1, 2. Isaka 2018 miheca iraay ko manan a saˈopo, wa ngaˈay palacecay kitaanan? Misamaanay? (Nengnengen ko satapangan coka.)

ITINI I 2018 miheca 3 folad 31 romiˈad ikor no micelem ko cidal, o finawlan no Kawas ato makalimay minanam to Fangcalay Cudad a tamdaw wa masaˈopo, mirienang to mihecahecaan a Lafi no Tapang, ˈalomanay ko tamdaw malacafayay a miharateng to kapatay ni Yis. Oniya Piharatengan a Saˈopo palacecayay kitaanan, awaay ko roma demak to ngangaˈay a pakarini!

² Wa mahemek ci Yihofa aci Yis pakaˈaraw, itini i cowacowa pala a tamdaw mirienang toni mikiriwiˈay a saˈopo. Pairasolay ko Fangcalay Cudad: “Nanoya, nengneng sa kako i, maˈaraw ako ko caay ko mamafilo a saˈosien a ˈalomanay a finawlan. O kasakitakit, o kasangasaw, o kasafinacadan, o masasiromaromaay ko sowal nangra.” Lekal sa cangra a somowal, “O Paˈoripay titaanan ko maroˈay i tadamaanay a ˈanengang a Kawas ita ato Tofor a Siri!” (Paˈarawan 7:9, 10) Mirienang kita to Saˈopo no Piharatengan to Kapatay ni Yis, paihekalay to kangodoˈ ita ci Yihofaan aci Yisan, mihaen to demak tada fangcalayto!

3. Oniya lalakaw wa pacaˈof to manan salicay?

 ³ Oni lalakaw wa pacaˈof to sepat a salicay: (1) Samaan kita mikitini i Piharatengan a Saˈopo milifok to epoc? (2) Oniya Piharatengan a Saˈopo wa samaan palacecay to finawlan no Kawas? (3) Samaan kita pakayni sakalacecayaw no finawlan no Kawas a misadak to ˈicel? (4) Oniya Piharatengan a Saˈopo a limasmas, wa mahererek han? Ano hatiraay i, wa hacowa toki hani?

4. Mirienang to Piharatengan a Saˈopo, hano o masaka limelaan hani?

⁴ Isalakat, songilaˈen a miharateng hano masakalimelaan ko pirienang to Piharatengan a Saˈopo. Mafanaˈay kita masalalomaˈay no matatodongay pidoko ko saˈopo. Ci Yihofa aci Yis misinanotay to cima ko mirienangay toniya kalimelaan a saˈopo. Mihaenay, edeng ano tatiih ko tireng ato pasangaray a demak, ano cowa ka hatira, wa mirienang kita toniya saˈopo. Tano waywayan ita paihekal to misaaretengay toniya saˈopo, wa ira ko lalangian ni Yihofa mitilid to ngangan ita i ‘sakaˈorip a cudad,’ o matiliday ko ngangan i sakaˈorip a cudad a tamdaw, wa tahadaˈoc ko ˈorip.​—Malaki 3:16; Paˈarawan 20:15.

5. Itini ˈayaw no Piharatengan to Kapatay ni Yis a Saˈopo, wa ngaˈay kita, misamaan a “milifet a mihapinang” to niyah kamayan a madimadi to pidoyongan hokira?

⁵ ˈAyaw no pina lipay no Piharatengan to Kapatay ni Yis a Saˈopo, ngaˈayay palaken ita ko toki a mitolon, hanaca haharatengen ko kalalaˈed no niyah aci Yihofa. (ˈOsien ko 2 Korinto 13:5.) “Lifeten a mihapinang” ko niyah, kamayan a madimadi to pidoyongan, ngaˈayay licayen ita ko niyah: “Pakasoˈlin kako to dengan koni likakawa, misakadademakan ni Yihofan palaˈosi to araaw Ningra han? Miemienay to ˈicel kako a mitosil, pasifanaˈ to ngaˈayay ratoh no Hongti Kitakit to tamdaw han? O waywayan no mako paihekalay to pakasoˈlin to salikoray a romiˈad nohatini, mamahererek ko pikowan ni Satan han? Nohatini mahecaday kako toya pipatafang to tireng ci Yihofaan, misarocod to falocoˈ, mitiˈer ci Yihofa aci Yisan han? (Matay 24:14; 2 Timoti 3:1; Hipray 3:14) Harateratengen ko caˈof noni salicay, papadama kitaanan padadotoc a milifet a mihapinang to samaanay a tamdaw ko niyah.

6. (1) Samaan ko demak ita ngaˈ milifok to tahadaˈocay a ˈorip? (2) To mihecahecaan, o cecay malohemay malitengay samaanay misaday to Piharatengan a Saˈopo? Wa ngaˈay kiso misamaan to demak?

⁶ Wa miˈosi ato midotim kita to milingatay to Piharatengan a Saˈopo a lalakaw. (ˈOsien ko Yohani 3:16; 17:3.) Kalimelaan ko ‘kafanaˈ ita’ ci Yihofaan ato ‘pasoˈlin a mitiˈer’ to wawa Ningra ci Yisan, ngangaˈay milifok to tahadaˈocay ˈorip. Ano misaday kita to Saˈopo no Piharatengan to Kapatay ni Yis i, ngaˈayay halakaen ko cacekiwen mitoor a midemak, mihaen wa ngaˈay matongal ko kalalaˈed no niyah ci Yihofaan aci Yisan. Nengnengen ita to samanay ko demak no cecay halafinay malo malohemay malitengay a salikaka. Itini pina miheca misopedan ningra ko adihayay lalakaw no Mikecolay, mahaen o milingatay to Piharatengan a Saˈopo, ato kaolah ni Yihofa aci Yis kitanan a lalakaw. Itini ˈayaw no pina lipay no Piharatengan a Saˈopo, miliyaway cingra, miasip toniya lalakaw halo miharateng to kalimelaan noniya saˈopo. Padotocay cingra a misoped to hatiniay lalakaw. Mahapinangay noniya malohemay malitengay, milomal to hatiniay lalakaw, ato midotim to aasipen a sinael i ˈayaw no Piharatengan a Saˈopo, to mihecahecaan mananamay ningra ko faelohay a kalimelaan. Sakakaay i, matongalay ko ˈangongol no kaolah no niyah ci Yihofaan aci Yisan. O hatiniay pihalaka a micekiw, wa ngaˈay padama tisowanan matongal ko olah ato piakoˈid ci Yihofaan aci Yisan, mihaen wa malifok iso ko taˈangayay epoc mikitini Piharatengan a Saˈopo.

7. (1) Tiya patireng ci Yis to Lafi no Tapang i, micangacangay cingra to manan i Wama hani? (2) Samanay a mahapinang ita to pacaˈofan ni Yihofa ko satolon ni Yis?

⁷ Tiya patireng ci Yis to Lafi no Tapang i, mihadakayto mikiriwiˈay a satolon. Masowalay ningra ko kalacecay no niyah ato Wama, cangacangayho to Wama, palacecay to nisawawaan, mahecad cingranan ato Wama. (ˈOsien ko Yohani 17:20, 21.) Itiya a romiˈad, pacaˈofan ni Yihofa ko satolon no kaolahan Ningra a wawa, anini ˈalomanay tamdaw anini pakasoˈlinay to miocoran ni Yihofa ci Yis. O Piharatengan a Saˈopo tada pahapinangay to tamdaw to nika lacecay no Misawacayay Tamdaw ni Yihofa, samanen icowacowa caay ka hecad a kitakit ato fanges a tamdaw, mirienangay toniya saˈopo. Itini i roma kilac, pasangaray a maˈaraw, malacafay ko cowa ka lecad a ngasaw, mirienang to saˈopo no pidoyongan, harateng no roma tamdaw, coka ngaˈay ko mihaen to demak sanay! Itini i pinengneng ni Yihofa aci Yis, malacecay ko salikaka mapolong tada fangcalay!

8. Mifanaˈan ni Yihofa ci Icikil to maanan a demak?

⁸ Mafanaˈay kita to finawlan no Kawas wa paihekal to malacecayay a harateng, samanen pairasolay ci Yihofa to mamifekad koniya demak. Ocoran Ningra ci Icikil, miala to matiliday ko “Yuta” a cokor, ato matiliday ko “Yusif” a cokor mipakakiting. (ˈOsien ko Icikil 37:15-17.) Isaka 2016 miheca saka 7 folad a Mikecolay, “Salicay no Miˈosiay Tamdaw” sanay mitadtad: “Mifanaˈan ni Yihofa ci Icikil to cecay matomesay to hatokel a lihaf, mikiˈokay Cingra wa minokay ko Israil tamdaw i mikiˈokan a pala, miliyaw malacecay malo kitakit. Oniya lihaf pairasolay i salikoray romiˈad, wa malacecay ko finawlan no Kawas a mihodop Cingraanan.”

9. O Piharatengan a Saˈopo, samaanay padama kitanan mihapinang to pairasolan ni Icikil a malacecayay a harateng?

⁹ Mikitini i 1919 miheca a misatapang, palidlid hananay ni Yihofa a milikakawa ko mapasimalay Krisciyang, miliyaw a palacecay cangranan. O cokor no “Yuta” mitaypiyaway to mapasimalay Krisciyang, o cokor ni “Yusif” mitaypiyaway to aitini fafekang no sera, tahadaˈoc maˈorip a tamdaw, oniya tosa ˈopo wa “malacecay ko kasafelaw.” (Yohani 10:16; Cikariya 8:23) Mikiˈokay ci Yihofa wa palacecayen to koniya tosa cokor. (Icikil 37:19) O masowalay ni Icikil a “sikawdan ci Tafiti,” mitaypiyaway ci Yis Kristoan, itini pikowan noniya hongti, oniya tosa ˈopo nohatini malacecayay a mihodop to Kawas. (Icikil 37:24, 25) To mihecahecaan, o maˈosaway a mapasimalay ato roma siri masaˈopoay miharateng to kapatay ni Yis, paihekalay cangra to misowalan ni Icikil a malacecayay a harateng. Hatiraay, wa ngaˈay kita misamaan mitafo ato micowat to kalacecay no Krisciyang hani?

10. Wa ngaˈay kita misamaan micowat to kalacecay no finawlan no Kawas?

¹⁰ O sapicowat kita to sakalacecay no finawlan no Kawas a pakayraan i palahad to misapoeneray a capeling. Itiniho i fafekang no sera ci Yis, palimoˈotay to nisawawaan misapoener to falocoˈ. (Matay 23:12) Ano misapoener ko falocoˈ ita, cowato ko mamalingat no misakataraway a harateng no hekal, oha mamidofdof to mikayatay a tamdaw, oniya midofdofay a harateng wa palacecay to kasakopang. Sakakaay i, ano paihekal kita to misapoeneray falocoˈ, wa mahemek ko Kawas, samanen, “Paculien no Kawas ko misatakaraway ko falocoˈ a tamdaw, palemeden Ningra ko misapoeneray ko falocoˈ a tamdaw.”​—1 Pitiro 5:5.

11. Ano dotimen ko tatodong no tahapinangan a dafong, wa samaan micowat to kalacecay hani?

¹¹ O roma sapicowat to kalacecay a pakayraan  i, dotimen ko tatodong no tahapinangan a dafong i Piharatengan to Kapatay ni Yis a Saˈopo. Itini ˈayaw no Piharatengan a Romiˈad, tangongolen ita misimsim ko tatodong noya epang ato epah, mangalef toya dadaya, tada mamihaen ko demak ita. (1 Korinto 11:23-25) Oya epang mitaypiway toya awaay ko raraw a tireng ni Yis, oya epah mitaypiway to malakisay ningra a remes. Kawra, o kafanaˈ aca to mitaypiwan no tahapinangay a dafong cangoˈotayho, haharatengen no mita, o sapatefoc paihekalay to olah ni Yihofa aci Yis, pakayniay i kitanan ko kinafalah ni Yihofa to wawa Ningra, ao ci Yis to makahiay pakayni kitaanan a kinafalah to ˈorip. Ano songilaˈen a miharateng ko olah Nangra kitaanan, wa miocor kitaanan tano olah a patikol to olah. O kaolah ci Yihofaan miocoray kitaanan malacecay ko falocoˈ to salikaka, mahecad to misefetan no sasoˈot kita a malacafay.

12. O sapatinako ni Yis samanay pahapinang kitanan, mitokelay ci Yihofa kitaanan misodod to tao?

¹² Saka tolo micowat to kala ceccay a pakayraan i, mikahi misodod to tao. Misodod kita to pakararaway kitaanan a tamdaw, paihekalay to miakoˈiday kita ci Yihofaan, pakayni i sapatefoc ni Kristo a misodod to raraw no mita. Patinakoay ci Yis mitadtad to kalimelaan ko misododay, maˈoningay i Matay 18:23-34. Maherek maˈosi toni a sinael, licayen ko niyah: “Sakadademakaw kako to sapasifanaˈ ni Yis han? Mihadidiay kako micada to salikaka, a cipinangto pakayraan nangra han? Soˈlinay kako makahi a misodod to pakararaway takowanan a tamdaw han?” Manaokaniw, iraay ko karetengay anca kahemaway a raraw, pakaynien i cowa ka lefot a tamdaw ko sowal, o roma a raraw pasangaray sododen. Kawra, mikitini kita i sapatinako ni Yis, mahapinangay to mitokelay ci Yihofa kitaanan mihaen to demak. (ˈOsien ko Matay 18:35.) Ihekalay ci Yis mifanaˈ, ano iraay ko lalangian ita misodod to salikaka, kawra caka kahi mihaen to demak, cowa ko mamisodod ci Yihofa kitaanan. Tada o haharateng no mita koniya sowal ni Yis! Tooren ko sapasifanaˈ ni Yis a misodod to tao, wa ngaˈayto malacecay ko salikaka.

13. Misamaanay misaˈicel a mitafo to rihadayay, ngangaˈay micowat to kalacecay?

¹³ Ano misodod kita to tao, o micowatay to rihadayay a tamdaw kita. Sowal no tarokos ci  Pawlo, wa tano “kao rihadayay a falocoˈ namo ko sakakakafit namo. Kararid a misaˈicel a maˈimer to nipipalaccay no [fangcalay saocor] i tamowanan.” (Ifiso 4:3) ˈAyaw ato ikor no Piharatengan a Saˈopo a romiˈad, songilaˈen ita miharateng to samanay ko niyah micada to tamdaw, toya Piharatengan a Saˈopo tongalen ko pihaen to demak. Ngaˈay licayen ita ko niyah: “Itini pinengneng no tao, o cowa ka ciˈinteh kako a tamdaw han? Miharateng ko tao takowanan, o misaˈicelay micowat to rihaday ato kalacecay han?” O haharatengen ita ko niya kalimelaan a salicay.

14. Wa ngaˈay kita misamaan tano olah a masasodosodod?

¹⁴ Saka sepat a pakayraan micowat to kalacecay i, todongen ko Kawas Yihofaan paihekal to olah. (1 Yohani 4:8) Kawra, coka ngaˈay mihaen ko harateng: “Maolah kako cingranan, samanen o salikaka ako cingra, soˈlinay cowa ka semer kako cingranan.” Ohatiniay a harateng cowa ka hecad to limoˈot ni Pawlo, sowal ningra kitanan, tano olah a masasodosodod. (Ifiso 4:2) Sinanoten sowal ni Pawlo cowa ko saka sodod aca, wa tano olah a masasodosodod, masasiromaay koniya tosa. Itini kasakopang, iraay ko masakenakenaay a tamdaw to masolotay ni Yihofa. (Yohani 6:44) Papiingiden ni Yihofa koniya tamdaw Cingranan, samanen maˈaraway Ningra ko kangaˈayen noniya tamdaw. Ano hatiraay i, wa ngaˈay saˈosien ita koniya salikaka to cowa ko kakaolahen ita han? Cowa kangaˈay mihaen! Tatengilen ko limoˈot no Kawas, maolah to cecacecay salikaka.​—1 Yohani 4:20, 21.

15. Hano mafanaˈ kita to mamahererek to Piharatengan to Kapatay ni Yis a Saˈopo hani?

¹⁵ Piharatengan to Kapatay ni Yis a Saˈopo wa mahererek, hano mafanaˈ kita hani? Itini i sapatemer no fangcalay saocor patikamiay ci Pawlo to mapasimalay a Krisciyang i Korinto a kasakopang, saka cecay a tikami milengoay to miharateng cangra to kapatay ni Yis to mihecahecaan, “o patalahekalay kamo a paratoh to patay [ni Yis] tahira i piliyawan ningra a tayni.” (1 Korinto 11:26) Masowalay noniya sinael ko “tayni” sanay a tilid, tiya pairasolay ci Yis to kahererekan i misaka dademakay to “tayni” sanay, malengo ningra ko aira a taˈangayay a padiing, sanay ko sowal: “O mamaˈaraw i kakarayan ko kacipinangan to nipiliyaw noya tamdaw a tayni. Ta o tatomangic a maemin ko kasafinacadan no hekal. O mamaˈaraw nangra ko nika o tadaciˈicelay, o ciˈdilay koya tamdaw a pakatoˈem a tayni nai kakarayan. Ta ocoren ningra ko coyoh a patayra i kaˈamis i katimol i kawali i kaetip. (Matay 24:29-31) ‘Saˈopoan ko nipiliˈan a tamdaw’ mitoroˈan nonini oya itiniayho i fafekang no sera a mapasimalay a Krisciyang wa milifok to sapalifon i kakarayan. Wa isalakat mifekad to taˈangayay padiing, dotoc wa cadaen cangra tayra kakarayang, ikorto mifekad to Armakiton. Salikor, o Hongti ci Yis ato 144,000 a mapasimalay a Krisciyang, wa pakalowid to kalo hongti i fafekang no sera. (Paˈarawan 17:12-14) Mihaenay, iˈayaw no “tayni” ci Yis misaˈopo to mapasimalay a Krisciyang tayra i kakarayan a Piharatengan to Kapatay ni Yis a Saˈopo, o salikorayto koniya Piharatengan a Saˈopo.

16. Misamaanay hano misaˈosi ko falocoˈ iso, wa mirienang to Saˈopo no Piharatengan to Kapatay ni Yis aniniay miheca?

¹⁶ Misaˈosiay kiso mirienang to Saˈopo no Piharatengan to Kapatay ni Yis, itini i 2018 miheca saka 3 folad 31 romiˈad han? Cowa ko pihaen aca no mita to demak, micangacangho ci Yihofaan padama kitaanan, micowat to kalacecay i kalalaˈed. (ˈOsien ko ˈOlic 133:1.) Mafanaˈay kita wa ira ko cecay romiˈad, wa mirienang kita to salikorayto a Piharatengan a Saˈopo. Mihaenay, nanay misaˈicel kita mirienang toniya kalimelaan a saˈopo, salimlaen ko malifokay a kalacecay itini i Piharatengan to Kapatay ni Yis a Saˈopo.