1, 2. Anini sikawdan no Kawas misiˈayaway to manan a pasangaray a pakayraan? (Nengnengen ko satapangan coka.)

O ISING ato kangkofo, itini i katayalan, marariday a miingid to midengaay ko adada a adadaay tamdaw, kawra makahiayho midimokos tora adadaay tamdaw. Samanen sapipadamaaw to adadaay tamdaw cangra. Nikawrira, o ising ato kangkofo mamidipot to tireng no niyah, hongaˈ caka madenga no adada. Mahecaday tora, kita marariday a miingid to cowa ka fanaˈ to Kawas a tamdaw itini nokaˈorip ita, o pinangan ato waywayan nangra masasiromaay to midokoay to Kawas a tamdaw. Ano sakaecaaw ka denga nangra, cowa ko madoloay a demak.

² Itini toni saikoray a lintad, malikelonay ko waywayan no tamdaw. Ya saka tosa tikami ni Pawlo ci Timotian, somowalay to pinangan no cowa ka olah to Kawas a tamdaw, o matiniay a pinangan mahapinang mahapinangay maˈaraw. (ˈOsien ko 2 Timoti 3:1-5, 13.) Maˈaraw ita ko tatiihay a pinangan no ˈalomanay, masomaday ko falocoˈ ita, kawra mamadenga no pinangan ato waywayan nangra kita alatek. (Taneng 13:20) Oni lalakaw mamilengo, o tatiihay pinangan, samaanay ko kasasiroma to mikiriwiˈay a capeling no  maolahay to Kawas a tamdaw, nengnengen ita, ano padama kita to tao mala widang no Kawas i, misamaan a midipot to niyahan, ho caka madenga noni tatiihay pinangan.

3. Itini i 2 Timoti 3:2-5 somowalay to masamaanay a tamdaw hani?

³ ‘Itini i saikoray lintad o pasangaray a siˈayawen a ˈawaled’ sanay ci Pawlo. Dotoc somowalay to 19 a tatiihay pinangan no tamdaw anini. Ora masowalay a pinangan mahecaday to nisowalan i Loma 1:29-31 a pinangan, kawra mikikakaay ko nika adihay a masowalay i 2 Timoti a tatiihay pinangan, ilalomaˈ to pinapina awaay masadak i romaroma Krisiya Sowal Fangcalay Cudad. ˈArawhan, cowa ka mapolong sa ko tamdaw maemin patahekal to matiniay a tatiihay pinangan, o Krisciyang sa i, patahekalay to masasiromaay a mikiriwiˈay a capeling.​—ˈOsien ko Malaki 3:18.

4. Samaanen iso mitadtad a somowal ko malitaˈangay a tamdaw hani?

⁴ Salakat somowalay ci Pawlo toya misatekeday maolah to niyahan ato maolahay to payso a tamdaw, o mahaenay tamdaw patahekalay to pasenengay, misatakaraway ko falocoˈ, malitaˈangay. Saka mahaen a tatiih ko pinangan nangra, samanen o inanengay, makapahay, cihafayay, ˈakawangay ko saaroˈan no niyah sanay cangra. Nanay kaolahen ato taˈongen no tao kako sanay ko ngalay no falocoˈ nangra. O cecay matanengay tamdaw somowal to hatiraay pakinaliay ko nika malitaˈang a tamdaw, sanay: “Ilalomaˈ no falocoˈ nangra, iraay ko mimingay patafangan a mitaˈong cangra to niyahan.” O sowal no roma a tamdaw, o mahaenay malitaˈangay tada o kaˈesangan no tao, ano o romaromato a malitaˈangay a tamdaw mapiliˈay cangranan sanay.

5. O romaroma madimadiay a sikawdan, samaanay madenga no malataˈangay a pinangan?

⁵ Tada kapiliˈan ni Yihofa ko malitaˈangay a pinangan. ˈIntehay Cingra to ‘misatakaraway minengneng’ a tamdaw. (Taneng 6:16, 17) Malitaˈangay tamdaw awaay ko pakayraan a miingid to Kawas. (ˈOlic 10:4) Ci Akoma patahekalay to malitaˈangay a pinangan. (1 Timoti 3:6) Kadaayayan i, ano o madimadiay sikawdan ni Yihofa, madengaay no matiniay tatiihay a pinangan. Hongti no Yutaya ci Uciya, pinaay miheca madimadi a midoko to Kawas, kawra, miˈoningay ko Fangcalay Cudad: “Macakat a ciˈicel ci Uciya saka malataˈang cingra, onini ko sakatefad ningra. Ciraraw cingra i Tapang, patedo sa cingra a micomod i Pitaˈongan a paexiw i pipaexiwan.” Ikor, ya madimadiay a Hicikiyaan matalakalay no malitaˈangay a pinangan, patahekal to misatakaraway.—2 Rayray 26:16; 32:25, 26.

6. Iraay ko manan a lalangian to mamalataˈang ci Tafiti hani? Hano padadotoc cingra mitafo to misapoeneray a falocoˈ hani?

⁶ Misamaanay hano malataˈang a misatakaraw ko tamdaw hani? Alatek makapahay ko pising nangra, masowalay ko ngangan nangra, matanengay tono radiw, tanektekay ko tatirengan anca ˈakawangay ko saaroˈan nangra. Iraay ko mahaenay a maemin a kangaˈayan ni Tafiti, ˈarawhan hakelong no ˈorip ningra, mitafoay to misapoeneray. Tiya mapatay ningra ci Koliyat ikor, miharatengay ci Sawlo pakadafo to wawa i cingranan, ˈarawhan sanay ci Tafiti pasowal: “Caay ko masamaanay kako, caay ko masamaanay ko paro no lomaˈ ako itini i Israil, maedeng kako a malakadafo no hongti saw?” (1 Samuil 18:15-18) Misamaanay hano ngaˈay mitafo ci Tafiti to misapoeneray hani? Samanen mafanaˈay cingra, o mikiriwiˈay a capeling ningra, ˈicel ningra, malifokay a sapalemed sahetoay o naitiniay i Kawas. “Roho sa [ko Kawas] minengneng,” patahekalay to misapoeneray, ato midimokos ci Tafitian. (ˈOlic 113:5-8) Mahapinangay ni Tafiti, o kihecod a nika ira ningra o naitiniay ci Yihofaan.—Nengnengen ko 1 Korinto 4:7.

7. O manan ko papadama kitanan patahekal to misapoeneray a falocoˈ?

⁷ Anini, tamdaw ni Yihofa matiraay ci Tafitian,  misaˈicelay a patahekal to misapoeneray. O satakaraway i paro no kakarayan ci Yihofa, ˈarawhan patahekalay Cingra to misapoeneray a mikiriwiˈay a capeling, mafanaˈ kita toninian coko mamasemer ko falocoˈ ita han? (ˈOlic 18:35) O mamisaˈicel kita midoedo to Fangcalay Cudad: “Kao adayayay, kao siniˈadaay, kao misapoeneray, kao damsayay, kao kodaitay ko falocoˈ namo.” (Kolosay 3:12) Mafanaˈay kita, o olah hananay “caay paseneng a misatakaraw ko falocoˈ.” (1 Korinto 13:4) Ano patahekal kita to misapoeneray capeling i, o mamasolot ko tamdaw a miingid ci Yihofaan. Mahaen o fafahi, caay pasowal to maanan, tona makapahay ko waywayan a masolotto ko faˈinay, o tamdaw no Kawas ano patahekal to misapoeneray capeling i, o mamasolot ko tao mafanaˈ to Kawas.—1 Pitiro 3:1.

8. (1) Pakayni to micoliay a micongangah ko wawa to wama wina, samaanay a minengneng ko tamdaw anini? (2) Itini i Fangcalay Cudad, pakafanaˈay to manan to wawa?

⁸ Somowalay ci Pawlo, itini i saikoray lintad, samaanay ko pakayraan no kalo tamdaw. Itini i saikoray lintad o mamicoli a micongangah ko wawa sanay cingra. Anini, adihayay a cudad, ika ato kamok no tilifi misintingay to mahaenay a pinangan. O micoliay a micongangah a pinangan miperaray to paro no lomaˈ, nano litenganho, mafanaˈayto ko tamdaw o mahaenay tatiihay pinangan mipalakay to rihaday no paro no lomaˈ. Patinakoen, itini i nolitengan a Krisiya, o wawa ano misetiˈ to wama wina i, milaplapan no finawlan cangra. O sarikec no Loma, ano miˈodot to wama ko wawa, o mipatayay to tamdaw a raraw kora. Itini i Fangcalay Cudad no Hipray Sowal ato Krisiya Sowal, palimoˈotay to mamikangodo ko wawa to wama wina.—Kasadakan 20:12; Ifiso 6:1-3.

9. Haharatengen no kaemangay ko manan padama cangranan madolo a midofdof to wama wina?

⁹ Wa misamaan midipot ko wawa to niyahan, caka madenga no micoliay a micongangah a pinangan hani? Haratengen ko nano demak no wama wina i cangranan, mihaen cangra mamiakoˈid to wama wina, sapidofdofaw to wama wina. Paifalocoˈen no wawa, o Wama ita i kakarayan ko misaaliay kitanan, papidofdof to wama wina. Ano somowal to wama wina ko kaemangay tamdaw i, o kangaˈayan nangra ko sowalen, hongaˈ mihaen a mikangodo to wama wina nangra ko romaroma a kaemangay. Manaokaniw, o wama wina ano caay ka siniˈada to wawa, wa pasangaren ko wawa a midofdof cangranan. Nikawrira, ano mahapinang no kaemangay ko olah no wama wina i, soˈlin sato pasangaren cangra, wa makahien a mitoor to sowal no wama wina. O cecay ci Awstin hananay kaemangay, sanay ko sowal: “Soˈliˈlin sapilaliwaw to ˈinorong kako, kawra matatodongay ko sarikec no wama wina i takowanan, hanaca ngaˈayay sakasasowalen cangra, padamaay takowanan a midofdof to wama wina. Mahapinangay ako to ciharatengay i takowanan cangra, mansa mahemekay kako palipahak cangranan.”

10, 11. (1) O cangoˈotay to maolahay falocoˈ a tamdaw patahekalay to manan tatiihay a pinangan? (2) Soˈlinay Krisciyang sasamaan patahekal to maolahay to tao matira maolah to tireng no niyah?

¹⁰ Mihadakay to romaroma tatiihay pinangan ci Pawlo, somowal to cangoˈotay to maolahay falocoˈ ko tamdaw. Isalakatay a somowal ci Pawlo to ‘micoliay micongangah to wama wina’, aikor somowalay to caay ka fanaˈ a miahowid ko tamdaw, o matiniay tamdaw cowa piakoˈid to nano demak no tao i cangranan. O roma i, awaay ko falocoˈ to saki Kawas sanay ci Pawlo, hanaca maˈdesay ko tamdaw, cowa kakahi mala ngaˈay ato tao. Somowalay to milikafay a sowal, pacakay to widang, midokaˈ ko sowal to tao, halo milikafay to Kawas. Cowa koninian aca, mitonganganay to tamdaw cangra, tano mariˈangay a mangah mipalak to ngangan no tao. *

 ¹¹ Kawra, o midokoay ci Yihofaan a tamdaw, cowa ka hecad toya awaay ko olah a tamdaw, tohatiniay, o sikawdan ni Yihofa masasiolahay cangra. Sowal ni Yis, itini i Rikec ni Mosi, saka tosa a kalimelaan a sapalimoˈot i, o nika olah to tao ko nika olah iso to niyah, o a·kaˈpe sanay, saka cecay a kalimelaan a limoˈot i, o olah ci Yihofaan. (Matay 22:38, 39) O tahapinangan no soˈlinay Krisciyang ko masasiolahay sanay ko sowal ni Yis. (ˈOsien ko Yohani 13:34, 35.) Ano o ˈadato, mikaolahan no Krisciyang.—Matay 5:43, 44.

12. Samaanay ci Yis patahekal to olah i tamdaw hani?

¹² Ci Yis patahekalay to soˈlinay olah i tamdaw. Ya itiniho i sera cingra, paka niyaniyaroˈay mitenak to ngaˈayay lihaf no Hongti Kitakit. Miadahay to mapohaway, mapiˈiway, madoˈengay, mapodokay, patikorho paˈorip to mapatayay tamdaw. (Luka 7:22) Kinafalahay to ˈorip ci Yis saki polong a tamdamdaw, mapatay saki ˈintehay i cingranan a tamdaw. Misaheciay ci Yis patahekal to olah no Wama ningra. Itiniay i paro no kakarayan a Misawacayay Tamdaw ni Yihofa, mitodongay ci Yisan patahekal to soˈlinay a olah.

13. Ano patahekal kita to olah, wa samaan misolot to tao sakafanaˈaw ci Yihafaan hani?

¹³ Ano patahekal kita to olah, o mamisolot to tao sakafanaˈaw to Wama ita i kakarayan. Patinakoen, itini i Taylan, o cecay faˈinayan mirienang to taykay i, maˈaraway ko salikaka patahekal to soˈlinay olah, tada masemeray cingra. Minokayto cingra, misaaliay cecay lipay, kina tosaen a pacekiw cingra. Mitosilan ningra ko polong a salawinawina. Ikor no enem folad to pirienang to taykay, mirienangayto to pahatatanamay saˈopo, miˈosi to sinael. Ano sakafanaˈaw to misaˈicelay ko niyah patahekal to olah hokira, ngaˈayay licayen ko niyah: ‘Misaˈicelay kako padama to paro no lomaˈ, to kasakopang a salikaka, to malitemohay i pitosilan tamdaw han? Misaˈicelay kita tano pinengneng ni Yihofa cangranan han?’

14, 15. Roma tamdaw na patahekalay to manan tatiihay a pinangan hani? Misamaanay hano mafalic ko pinangan nangra hani?

¹⁴ Itini i saikoray lintad, iraayho ko romaroma tatiihay a pinangan, o laliyasen no Krisciyang ko matiniay a tamdaw. Patinakoen, ˈalomanay tamdaw mapiliˈay to ngaˈayay demak, o  roma Fangcalay Cudad “ˈintelay to ngaˈayay demak” hananay a mihongyak. O mahaenay tamdaw caay pakaˈemet to tireng, mariˈangay, o roma tamdaw patedoay, ˈamelasay ko demak, caay pikihar to mamidokaˈ to tao.

¹⁵ ˈAlomanay tamdaw ˈayaw no pinanam to Fangcalay Cudad, mahaenay o ˈaˈadopen a mariˈang ko pinangan, kawra ikor mafalicay cangra. Nawhani, paliˈayaway pasowal ko Fangcalay Cudad toni makapahay a demak. (ˈOsien ko Isaya 11:6, 7.) Sanay kora sinael, o oles ato tomay o matiniay ˈaˈadopen, o rarihaday ato tofor siri ato ciciw no kolong sanay. Sinanoten hano ngaˈay cangra a rihaday a makakapot, sowal no Fangcalay Cudad: “O mamatiya o nika kakahad no riyar ko nika tenak no fanaˈ no tamdamdaw to pakayniay i Tapang [ci Yihofa] itini i polong no hekal.” (Isaya 11:9) Kawra, cowa ko mamafanaˈ ko ˈaˈadopen ci Yihofaan, mansa oni sapairasol o sapatinako koranan, o nika falic no pinangan no tamdaw ko mitoroˈan.

16. Samaanay ko Fangcalay Cudad padama to tamdaw mifalic to pinangan hani?

¹⁶ ˈAlomanay faˈinayan fafahiyan salikaka, na matiraay o mariˈangay a oles, ikor masaheciay a mafalic cangra, rihadayto kala cafay to tao. Ngaˈayay ˈosien iso itini i jw.org. wangcan a lalakaw, “Fangcalay Cudad Mifalicay to Kaˈorip no Tamdaw,” sanay a lalakaw, minengneng to nalifetan nangra. Mafanaˈto ci Yihofaan cangra, misetekay to falocoˈ a mihodop ci Yihofaan, caay ka matira o roma tamdaw somowal to midokoay ko niyah to Kawas, ˈarawhan cowa pitengil to sowal no Kawas a mihakelong, cangra o fadic aca ko nipitoor, mamafalah nangra ko heci no pitoor nangra. Nikawrira, oya na mariˈangay ko pinangan a salikaka, misaˈicelay “micaˈdong to faelohay a pinangan, oya milecaday to pinangan no Kawas a masangaˈay. Mapahapinang konini i faelohay a ˈorip. Onini a faelohay a ˈorip i, o nika moecel ato nika fangcal no demak.” (Ifiso 4:23, 24) Mafanaˈto to Kawas mahapinangay nangra to mamafalic ko niyah, misaˈicel mitoor to palinian no Kawas, itini i pihakelongan, i pakayraan, i waywayan a mifalic, mihaen to demak soˈlin cowa ko madoloay, kawra makalimay cangra sapakahemekaw to Kawas, itiniay i sapadama no fangcalay saocor no Kawas, ngaˈayay mifalic cangra to niyah.

17. Samaanen ita miliyas ko nika pidenga no cowa ka ngodo to Kawas a tamdaw hani?

¹⁷ Nohatini, mahapinangay ita ko kasasiroma no midokoay to Kawas ato caay pidoko to Kawas a tamdaw. Naˈonen ita, aka a pasalaten ko hekal a midenga kitanan. Tengilen ita ko sapalimoˈot no Fangcalay Cudad, laliyasen koya nisowlan no 2 Timoti 3:2-5 a tamdaw. Manaokaniw, o mamalitemohho ita ko cowa ka ngodo to Kawas a tamdaw, samanen kala cafayan ita matayal, kala cafayan ita micudad, anca o paro no lomaˈ ita cangra. Hay, samaanen ita miliyas ko pakayraan ato waywayan nangra a midenga kitanan hani? Miˈosi kita to Fangcalay Cudad a mitongal to kala widang aci Yihofa, halo mararid micawmaˈ to midokoay ci Yihofaan a tamdaw.

18. Samaanen ita pakayni i sasowalen ato waywayan padama to tao, mafanaˈ ci Yihofaan hani?

¹⁸ Misaˈicel kita padama to tao a mafanaˈ ci Yihofaan, misaka dademaken ko toki a mitosil cangranan, tolonen ko Kawas padama kitanan, itini i matatodongay a toki pasowal to matatodongay a sowal. Pakafanaˈen ita ko tao to Misawacayay Tamdaw ni Yihofa kita, mihaen papaˈodingar to ngangan no Kawas ko ngaˈayay a waywayan ita. Pasifanaˈay ci Yihofa kitanan, ‘mifalah to caay ka ngodo a falocoˈ ato ˈanof no hekal, kitinien marocoday a harateng, moecelay, mangodo to Kawas a maˈorip,’ sanay. (Titus 2:11-14) Ano todongen ita ci Yihofa, misaˈicel midemak to matatodongay demak, maˈaraw no tao ko ngaˈayay waywayan ita i, wa mihaen a pasowal: “Haydaen kami a mikapot i nika tadamaan namo, nawhani matengil niyam ko nika mikapot ko Kawas i tamowanan.”—Cikariya 8:23.