1. Misamaanay hano itiniay i mikiriwiˈay a lalintadan a maˈorip kita?

ITINIAY i mikiriwiˈay a lalintadan a maˈorip kita. Matira o sapaliˈayaw no Fangcalay Cudad, ci Yihofa naitiniay i ‘kasakitakit, kasangasaw, kasafinacadan’ palisopsop to ˈalomanay a tamdaw, o “masasi romaromaay ko sowal nangra,” mala o “ciˈicelay a kitakit”, mataˈlifayto ko 800 a ˈofad ko kaˈaloman nangra. Onini lipahakay tamdaw ‘to romiˈad to dadaya’ midokoay to Kawas. (Paˈarawan 7:9, 15; Isaya 60:22) Hatira ko nika ˈaloman no maolahay to Kawas, masasi olaolah cangra, awa awaay iti:yaho.

2. Cowa ka olah to Kawas a tamdaw, paihekalay to maanan a waywayan? (Nengnengen ko satapangan coka.)

² Nikawrira, pairasolay ko Fangcalay Cudad itini toni lintad ita, ˈalomanay ko cowa ka olah to Kawas, paihekalay to misatekeday a olah. Sanay ko sowal ni Pawlo: ‘Itini i salikoray a ˈawaled . . . , misatekeday maolah to niyah ko tamdaw, maolah to payso, . . . maolah to lawla caka olah to Kawas.’ (2 Timoti 3:1-4) O matiniay misatekeday olah, cowa ka lecad to olah no Krisciyang; tada taˈangayay ko nika sasiroma. O misatekeday olah cowa ko soˈlinay lipahak. Samanen o  niyah aca ko kaolahan, mankora itini toni maˈidiay a hekal hato ‘pasangaray a siˈayawen.’

3. Onini lalakaw wa mitadtad to manan? Mihaen to demak hano o masaka limelaan hani?

³ Mafanaˈay ci Pawlo, o ˈaˈaloman ko paihekalay to misatekeday a olah, o matiniay a waywayan mipalakay to Krisciyang. Mankora, parikecay cingra to “laliyasen iso ko matiraay a tamdaw,” sanay. (2 Timoti 3:5) Kawra, awaay ko pakayraan ita, misaheci a miliyas to matiraay a tamdaw, hay, misamaan kita to demak, ho ecaka mafiyor nangra, halo misaˈicel a pakahemek toya ciolahay a Kawas hani? Sanay yaca tadtaden ita, o olah to Kawas atora nisowalan no 2 Timoti 3:2-4 a misatekeday olah, o manan ko kasasiromaan hani? Mihaen to demak papadama kitanan milalat to hakowaay ko olah no niyah to Kawas. Paira to soˈlinay lipahak ato marenec ko falocoˈ.

4. Maolahay to tireng no niyah a midipot, hano o matatodongay a demak hani?

⁴ ‘Misatekeday maolah to niyah ko tamdaw,’ sanay ko sowal ni Pawlo. Kawra maolah to niyah o mararaway han? Cowa. Maolah to niyah ko tamdaw, o matatodongay kora. Ya misangaˈ ci Yihofa kitanan i, misafacoan kita to mamafanaˈ midimokos to niyah. Sanay ko sowal ni Yis: ‘Matiraen o niyah a maolah to tao.’ (Marko 12:31) Ano caka fanaˈ kita maolah to niyah, wa misamaan mafanaˈ a maolah to tao. O sowal no Fangcalay Cudad: “O sasamatiyaen no faˈinay o nika olah to tireng ko nika olah to fafahi. O maolahay to fafahi a faˈinay i, o maolahay to tireng no niyah. Awaayho ko miˈintelay to tireng no niyah.” (Ifiso 5:28, 29) Maolahay to tireng no niyah a midipot, o matatodongay a demak.

5. O misatekeday maolah to niyah a tamdaw, paihekalay to manan a waywayan?

⁵ Ora nisowalan i 2 Timoti 3:2 a misatekeday maolah to niyah hananay, o cowa ko matatodongay a olah kora, ao maˈidiay a olah. Misatekeday maolah to niyah a tamdaw, pakinaliay a misakareteng to niyahan. (ˈOsien ko Loma 12:3.) O niyah aca ko mikiharan nangra, caka pikihar to tao. Ano mararaw ko demak i, o tao ko mirorohan, caka sapitamorongaw to ˈinorong. O cecay mitadtaday to Fangccalay Cudad a tamdaw somowalay, “O matiraay tamdaw mahecaday toya cicekaay a ˈaˈadopen, mananamay cangra milolod to tireng, pasilalomaˈen ko kaepeday a fanoh, pasipapotal to ceka a mitoroˈ to tao,” o mahaenay misatekeday to niyah a tamdaw, cowa ka lipahak cangra.

6. Maolahay to Kawas a tamdaw, papalahad to manan a capeling?

⁶ O pitadtad no roma cudad toni tatiihay a pinangan, paisalakatan ni Pawlo somowal kora ‘misatekeday maolah to niyah,’ hananay, samanen o matiniay maˈidiay olah milingatay to romaroma tatiihay a pinangan. Nikawrira, o maolahay to Kawas a tamdaw paihekalay to heci no fangcalay saocor. Palalitingan no Fangcalay Cudad ko olah ato romaroma capeling, matiraay o lipahak, o rihaday, o kodait, o siniˈada, o ngaˈayay, o soˈlinay a falocoˈ, o damsayay, o pakaˈmetay to tireng. (Kalatiya 5:22, 23) Somowalay ko mitiliday to ˈOlic: “O mangodoay to Tapang [ci Yihofaan] a pala Kawas a finawlan i, tada o malemeday.” (ˈOlic 144:15) Ci Yihofa o lipahakay a Kawas, mansa o finawlan Ningra lipahakay. Oya misatekeday maolah to niyah a tamdaw, mitalaay to pipadama no tao, kawra o finawlan no Kawas makalimay mipadama to tao.​—Dmak 20:35.

7. Iraay ko manan a salicay ngangaˈay padama kitanan mihapinang to niyah, to maolahay to Kawas anca o niyah aca han?

⁷ Kita i, maolahay to niyahan a mikikaka ko nika olah to Kawas han? Filipi 2:3, 4 palimoˈotay kitanan: “Ano o maamaanto a demak i, aka kao misatekeday, aka kao mipasenengay ko demak namo. Kao misapoeneray ko falocoˈ namo. Ikakaay no mako ko tao, han ko  falocoˈ namo a masasi ngodongodo. Aka kao demak no tireng a cecay ko haharatengen. Halo notaoen a demak a miharateng.” Ngaˈayay licayen ita ko niyah: “Mitengilan ako koni sapalimoˈot han? Misaˈicelay kako midofdof to araaw no Kawas han? Itini i kasakopang ato mitosilay demak misaˈicelay kako padama to tao han?” Padama to tao latekay cowa ko madoloay, samanen mihaen to demak oha mamikinafalah to toki ato ˈicel no niyah, kawra, ano padama kita to tao mamahemek ko Kawas, awaay ko romaroma a hemekan to mikikakaay to pakahemekay toya satakaraway a Tatapangan ci Yihofa.

8. O olah to Kawas mikowaday to romaroma tamdaw makahi a misamaan to demak?

⁸ O olah to Kawas mikowaday to romaroma tamdaw makahi mifalah to sakacihafayaw, misarocod to falocoˈ a midoko ci Yihofaan. Patinakoen, ci Arik itiniay i Padaka a ising, cowa picangacang to saka cinganganaw itini noisingan a demak, ao misakafahay ko demak, cingra ato faˈinay tayniay i roma kitakit a matayal. Sanay milomal cingra: “O nilifetan itini i roma kitakit ato kafanaˈan niyam a widang, palipahakay to kaˈorip niyam. Nohatini, mala isingayho kako, kawra, o adihayay toki ako ato ˈicel itiniay i pidimokos to saka tanoktok noˈadingoan no tao, ato padama to i kasakopangay a salikaka, mihaen to demak lipahakan nanay kako, marenecay ko falocoˈ.”

9. Misamaanay hano maolah to payso ko tamdaw, awaay ko tadaˈocay a lipahak?

⁹ Sowal ni Pawlo ‘maolahay to payso’ ko tamdaw sanay. Itini i Aielan, ˈayaw no pina miheca tosilan no cecay misakafahay ko cecay faˈinayan pakayni i Kawas, solot han nora faˈinayan i ˈalofo ko payso, tatoyen ningra talafekang, malitaˈang a pasowal: “Onini ko kawas ako!” Soˈlin cowa pihaen ko ˈalomanay patodicek saan pasowal to harateng pakayni payso, kawra soˈlinay maolah ko ˈalomanay tamdaw to payso ato macakayay no payso a maamaan. Kawra patalipaˈelalay ko Fangcalay Cudad kitanan: “O maˈanofay to payso i, caay ko payso ko sakaraheker ningra. O maˈanofay to dafong i, caay ko dafong ko sakaraheker ningra.” (Patnakay 5:10) Maˈanofay to payso a tamdaw, cowa ka citolas a misaali to adihayay a payso, ˈarawhan “ta mapades a mararom ko falocoˈ nangra to masamaamaanay.”​—1 Timoti 6:9, 10.

10. Samaanay ko pinengneng ni Akur to manikaway ato cihafayay?

¹⁰ Manaokaniw, misaaliay to payso kita, samanen iraay ko pidipot no payso kitaanan. (Patnakay 7:12) Kawra, ano o kalo a saali aca ningra ko mamarenec, o lalipahak cingra han? Manaeca. (ˈOsien ko Patnakay 5:12.) Sanay mitolon ci Akur o wawa ni Yaki: “Aka padafongen kako, patatodong han ko sakaˈorip aca ako a kakaenen.” Mitadtad ci Solomon, cowa ka ciharateng cingra to nika nikaw a mitakaw, teloc mapakangodo ko ngangan no Kawas. Kawra hano mingitangit to Kawas aka padafongen kako saan hani? Sanay ko sowal ningra: “Ano cirafas kako i, latek manaˈay kako i Tisowanan, ‘somowal to “cima ci Yihofa?” Wa saan.’” (Taneng 30:8, 9) Anini, o roma tamdaw mahaenay nisowalan ni Solomon, o hafay no niyah ko mitiˈeran ao cowa ko Kawas.

11. Pakayni payso patalipaˈelalay ci Yis to manan?

¹¹ O maolahay to payso a tamdaw, cowa pakahemek to Kawas. Sanay ci Yis: “Caay ka ngaˈay a tosa ko tapang no cecay a matayalay a koli. Nawhani ano haenen ningra i, kaˈosien ningra ko cecay, kaolahen ningra ko cecay. Ano eca i, kangodoen ningra ko cecay, epecen ningra ko cecay. Orasaka, ano palecaden namo ko harateng to saki Kawas ato saki dafong i, caay ka ngaˈay. Aka pinaˈang itini i hekal to malodafong namo. Nawhani ano haenen namo i, ira ko aayad a mikaen, o mamatayiˈ a mapohed. O romasato, o mamatakaw no mitakaway a tamdaw. Naˈangen i  kakarayan ko malodafong namo. Nawhani awaay ko aayad a mikaen. Caay ko mamatayiˈ a mapohed, awaay ko mamitakaw a tamdaw itira.”​—Matay 6:19, 20, 24.

12. Misadolo to kaˈorip misamaanay padama kitaanan midoko ci Yihofaan? Patinakoen hena.

¹² Mahapinangay no ˈalomanay, misadolo to kaˈorip palipahakay cangranan, adihayto ko toki nangra midoko ci Yihofaan. Patinakoen, itiniay i Padaka ci Ciyak toha sapipacafayaw to fafahi a mala misakafahay, milahecian ningra ko singdi ningra, paliwalan ko taˈangayay lomaˈ. Sanay milomal cingra: “Mifalah kami to makapahay a lomaˈ niyam ato sera, cowa ko madoloay. Itiya pinaay miheca, pakayniay i tayal minokay tahalomaˈ maˈefangay ko falocoˈ. O fafahi ako o miceriday a misakafahay, marariday a lipahak cingra. ‘Iraay ko sangaˈayay a tawki ako!’ Sanay ko sowal ningra. Nohatini misatapangayto kako mala misakafahay, mala cafayay kami matayal to sangaˈayay a tawki ci Yihofa.”

13. Wa misamaan mafanaˈ to samaanay ko kapinengneng no mita to payso?

¹³ Sakafanaˈaw to samaanay ko kapinengneng no mita to payso, sasoˈlinen a milicay ko niyah: “Pakasoˈlinay kako to kapinengneng no Fangcalay Cudad pakayni to payso, mikalasaka dademak a mitoor han? Tada masaka limelaan i nokaˈorip ako ko mietanay to payso han? Pakayni i dafong ikakaayho to nika lalaˈed aci Yihofa ato nika lalaˈed ato romaroma tamdaw han? Pakasoˈlinay kako ci Yihofaan to dadipoten Ningra ko saali ako han?” O ngangaˈay pakasoˈlinen ita ci Yihofa, cowa ko papatoled to mitiˈeray i Cingranan a tamdaw.​—Matay 6:33.

14. Sasamaan ko kapinengneng no mita to lawla?

¹⁴ Paliˈayaway ko Fangcalay Cudad, itini i salikoray ˈawaled o tamdaw ‘maolahay to lawla.’ O matatodongay lawla awaay ko kararawan, mahaen matatodong ko kapinengneng ita to niyahan ato payso. Rorayen ko kaˈorip cowa ka saan ci Yihofa kitanan, cowa pikeceng kitanan a malawla. Soˈlinay haw i, pakalalokay ko Fangcalay Cudad to madimadiay a sikawdan no Kawas: “Dada, kahemek a komaen to hemay, kalipahak a komaen to epah iso.”​—Patnakay 9:7.

15. Itini i Timoti 3:4 somowalay, o manan ko tatodong no ‘maolahay to lawla’ hananay?

¹⁵ Itini i Timoti 3:4 somowalay, orira  maolahay to lawla a tamdaw cowa pikihakihar to Kawas sanay. Sinanoten kora sinael, o olah nangra to lawla ikakaay ko nika olah to Kawas, hato iraayho ko miming olah to Kawas cowa ka saan. Nao cowa ka olaolah to Kawas cangra o sanay. Mahaenay ko sowal no cecay matanengay a tamdaw: “Iraayho ko miming a olah nangra to Kawas cowa ka saan, ao caay ka olaolah aca cangra to Kawas.” Tada karetengay a saparikec toya misamacayay micangacang to lawla a tamdaw koni sowal! O sowal no Fangcalay Cudad o matiniay tamdaw ‘macepetay no acang no hekal’ cangra.​—Luka 8:14.

16, 17. Pakayni i lawla, patirengay ci Yis to manan a ngaˈayay a taˈarawan?

¹⁶ Ira ko matatodongay a noka pinengneng to lawla, pakayni tonini, patirengay ci Yis to ngaˈayay a taˈarawan. Mirienangay cingra to “pararamoday,” ato “tadamaanay a sapataheka.” (Yohani 2:1-10; Luka 5:29) Itini i pararamoday, tona cangoˈotay ko epah, midemakay ci Yis to kafahekaˈan a pala epah to nanom. Kina cecayay, milikafay ko tamdaw cingranan to halikaenay haliepahay, somowalay cingra to cowa ka tatodong ko pinengneng nangra pakayni tonini demak.​—Luka 7:33-36.

¹⁷ Nikawrira, cowa ko lawla aca ko kaciharatengan ni Yis. Paisalakatan ningra ci Yihofa, misaˈicel a padama to tamdaw. To sapilidongaw to ˈorip no ˈalomanay, makahiyay cingra misemsem a mapatay i pisemseman a tektek. Hananay ni Yis pasowal ko mikotoday i cingranan a tamdaw: “Ano milokes ko tamdamdaw i tamowanan a mikariˈang a mipalafo to masamaamaanay a tatiihay a sowal tona mitoor kamo i takowanan i, o malemeday. Nawhani mahaento a makariˈang ko iˈayaway namo a paliˈayaway to sowal no Kawas a tamdaw. Saka, kalipahak, kalipahak, nawhani tadamaan ko sapakaolah i tamowanan i kakarayan.”​—Matay 5:11, 12.

18. Toha sakafanaˈaw to pakinaliay ko niyah to lawla hokira, licayen ko niyah to manan?

¹⁸ Misamaan mafanaˈ kita to pakinaliay ko niyah to lawla hokira? Licayen ko niyah: “Ikakaan ako ko lawla to saˈopo ato mitosilay demak han? Mamakahi kako pakayni to sapidokoaw ci Yihofaan a mifalah ko kaolahan a demak ako han? Ano mipiliˈ to lawla, sasinanoten ako ko kapinengneng ni Yihofa han?” Ano soˈlinay maolah kita to Kawas, o laliyasen ko caay kaolahan a demak no Kawas, cowa ka hatini aca, ano cisasaay kita to mamaketer Cingra alatek, aka a pidemak tora.​—ˈOsien ko Matay 22:37, 38.

19. Masamaanay a tamdaw cowa ko mamilifok to soˈlinay a lipahak hani?

¹⁹ 6,000 miheca misemsem ko tamdamdaw, kawra oni hekal ni Satan, mamalahedawto. Nohatini toniya hekal matomesay ko misatekeday a maolahay to niyah, maolah to payso, maolah to lawla a tamdaw, o coos aca no niyah ko miharatengan nangra, ono niyah aca sakangaˈay ko mikiharan, o mahaenay tamdaw cowa ka hemek cangra. Sowal no mitiliday to ˈOlic: “O mapadamaay no Kawas ni Yakop a tamdaw i, tada o malemeday, o mitiˈeray a tamdaw to Tapang a Kawas ningra i, tada o malemeday.”​—ˈOlic 146:5.

20. O nika olah to Kawas, papaira to manan a sapalemed kisowanan hani?

²⁰ O olah no tamdaw ni Yihofa i Cingranan, padadotocay a macakat, to mihecaheca ˈaloman ˈalomanay ko midokoay to Kawas. Paihekalay koni to mangataayto mikowan ko Hongti Kitakit no Kawas, kakalikito mapalemed koni cikiw. Midofdof to araaw no Kawas ngaˈ, paira to soˈlinay a lipahak ita, samanen mafanaˈay kita mihaen to demak pahemekay to Kawas, o maolahay ci Yihofaan a tamdaw, tatahadaˈoc a mapalemed. Ilaenoay lalakaw mamilengo kita, o misatekeday a olah, pairaay to maanan tatiihay a waywayan, misamaanay masasiroma to mikiriwiˈay capeling no tamdaw ni Yihofa.