Satapangan no saka 20 hahekalan 40 miheca, o wama wina ako malacafayay to Misawacayay Tamdaw ni Yihofa minanam to Fangcalay Cudad, kawra ikor paselaˈay. Kawra, padotocay macada no wina ako ko Mikecolay ato Katalipaˈelal! a casi. 1950 miheca iraay ko koksay taykay i Niwyok, paro no lomaˈ niyam micadaay to satahidang mirienang tonini a taykay.

Ikor caka halafin, salikaka ci Lawlons Cifoli misatapangay milisoˈ tamiyanan, makalimay cingra padama takowanan minanam to soˈlinay kimad. Satapang aca cowa pihayda kako to saaroˈan no Misawacayay Tamdaw ni Yihofa, samanen cowa pirienang cangra to mirikecay ato malasofitay. Pasowalan ako cingra, o polong a Padaka tamdaw ano manaˈay mirienang to lalood, o mamadolo maˈafas no ˈada ko kitakit ita. Mihadidiay ko salikaka ci Cifoli masasowal takowanan: ‘Haratengen hena, o polong a Padaka tamdaw ano midokoay ci Yihofaan, ano ira ko ˈada miˈodis i, harateng iso sasamaan ko demak ni Yihofa hani?’ Mihaen ko sowal ningra padamaay takowanan mihapinang to cowa ka tatodong ko harateng ako, matatodongay ko pitadtad to roma demak, padamaay konini takowanan misatapang maolah to Fangcalay Cudad.

O wina mitelian ko matelangay Mikecolay ato Katalipaˈelal! i tingloh no lomaˈ, adihayay ko mipalakan ako a toki miasip toniya casi. Mahapinangay ako o soˈlinay a kimad ko mananamay no niyah, orato mihaiay to salikaka ci Cifolian minanam to Fangcalay Cudad, hanaca misatapang micerid mirienang to saˈopo. Mitemeray to falocoˈ ako ko soˈlinay kimad, mihaenay malo cowaho picada to paputisem a mitosilay kako, misatapang milasil to ngaˈayay lihaf. Mahapinangay ako ‘mangataayto ko taˈangayay romiˈad ni Yihofa,’ hato mifalican ko patosokan no niyah. (Cifaniya 1:14) Cowato pisamacay ko falocoˈ ako micudad to taykak, ao makalimay padama to tao minanam to soˈlinay kimad no Fangcalay Cudad.

1956 miheca 6 folad 13 romiˈad, micudiyapay kako i kawcong, ikor no tolo romiˈad itiniay kako i kasakilac  taykay micada to paputisem. Itiya cowa ka fanaˈ kako, mipiliˈ kako patafang to hakelong no ˈorip, misaˈicel minanam ato pasifanaˈ to pakayniay ci Yihofaan a demak, pairaay to kadofahay a sapalemed.

Micada kako to paputisem ikor no 6 folad misatapangayto malo miceriday misakafah. Pakafoladay a Salasil 1956 miheca 12 folad (no Padaka) iraay ko cecay lalakaw, lalangian i ‘Wa Ngaˈay Kiso Itini Taˈangayay ko Saali a Kilac Matayal Han?’ Mitemeray konini a lalakaw takowanan, pairaay to kalim ako tayra i cowa ka ˈaloman ko mitosilay a kilac matayal.—Matay 24:14.

Malinahay kako tayra i Nankalolaynaco Aycifiete, itiraay a kasakopang 4 ko mitosilay, halo kako limaay. Itiniay kami i lomaˈ no cecay salikaka misikay to saˈopo. To folafoladan 100 ko toki ako mitosil. Mikeriday kako mitosil, misikayayho to kamok no saˈopo, mansa tada ˈifowaay. Kawra kasemeran i, adihay ko demak ako, matongalay ko mananamay to pakayniay ci Yihofaan a demak.

Malacafayay takowanan minanam to Fangcalay Cudad a fafahiyan itiniay i pina kongli ko raay a Yohaseton misasingdi to no mitademay a demak. Tada ngaˈayay ko falocoˈ ningra, pafeliay takowanan to miming a katayalan, pacaliwayho tamiyanan to kaemingay a lomaˈ ningra malo Hongti Kitakit Kasaˈopoan.

O wawa no singsi ako ci Ciwli Cifolos mikitiniay i Niwyok Prokelin tayniay malinah, malo cafayto ako misakafah. Cecay faˈinayan salikaka pacaliway tamiyanan to kaemingay ngaˈayay linahen paliding a lomaˈ, itiniay kami toniya paliding a mikilomaˈ.

Mimingay ko lifon i katimol, cecay romiˈad toloay rimood no Padaka ko lifon niyam. Kinacecayay itini patiyamay misaka dademakan ako ko salikorayto a payci micakay to kakaenen, masadak kako iraay ko cecay faˈinayan miraoday milicay: “Makalimay kiso matayal han? Cecay ko toki pafelien ako kiso to cecay rimood no Padaka.” Miciyaay cingra takowanan miasik to cecay kamaomahan no patirengay, matayalay kako itira tolo romiˈad. Mahapinangay, padamaay ci Yihofa takowanan materek i Aycifiete. Soˈlin cowa ka adihay ko payci ako, kawra itini 1958 miheca kamayan tayra kako i Niwyok mirienang to koksay taykay.

Saka tosa romiˈad no taykay mifekaday ko cecay mikiriwiˈay a demak. Mafanaˈay kako ci Lopi Watelinton fafahiyan salikaka, itiya itiniay cingra i Tinasi Ciyalatin malo miceriday misakafah. Makalimay kami tatosa malo manilnilay mikiriwiˈay mitosilay, orato mirienangay to pisiwkay to Kiliyat Picudadan i pitaykayan a tatokian. Mahererek ko taykay, misatapangay kami patatikami. Kinacecayay matahidangay kako tayra Ciyalatin mihadak to pakapapotalay a kimad, mametan ako ko toki micangacang ci Lopian mararamod. Ikor, malinahay kako tayra i kasakopang ningra. 1959 miheca mararamodayto kami.

23 ko mihecaan ako itini Ciyalatin manilnilay malo misatenokay no malohemay malitengay. Kami i o sakacecay milisoˈan no ikor no mala kasakilac kantok ci Caes Tangposen a kasakopang. Soˈlin adihayay ko nalifetan ningra, kawra milicayayho cingra takowanan iraay ko maanan saali no kasakopang, ato roma kasakilac kantok samaanay misaysay tonini a demak.  Mananamay ako cingranan, itini ˈayaw no misaysay to demak sangaˈayay licayenho ko tao, cipinang to kihcod a demak.

1964 miheca 5 folad, matahidangay kako mirienang to Sapahatatanam to Ciˈinorongay a Kantok i Niwyok Nanlansin. Mikitini i singsi nonini pihatatanaman adihayay ko mananamay ako. Maharek mirienang tonini pihatatanaman, matongalay ko kalim ako sapinanamaw to pakayniay ci Yihofaan a sifanaˈ, mitongalho to piingid Cingranan.

1965 miheca 1 folad, kako aci Lopi micadaay to tahidang, misatapang to milisoˈay to kasakilac a tayal. Manilnilay kami tayra i taˈangayay kilac, mikitini Tinnasico a Nokesewie tahiraay i Fociniyaco a Lisman, polong a kilac mahawpay ko Pikalolaynaco, Kentacico ato Sifociniyaco cowa ka lecad a kasakopang. O kasakopang no kohetingay tamdaw ko milisoˈan ako, samanen itiya katimol no Padaka iraay ko limasmas palaliyas to finacadan, o kohetingay tamdaw ato kohecalay tamdaw cowa kangaˈay malacafay masaˈopo. Toya tatokian, pasangaray ko kaˈorip no salikaka, minanamay kami paladaˈ to dafong no niyah i misaaliay a tamdaw. Maharatengayho ako, cecay halafinayto malo kasakilac kantok a salikaka pasowalay takowanan to cecay kalimlaan a kimad, sanay cingra: “Ano milisoˈ kiso to kasakopang i, malo salikaka nangra, aka malo tawki. Minengneng ko salikaka tisowanan o salikaka nangra, mihaen ngaˈ ngaˈay padama kiso cangranan.”

Milisoˈ kami to cecay kaemingay kasakopang i, misatapangay ci Lopi pasifanaˈ to cecay kaemangay fafahiyan minanam to Fangcalay Cudad. Onini a fafahiyan iraay ko cecayay ko mihecaan a fafahiyan wawa. Itiya i kasakopang awaay ko tamdaw to ngangaˈay misikay tonini a pipacekiw, mansa pakaynian ni Lopi i tikami padotoc pasifanaˈ cingranan to soˈlinay kimad. Itini piliyaw niyam milisoˈ i, satapangay koniya fafahiyan mirienang to polong a saˈopo. Ikor iraay ko tatosa mikiriwiˈay misakafahay fafahiyan salikaka malinahay tayra, cangrato ko padotocay a pacekiw. Caka halafin micadaayto konini fafahiyan to paputisem. Ikor no 30 miheca, itini 1995 miheca, itini kami i Patterson Pitil, iraay ko cecay kaemangay fafahiyan salikaka masasowalay ci Lopian, o wina ningra oya na pacekiwan ni Lopi a fafahiyan. Onini a kaemangay fafahiyan salikaka ato faˈinay ningra o saka 100 liyad micudiyapay i Kiliyat Picudadan.

O saka tosa kasakilac niyam mahawpay ko i tenokay a kilac no Fororitaco. Itiya misaaliay kami to paliding, orato miˈacaay kami to cecay, hanaca cowa ka pasangar ko sapiˈaca. Kawra saka cecay a lipay mapalakayto ko ponpo no nanom, awaay ko payci niyam sapasangaˈ. Itiya maharatengay ako ko cecay faˈinayan salikaka wa ngaˈay padama, patingwaan cingra. Miocoran ningra ko cecay maomahay pacafay tamiyanan misangaˈ to paliding, hanaca cowa pisaali to payci, sanay ko sowal ningra: “Akato calemcem, ngaˈayayto.” ˈArawhan pafeliayho cingra tamiyanan to miming a payci! Matinakoay niyam ko pidimokos ni Yihofa to sikawdan Ningra, patalipaˈelalay konini tamiyanan hinapaladaˈ to tao.

Ano milisoˈ kami to kasakopang i, itiniay ilomaˈ no salikaka a milafin, mihaenay ˈalomanay salikaka malo ngaˈayayto a widang. Kinacecayay o micadaay tamiyanan a paro no lomaˈ iraay ko toloay ko mihecaan faˈinayan wawa. Cecay romiˈad tano sapitilid a kikay mitilid kako to safanaˈ no kasakopang i, cowaho ka lahci mitilid masadakayto misaysay to roma a demak, minokay kako to dadaya i, mahapinangay koya wawa maherekayto ‘padama’ takowanan milahci tora safanaˈ. Ikor adihayay a mihecaan, mihadakan ako koniya demak a pakatawa to salikaka.

1971 miheca, macadaay ako ko cecay sanilnil a tikami, tatayra i Niwyok malo kasapala kantok. Tada macekiday kami! Itiya 34 ko mihecaan ako, o saka cecay kohetingay tamdaw a kasapala kantok tora pala. Kawra malinah kami tayra i, mahemekay ko salikaka mihamham tamiyanan.

Malo kasapala kantok i, maolahay kako itini pilipayan kasakilac a taykay pasifanaˈ to milingatay ci Yihofaan a demak. ˈAlomanay kasakilac kantok ikakaay ko adihay no nalifetan takowanan, o cecay nangra itini picada ako to paputisem i, o mikimaday to paputisemay a kimad, o roma salikaka ci Siawto Cilase ikor malo Malohemay Malitengay i Congpo. Roma i, ˈalomanayho ko itiniay Prokelin a Pitil matayal a salikaka, tada kadofahay ko nalifetan nangra. Onini a kasakilac kantok ato itiniay Pitil a salikaka parihadayay to falocoˈ ako, tada miakoˈiday kako cangranan. Maˈaraway ako konini a sidaˈitay a pakaenay mitiˈeray to sowal no Kawas, madimadi midama to likakawa Ningra. Tada misapoeneray ko falocoˈ nangra, padamaay konini  takowanan malo kasapala kantok i, cowa ka tada marawraw ko falocoˈ.

1974 miheca, o Malohemay Malitengay i Congpo mipiliˈay to papina kasakilac kantok malo kasapala kantok. Kako saan miliyaway malo kasakilac kantok ko tayal, o lalisoˈen a kasakilac o Nankalolaynaco. Itiya o katimol no Padaka ngaˈayayto malacafay ko kasakopang no kohecalay ato kohetingay tamdaw, tada mahemekay ko salikaka maemin.

Salikor no 1976 miheca, maocoray kako tayra i kasakilac no Ciyawceyaco, onini a kasakilac itiniay i laˈed no Atelanta ato Kelompo. Caay ka pawan kako kinacecayay itini patademan patadoay kako to lalima kohetingay a wawa mihadak to mitademay a kimad, tahalifa cangra to pades samanen iraay ko mitekolay to fakotang i lomaˈ nangra, ano winato nangra madokaˈay hato miniwingay. O kohetingay anca kohecalay a salikaka, padotocay tayra i paisingan milisoˈ to wama wina no wawa, pafeli to sahinom cangranan. O salikaka soˈlinay patalahkal to taˈangayay a olah! Samanen iraay ko hatiniay a olah, hato ngaˈayay ko sikawdan no Kawas miremo to sapasangaray i nokaˈorip.

1977 miheca, maocoray kami tayra i Prokelin a Pitil to pina folad, pacafay milahci to cecay tayal. Tiya mamalahcito ko tayal i, tatosaay Malohemay Malitengay i Congpo mikiriwiˈay a mikilim takowanan, milicay takowanan aci Lopian mamakahi padadotoc materek i Pitil matayal hokira. Micadaan niyam konini a satahidang.

Itini Kapot no Mitosilay matayal to 24 miheca. O salikaka nonini a Kapot marariday pacaˈof to pasangaray a salicay. Adihayay mihecaan, padotocay ko Malohemay Malitengay i Congpo mitoor to safalod no Fangcalay Cudad pafeli to sakayat tamiyanan. Mikitini tonini a sakayat, cowa ko pipacaˈof aca niyam to salicay, ngaˈayho pahatatanam to kasakilac kantok, malohemay malitengay ato misakafahay. O mahaenay a pipahatatanam padamaay to ˈalomanay salikaka malo matenesay, hanaca padamaayho to likakawa no Kawas malingad ko kacakat.

Mikitini 1995 miheca tangasa 2018 miheca, malo taypiyaway no congpo kako, milisoˈay to adihayay a fenpo. Masasoˈaraway kako to Iing no Fenpo, matayalay i Pitil ato mikiriwiˈay nilnilen a mitosilay, pafeli cangranan to sapakalalok, halo padama cangranan miremo to malifaay a pasangaray, onini a salikaka paladaˈay to nalifetan takowanan aci Lopian taˈangayay ko sapakalalok tamiyanan. Tinakoen, itini 2000 miheca milisoˈ kami to Rowanta. O matayalay i Pitil ato romaroma salikaka na milakowitay to kapapatay no finacadan i 1994 miheca, ˈalomanay tamdaw malahdaway ko kaolahan a salawina. O mihadakan nangra a nalifetan tada mitemeray to falocoˈ niyam. Soˈlin tada pasangaray, kawra paihkalay ko salikaka to tanektekay a pakasoˈlin, padadotoc ira ko tokel, lipahak a midoko ci Yihofaan.

Nohatini 80 ko mihecaan niyam. Toniya 20 mihecaan, padotocay kako itini Iing no Fenpo no Padaka matayal. Soˈlin cowa picudad kako to taykak, kawra mikitini ci Yihofaan ato likakawa Ningra malifokay ko sangaˈayay a sapasifanaˈ, padama takowanan ira ko inaneng ngaˈay pasifanaˈ to tao soˈlinay kimad no Fangcalay Cudad, padama cangranan milifok to midaˈocay a haepoc. (2 Korinto 3:5; 2 Timoti 2:2) Adihayay mihecaan, maˈaraway ako ko kimad no Fangcalay Cudad samaanay padama to tamdaw misalof to kaˈorip ato miingid to Misangaˈay a Tatapangan. (Yakop 4:8) Minanam ato pasifanaˈ to milingatay ci Yihofaan a demak, soˈlinay o sataˈangayay a sapalemed i sikawdan ni Yihofa. Kako aci Lopi wa padadotoc mihadak to ˈicel no niyah, pakalalok to roma tamdaw mihaen ko demak.