakarayan Wama ci Yihofaan a maolah cangranan.

17. Mikitini Matay 5:16, samaan ko demak ita ngaˈay paˈodingar to kakarayan Wama hani?

¹⁷ Ngaˈay masalalomaˈ no ciolahay a paro no lomaˈ i paro no kakarayan, tada kalikoanto! Mitokelay kita ira ko ˈalomanay tamdaw micomod toniya taˈangayay a paro no lomaˈ, malacafay kitanan midoko ci Yihofaan. Mihaenay, caay kakahi kita midemak to mipalakay to ngangan no Kawas a demak, caay kakahi ira ko tatiihay a pinengneng no tao to finawlan no Kawas. Misaˈicel kita mitafo to ngaˈayay a waywayan, misolot to tao mafanaˈ ato midoko ci Yihofaan.—ˈOsien ko Matay 5:16.

18. Ano milengo kita i tao to pihakelongan no niyah i, hano cowa ko mamatalaw hani?

¹⁸ Latekay, pakayni pidofdof ita to kakarayan Wama tahalifaay to pilikaf ato sapalak. Ano matalaw ko harateng ita, caka timolo milengo to pihakelongan no niyah i tao, sasamaanto hani? Ngaˈayay pakasoˈlin kita, ci Yihofa ato wawa Ningra o papadama kitaanan. Mikiˈokan ni Yis ko nisawawaan, aka calemcem cangra to o maanan ko hasowal ato sasamaan somowal,  misamanay hani? Mitadtaday ci Yis: ‘Maraod ko toki, o mamafanaˈ kamo o maanan ko hasowal, samanen o somowalay cowa ko kamo, o fangcalay saocor no Wama namo pakayniay tamowanan a somowal.’—Matay 10:19, 20.

19. O roma salikaka timoloay a misawacay, sowalen ko nalifetan nangra.

¹⁹ Nengnengen ko nalifetan no itiniay Nanfi ci Ropote. Tiya misatapang cingra minanam to Fangcalay Cudad i, itini hoing no sofitay wa mitadtad to hano eca ka lasofitay ko niyah. Soˈlin cowaho ka adihay ko kafanaˈan to Fangcalay Cudad, kawra timoloay cingra pasowal to maolahay ko niyah to salikaka, mansa mamitafo to misatenokay. Tada misalimlaay cingra to taˈangayay paro no lomaˈ no Krisciyang! Fahal sanay milicay ko cecay hankang cingranan: “O cima ko salikaka iso?” Cowa ka harateng ni Ropote to mamihaen milicay ko hankang, kawra tangsolay maharateng ningra ko pakaromiˈaday a sinael, itiniay i Matay 12:50: ‘O cima ko midofdofay to araaw no kakarayan Wama midemak, o salikaka ako, o wina ako cingra.’ Milicayayho ko hankang ci Ropotean to roma cowa ka harateng ningra a salicay, soˈlin cowa ka hakowa ko sifanaˈ ni Ropote to Fangcalay Cudad, kawra mitadiˈecan ningra ko sadama no fangcalay saocor, ngaˈayay ko pipacaˈof, maedeng malikoay ci Yihofa ci Ropotean. Ano tadiˈecen ita ci Yihofa, itini pasangaray a pakayraan timolo a misawacay, o papakayni kitaanan a maliko ci Yihofa.

20. Wa misetek kita to falocoˈ samaan ko pidemak? (Yohani 17:11, 15)

²⁰ Masalalomaˈay no makelecay ciolahay a taˈangayay paro no lomaˈ no Krisciyang kita, o mamisalimla toniya sapalemed. Iraay ko sangaˈayay a Wama ita, iraay ko ˈalomanay maolahay kitanan a salikaka, cowa ka samaan konini aka saan ko pinengneng. Ci Satan ato tatiihay coyoh ningra pairaay to cisasaay harateng ita to olah no kakarayan a Wama, sapipalakaw to kakelec no paro no lomaˈ no Krisciyang. Kawra, patadoay ci Yis kitaanan a mitolon, micangacang to kakarayan Wama midimokos kitanan, padama kitanan padadotoc a makelec. (ˈOsien ko Yohani 17:11, 15.) Soˈlinay pacaˈof ci Yihofa toniya satolon. Palecaden ita ci Yis caay ka cisasa to olah no kakarayan Wama kitanan, hanaca pakasoˈlin to papadama Cingra kitaanan, wa misetek to falocoˈ mitongal to piingid to salikaka!