1. (1) O tamdaw anini misiˈayaway to maanan a pasangaray? (2) Hano mahemek ci Yihofa to madimadiay a sikawdan Ningra? (Nengnengen ko satapangan coka.)

ITINI KITA salikoray romiˈad maˈorip adihayay ko kacarirawan. ˈAlomanay salikaka ita, misiˈayaway to cowa ka lecad a pasangaray, o roma mihadidiay to pakidemay adada. O roma matoˈasayto, kawra midipotayho to matoˈasay salawina. O roma salikaka pakayni sapaririˈaw to paro no lomaˈ, marorayay matayal, o roma Krisciyang cowa ka cecay aca ko misiˈayawan a pasangaray! Sapisaysayaw toniya pasangaray, adihayay ko mapalakay a toki ato ˈicel, adihayayho ko mapalakay a payci. Kawrira, pakasoˈlinay ko salikaka to sakiˈok no Kawas, caay ka cisasa ko harateng to hatokel noikor, tada pakahemekay ci Yihofaan konini!

2. (1) Mikitini Isaya 40:29 wa malifok ita ko maanan sapakalalok? (2) Wa ira ko manan a mararaway harateng no Krisciyang hani?

² Tolatekay pasangaran nanay kiso to macadaay a saroero i nokaˈorip han? Mahaenay ko harateng no ˈalomanay tamdaw. Sowal no Fangcalay Cudad, ono litengan a madimadiay sikawdan pasangaran mihadidi to misiˈayawan a sapalifet. (1 Hongti 19:4; Yopu 7:7) Kawra, micangacangay cangra to sadama ni Yihofa, cowa  pisawad, cowa pasokiyawen ni Yihofa cangra, samanen, o Kawas ita, ‘paˈicelay to marorayay a tamdaw.’ (Isaya 40:29) Ka adayayan i, o pakayraan no roma Krisciyang a misaysay to pasangaray, sawad sanay to noˈadingoan a demak, mihaen cangra to demak, o karetengay a ˈinorong ko midokoay to Kawas, cowa ko sakalipahak o sanay. Mihaenay, o roma Krisciyang, cowato piˈosi to Fangcalay Cudad, cowato pirienang to saˈopo ato mitosil, mahemekay ci Satan, mihaen ko demak no mita.

3. (1) Samaan ko demak ita ngaˈ caka pahecad to harateng ni Satan a malonay i noˈadingoan hani? (2) Oni lalakaw wa milengo to manan?

³ Mafanaˈay ci Satan, ano misarocod kita mirienang to demak no Krisicyang, wa matongal ko pasoˈlinay falocoˈ, cowa ka olah cingra tanoktok kita i noˈadingoan. Mihaenay, ano malotay ko tireng ato harateng iso, aka a piliyas ci Yihofaan, tongalen ko piingid Cingranan, oha ‘patanoktoken’ Ningra kiso. (1 Pitiro 5:10; Yakop 4:8) Oniya lalakaw wa milengo i pihodop no Krisciyang to Kawas, wa pakayni tosa a pakayraan a malonay, ato sasamaan kita misaka dademak to safalod no Fangcalay Cudad a misaysay to pasangaray. Kawra, salakaten ita minengneng ko Isaya 40:26-31, samanay somowal to iraay ko fadangalan ni Yihofa a paˈicel kitanan.

4. Mikitini Isaya 40:26, wa ngaˈay mananam ita ko manan hani?

⁴ ˈOsien ko Isaya 40:26. Aawaay ko pakaˈosiay a tamdaw to foˈis no kakarayan. Pasoˈlinay ko kakakosiya, itini i dohaw mataˈlifay ko 4,000 walwal a foˈis. Soˈlin hatira, panganganan ni Yihofa ko kahacecay no foˈis. Haratengen hena, ano misinanotan ni Yihofa ko awaay ko ˈorip a masangaˈay, coko a ikaka ko kaciharateng Ningra to maolahay Cingranan a madimadiay sikawdan han? (ˈOlic 19:1, 3, 14) Cipinangay ko kakarayan a Wama kitanan, sowal no Fangcalay Cudad: “Ano o fokesto no fongoh namo i, maeminay a masaˈosi.” (Matay 10:30) Mihadakay to sakiˈok ko mitiliday to ˈOlic: “Dipoten [ni Yihofa] ko mangodoay Cingranan a tamdaw.” (ˈOlic 37:18) Soˈlinay mafanaˈ ci Yihofa to o maanan ko masiˈayaway iso a sapalifet, wa padamaen Ningra kiso, ho ngaˈay kiso mihadidi to masakenaay a sapalifet.

5. Hano mafanaˈ kita to ngangaˈay ci Yihofa pafeli to misaalian ita a haˈicel?

⁵ ˈOsien ko Isaya 40:28. Taˈangayay ko ˈicel ni Yihofa, o Pipowaran no kihecod a ˈicel. Haratengen hena, hakowaay ko sapafeli no Kawas a ˈicel to cidal, o cecay mitatiliday a tamdaw ci Tafiti Potayni, sanay ko sowal: “Kinacecay miyaw, o masadakay no cidal a ˈicel, maedeng [pinaay poloˈ a walwal] a fakotang.” Sanay ko roma tamdaw, o cidal “kinacecay miyaw misadakan a ˈicel, maedengay sakadademaken no tamdaw to 20 ˈofad a miheca!” Ngaˈayay pafelien no Kawas ko cidal to taˈangayay a ˈicel, wa awa ko pakayraan Ningra pafeli kitanan to haˈicel a misaysay to pasangaray han?

6. Misamaanay o taloˈodan ni Yis, ‘o ngaˈayay tamorongen’ han ko sowal? Cipinang kita tonini wa misamaanto ko hademak?

⁶ ˈOsien ko Isaya 40:29. Mihodop ci Yihofaan tada pakahemekay kitaanan. Pasowalan ni Yis ko nisawawaan: ‘Sataloˈoden ko taloˈodan ako . . . mamasayal ko ˈorip namo. O ngaˈayay tamorongen ko taloˈodan ako, o kahemaway ko sapaˈorong ako.’ (Matay 11:28-30) Soˈliˈlinay ko sowal ni Yis! Tolatekay, ˈayaw no malingad masaˈopo anca mitosil marorayan kita, kawra minokayto kita, samanay ko harateng hani? Patikolay a ciˈicel kita, hanaca maherekayto misaday misiˈayaw to sapalifet i nokaˈorip. O taloˈodan ni Yis soˈlinay ‘o ngaˈayay tamorongen!’

7. Tinakoen mitadtad to Matay 11:28-30, o soˈliˈlinay a kimad konini.

 ⁷ O cecay fafahiyan salikaka ci Kayla, misiˈayaway cingra to hinarorayay adada, matoleday ato haliadadaay ko fongoh. Mihaenay, pasangaray a mirienang cingra to saˈopo. Kawra, cecay romiˈad misaˈicelay cingra mirieneng to saˈopo, sanay ko sowal: “Milengoay ko kimad to samaan misaysay to matoleday falocoˈ, haratengen ko lalakaw no kimad, hato siniˈadaay ato ciharatengay takowanan, cilosaˈay kako a mitengil. Oniya milifetan patalipaˈelalay takowanan, micerid mirienang to saˈopo.” Tada mahemekay koniya salikaka, misadak to ˈicel a mirieneng to saˈopo!

8, 9. Sowal ni Pawlo: “Nawhani yo tadanca kako i, ciˈicel kako.” O maanan ko tatodong noniya sowal ningra hani?

⁸ ˈOsien ko Isaya 40:30. Wa mihayi kita, ano hakowato ko ˈicel ita, ano tiˈeren ko ˈicel no niyah, cowa ko mamalaˈosi ko kihecod a demak. Tinakoen ko tarokos ci Pawlo, adihayay ko mademakay ningra, kawra iraay ko tolas no ˈicel ningra. Tiya fanaˈen ningra ko Kawas to nai falocoˈay a harateng i, sanay ko caˈof no Kawas cingranan: “Nawhani itiya i nika tadanca iso a masongilaˈ ko ˈicel Ako.” Cipinangay ci Pawlo tonini, mansa, mihaen ko sowal: “Nawhani yo tadanca kako i, ciˈicel kako.” (2 Korinto 12:7-10) O maanan ko tatodong noniya sowal ni Pawlo hani?

⁹ Cipinangay ci Pawlo, ano awa ko sadama no Kawas to niyah, citolasay ko mamademak. Itini ka tadancaan ni Pawlo, patongalay to ˈicel ko fangcalay saocor, padama ci Pawloan milaheci to adihayay a demak, oniniyan cowa ko nano ˈicel ni Pawlo ko sakalaˈosi. Anini, ano milifok kita to sadama ni Yihofa, wa ngaˈay ira ko taˈangayay a ˈicel!

10. Samanay ci Yihofa a padama ci Tafitian miremo to pasangaray?

¹⁰ O mitiliday to ˈOlic ci Tafiti, kinapinaay mikitini fangcalay saocor no Kawas milifok to ˈicel. Itini ˈOlic, sanay ko sowal ningra: “O pafeliay Kiso i takowanan to sapilowid to ˈada a ˈicel, saka, maedeng kako a mipelpel to pisitalaan nangra a ˈadipel.” (ˈOlic 18:29) Tolatekay, o malifaay ita a pasangaray—mahecaday o ˈadipel—ano tiˈeren ko ˈicel no niyah, cowa ko ‘pakacakat,’ misaaliay kita to sadama ni Yihofa ngangaˈay maremo ko pasangaray.

11. Tadtaden to sasamaan ko fangcalay saocor padama kitanan a misaysay to sapalifet.

¹¹ ˈOsien ko Isaya 40:31. Ngaˈayay ko lidep maefer i kakarayan ato maraay ko kaeferan, cowa ko ˈicel aca ko mitiˈeran, micaliwan nira ko macokacokay faedetay a fali, mirahid to ˈicel. Ano malifa iso ko pasangaray a sapalifet, cangacangen ko sadama ni Yihofa, wa pakayraen Ningra i “padamaay,” oya ˈicel no fangcalay saocor padama tisowanan, mahecad o lidep a maefer. (Yohani 14:26) Tada mahemekay kita, miceriday a micangacang to sadama no fangcalay saocor ni Yihofa. Ano ira ko lacongis ita to salikaka i, mangalefay misaali to sadama no Kawas. Itini kalalaˈed no salikaka hano ira ko lacongis hani?

12, 13. (1) Itini kalalaˈed no Krisciyang, hano ira ko lacongis hani? (2) Pakayni ci Yihofaan, mikitini milifetan ni Yosif, mananam ita ko manan hani?

¹² Kita ato salikaka sahetoay cowa ko malefotay, ano malacafay iraay ko cowa kahecadan a harateng. Latekay, o sowal ato demak no salikaka pakararaway kitanan, ano kita to pakararaway cangranan. O lacongis i kalalaˈed no Krisciyang, mahecaday o sapalifet. Kawra, soˈlin cowa ko malefotay ko salikaka, kamayan maolah ci Yihofa cangranan, mihaenay ano mapalifet i hatiniay demak, misaˈicel kita malacecay to salikaka, o paihekalay to madimadiay kita ci Yihofaan.

¹³ O milifetan ni Yosif pahapinangay kitanan to mihayan ni Yihofa a mapalifet ko sikawdan Ningra. Oya kaemangay a Yosif pakayni kaˈinap no kakakaka, mapacakayay tayra i Icip mala koli. (Satapangan  37:28) Maˈaraw ni Yihofa ko widang Ningra ci Yosif, caka sadafdaf ko micadaan maedeng adadaay ko falocoˈ. Nikawrira, cowa picapid ci Yihofa. Ikor, makotkotay no tamdaw ci Yosifan, sapiˈodangaw cingra to fafahi ni Potifa sanay, teloc mapalitay cingra, cowa ka congeden ni Yihofa koniya demak. Paihekalay koni to miliyasan no Kawas ci Yosif han? Cowa, sowal no Fangcalay Cudad: “Mikapot [ci Yihofa] ci Yosifan, saka, malaheci a maemin ko nidemakan ningra.”​—Satapangan 39:21-23.

14. Misamaanay hano ‘penecen’ ita ko keter hani?

¹⁴ O roma tinakoan, o widang no Kawas ci Tafiti, cowa ka hakowa ko tamdaw to mahecaday ci Tafitian, adihay ko malifaay to cowa ka sadafdaf a demak, soˈlin tahalifa cingra to hatiniay demak, cowa ka ngaliwngiw ko harateng. Ci Tafiti, itini i ˈOlic sanay: ‘Penecen ko keter, liyasen ko ngolaw, aka mafirang, o saka raraw konini.’ (ˈOlic 37:8) Hano ‘penecen’ ita ko keter hani? Samanen sapitodongaw kita ci Yihofaan, “caay pidoedo Cingra to lalayapen ita a mitefoc titaanan.” (ˈOlic 103:10) O roma, ‘mipenec’ to keter iraay ko saka ciepoc no mita. Ano maketer wa mipalakay to tireng, ˈakawangay ko ˈirang, ciadada tono saselaˈan, milingatay to ˈatay, tapeling, tatiihayho ko fitoka. Ano mangolaw kita i, wa pasangaray mihapinang to demak. Latekay, maherek mangolaw ko tamdaw i, wa halafinayto a matoled ko falocoˈ. Mahaen o sowal no Fangcalay Cudad: “O nika sinanot no falocoˈ i, o sakatanoktok no tatirengan.” (Taneng 14:30) Mihaenay, wa samaan kita a misaysay to mapakararaway no tamdaw a harateng hani? Samaan a mala kangaˈay to salikaka no mita hani? Saka dademaken ita ko citanengay a limoˈot no Fangcalay Cudad, wa malaˈosi ko pisiˈayaw to hatiniay a pakayraan.

15, 16. Ano mapakararaw no tao i, sasamaan ko hademak ita hani?

¹⁵ ˈOsien ko Ifiso 4:26. Ano caka ngaˈay ko hekal a tamdaw kitaanan, cowa ko fafahekaˈ kita, kawra, itini sasowalan ato waywayan midokaˈ ko salikaka ato paro no lomaˈ kitanan, wa mafahekaˈ a mararom kita halatek. Ano pasangar kita mipawan to pakararawan no tamdaw a demak, wa halafin a ˈinteh ko falocoˈ, anca mitoor to limoˈot no Fangcalay Cudad, kaliki a misaysay to demak hokira? Ano halafinto eca kalangaˈay kita to salikaka, wa pasangarto miliyaw ira ko rihadayay a kalalaˈed cangranan.

¹⁶ Ano pasangar kiso, mipawan to pakararawan no salikaka a demak, wa samaan ko demak iso a mala kangaˈay cingranan hani? Salakat, kifalocoˈen a mitolon ci Yihofa, cangacangen Cingra padama tisowanan ngaˈay ko kasasowal to salikaka. Haratengen  ora pakararaway a salikaka iso, o widang ni Yihofa. (ˈOlic 25:14) Ci Yihofa tano ciolahay falocoˈ ato siniˈadaay a pakayraan ko picada to widang Ningra, mitokelay Cingra mihaen ko demak iso. (Taneng 15:23; Matay 7:12; Kolosay 4:6) Dotocto, itini falocoˈ ngaˈayay haratengen to sasamaan masasowal cingranan. Hamaan misaˈosi to o padetengay ko salikaka midokaˈ tisowanan, pairaen ko toki a mitadtad. Hanaca, haratengen to iraay ko raraw no niyah. Ano masasowal kiso to salikaka i, tanamen mihaen to sowal: “Alatek, adihayay ko maharatengay ako, kawra, yasowal iso nacira, haratengen ako i, . . . ” Ano coka hecad ko minaroˈan no kasasowal to harateng iso, kilimen ko roma toki mala kangaˈay to salikaka. Patadoen cingra mitolon, micangacang ci Yihofaan palemed cingranan, cangacangenho ci Yihofa padama tisowanan misamacayto kangaˈayan ningra. Ano samaanto ko teloc, o soˈlinay noka pisaˈicel iso mala kangaˈay to salikaka, wa mahemek ci Yihofa.

17. Ano midemak kita to pakidemay a raraw, pakaynian ni Yihofa i masamanay pakayraan a padama titaanan? Micadato hatiniay a sapadama, hano o masakalimelaan hani?

¹⁷ O roma Krisciyang na midemakay to pakidemay a raraw, awaay ko tatodong no niyah a mihodop ci Yihofaan, sanay ko harateng. Pakayni kararaw tada adadaay ko falocoˈ nangra. Na iraay ko mahaenay harateng ni Tafiti, sanay cingra: “Yo caho patalahekal kako to raraw no tireng i, saromiˈamiˈad sa kako tomangic, maroray ko tireng ato falocoˈ ako . . . Sakareteng sa ko kamay Iso a mireken i takowanan.” Kawraan, tano noˈadingoan pinengneng ko sapisaysay ni Tafiti toniya demak, sowal sa cingra: “Patalahekalen ako ko raraw i Tisowanan . . . saka hepolen Iso ko polong no raraw ako.” (ˈOlic 32:3-5) Ano pakidemay ko raraw iso, makahiay ci Yihofa padama tisowanan misalof to kalalaˈed Cingranan. Kawra wa micada kiso to pakaynian no Kawas i kasakopang a sapadama. (Taneng 24:16; Yakop 5:13-15) Aka a pinayar—misaali to sadama, ano mihaen i, wa ira ko hatokel iso noikor! Kawra, ano halafinayto milifok kiso to sasodod, kamayan a misemsem ko falocoˈ, wa samaanto aki?

18. O roma Krisciyang marorayay ko falocoˈ to nano raraw isaˈayaw, o milifetan ni Pawlo wa ngaˈay misamaan pakalalok cangranan?

¹⁸ O tarokos ci Pawlo na pakayniay i saˈayaway a raraw maroray ko falocoˈ, sanay cingra: “O sasafaay a tarokos kako. Caay ka tatodong kako a cingangan to tarokos. Nawhani nano mikariˈangay kako to saˈopo no mitooray to Kawas.” Kawra, sanayho cingra: “O sakamatini no mako i, o nano siniˈada no Kawas.” (1 Korinto 15:9, 10) Mafanaˈay ci Yihofa to samanay a tamdaw ci Pawlo i saˈayaw, micadaan Ningra ci Pawlo, ciharatengay to saka cipinangaw ni Pawlo tonini. Ano pasasiyorayto kiso to nano raraw i saˈayaw, hanaca mihai iˈaˈayaw no malohemay malitengay to pakidemay a raraw, wa ngaˈayto pasoˈlin kiso to sasododen ni Yihofa kiso. Mihaenay tadiˈecen ci Yihofa, pasoˈlin to maherekayto Cingra misodod tisowanan.​—Isaya 55:6, 7.

19. O pakamihecaay a sinael i 2018 miheca o maanan? O sapatalipaˈelal noniya sinael hano o matatodongay aki?

¹⁹ Pakayni pingata no kahererekan a romiˈad no hekal, mafanaˈay kita wa matongal ko saroero no kaˈorip. Kawra, wa ngaˈay pasoˈlin kita to Kawas, “Paˈicelen Ningra ko marorayay ato masetoˈay a tamdaw.” Wa padamaen Ningra kita a mihadidi, padotoc a madimadi mihodop Cingranan. (Isaya 40:29; ˈOlic 55:22; 68:19) Itini 2018 miheca, ano mirienang kita to saˈopo ano maˈaraw ko pakamihecaay a sinael i, mapatalipaˈelal: O halamhamay ci Yihofaan a tamdaw o mamasafaeloh ko ˈicel.​—Isaya 40:31.