Nengnengen ko Fangcalay Cudad samaanay pacaˈof tonini tosa salicay.

Dmak 24:15 pasowalay kitaanan, noikor ‘moecelay a tamdaw ato cowa ka moecel a tamdaw o papatikol maˈorip.’ ‘Moecelay a tamdaw’ oya ˈayaw no mapatay midofdofayto to Kawas a tamdaw, o ngangan nangra maherekayto tiliden i sakaˈorip a cudad. (Malaki 3:16) ‘Cowa ka moecel a tamdaw’ mahawpay koya ˈayaw no mapatay cangoˈotay ko toki mafanaˈ ci Yihofaan a tamdaw, o ngangan nangra cowa ka tiliden i sakaˈorip a cudad.

O misowalan no Yohani 5:28, 29 ato misowalan no Dmak 24:15 o malecaday a tosa ˈopo tamdaw. Sowal ni Yis: ‘O ngaˈayay ko demak i, patikol maˈorip milifok to ˈorip; o tatiihay ko demak i, patikol maˈorip micada to sasawkit.’ ‘Moecelay a tamdaw’ ˈayaw no mapatay ngaˈayay ko demak, patikol maˈorip cangra mamilifok to ˈorip, samanen o ngangan nangra kamayan materek i sakaˈorip a cudad. Roma pakayraan i, ‘cowa ka moecel a tamdaw’ ˈayaw no mapatay tatiihay ko demak, cowa ka tilid ko ngangan nangra i sakaˈorip a cudad. Patikol maˈorip cangra ikor mamicada to sasawkit, itini lalomaˈ no cecay liyad tatokian o hahapinangen anca sasinanoten. Toniya tatokian, wa ira ko toki nangra mafanaˈ ci Yihofaan, o ngangan nangra wa ira ko toki matilid i sakaˈorip a cudad.

Sowal no Paˈarawan 20:12, 13, polong patikolay maˈorip a tamdaw o mamidofdof to ‘matiliday a sowal i maloloday cudad,’ oya milasilan a faelohay sarikec i faelohay hekal, oya cowa pidofdof a tamdaw o mamapalaˈafo.—Isaya 65:20.

O paˈayawan no Taniil 12:2 itiniay i patay maeholay a tamdaw ‘wa mapalal, o roma mamilifok to midaˈocay a ˈorip, o roma mamicada to sapakangodo, tahadaˈoc a sakahmawen.’ Sowal nonini a sinael o patikolay maˈorip a tamdaw tosaay ko teloc, o cecay i ‘milifok to midaˈocay a ˈorip,’ o roma i ‘tatahadaˈoc a sakahmawen.’ Mihaenay itini mahererek ko Pikowan to Comaˈol Miheca i, o roma tamdaw mamilifok to midaˈocay a ˈorip, o roma tamdaw tatahadaˈoc mapalaˈafo.—Paˈarawan 20:15; 21:3, 4.

Ngaˈayay palalinien ita ko patikolay maˈorip a tosa ˈopo a tamdaw to mamalinah tayra i roma kitakit maˈorip a tamdaw. ‘Moecelay a tamdaw’ malecaday o milifokay to katayalan a minkiw anca sakaterek a minkiw a tamdaw, wa ngaˈay cangra toniya kitakit maˈorip, hanaca milifokay to pina fadangalan ato pasalat. Kawra ‘cowa ka moecel a tamdaw’ malecaday o milifokay to cecay liyad a minkiw anca sapiliwko a minkiw a tamdaw, ngaˈayay cangra micomod tonini a kitakit, kawra sapadadotocaw materek itira maˈorip, o mamitoor to pina palinian. Malecaday, oya patikolay maˈorip a ‘cowa ka moecel a tamdaw,’ o maminanam ato midofdof to sarikec ni Yihofa, malo moecelay a tamdaw i pinengneng no Kawas, ngaˈ ngaˈay materek i Lakoing. O cecay a tamdaw ano o mananto a minkiw ko malifokay micomod i roma kitakit, salikor mamala finawlanto nonini a kitakit cingra alatek, anca wa pasadaken panokay alatek, o waywayan ningra ato midemakan itini tonini a kitakit ko sapisaˈosi. Malecaday, polong patikolay maˈorip a tamdaw wa samaan ko teloc, o ka madimadi nangra ci Yihofaan ato pitoor to palinian Ningra maˈorip i faelohay hekal ko sapisaˈosi.

Ci Yihofa cowa ko matomesay aca to olah a Kawas, o masadafdafayho a Kawas. (Limoˈot 32:4; ˈOlic 33:5) O papatikolen Ningra paˈorip ko ‘moecelay a tamdaw’ ato ‘cowa ka moecel a tamdaw,’ paihkalay konini to tada ciolahay Cingra. Kawra itini toniya demak, cowa ko papatefaden Ningra ko ˈakawangay palinian no waywayan no Niyah, edengan o maolahay Cingranan, itini kaˈorip mitooray to palinian Ningra a tamdaw ko papadotoc materek i faelohay hekal.