1-2. Pairasolay ci Hakay itini litad no mita wa mifekad ko masamaanay a pingernger hani?

“LALOMAˈ no pina ehon, matelepayto ko pisasingdian a lomaˈ ato matelangay lomaˈ.” “Sasifod sanay ko tamdaw . . . sowal no ˈalomanay maedeng tosaay ehon ko ˈatoray, kawra halafinan nanay ko piharateng ako.” O nafalocoˈan no cowa ka patay a tamdaw i taˈangayay ˈatoray i 2015 miheca Nipoe konini. Ano o kiso ko tahalifaay toniya pades, maedeng cowa ko mamapawan iso konini.

² Soˈlinayto, tahalifaay kita to cecay kangernger, oniya kangernger cowa ko cecayay aca niyaroˈ anca cecay kitakit ko mafiyoray, ao mafiyoray ko polong a kitakit, hanaca padotocay to pina poloˈ miheca. Ona mipairasolan ni Hakay a demak konini, sanay cingra: ‘O ˈaˈideman no sofitay i kakarayan ci Yihofa sanay: “Cato ka halafin, wa liyawen ako mingernger ko kakarayan ato sera, o riyar ato hadhad.’”—Hakay 2:6.

3. Paliˈayawan ni Hakay a pingernger ato ˈatoray iraay ko manan a kasasiroma hani?

³ Pairaay to sakapalak ko ˈatoray, kawra o paliˈayawan ni Hakay a kangernger pairaay to ngaˈayay minaroˈan. Pasowalay ci Yihofa kitaanan tonini, sanay Cingra: ‘Wa ngerngeren Ako ko kasakitakit, o papataynien i fangcalay sefi ko odoˈ no kasakitakit, wa patomesen Ako to ˈdil itini.’ (Hakay 2:7) Oniya sapairasol pakayni lintaday ni Hakay a tamdaw iraay ko maanan a tatodong? Pakayni kitaanan anini iraay ko maanan a tatodong? Papacaˈof koniya lalakaw toniya salicay. Wa mananamho ita, wa ngaˈay kita samaan mirienang toniya mingerngeray to kasakitakit a tayal.

4. Misamanay hano ocoren ni Yihofa ci Hakay pakalalok to Yutaya tamdaw hani?

⁴ Pafelian ni Yihofa ci Hakay to cecay kalimlaan a ˈinorong, nengnengen ita ko pakayraan itiya. ˈAyaw no Kongyen 537 miheca, o Yutaya tamdaw mikitini Papilon minokay tayra i Yirusalim, masalalomaˈay ci Hakay alatek. Tahira cangra caka halafin oniya madimadiay midoko ci Yihofaan a tamdaw, patirengay to taˈeneran no fangcalay sefi. (Icra 3:8, 10) Ka adayayan i, ikor pakayni pisafelit no ˈada matoleday cangra, hawad sanay to patireng to fangcalay sefi a tayal. (Icra 4:4; Hakay 1:1, 2) Orato itini ˈayaw no Kongyen 520 miheca, miocoran ni Yihofa ci Hakay pakalalok to Yutaya tamdaw a talifak, milaheci to patirengay to fangcalay sefi a tayal. *—Icra 6:14, 15.

5. Misamanay o milasilan ni Hakay a lihaf maedeng taˈangayay ko pakalalok to Yutaya tamdaw hani?

⁵ O milasilan ni Hakay a lihaf paˈicelay to pakasoˈlinay falocoˈ no Yutaya tamdaw ci Yihofaan. Timoloay cingra milasil to sowal ni Yihofa i matoleday a Yutaya tamdaw, sanay cingra: ‘Itiniay a finawlan, katanektek, kalalok a matayal.’ O sowal ni Yihofa konini. Kakeridan no sofitay i kakarayan ci Yihofa sanay milasil: ‘Ira Kako a mikapot i tamowanan.’ (Hakay 2:4) “Kakeridan no sofitay i kakarayan ci Yihofa” oniya ngangan mitadtaday, iraay ko cecay taˈangayay a ˈopo a coyoh ni Yihofa, maedeng tataˈangay ko pakalalok to Yutaya tamdaw. Sakalaˈosiyaw cangra, mamitiˈer ci Yihofaan ngangaˈay.

6. Paliˈayawan ni Hakay a pingernger wa paira to masamanay minaroˈan hani?

⁶ Ocoren ni Yihofa ci Hakay pasowal to Yutaya tamdaw wa ngerngeren Ningra ko kasakitakit, sakoniya sowal, wa ngerngeren Ningra koya mikowanay to adihayay kitakit a Pirsiya, pakaynien i matoleday ko falocoˈ sawad sanay patireng to fangcalay sefi a tamdaw tada taˈangayay ko pakalalok. Oniya pingernger wa paira to masamanay minaroˈan hani? Salakat, o mamiliyaw a patireng to fangcalay sefi ko finawlan no Kawas. Dotoc, o roma ˈalafang tamdaw o tatayni toniya fangcalay sefi malacafay cangranan midoko ci Yihofaan. Pakaynien i finawlan no Kawas, tada o pakalalokay to tamdaw a lihaf konini!—Cikariya 8:9.

7. Anini iraay ko tatodong ita mirienang to maanan mingerngeray to kasakitakit a tayal? Tadtaden.

⁷ O sapairasol ni Hakay pakayni kitanan iraay ko manan tatodong hani? Anini mingerngeray ci Yihofa to kasakitakit, iraay ko tatodong ita mirienang toniya demak. Haratengen hena: 1914 miheca minilnilan ni Yihofa ci Yis malo Hongti no kakarayan a Hongti Kitakit. (ˈOlic 2:6) Pakaynien i ˈaˈideman no hekal o tatiihay a lihaf konini, samanen tatodong nonini ‘mahererekayto ko misaˈosian a toki no kasakitakit,’ sakoniya sowal, awaay ko mitaypiyaway to pikowan ni Yihofa a tatokian mahererekayto. (Luka 21:24) Mihaenay, mikiriwiˈay mikitini 1919 miheca, padotocay ko finawlan no Kawas pasowal to polong a tamdaw edengan ko Hongti Kitakit no Kawas ko hatokel no tamdaw, milasil toniya ‘ngaˈayay lihaf no Hongti Kitakit’ a tayal mingerngeray to polong no hekal.—Matay 24:14.

8. Malecad o sowal i ˈOlic 2:1-3, ˈalomanay tamdaw samanay ko harateng to lihaf no Hongti Kitakit?

⁸ Samanay ko harateng no tamdaw toniya lihaf hani? Cowa kaolah ko ˈalomanay tamdaw. (ˈOsien ko ˈOlic 2:1-3.) Malecad o misowalan no Fangcalay Cudad, macariraway ko tamdaw  no kasakitakit, minaˈayay to minilnilan ni Yihofa a mikowanay. O milasilan ita a lihaf no Hongti Kitakit cowa ko ngaˈayay lihaf sanay, o roma sifo mikecengay to mitosilay a tayal ita. Adihayay mikowanay no kitakit soˈlin pasowal to midokoay to Kawas, kawra caay kakahi misawad to fadangalan no niyah. Malecaday cangra to saka 1 hahekalan a mikowanay misafelitay to minilnilan ni Yihofa a ˈaˈideman, miˈodisay to madimadiay a finawlan no Kawas.—Dmak 4:25-28.

9. Caka kahi ko tamdaw no kasakitakit micada to ngaˈayay lihaf, pakayni tonini samanay ko harateng ni Yihofa hani?

⁹ ˈAlomanay tamdaw no kasakitakit cowa kakahi micada to ngaˈayay lihaf, pakayni tonini samanay ko harateng ni Yihofa hani? Itini ˈOlic 2:10-12 sanay: ‘Hongtiaw, ka cipinang kamo to pakayraan nohatini, misawkitay a tapang i fafekang no sera, ka picada kamo to sasalof. Tano mangodoay a falocoˈ mitaˈong ci Yihofaan, ka lipahak, ka ciˈangiho. Ka pasayra i wawa no Kawas a mitaˈong, hoeca ka mangolaw Cingra, talifahal sa kamo a malaˈafo, samanen o mamatiya o namal ko keter Ningra. O pasayraay Cingranan a milongoc to pidipot i, tada malemeday!’ Tada sidaˈitay ci Yihofa, pairaay to toki no tamdaw a mifalic to harateng, micada to Hongti Kitakit Ningra. Kawra cowato ka hakowa ko toki, itiniay kita i ‘salikoray romiˈad’ noniya hekal maˈorip nohatini. (2 Timoti 3:1; Isaya 61:2) O kacalohanto a tatokian nohatini, macalohay ko sakafanaˈaw no tamdaw to demak, ho inaneng ko mipiliˈan.

10. Mitadtaday ko Hakay 2: 7-9, o mingerngeray to kasakitakit a demak pairaay to maanan ngaˈayay a minaroˈan?

¹⁰ O paliˈayawan ni Hakay a pingernger pakayni roma tamdaw iraay ko ngaˈayay a pilingat. Sanay cingra, pakayni toniya pingernger, ‘o odoˈ no kasakitakit “moecelay ko falocoˈ a tamdaw” tatayra i fangcalay sefi’ midoko ci Yihofaan. * (ˈOsien ko Hakay 2:7-9.) Pakayni ‘salikoray a lintad,’ na paliˈayaway ci  Isaya aci Mika to mamifekad ko mahaenay a demak.—Isaya 2:2-4; Mika 4:1, 2.

11. O cecay salikaka matengil ko ngaˈayay lihaf no Hongti Kitakit i, samanay ko pilingat hani?

¹¹ Nengnengen koniya mingerngeray to kasakitakit a ngaˈayay lihaf pakayni i cecay salikaka samanay ko pilingat. Oniya salikaka ci Kenen, anini itiniay i Congpo a matayal. Ihkalay maharateng ningra, ˈayaw no 40 miheca sakinacecay matengil ko ngaˈayay lihaf no Hongti Kitakit samanay ko harateng, sanay cingra: “Sakinacecay matengil ako ko soˈlinay kimad no Fangcalay Cudad i, tada miakoˈiday kako to Kawas pasifanaˈ takowanan oniya hekal cowato ka hakowa ko romiˈad. Mahapinangay ako sapilifokaw to pihayda no Kawas ato midaˈocay a ˈorip, mamiliyas kako toniya mamalaˈafo a hekal, mansa tanektek midopo ci Yihofaan. Ikor no mitolon kako i, tangsolay a midemak, cowato pidama kako toniya hekal, micomod to caay ka ngiyangi a Hongti Kitakit no Kawas, milifok to soˈlinay a sadipot.”

12. Itini salikoray romiˈad, o manan ko mitomesay to ˈdil i ‘fangcalay sefiˈ ni Yihofa hani?

¹² Mahapinangay ita padadotocay ci Yihofa palemed to finawlan Ningra. Itini salikoray romiˈad, macakatay ko ˈaloman no finawlan Ningra. Mikitini 1914 miheca pinaay aca patek tamdaw, mataˈlifayto ko 800 emang nohatini. To mihecahecaan iraay ko pina soˈot emang a tamdaw kalacafayay kitaanan mirienang to piharatengan to kinafalah ni Yis a saˈopo. Mihaenay, itiniay fafekang no sera a ‘fangcalay sefi’ ni Yihofa matomesayto ko ‘odoˈ no kasakitakit.’ Oniya ‘fangcalay sefi’ o limasmas ni Yihofa pakayni matatodongay pidoko. Roma i, oniya sano odoˈay a tamdaw misaˈicelay micaˈedong to faelohay capeling, o kafalic nangra paˈdilay to fangcalay ngangan ni Yihofa.—Ifiso 4:22-24.

13. O katongal no finawlan ni Yihofa matatodongay to manan sapairasol hani? (Nengnengen papotalay a coka.)

¹³ Oniya kahemekan a kacowat matatodongay to roma sapairasol, tinakoen sapairasol no Isaya 60 fedengan. 22 sinael sanay: ‘Sasafaay finacadan wa matongal to comaˈol tingloh, o malonayay a kitakit mamalo ciˈicelay. Maraod ko toki, o kakalekien ni Yihofa palaˈosi koniya demak.’ Matongalay ko ˈaloman no midokoay ci Yihofaan a tamdaw, pairaay  to cecay kangaˈayan. Oniya ‘odoˈ’ adihayay ko inaneng, makahiayho mirienang to milasilay to ngaˈayay lihaf no Hongti Kitakit a tayal. O inaneng nangra malecaday o misowalan ni Isaya ‘o hacol no kasakitakit,’ tada ciepocay to likakawa no Kawas. (Isaya 60:5, 16) Itini sadama nangra, o ngaˈayay lihaf mapatenakayto i 240 kasakitakit ato kasakilac, o mitepangan a cudad o sasowalen mataˈlifayto ko 1,000 masasiroma.

14. Wa misaˈosito nohatini ko tamdaw to maanan hani?

¹⁴ Itini salikoray a ˈawaled, mingerngeray to kasakitakit a tayal pacieciay to tamdaw misaˈosi: Wa midama to Hongti Kitakit no Kawas? Anca mitadiˈec to sifo no hekal? O sasiˈayawen no kahacecay tamdaw a papiliˈen konini. Soˈlin midofdofay ko finawlan ni Yihofa to rikec no sifo, kawra itini mirikecay a demak masongilaˈay ko pitafo nangra to misatenokay. (Loma 13:1-7) Mafanaˈay cangra, edengan ko Hongti Kitakit no Kawas ko ngangaˈay misaysay to kihcod a pasangaray no tamdaw, oniya Hongti Kitakit o cowa ko nonini a hekal.—Yohani 18:36, 37.

15. Mitadtaday ko Paˈarawan o madimadi ita wa micada to maanan pakidemay sapalifet?

¹⁵ Mitadtaday ko Paˈarawan, itini salikoray romiˈad wa padadotoc ko finawlan no Kawas micada to pisafelit ato sapalak, o madimadi nangra wa tahacada to sapalifet. O sifo no hekal wa misaali kitaanan midoko cangranan, wa mipalakho to manaˈayay midama to sifo a tamdaw. (Paˈarawan 13:12, 15) Sowal no Fangcalay Cudad, cangra wa ‘pacieci to polong a tamdaw itini kawanan no kamay ato katotong no fongoh mitilid to tahapinangan, ano manikaway cihafayay, pasalatay anca o koli a tamdaw wa mihaen maemin to demak.’ (Paˈarawan 13:16) Nolitengan a koli iraay ko tahapinangan i tireng, paihkal to ono nima ko niyah. Malecaday, o tamdaw no hekal anini mitokelay tano waywayan ato harateng paihkal to midamaay ko niyah to sifo, malecad o iraay ko tahapinangan i kamay ato katotong no fongoh.

16. Hano aniniho misetekto to falocoˈ tahatolas a madimadi ci Yihofaan hani?

¹⁶ Wa micada kita toniya ‘tahapinangan,’ midama to sifo no hekal hokira? O minaˈayay micada to tahapinangan a tamdaw wa tahalifa to roray ato katalawan, sanay ko sinael no Paˈarawan: ‘O cima awaay ko tahapinangan, cowa ko ngangaˈay micakay ato pacakay.’ (Paˈarawan 13:17) Mafanaˈay ko finawlan no Kawas, sasamaan ko picada no Kawas toya micadaay toniya tahapinangan a tamdaw. (Paˈarawan 14:9, 10) Mihaenay, tanektekay cangra eca kakahi micada toniya tahapinangan, itini kamay nangra malecaday o matiliday ko ‘oni Yihofa kako.’ (Isaya 44:5) Nohatiniho misetek to falocoˈ, tahatolas a madimadi ci Yihofaan. Mihaen, o mamahemek ci Yihofa, pangangan to ono Ningra a tamdaw kita.

17. Soˈlin iraay ko mihadidiay ni Yihofa, kawra o haharatengen ita ko maanan?

¹⁷ Itini salikoray romiˈad, paihkalay ci Yihofa to taˈangayay a pihadidi, caay kaolah Cingra malaˈafo ko cecacecay tamdaw. (2 Pitiro 3:9) Soˈlin pairaan ni Yihofa ko toki no kahacecay tamdaw a pasasiyor, mipiliˈ a midoko Cingranan, kawra citolasay ko pihadidi Ningra. Oya manaˈayay midopo to Hongti Kitakit no Kawas a tamdaw, wa malecad o teloc noya lintaday ni Mosi a Falawan. Pasowalan ni Yihofa ci Falaw: “Ano nilahcian Ako a mipalifong kiso ato finawlan iso i, kona o matekopayto kamo itiya aca. Nikawrira, o sapahapinangaw Ako to ˈicel Ako saka, paˈoripenho Ako kiso. Onini i, o sakalosiyangaw no ngangan Ako i polong no  hekal.” (Kasadakan 9:15, 16) Salikor o mamihai ko kasakitakit, edengan ci Yihofa ko soˈlinay a Kawas. (Icikil 38:23) Sasamaan ko pifekad noniya demak hani?

18. (1) O misowalan no Hakay 2:6, 20-22 o roma a pingernger o maanan ko mitoroˈan? (2) Hano mafanaˈ kita oniya sapairasol ikorto ngaˈ matatodong hani?

¹⁸ Ikor no mapatay ci Hakay pina soˈot miheca i, tarokos ci Pawlo itini Hipray misaka dademakay to Hakay 2:6, 20-22 (ˈOsien.) Paihkalay ko sowal ni Pawlo oniya sapairasol ikorto ngaˈ matatodong. Sanay cingra: “Mikiˈokay Cingra: ‘Wa miliyaw, cowa ko pingernger aca Ako to sera, wa mingerngerho to kakarayan.’ Sowal Ningra ‘wa miliyaw,’ paihkalay o mamalahdaw ko mingerngeran, sakoniya sowal, o mamalaˈafo ko masangaˈay, o mamaterek ko cowa ka ngernger.” (Hipray 12:26, 27) Cowa kalecad to misowalan no Hakay 2:7 a mingerngeran, itini toniya pingernger, o polong malecaday ci Falawan manaˈayay mihai to sapikowan a fadangalan ni Yihofa a tamdaw o tatahadaˈoc mamalaˈafo a maemin.

19. O maanan ko cowa ko mamangernger? Hano mafanaˈ kita tonini hani?

¹⁹ O maanan ko cowa ko mamangernger, cowa ko mamalaˈafo hani? Sanay ci Pawlo mitadtad: ‘Ano mamalifok ita ko cowa ko mamangernger a Hongti Kitakit, ka padotoc micada to mikiriwiˈay a sidaˈit. Mihaen, ngaˈayto kita ira ko mikifalocoˈay a mikangodoay a falocoˈ midoko to Kawas, milifok to pihayda Ningra.’ (Hipray 12:28) Hatiraayto, malaˈosito ko demak i, edengan o Hongti Kitakit no Kawas ko tatahadaˈoc a materek.—ˈOlic 110:5, 6; Taniil 2:44.

20. O polong a tamdaw oha mamisaˈosi to manan? Wa ngaˈay kita samaan a padama cangranan?

²⁰ Cowato ka hakowa ko toki! O kahacecay tamdaw o mamipiliˈ: Wa padotoc mitoor to pakayraan noniya hekal a maˈorip, saikor malaˈafo han? Anca mitoor to araaw no Kawas maˈorip, saikor milifok to midaˈocay a ˈorip han? (Hipray 12:25) Misaˈicel kita mitosil, wa ngaˈay padama to tao mipiliˈ toniya kalimlaan a sasaˈosien. Nanay ngaˈay kita padama to ˈalomanay malecaday o odoˈ a tamdaw midopo to Hongti Kitakit no Kawas. Nanay haratengen ita ko sowal no Tapang ci Yis: ‘Oniya ngaˈayay lihaf no Hongti Kitakit wa patenaken i palo no kakarayan, matengil no polong kasafinawlan, maraod ko toki irato ko salikoray romiˈad.’—Matay 24:14.