CI SILEWIYANA o misakafahay, mataˈlifayto 20 ko mihecaan, sanay cingra: “O widang ako tayraay i misaaliay to misakafahay a pala mitosil, matengilay ko nalifetan nangra, makalimay kako mitanam to matiraay a hemek. Kawra calemcemay kako, awaay ko inaneng tayra to hatiraay a pala a mitosil.”

Hatiraay ko harateng iso toni Silewiyana, sakatayraaw i misaaliay to mitosilay a pala han? Calemcemay to cowa ko mamatoor koni patosokan han? Ano hatiraay i, aka calemcem! O ˈalomanay salikaka, itini i sapadama ni Yihofa, pakaremoay to pasangar, adihay ko nidemakan saki Yihofa. Sakafanaˈaw kiso to misamaanan ni Yihofa padama ko salikaka, miremo to pasangar han? Tayra kita i saka sepat taˈangayay a potipot, i Matakaska kitakit a miˈaraw.

Toni pina a 10 mamihecaan, mataˈlifay ko 70 a ˈifowaay a mitosilay ato misakafahay, naitiniay i 11 a kakitakitan * tayraay i Matakaska a mitosil. Misakaretengay to Fangcalay Cudad ko ˈalomanay tamdaw itira, kadofahay ko minaroˈan no mitosilay. O itira tora pala a romaroma salikaka, makalimay malinah tayra i roma a kitiraan a mitosil. Nengnengen ita ko papina nangra.

Ci Lowis aci Perin oni mararamoday, mataˈlifayto ko 30 mihecaan nangra, naitiniay i Frans malinah tayra i Matakaska. Pinaay miheca cangra, misahalaka to mamalinah tayra i misaaliay to mitosilay a pala, kawra cowa ka masaˈosi ko harateng ni Perin. Sanay cingra: “Matalaway kako malinah tayra i kafahalan a pala. Miliyas to salawina, kasakopang, lomaˈ, miliyas to kananaman a kitiraan, mifalic to kananaman nokaˈorip, maharatengho konini calemcemayto kako. Hinacalemcemay kako to adihayay a demak, oha raremoen ako koni.” Tangasa saka 2012 miheca, iraayto ko timolo ni Perin, kalacafay to faˈinay miliyas to Frans. Samaanayto ko falocoˈ ningra hani? Sanay ko sowal ningra: “Ci Yihofa ko padamaay i tamiyanan, o matiniay a milifetan paˈicelay to nika pakasoˈlin ako.” Ci Lowis sanay pasowal: “Tada fahekaˈay  kami, sakina cecay a Piharatengan to Kapatay ni Yis a saˈopo, iraay ko moetepay a mipacekiwan mirienangay toniya saˈopo!”

Ano tahalifaay to pasangar i, sasamaanen nangra padadotoc tora ˈinorong hani? Mitolonan ci Yihofa, mingitangit pafeli cangranan to ˈicel a mihadidi. (Filipi 4:13) Sanay ci Lowis: “Mahapinangay kami to mitengilan ni Yihofa ko satolon niyam, parihaday tamiyanan, misamacay to kahemekan i mitosilay a demak. O roma i, patikamiay ko widang pakalalok to aka pisawad saan pasowal tamiyanan.”​—Filipi 4:6, 7; 2 Korinto 4:7.

Mihadidiay ca Lowis aci Perin, palemedan ni Yihofa cangra han? Sanay ci Lowis: “Isaka 2014 miheca ka moetepan folad, mirienangay kami to Pahatatanamay to Mararamoday a Krisciyang * i Frans, o sapatelong ni Yihofa koni.” Micudiyap cangra ikor, patikol tayra i Matakaska a mitosil cangra.

Isaka 2010 miheca, ci Titiay aci Natin, mataˈlifayto ko 50 a mihecaan nangra, naitiniay i Frans malinah tayra i Matakaska. Sowal sa ci Titiay: “Kaemangho misakafahayto kami, ikor palahaday kami to tatolo a wawa. Taˈangayto cangra i, malalengoay kami to ngangaˈay tayra i roma kitakit mitosil hokira.” Pasowal sa ci Natin: “Soˈlinay, tangoˈoray kami to wawa, kawra pasowal ko wawa tamiyanan: ‘Ano tayra kamo i roma kitakit i, malikoay kami tamowanan!’ Sanay. Mikowaday tamiyanan koni sowal. Soˈliˈlin mararaay kami ato wawa, kawra marariday mirinnakay kami ato wawa.”

Cowa ka dolo a minanam to sowal no Matakaska. Sanay matawa a pasowal ci Natin: “Cowato ko 20 ko mihecaan a kaemangay kami!” Hay, samaanay cangra pakafilo hani? Isalakat, mirienangay cangra to nowina sowal a kasaˈopoan, ikor masadayto ko falocoˈ i, malinahay tayra i sano Matakaskaay ko sowal a kasaˈopoan. Somowal ci Natin: “Mitosil kami i, ˈalomanay ko maolahay minanam to Fangcalay Cudad a tamdaw, marariday cangra miakoˈid to pilisoˈ niyam, hato talatiihay ko pihemek ako. Tada maolahay kako misakafah itini, lomowad to dafadafak, hananay ako pasowal ko niyah: ‘Tada ngaˈayayto! Malingadto kako mitosil anini!’”

Milomal ci Titiay to satapang minanam to sowal no Matakaska i, matawaay a pasowal: “Misikay kako to saˈopo i, mafokilayho mitengil to caˈof no salikaka, edeng “aray” aca ko sowal. Kinacecay pacaˈof ko cecay fafahiyan salikaka ikor, “aray” hananay ako, kawra oya maroˈay i lalikor a salikaka, mikawingay pasowal to mararaway ko caˈof ningra. Sakaliki sa kako mitoroˈ to roma salikaka papiliyaw a pacaˈof​—nanay matatodongayto kora caˈof ningra.”

Ci Tiyali ato fafahi ci Natiya, itini isaka 2005 miheca a taykay minengneng to cohi “Micangacang to Noˈadingoan a Patosokan, Paˈodingar to Kawas” i,  matemeray ko falocoˈ nangra to pakayniay ni Timoti a cohi, saka tayraaw i misaaliay a pala a mitosil. O sowal ni Tiyali: “Malaheci ko cohi, mipaepa to kamay ko ˈalomanay i, miingid hananay ako ci Natiya a milicay: ‘Talacowa kita mitosil hani?’ Mahecaday ko miharatengan ako, sanay cingra.” Cowa ka halafin, tangsolay cangra mitoor tora patosokan. Sowal sa ci Natiya: “Palidlid hananay milowan ko dafong niyam, salikor sepatayto a tulangko ko maˈosaway a dafong niyam!”

Isaka 2006 miheca, tayraayto i Matakaska cangra, maolahay to mitosilay demak itira. Pasowal ci Natiya: “O malitemohay niyam a tamdaw, tada palipahakay tamiyanan.”

Ikor no 6 miheca, tahalifaay ci Tiyali aci Natiya to pasangar. O wina ni Natiya ci Mari mapolinay, mapitekay ko kamay ningra, madokaˈay ko fongoh. Ikor, malalengo to ising cangra, licayan ko wina, makahi cingra malinah tayra i Matakaska hokira. Itiya 80 ko mihecaan ni Mari, kawra mahemekay cingra mihayda. Samaanayto ko harateng ni Mari to nokaˈorip i roma kitakit hani? Sanay cingra: “Tayni i roma kitakit a maˈorip cowa ko madoloay, soˈlin citolasay ko ˈicel ako, kawra iraay ko nika padama to kasakopang, kahemekan ako i, o tayni malacafay to wawa, ngaˈ cato ka pinokay cangra i Frans, padadotoc itini a milifok to kadofahay a minaroˈan no mitosilay demak.”

Ci Riana o 20 ko mihecaan a faˈinayan salikaka, itiniay i kawalian no Matakaska a Alaotera Mankoro a lomahad. Mafanaˈay micudad ci Riana, na miharatengay to papadotoc a micudad, kawra minanam to Fangcalay Cudad ikor, mafalicay ko harateng ningra. Sanay ko sowal ningra: “Inanengay kako micudad, sapikalikiaw kako micudiyap. Mitolon ci Yihofaan, ‘Ano mataˈlif ako ko salikoray a seking i, misatapang kako misakafah.’” Micudiyapto ci Riana i, malinah mikalacafay to cecay misakafahay a salikaka, mahelaay ningra ko apotoˈay toki a katayalan, misatapangto misakafah. O sowal ni Riana: “O tada ngaˈayay a saˈosi no mako konini!”

ˈArawhan, cowa ka hemak ko salawina ni Riana, hano caka misaˈicel cingra mikilim to ngaˈayay a katayalan. Sowal ni Riana: “O wama, faki, ato fofo ako paciˈciay takowanan mitakci to takarawan a picudadan, kawra cokakahi kako misawad to misakafahay.” Caho ka halafin, sakatayraaw to misaaliay to mitosilay a kilac. Sanay mitadtad cingra: “Kina cecayay matakaway ko lomaˈ ako, maalaay ko adihayay a dafong, oniya demak maharatengay ako koya sowal ni Yis, ‘naˈangen i kakarayan ko malodafong namo,’ sanay. Itiyaay kako misetek to falocoˈ misaˈicel a minaˈang i kakarayan to dafong.” (Matay 6:19, 20) Ikor, malinahay ci Riana i sakatimol no Matakaska, miraay to lomaˈ ningra to 1,300 kongli, o makedalay a kitiraan, o kitiraan no Antantelo a tamdaw. Hano tayra malinah ci Riana hani?

ˈAyaw no cecay folad ta mifekad ko mitakaway i, satapangay cingra pacekiw to tatosa Antantelo a tamdaw. Mihatatanamay ci Riana to Tantelo a sowal, samanen mafanaˈay cingra, iraayho ko ˈalomanay cowa ka matengil to lihaf no Hongti Kitakit. Sowal sa ci Riana: “Tolonan ako ci Yihofa, padama takowanan malinah tayra i cisowalay to Tantelo a kilac.”

Ikor, malinahay ci Riana. Kawra tangsol tahalifa to pasangar cingra, awaay ko katayalan toha sakaˈorip ningra. Sanay pasowal ko cecay faˈinayan i cingranan: “Mimaan tayni kiso saw? O itiniay tamdaw tayraay i niyaroˈ iso mikilim to katayalan, coka fanaˈ kiso han?” Ikor no tosa lipay, malingaday ci Riana mitaykay, awaawaayto ko payci ningra, fokil sanayto cingra. Toya salikor romiˈad no taykay, o cecay faˈinayan salikaka, pafeliay to dafong i ˈalofo ni Riana. ˈArawhan o payci kora, maedengay sapinokay tayra i Antantelo a kilac, hanaca ngangaˈayho misasingdi paliwal to ˈacicimay hacol cingra. Sowal sa ci Riana: “Malifetay ako ko pidama ni Yihofa, hato ngangaˈay padadotoc kako padama toya caayho ka fanaˈ ci Yihofaan a tamdaw!” Cowa koninian aca, adihayay ko tayal ni Riana i kasaˈopoan, sanay ko sowal ningra: “Ocoran no salikaka kako, kina tosa a lipay papikimadan ko cecay kimad no Fangcalay Cudad. Pakaynian ni Yihofa i likakawa Ningra pahatatanam takowanan.” Anini,  itiraayho ci Riana i cisowalay to Tantelo a kilac, mitenak to lihaf no Hongti Kitakit, padama cangranan mafanaˈ ci Yihofaan.

Mikiˈokay ci Yihofa kitanan: “Ano cimacimato a tamdaw ko mamilongoc to sapalemed i, katayra a maemin i kaˈayaw no soˈlinay a Kawas a mingitangit.” (Isaya 65:16) Mikiemel kita miremo to pasangar, adihay ko mitosilay a demak i, o mamalayap ko sapalemed no Kawas. Maharatengayho koya salakatay lalakaw a Silewiyana han? Calemcemay cingra matalaw tayra i taˈangayay ko saali a kilac a mitosil. Saan a mitadtad cingra: “Apotoˈay ko kawili ˈoˈo ako, mapiˈiway ko rakat ako, hinarorayay.”

Isaka 2014 miheca, ci Silewiyana aci Silewian, malacafayay cangra malinah tayra i 85 kongli ko raay a niyaroˈ. Soˈliˈlin misiˈayaway to adihayay pasangar, kawra malaheciayto ko patosokan ni Silewiyana. O manan ko malayapay a sapalemed hani? Sanay ko sowal ningra: “Cecayayho miheca kako itini, ya pacekiwan a kaemangay wina ci Toratin, micadaay to inoˈ i kasakilac taykay!”

Tayni i misaaliay kilac a mitosil a salikaka, paihekalay to taˈangayay a noka pakasoˈlin no falocoˈ nangra! Mikiˈokay ci Yihofa to sikawdan Ningra: “O papatanekteken Ako kamo a mipadama, o dadipoten Ako kamo a paˈorip.” (Isaya 41:10) Ano kiemel kita miremo to pasangar, ato adihayay ko tayal saki Yihofa i, wa mamatinako ita to papalaˈosi ko mikiˈokan ni Yihofa, hanaca o mamangata ko lalaˈed aci Yihofaan. Ano itiniay i niyaroˈ no niyah anca tayra i roma a kitakit, ano ira ko kalim no falocoˈ ita, wa ngaˈay misaday no niyah, itini i faelohay hekal a malaheci to tayal no Kawas. Mahaen ya nisowalan ci Titiay: “Tayra i misaaliay a kilac mitosil, wa pahatatanamay kitanan misaday to noikoran.” Nanay, ˈaˈaloman ko makalimay kinafalah to niyahan a salikaka, micada to matiniay a sapahatatanam!