CACEKIWEN LALAKAW 39
O Ngangan Iso Itiniay i ‘Sakaˈorip a Cudad’ Han?
‘O mangodoay ci Yihofaan a tamdaw, matiliday i kaˈayaway Ningra piharatengan a cudad.’—MALAKI 3:16.
RADIW 17 Talaˈayaw, O Misawacayay!
KALIMLAAN NO LALAKAW a
Pina caˈol miheca, padotocay ci Yihofa mitongal to faelohay ngangan i ‘sakaˈorip a cudad’ (Nengnengen ko saka 1-2 fatac)
1. Mikitini Malaki 3:16, padotocay ci Yihofa mitilid to maanan a cudad? Onini a cudad o maanan ko lalakaw?
PINAAY caˈol miheca, padotocay ci Yihofa mitilid to cecay mikiriwiˈay a cudad, onini a cudad matiliday ko ngangan no ˈalomanay tamdaw. O sakacecay matiliday ko ngangan oya madimadiay misawacayay a Apil. b (Luka 11:50, 51) Padotocay ci Yihofa mitongal to faelohay a ngangan itini tonini a cudad, tahanini cowato ka saˈosi ko matiliday a ngangan tonini a cudad. Itini Fangcalay Cudad, onini a cudad panganganan to ‘piharatengan a cudad’ anca ‘sakaˈorip a cudad.’ (ˈOsien ko Malaki 3:16; Paˈarawan 3:5; 17:8) Onini a lalakaw panganganay tonini a cudad to ‘sakaˈorip a cudad.’
2. O nima a ngangan ko mamatilid tonini a cudad hani? Samaan ko pidemak ita, wa ngaˈay matilid ko ngangan tonini a cudad hani?
2 O polong matiliday ko ngangan tonini a cudad a tamdaw sahtoay o iraay ko mangodoay falocoˈ midoko to Kawas ci Yihofaan, hanaca misalimlaay to fangcalay ngangan Ningra. Iraay ko toki nangra milifok to midaˈocay a ˈorip. Anini, ano tiˈeren ita ko patafangan ni Yis Kristo a sapatefoc palahad to tangongolay kalawidang ci Yihofaan, o tatiliden Ningra ko ngangan ita tonini a mikiriwiˈay a cudad. (Yohani 3:16, 36) O hatokel ita ano tatayra i kakarayan anca itini fafekang no sera maˈorip, makalimay kita matilid ko ngangan no niyah tonini a cudad.
3-4. (1) O ngangan ita ano matiliday nohatini i sakaˈorip a cudad, noikor o mamalifokto ita ko midaˈocay a ˈorip han? Tadtaden. (2) Onini a lalakaw ato dotoc a lalakaw mamilengo to maanan?
3 Sakoniya sowal, ano matilid ko ngangan no tamdaw tonini a cudad, o masaˈosiayto mamilifok to midaˈocay ˈorip han? Wa ngaˈay kita mikitini sowal ni Yihofa ci Mosian mahela ko caˈof. Itini Kasadakan 32:33, sanay ci Yihofa: ‘O cima ciraraway, pakararaw Takowanan, wa padengen Ako ko ngangan ningra mikitini i cudad Ako.’ Mihaenay, matiliday i sakaˈorip a cudad a ngangan anini ngaˈayay falahen anca padengen, malecaday konini satapang aca tano impican a tiliden konini a ngangan. (Paˈarawan 3:5) O mamisaˈosi kita padotoc materek ko ngangan no niyah i sakaˈorip a cudad, malecad o tano ˈekengan a impic tiliden konini a ngangan.
4 Alatek o mamaharateng ita ko pina salicay, tinakoen: Pakayni matiliday ko ngangan i sakaˈorip a cudad a tamdaw ato cowa ka tilid ko ngangan a tamdaw, samanay ko sowal no Fangcalay Cudad? O materekay ko ngangan i sakaˈorip a cudad a tamdaw, wa hacowa a tatokian milifok to midaˈocay a ˈorip hani? Oya ˈayawho no mapatay awaay ko toki mafanaˈ ci Yihofaan a tamdaw sasamaan hani? O ngangan nangra wa matilid i sakaˈorip a cudad han? Onini a lalakaw ato dotoc a lalakaw papacaˈof tonini a salicay.
O NIMANIMA A NGANGAN MATILIDAY I SAKAˈORIP A CUDAD?
5-6. (1) Mikitini Filipi 4:3, o nimanima a ngangan matilidayto i sakaˈorip a cudad? (2) Hacowa a tatokian misatapang, o ngangan nonini a tamdaw tatahadaˈoc materek i sakaˈorip a cudad?
5 O nimanima a ngangan matiliday i sakaˈorip a cudad hani? Dotoc nengnengen ita ko lima ˈopo a tamdaw, ilalomaˈ nangra matiliday ko ngangan no roma tamdaw i sakaˈorip a cudad, awaay ko ngangan no roma tamdaw.
6 Saka cecay ˈopo a tamdaw oya mipiliˈan no Kawas tayra i kakarayan malacafay ci Yisan mikowan a tamdaw. Nohatini itiniayto i sakaˈorip a cudad ko ngangan nangra han? Hai. Mikitini sowal no tarokos ci Pawlo to Filipiay ‘cafay matayal,’ wa ngaˈay mahapinang ita, manilnilay no fangcalay saocor a Krisciyang, oya tatayra i kakarayan malacafay ci Yisan mikowan a tamdaw, o ngangan nangra matilidayto i sakaˈorip a cudad nohatini. (ˈOsien ko Filipi 4:3.) Kawra ano makalimay cangra tahadaˈoc materek ko ngangan no niyah tonini a cudad i, o tatahatolas a madimadi. Mihaen, itini ˈayaw no mapatay cangra anca ˈayaw no mifekad ko taˈangayay padiing, o mamilifok to salikoray a satopa. Mikitiya misatapang, tatahadaˈoc to materek ko ngangan nangra i sakaˈorip a cudad.—Paˈarawan 7:3.
7. Pakayni i ngangan no taˈangayay ˈopo a tamdaw hacowa a tatokian misatapang o tatahadaˈoc materek i sakaˈorip a cudad, mikitini Paˈarawan 7:16, 17 ngaˈay mahapinang ita ko maanan?
7 Saka tosa ˈopo a tamdaw oya ilalomaˈay no roma lopayˈay siri a taˈangayay ˈopo a tamdaw. O ngangan nangra matilidayto nohatini i sakaˈorip a cudad han? Hai. Ikor no milakowit to Armakiton, papadadotoc materek ko ngangan nangra i sakaˈorip a cudad han? Hai. (Paˈarawan 7:14) Sowal ni Yis, sano lopayˈay siri a tamdaw wa ‘milifok to midaˈocay a ˈorip.’ (Matay 25:46) Kawra o milakowitay to taˈangayay padiing a tamdaw cowa ko tatangsol milifok tonini a sapalemed. O ngangan nangra malecaday to sano impican a tiliden. Itini Pikowan to Comaˈol Miheca, ci Yis ‘papakaen cangranan, mikerid cangranan tayra i pipowaran no sakaˈorip a nanom.’ Ano midofdof cangra to sakayat ni Yis, hanaca salikor misaˈosian ni Yihofa to madimadiay a tamdaw, tatahadaˈoc materek ko ngangan nangra i sakaˈorip a cudad.—ˈOsien ko Paˈarawan 7:16, 17.
8. O nimanima a ngangan cowa ko mamatilid i sakaˈorip a cudad? Samaan ko teloc nangra?
8 O saka tolo ˈopo a tamdaw o sano lotokay a siri a tamdaw, itini Armakiton a lalood wa masongilaˈ cangra mapalaˈafo. O ngangan nangra cowa ka tilid i sakaˈorip a cudad. Sowal ni Yis onini ˈopo a tamdaw wa ‘tahadaˈoc a malaˈafo.’ (Matay 25:46) Itini sakayat no fangcalay saocor, sanay ko sowal ni Pawlo: ‘Onini a tamdaw mamicadato sasawkit, tahadaˈoc malaˈafo.’ (2 Tisalonika 1:9; 2 Pitiro 2:9) Pina caˈol mihecaan, oya padetengay mitowakang to ˈicel no fangcalay saocor a tamdaw, wa malecad ko teloc. O tatahadaˈoc cangra a malaˈafo, cowa ko mamilifok to midaˈocay a ˈorip. Mahapinangay, cowa ko papatikol cangra maˈorip. (Matay 12:32; Marko 3:28, 29; Hipray 6:4-6) Dotoc wa minengneng kita salikoray to tosa ˈopo a tamdaw, onini a tamdaw wa patikol maˈorip i fafekang no sera noikor.
WA PATIKOL MAˈORIP I FAFEKANG NO SERA A TAMDAW
9. Mikitini Dmak 24:15, o manan tosa ˈopo a tamdaw papatikol maˈorip i fafekang no sera? Oniya tosa ˈopo a tamdaw iraay ko manan kasasiroma?
9 Masowalay no Fangcalay Cudad, ira ko tosa ˈopo a tamdaw wa patikol maˈorip i fafekang no sera, hanaca ira ko tokel tahadaˈoc maˈorip. Cangra i o ‘moecelay a tamdaw’ ato ‘cowa ka moecel a tamdaw.’ (ˈOsien ko Dmak 24:15.) ‘Moecelay a tamdaw’ oya ˈayawho no mapatay madimadiayto midoko ci Yihofaan a tamdaw. ‘Cowa ka moecel a tamdaw’ oya ˈayawho no mapatay cowa pidoko ci Yihofaan a tamdaw, o waywayan no ˈalomanay tamdaw misafelitay to moecelay palinian ni Yihofa. Oniya tosa ˈopo a tamdaw ano papatikol maˈorip, o mamatilidto ko ngangan nangra i sakaˈorip a cudad hokira? Sapacaˈofaw tonini a salicay, pafafidaˈen ita milengo ko pakayraan nonini tosa ˈopo a tamdaw.
10. ‘O moecelay a tamdaw’ hano papatikol maˈorip hani? Ilalomaˈ nangra o roma tamdaw mamilifok to maanan a sapalemed? (Nengnengen konini a casi milengoay to patikol maˈorip “Salicay no Miˈosiay Tamdaw.”)
10 O saka sepat ˈopo a tamdaw o ‘moecelay a tamdaw.’ Itini ˈayaw no mapatay, matilidayto ko ngangan nangra i sakaˈorip a cudad. Mihaenay, tiya mapatay cangra i, wa mafalah ko ngangan han? Cowa, samanen padotocay cangra maˈorip itini piharateng ni Yihofa. Ci Yihofa ‘cowa ko Kawas no mapatayay a tamdaw, ao Kawas no maˈoripay a tamdaw, samanen itini pinengneng Ningra, sahtoay o maˈoripay cangra.’ (Luka 20:38) Tatodong nonini, ano patikol maˈorip ko moecelay tamdaw i fafekang no sera i, wa kamayan ira ko ngangan nangra i sakaˈorip a cudad, edeng kamayan o tano impican a mitilid. (Luka 14:14) Ilalomaˈ nangra o roma tamdaw ikor no patikol maˈorip wa manilnil ‘malo ˈaˈideman’ i fafekang no sera.—ˈOlic 45:16.
11. O ‘cowa ka moecel a tamdaw’ misaaliay to manan a sapadama, ho ngaˈ matilid ko ngangan nangra i sakaˈorip a cudad alatek?
11 Salikor, nengnengen ita ko saka lima ˈopo a tamdaw, oya ‘cowa ka moecel a tamdaw.’ Samanen ˈayawho no mapatay cangra cowa pitoor to moecelay palinian ni Yihofa a maˈorip, samanen cowa kafanaˈ to saali ni Yihofa alatek. O ngangan nonini a tamdaw cowa ka tilid i sakaˈorip a cudad. O papatikolen no Kawas paˈorip cangra, ho ira ko toki matilid ko ngangan nangra i sakaˈorip a cudad. Kawra onini a ‘cowa ka moecel a tamdaw’ tada misaaliay to sapadama, ilalomaˈ nangra o roma tamdaw na midemakay to pakidemay tatiih a demak, mihaenay misaaliay cangra to papasifanaˈen mitoor to moecelay palinian ni Yihofa a maˈorip. Sapadamaaw tonini a tamdaw, o Hongti Kitakit no Kawas o mamidemak to sataˈangayay i likisi no tamdaw pasifanaˈay a tayal.
12. (1) O cima ko pasifanaˈ to ‘cowa ka moecel a tamdaw’ hani? (2) O cecay tamdaw ano eca kakahi mitoor to mananamay a midemak, wa ira ko manan a teloc hani?
12 O cima ko pasifanaˈ to ‘cowa ka moecel a tamdaw’ hani? Oya taˈangayay ˈopo a tamdaw ato patikolay maˈorip a ‘moecelay a tamdaw.’ O ‘cowa ka moecel a tamdaw’ ano makalimay matilid ko ngangan no niyah i sakaˈorip a cudad, o papalahad to kalawidang ci Yihofaan, hanaca patafang to tireng Cingranan. Ci Yis Kristo ato kalacafayay cingranan mala Hongti a tamdaw wa misongilaˈ a misinanot to kacakat nonini a tamdaw. (Paˈarawan 20:4) O cecay tamdaw ano eca kakahi mitoor to mananamay a midemak, soˈlin simoˈot to ko mihecaan, o papalaˈafoen. (Isaya 65:20) Ci Yihofa aci Yis Kristo pafeselay ko pinengneng to falocoˈ no tamdaw, o mamisinanot Cangra itini faelohay a hekal wa awa ko tamdaw patelas saan a midemak to tatiihay demak.—Isaya 11:9; 60:18; 65:25; Yohani 2:25.
PATIKOL MAˈORIP MILIFOK TO ˈORIP ANCA PATIKOL MAˈORIP MICADA TO SASAWKIT
13-14. (1) Isalakat, samaanay ko kacipinang ita to sowal ni Yis i Yohani 5:29 hani? (2) Pakayni toniya sowal, mamisinanot kita to maanan?
13 Milengoay ci Yis o cima ko aitini i fafekang no sera patikol maˈorip. Sanay cingra: ‘Aka ka fahkaˈ tonini a demak, ano maraod ko toki, o mamatengil no matademay a tamdamdaw ko ngiha ningra, ta masadak. O ngaˈayay ko demak a tamdaw i, patikol maˈorip milifok to ˈorip; o tatiihay ko demak a tamdaw i, patikol maˈorip micada to sasawkit.’ (Yohani 5:28, 29) O sowal ni Yis o manan ko tatodong hani?
14 Isalakat, harateng ita itini pilengo ni Yis o patikolay maˈorip a tamdaw ikor midemakan a demak, sanay ko sowal, o roma patikolay maˈorip a tamdaw ikor wa midemak to ngaˈayay a demak, o roma patikolay maˈorip a tamdaw ikor wa midemak to tatiihay a demak. Kawra sinanoten, o patikol maˈorip a tamdaw mamidemak to ngaˈayay a demak anca patikol maˈorip a tamdaw mamidemak to tatiihay a demak cowa ka saan ci Yis, ao ‘midemak to ngaˈayay a demak’ ato ‘midemak to tatiihay a demak.’ Oniya sowal, misaka dademakan ni Yis a sowal o mataˈlifayto a tatokian a sowal, paihkalay konini sahtoay o iˈayaway no mapatay cangra midemakan a demak. Oniya pitadtad tada matatodongay, samanen itini faelohay a hekal cowa ko mamihai ko Kawas to tamdaw midemak to tatiihay a demak. Mihaenay, onini ‘tatiihay a demak’ maedeng itiniay ˈayawho no mapatay a midemakan no cowa ka moecel a tamdaw. Sowal ni Yis ‘patikol maˈorip milifok to ˈorip’ ato ‘patikol maˈorip micada to sasawkit’ o maanan ko tatodong hani?
15. Cima ko ‘patikol maˈorip milifok to ˈorip,’ misamaanay hani?
15 O misowalan no Yohani 5:29 ano o waywayan no cecay tamdaw i ˈayaw no mapatay, mihaenay o ‘ngaˈayay ko demak’ oya misowalan no Dmak 24:15 a ‘moecelay a tamdaw.’ O ‘moecelay a tamdaw’ itini ˈayawho no mapatay ngaˈayay ko demak, wa ‘patikol maˈorip milifok to ˈorip’ cangra noikor, samanen o ngangan nangra matilidayto i sakaˈorip a cudad. Soˈlin ano mapatay ko tamdaw o raraw ningra malahdawayto saan ko sowal no Loma 6:7, kawra ano sinanoten i, onini a moecelay tamdaw padadotocay madimadi to Kawas, cowa ko mamapawan ko Kawas, mihaenay o ngangan nangra patikol maˈorip ikor kamayan itini i sakaˈorip a cudad. (Hipray 6:10) Manaokaniw, onini a moecelay tamdaw ano patikol maˈorip misaaliay to padadotocay madimadi, ngaˈ materek ko ngangan itini sakaˈorip a cudad.
16. ‘Patikol maˈorip micada to sasawkit’ o manan ko tatodong hani?
16 ˈAyawho no mapatay midemakay to tatiihay a demak a tamdaw wa samaan hani? Oniya ‘tatiihay ko demak a tamdaw’ o masowalay no Dmak 24:15 a ‘cowa ka moecel a tamdaw.’ Soˈlin tiya mapatay cangra mafalahayto ko raraw, kawra ˈayawho no mapatay cowa ka madimadi cangra midoko ci Yihofaan, awaay ko ngangan nangra i sakaˈorip a cudad. ‘Patikol maˈorip wa micada to sasawkit’ cangra, c o mamicada to pihapinang. (Luka 22:30) Tatodong i mataˈlif ko cecay liyad a tatokian mihapinang ikor, mamisawkit ci Yis to tatiliden ko ngangan nangra i sakaˈorip a cudad hokira. Oniya cowa ka moecel a tamdaw mamifalah to isalakatay a mararaway waywayan, hanaca patafang to tireng ci Yihofaan, ngaˈ matilid ko ngangan no niyah i sakaˈorip a cudad.
17-18. (1) Itini fafekangay no sera patikolay maˈorip a tamdaw mamidemak to maanan? (2) O maanan ko tatodong no Paˈarawan 20:12, 13 mitoroˈan a ‘waywayan’?
17 Itini Pikowan to Comaˈol Miheca wa ira ko faelohay cudad macelakay, o patikolay maˈorip tamdaw ˈayawho no mapatay ano moecelayto tamdaw anca cowa ka moecel a tamdaw, mamidofdof to sarikec nonini a cudad. Mitadtaday ko tarokos ci Yohani itini i maˈaraway ningra a mapolosi a pakayraan, sowal sa: “Itiya i, maˈaraw ako ko mapatayay a tamdamdaw. Ano o tadamaanayto, ano o tadancaayto i, ira a maemin a tomireng i kaˈayaw noya tadamaanay a ˈanengan. Macelak ko pinapina a cudad itira. Ira ko roma a cecay a nicelakan a cudad, o pitilidan to ngangan no maˈoripay. O matiliday toya pinapina a cudad a sowal ko piˈarawan a misawkit to mapatayay a tamdamdaw to nano demak nangra.”—Paˈarawan 20:12, 13.
18 O patikolay maˈorip a tamdaw wa mikitini i masamaanay a ‘waywayan’ micada to sasawkit hani? Oya iˈayawayho no mapatay a waywayan han? Cowa. Haratengen, iˈayawayho no mapatay a raraw nangra masododayto maemin. Hanaca, o misowalan itini a ‘waywayan’ cowa ko iˈayawayho no mapatay a midemakan nangra ko mitoroˈan, ao itiniayto i faelohay hekal micadaan nangra a sapasifanaˈ ikor midemakan nangra a demak ko mitoroˈan. Ano oyato madimadiay a Nowaan, Samuil, Tafiti aci Taniil oha mamafanaˈ cangra ci Yis Kristoan, hanaca pakayni i mipatafangan ningra a sapatefoc papaihkal to pakasoˈlin, onini a ‘cowa ka moecel a tamdaw’ mikikakaay ko saali mihaen to demak.
19. O minaˈayay tonini kalimlaan a toki wa ira ko masamaanay a teloc hani?
19 O minaˈayay tonini kalimlaan a toki wa ira ko masamaanay a teloc hani? O sowal itini i Paˈarawan 20:15: ‘O cima cowa ka tilid ko ngangan i sakaˈorip a cudad, o mamafahkol i marengrengay ko namal a fanaw.’ O mahaenay a tamdaw wa masongilaˈ, tahadaˈoc a malaˈafo. Hanaca, o mamisarocod kita, matilid ko ngangan no niyah i sakaˈorip a cudad, hanaca padadotoc a materek ilalomaˈ.
O cecay faˈinayan salikaka itini Pikowan ni Kristo to Comaˈol Miheca mirienangay to sataˈangayay pasifanaˈay a tayal i likisi no tamdaw (Nengnengen ko saka 20 fatac)
20. Itini Pikowan to Comaˈol Miheca mamisatapang to maanan kasapaan a tayal hani? (Nengnengen ko papotalay coka.)
20 O Pikowan ni Yis to Comaˈol Miheca tada o kahemekan no tamdaw a tatokian. Itiya, polong no cikiw wa misatapangto to sataˈangayay o pasifanaˈay a tayal, o moecelay a tamdaw ato cowa ka moecel a tamdaw wa paihkal to makahiay ko niyah midofdof ci Yihofaan. (Isaya 26:9; Dmak 17:31) Onini a pasifanaˈay a halaka wa sasamaan a misatapang hani? ˈOsien ko ilaenoay a lalakaw, wa mahela iso ko caˈof, pakayni tonini a kasapaan a tayal wa halamham kiso.
RADIW 12 Mikiˈokan no Kawas a Midaˈocay ˈOrip
a Ci Yis itini Yohani 5:28, 29 sanay, o roma tamdaw ‘patikol maˈorip milifok to ˈorip,’ o roma tamdaw ‘patikol maˈorip micada to sasawkit.’ Onini lalakaw misalofay to kacipinang ita to sinael i salakat. Mamananam ita o maanan ko tatodong no sowal ni Yis, ato o cimacima ko ‘patikol maˈorip milifok to ˈorip,’ o cimacima ko ‘patikol maˈorip micada to sasawkit.’
b Onini cudad ‘mikitini satapangan no nipisangaˈ to hekal’ misatapangayto mitilid. O ‘hekal’ mitoroˈan oya ngaˈayay milifok to salidong mihepol to raraw a tamdaw. (Matay 25:34; Paˈarawan 17:8) Mihaenay, oya moecelay a Apil o sakacecay matilid ko ngangan i sakaˈorip a cudad a tamdaw.
c Isaˈayaw o pinengneng ita to ‘pisawkit’ a tilid o tatiihay a sasawkit sanay itini, mitoroˈan i o ‘misaˈosian ko raraw.’ ‘Sasawkit’ sanay a tilid nolatekay soˈlinay a mahaen ko tatodong. Kawra mikitini i kaˈayaw kalikor no sinael, o misaka dademakan ni Yis itini a ‘pisawkit’ tatodong i paihkalay to misinanot ato mihapinang sanay. O citing no Kirisiya sowal sanay, onini a tilid ngaˈayay o ‘misinanotay to waywayan no cecay tamdaw’ han ko sowal.