1, 2. O hinapaladaˈay ci Yihofa, samaanay Cingra kalasaka dademak to kihecod a dafong no cikiw?

O HINAPALADAˈAY a Kawas ci Yihofa, o kihecod no mita sahetoay o sapafeli Ningra. O ekim, odoˈ ato kihecod a dafong no cikiw, oni Yihofa a maemin, kalasaka dademakan Ningra koniya kihecod a dafong, midipot to polong no pinaˈorip i cikiw. (ˈOlic 104:13-15; Hakay 2:8) Adihayay ko maˈoningay i Fangcalay Cudad, na midemakay ci Yihofa to kafahekaˈan a demak, pakayni i dafong no cikiw a midipot to finawlan Ningra.

² Tinakoen, itini i kohkoh ko Israil tamdaw to 40 a mihecaan, pafelian ni Yihofa cangra to mana ato nanom. (Kasadakan 16:35) Awaay ko kacangoˈotan nangra. (Nihimiya 9:20, 21) O roma i, pakaynian ni Yihofa ci Ilisaan, midemak to kafahekaˈan i cecay madimadiay a maponengay a fafahiyan. Deng cecay aca a talid ko simal noya maponengay a fafahiyan, kawra oniya kafahekaˈan a demak patomesan ko simal i polong a talid ningra. Ikor, pacakayan ningra kora simal ngaˈayto mapatikol ko kiyam ningra, oya  ˈosaw a payci i, madeng sakaˈorip ningra ato tatosaay wawa. (2 Hongti 4:1-7) Pafelian ni Yihofa ci Yis to ˈicel, midemak to kafahekaˈan, ngaˈay paladaˈ i tamdaw to kakaenen ato payci.​—Matay 15:35-38; 17:27.

3. Oniya lalakaw wa milengo to maanan a salicay?

³ Soˈliˈlin, adihayay ko dafong ni Yihofa, ngaˈay kalasaka dademaken ko dafong Ningra midipot to pinaˈorip no cikiw. Kawra, kamayanay a pakalalok to sikawdan Ningra, misaka dademak to dafong no niyah, midama to tayal no likakawa no Kawas. (Kasadakan 36:3-7; ˈosien ko Taneng 3:9.) Misamaanay hano mitokel ci Yihofa kitaanan, patafang to kalimelaan a dafong no niyah hani? Lalitengan a finawlan no Kawas, samaanay pakayni i patafang to dafong, midama to soˈlinay a pidoyongan? O likakawa no Kawas, samaanay kalasaka dademaken to sapakiyaho anini? Oniya lalakaw mamilengo toniya salicay.

4. Misamaanay hano mahemek kita patafang to dafong ci Yihofaan hani?

⁴ Mahemekay kita patafang to sapatelong ci Yihofaan, samanen maolahay ato miakoˈiday kita Cingranan. Ano haratengen ita ko nano demak ni Yihofa kitanan, tada mitemeray to falocoˈ no mita. Itiyaho, misatapang patireng to fangcalay sefi i, mitadtaday ci Tafiti to finawlan, misaaliay ko maamaan a dafongan, somowalay cingra, o kihecod a dafong no tamdaw, sahetoay o sapafeli ni Yihofa, soˈlinay i, ora sapatafang no mita mikitiraay Cingranan a ira.​—ˈOsien ko 1 Rayray 29:11-14.

5. Pakayni midokoay ci Yihofaan a tamdaw, paihekal to hinapaladaˈay a waywayan, o masaka limelaan a demak. Pakayni tonini mansanay ko sowal no Fangcalay Cudad?

⁵ Patafang to dafong ci Yihofaan, milingatay to pidoko Cingranan. Tarokos ci Yohani, itini i mapolosi matengilay ko sowal no midokoay ci Yihofaan a coyoh, sanay: “[Yihofaaw], Kawasaw niyam, matatodongay Kiso a mapahemek a mapacakat ko ngangan a mapafeli to ˈicel. Nawhani o misangaˈay Kiso to maamaan. O nafalocoˈan Iso ko sakasangaˈ nonini ato sakaira nonini a maemin.” (Paˈarawan 4:11) Citatodongay ci Yihofa micada to sapaˈdil ato pikangodo, mihaenay haw i, coko patafangen ita cingra to sangaˈayay a dafong hokira? Itiyaho, pakaynian ni Yihofa ci Mosian a palimoˈotan ko Israil a tamdaw, cecay miheca kinatolo tayra i ˈaˈayaw ni Yihofa a misalisin. Oniya midokoay a limasmas, cowa kangaˈay wakawak saan ko Israil a tamdaw a tayra i ˈaˈayaw ni Yihofa. (Limoˈot 16:16) Anini, pakayni i midokoay ci Yihofaan a tamdaw, paihekal to hinapaladaˈay a waywayan, o masakalimelaan, ano mihaen ko demak o paihekalay to miakoˈiday ato midamaay ko niyah to likakawa no Kawas.

6. Misamaanay ano hinapaladaˈ kita wa ira ko haepoc ita? (Nengnengen ko satapangan coka.)

⁶ Ano hinapaladaˈ kita wa mikikaka ko epoc noniyah to micadaay. (ˈOsien ko Taneng 29:21.) Tinakoen, o cecay a wawa tano sapafeli no wama wina a payci, micakay to sapatelong i wama ato wina, anca o cecay misakafahay a wawa, kamayanho i lomaˈ, kawra sapisadakaw to payci no niyah, midama to sakaˈorip no lomaˈ, ano macada no wama wina koniya sapatelong ato payci i, wa samaan ko harateng? Alatek, cowa pitokel ko wama wina mihaen ko demak no wawa, kawra, mafanaˈay cangra, o pipaihekal no wawa to miakoˈiday a falocoˈ koni. Mahecaday onini, mafanaˈay ci Yihofa, ano patafang kita to sapatelong ato payci, wa ira ko taˈangayay a epoc no mita.

7, 8. Nolitengan a finawlan ni Yihofa, samaanay patireng to taˈarawan, pakayni i patafang to dafong a padama to: (1) Mikiriwiˈay a limasmas? (2) Ciˈinorongay i pidoyongan a tamdaw?

⁷ Adihayay ko maˈoningay i Fangcalay Cudad to ˈalomanay finawlan no Kawas, patafangay to dafong ato payci no niyah. Nolatekay, finawlan no Kawas pakayniay i  mikiriwiˈay a araaw ko pipatafang. Tinakoen, pakalalokay ci Mosi to Israil tamdaw, pakayni i pidama to pipatireng to fangcalay kopang a tayal. Patalipaˈelalay ci Tafiti to finawlan, pakiyaho a midama to patirengay to fangcalay sefi a tayal. (Kasadakan 35:5; 1 Rayray 29:5-9) Lintad ni Yoas a hongti no Yuta, misaka dademakan no saysi ko sapatafang a payci, mitomadaw to fangcalay sefi ni Yihofa. (2 Hongti 12:4, 5) Tahira to saka cecay hahekalan, misiˈayaway to kedal ko salikaka itini i Yutaya, tangsolay a padama cangranan, pakaynian nangra i “ˈicel no paytemek ko nipipasadak to sapadama to itiraay i Yutaya a salikaka,” sanay.​—Dmak 11:27-30.

⁸ O roma i, nolitengan a finawlan ni Yihofa, tano dafong ato payci midama to ciˈinorongay i pidoyongan a tamdaw. Tooren ko Rikec no Mosi, o Lifi ngasaw, coka hecad to roma a ngasaw, mililam to sera a malahafay, mihaenay, o roma ngasaw a Israil wa patafang to cecay no kalimoetep a dafong i Lifi a ngasaw, ngaˈ misamacay cangra a matayal i fangcalay kopang. (Saˈosi 18:21) Isaka cecay hahekalan, romaroma a fafahiyan hinapaladaˈay a padama ci Yisan ato tarokos, “o dafong nangra ko sapipadang nangra a matayal ci Yisan.”​—Luka 8:1-3.

9. Finawlan no Kawas, na patafangay to maanan a dafong?

⁹ Finawlan no Kawas, na patafangay to maamaan a dafong ci Yihofaan. Tinakoen, pakayni sapatirengaw to Fangcalay kopang i kohkoh, alatek pakiyahoay ko Israil tamdaw to nai Icipay a ˈodo ato ekim. (Kasadakan 3:21, 22; 35:22-24) Isaka cecay hahekalan, o roma Krisciyang paliwalan ko dafong no niyah, matiya o omah ato lomaˈ, oniya paliwalan a payci pafelien ko tarokos, ikor palilamen ko misaaliay a tamdaw. (Dmak 4:34, 35) O roma Krisciyang miceriday pakiyaho padama to mitosilay a demak. (1 Korinto 16:2) Mihaen i, ano o manikaway anca o cihafayay, ngaˈayay misadak to ˈicel a padama to pakiyahoay a demak.​—Luka 21:1-4.

10, 11. (1) Samaan ko demak ita mitodongay to nolitengay a madimadiay sikawdan paihekal to hinapaladaˈay? (2) Ngaˈayay pakayni i pakiyaho midama to tayal no likakawa no Kawas, samaanay ko harateng iso?

¹⁰ Anini, iraay ko mikiriwiˈay araaw ita a papikiyaho. Alatek, o kasakopang iso misadayay patireng, anca mitomadaw to kasaˈopoan, anca itini i kitiraan iso a fenpo mitomadaway, oniya tayal misaaliay to sapikiyaho no mita. Wa ngaˈay kita pakiyaho midama to taykay, anca padamato tahalifaay to pades a salikaka. O sapakiyaho ita a payci, wa ngaˈay midipot to itiniay i Congpo, anca icowcowaay a fenpo matayal a salikaka, milakowitay to riyar a misakafahay, mikiriwiˈay misakafahay, ato kasakilac kantok. Roma i, o kasakopang iso misaˈosiay pakiyaho a padamato sapitirengan to pitaykayan ato kasasaopoˈan i polong no hekal. Ano mihaen to demak i, wa ngaˈay palemed to polong no hekal a salikaka.

¹¹ Itini salikoray romiˈad, adihayay ko malaˈosiay ni Yihofa a demak, wa ngaˈay kita midama toniya demak. Manaokaniw, adihayay a kiyaho, cowa pasadaken ko ngangan, ngaˈayay paroen ita ko kiyaho i hako no kasakopang, anca pakayni i jw.org wangcan a pakiyaho, kawra cowa ko papasengien no niyah ko tao. Nolatekay, cowa ka hakowa ko pakiyahoan no mita, awaay ko epoc sanay ko harateng iso. Kawra, aniniay a pakiyahoan a payci, cowa ko kina cecay aca ko macadaay to adihayay a payci, ao mimimimingay a kiyaho no ˈalomanay ko sakahoped. I nolitengan a Makitoniya Krisciyang tada manikaway cangra, kawra micangacangayho cangra ira ko tatodong a pakiyaho. Anini, o roma salikaka cowa ko cihafayay, kawra mahecaday cangranan a paihekal to hinapaladaˈay a pakiyaho.​—2 Korinto 8:1-4.

12. O likakawa no Kawas samaanay a kalasaka dademak to sapakiyaho?

¹² Malohemay Malitengay i Congpo a salikaka miceriday mitolon ato misongilaˈ a  miharateng, pakayni i kalasaka dademak to kiyaho, misaˈicelay paihekal to madimadi ato taneng. (Matay 24:45) Milimasmasan nangra ko mamapalak a payci, mitoor to limasmas a misaka dademak to kiyaho. (Luka 14:28) Nolitengan, o citodongay midimokos to kiyaho a tamdaw, mitoorayto limasmas, misinanot a kalasaka dademak to kiyaho, itini milingatay to pidoko ci Yihohaan a demak. Tinakoen, minokay ci Icra i Yirusalim, oya sapakiyaho no hongti ci Pirsiya ci Yihofaan a ekim ato sapatelong panokayan ci Icra, anini oniya dafong mataˈlifay ko cecay walwal no Padaka a payci. Oniya ekim ato sapatelong, o sapatafang ci Yihofaan, sanay ko pinengneng ni Icra, hanaca ora pinokayan a lalan, mitaˈlifay to katarawan a pala, mansa misongilaˈay cingra, milimasmas hongaˈ madipot koya sapatelong. (Icra 8:24-34) Tarokos ci Pawlo patado to Yutiya Krisciyang, mihoped to kiyaho to sakaˈorip a dafong, misongilaˈay a milimasmas, padama to micoloˈay to dafong a salikaka, “caay ko sakangaˈayaw no demak a tapalen [ni Yihofa] a cecay. O sakangaˈayaw a tapalen no tamdamdaw.” (ˈOsien ko 2 Korinto 8:18-21.) Anini, likakawa no Kawas mitodongay to taˈarawan ni Icra aci Pawlo, itini i pilosimet to pakiyaho a demak, midofdofay to masaˈosiay a palinian.

13. Toniya pina miheca, itini i tayal misamaanay hano misalof ko likakawa no Kawas?

¹³ O cecay paro no lomaˈ wa misinanot misaka dademak to payci, pakayni saka dademakaw ci Yihofaan wa midolo nokaˈorip, milowan to mapalakay a payci. O likakawa ni Yihofa mahecaday ko demak. Toniya pina miheca, adihayay ko faelohay a halaka no likakawa, nolatekay, ikakaay ko mapalakay a payci to macadaay a kiyaho, mihaenay, milowanay no likakawa no Kawas ko mapalakay a payci, halo pidolo to demak, mihaen i, tano ngaˈayay a pakayraan misaka dademak to kiyaho no salikaka a milaheci to adihayay a demak.

14-16. (1) Icowaan misakadademak ko sapakiyaho no mita? (2) Mikitini i masakenaay a limasmas no likakawa milifokay to maanan a epocan kiso hani?

¹⁴ O sowal no halafinayto midoko ci Yihofaan a Krisciyang, caayho ka lecad to aniniay adihay ko macadaay nangra a sapatelong naitini i likakawa. Haratengen hena, iraayto ko jw.org wangcan, iraayho ko nengnengen a JW Tilifi. O roma i, Faelohay Hekal Mihongyakan Fangcalay Cudad adihayay masasiroma ko sowal. Itini i 2014 tangasa 2015 miheca i polong no hekal, itini 14 niyaroˈ a taˈangayay ontociw, mirienangay to tolo romiˈad a “Padotoc a Micangacang to Hongti Kitakit no Kawas!” a Koksay Taykay. Tada mahemekay ko mirienangay a tamdaw.

¹⁵ ˈAlomanay tamdaw mikitini sapaini no likakawa a noˈadingoan kakaenen, milifokay  to taˈangayay sadama, tada miakoˈiday. O cecay mararamoday itiniay a Asia a kitakit dademak, pakayni kamok no JW Tilifi samanay ko harateng nangra hani? Sanay ko sowal: “Itiniay kami a kaemingay niyaroˈ mitosil, matoˈolay nolatekay, madoloay mapawan to hakowaay ko taˈangay no tayal ni Yihofa. Kawraan, ano minengneng to kamok no JW Tilifi, hato masalalomaˈay no polong kasacefang no salikaka ko niyah, sanay ko harateng niyam. Maolahay ko salikaka to kamok no JW Tilifi, marariday matengil niyam ko sowal nangra, ano maherek minengneng to kamo i, hato mingataayto ko niyah to Malohemay Malitengay i Congpo. Nohatini, malo finawlan no Kawas, o masakalikoan sanay ko harateng no salikaka.

¹⁶ Nohatini, polong no hekal madeng 2,500 ko patirengan ato mitomadawan a Hongti Kitakit kasaˈopoan. Itiniay i Hongtolas a kasakopang, irato ko faelohay a kasaˈopoan i, harateng no salikaka: “Tada mahemekay kami malo taˈangayay paro no lomaˈ ni Yihofa, ato kasacefang no salikaka, mihaenay hato ngaˈayay kami, itini ingata ira kono niyah a kasaˈopoan, malaˈosiayto ko mitiihan niyam!” Mahecaday ko harateng no ˈalomanay, macada nangra ko nowina a sowal a Fangcalay Cudad ato romaroma cudad, mikitini sadama to mapadesay milifok to epoc, anca maˈaraw ko ngaˈayay minaroˈan no kaˈalomanay a pisawacayan i roma kilac, miakoˈiday to kihecod a demak no likakawa no Kawas.

17. Hano mafanaˈ kita to midamaan ni Yihofa ko demak no likakawa hani?

¹⁷ Kalo a tamdaw pasangaran a cipinang, hano ngaˈay kita pakayni i kiyaho a milahecito adihayay demak. Maherek minengneng to piinsacuan no mita ko tawki no cecay taˈangayay kosi, marinaˈay i ponoˈ ningra. Tiya mafanaˈ cingra to cowa ko palifonan a tamdaw ko milaheciay to demak ita, o saka dademak a payci, cowa ko pacakayay to dafong ato mihaykiwan, ao no niyahan a sapakiyaho ko sapidama tada fahekaˈan nanay, sowal sa ano tooren koniya pakayraan no mita, cato kalaˈosi ko adihayay a demak sanay. Matatodongay ko sowal noniya tawki, o sakalaˈosi no mita samanen iraay ci Yihofa midama kitaanan.​—Yopu 42:2.

18. (1) Ano midama kita to demak no Hongti Kitakit, wa milifok to maanan a sapalemed? (2) Samaan kita pakalalok to wawa ato faelohay salikaka i kasakopang, midama to tayal no Hongti Kitakit?

¹⁸ Anini, pairaan ni Yihofa ko tatodong ita a pakayni pakiyaho midama to taˈangayay a demak no Hongti Kitakit, mikiˈokay Cingra ano mihaen to demak kita, wa micada to sapalemed Ningra. (Malaki 3:10) O roma i, mikiˈokay ci Yihofa paladaˈay a tamdaw i, mangalef a matongal ko hafay ninga. (ˈOsien ko Taneng 11:24, 25.) Makahiay kita pakiyaho wa milifok to hemek, o sowal no Fangcalay Cudad: “Ikaka no nika lemed no milayapay ko nika lemed no mipafeliay,” sanay. (Dmak 20:35) Pakayni kita i sasowalen ato waywayan, wa ngaˈay patirengto taˈarawan no wawa ato faelohay salikaka i kasakopang, pasifanaˈ cangranan pakayni i pakiyaho a paihekal to miakoˈiday, ngaˈayho milifok to sapalemed ni Yihofa.

19. Maherek miasip toni lalakaw, wa samaanto ko saˈosi no falocoˈ iso?

¹⁹ O kihecod a dafong ita, sahetoay o mikitiniay ci Yihofaan, ano makahi a patelong to dafong ci Yihofaan, paihekalay to maolahay kita Cingraanan, miakoˈid to nano demak Ningra kitaanan. (1 Rayray 29:17) Lalitengan a finawlan no Kawas, tiya pakiyaho midama patireng to Fangcalay sefi i, “Maolah ko finawlan a milonok a pacakat i [ci Yihofaan.] Salipahak sa cangra a maemin to nika adihayay no nipacakatan nangra a maamaan.” (1 Rayray 29:9) Padotoc kita patafang to sapafeli ni Yihofa kitaanan a dafong i Cingraanan, mihaen wa marenec ko falocoˈ no mita.