1. O manan ko sakakaay a olah? Hano o sakakaay a olah han aki? (Nengnengen ko satapangan coka.)

MISALALANGIAY to safalod hananay a olah (Hipray sowal: a·kaʹpe), o naitiniay ci Yihofaan a sapaamid. O pipowalan no olah Cingra. (1 Yohani 4:7) O sakakaay a olah koni, iraay ko hemek no falocoˈ ato dihekoay. O cowa pisateked, miharatengay to sakangaˈay no tao ko matiniay a olah. O cecay taˈarawan cudad sanay ko sowal, o a·kaʹpe hananay a olah, “mahapinangay itini i demak ningra.” Ano patahekal kita to matiniay cowa pisateked a olah, o mamatomes to hemek ato epoc ko nokaˈorip ita.

2, 3. Samaanay ci Yihofa patahekal to cowa pisateked a olah i kitaanan?

² Caho ka masangaˈ ci Atam aci Ifa i, patahekalayto ci Yihofa to olah i tamdamdaw. Misangaˈ to cikiw Cingra, o kitiraan no tamdaw tahadaˈoc, rihaked ko kaˈorip. Mihaen ci Yihofa o sakaciepoc no mita, cowa ko Ningra a sakangaˈay. Patahekalay to cowa pisateked a olah to teloteloc ni Atam, ira ko hatokel maˈorip i lakoing tangasa i daˈoc.

 ³ Misafelitto ci Atam aci Ifa ikor, patahekalay ci Yihofa to cowa pisateked a olah, pakasoˈlin to teloteloc ni Atam aci Ifa, o aira ko mamaolah Cingranan, midofdof to limoˈot Ningra, saka milimasmas sa Cingra to sapatefoc. (Satapangan 3:15; 1 Yohani 4:10) Soˈlinay haw i, ta mihayda ci Yihofa to aira ko Milidongay a tatapangan i, hato pasadakayto a pafeli Cingra itiya. Ikor tono 4,000 miheca ngaˈ, mapatayto ko edengan Wawa ni Yihofa saki tamdamdaw. (Yohani 3:16) Tada o aakoˈiden ci Yihofa, patahekal to cowa pisateked a olah i kitaanan!

4. Misamaanay hano cowa ka lefot a tamdaw mamafanaˈ patahekal to cowa pisateked a olah? Sadaken ko tinakoan.

⁴ Tona miringian i Kawas kita a sangaˈen, o mamafanaˈ patahekal to cowa pisateked a olah. Marocok ita ko raraw ni Atam i, pasangaray patahekal to olah, kawra, awaay ko ˈicel ita patahekal to olah, cowa ka saan. Ci Apil, maolahay to Kawas, patafang to sangaˈayay dafong, patahekal to cowa pisateked a olah ningra. (Satapangan 4:3, 4) Ci Nowa, patahekalay to cowa pisateked a olah to tamdamdaw, soˈlin cowa pikihar cangra to lihaf no Kawas, kamayanay padadotoc to pinaay mihecaan a mitosil. (2 Pitiro 2:5) O olah ni Apraham mikikakaay to maamaan, mitoor to limoˈot no Kawas a patafang to wawa ci Isakan. (Yakop 2:21) Matira tora madimadiay a sikawdan, ano tahasiˈayaw to maanan sapalifet, ciharatengay kita patahekal to olah.

5. Sasamaanen ita patahekal ko soˈlinay olah i tao?

⁵ Mitadtad ko Fangcalay Cudad, soˈlinay olah hananay, caay “kao ngoyos aca ato sowal ko nipiolah . . . Kao soˈlinay a falocoˈ ato ngaˈayay a demak ko nipiolah.” (1 Yohani 3:18) Cowa ko ngangaˈay kita tano sowal a patahekal to olah han? Cowa ka hatira! (1 Tisalonika 4:18) Tatodong no sinael i, ano patahekal to olah kita, cowa ka i ngoyos aca pairaen ko demak. Patinakoen, ano cangoˈot ko salikaka to kalimelaan noka ˈorip i, o sowal aca cowa ko mamaedeng. (Yakop 2:15, 16) Mahecaday, maolah kita ci Yihofaan ato tao i, “ngitangiten ko tapang no cipanayay a papiocor to mamatayal a mipanay.” Halo misaˈicel kita a mitosil.​—Matay 9:38.

6, 7. (1) “Aka kao misamangahay ko olah” sa i, o manan ko tatodong hani? (2) Iraay ko manan a tinakoan pakayni to misamangahay a olah?

⁶ Somowalay ko tarokos ci Yohani, o olah ita, “kao soˈlinay a falocoˈ ato ngaˈayay a demak ko nipiolah.” Mankora o olah ita, “aka kao misamangahay ko olah,” patahekal to “nika soˈlin no olah,” wangaˈ. (Loma 12:9; 2 Korinto 6:6) Tatodong nonini, cowa ko ngangaˈay misamangah kita to iraay ko olah a misaˈfit to tao. Halatek wa ira ko milicayay: “Hano ira ko misamangahay a olah saw?” Cowa ko soˈlinay olah kora, o matiniay makaniway olah, awaay ko maamaan a epocan.

⁷ Nengnengen ko pina tinakoan no misamangahay a olah. Itini i Itin, ci Satan, misakihakihar ci Ifaan, kawra, ora demak ningra, o makaniway. (Satapangan 3:4, 5) Itini i lintad ni Tafiti, ci Ahitofil misao widang ni Tafiti, samanen, pakayniay i sakangaˈay no niyah a misafelit ci Tafitian. (2 Samuil 15:31) Anini, ya misafelitay to kimad a tamdaw, atoya mifodifoday to kasakopang a tamdaw, “o koesanay ato cisaˈfitay a sowal” mifiyor to tamdaw, nengneng han hato cikiharay to tao, ˈarawhan, ono misatekeday falocoˈ ko sapihaen.​—Loma 16:17, 18.

8. Lalicayen ita ko niyah to manan a salicay?

⁸ O misamangahay a olah, o masaka ngodoan  a demak, cowa kalecad to kinafalahay a olah. Alatek masaˈfit ko tamdaw, kawra cowa ko mamasaˈfit ci Yihofa. O sowal ni Yis, o mahaenay tamdaw “caay ko sasamadahen . . . mitefoc,” sanay. (Matay 24:51) O sikawdan ni Yihofa, cowa ko mamihaen a misamangah to olah. Kawra, lalicayen ita ko niyah: “Patahekalay kako to soˈlinay a olah, cowa pisamangah han?” Dotoc i, sinanoten ita ko siwa pakayraan, misaˈicel a patahekal to “caay pisamangah a olah.”

9. Ano iraay ko soˈlinay olah ita, mamisamaan ko demak ita?

⁹ Ano ecaeca ka fanaˈ ko tao to demak ita, lipahakho matayal saki cangranan. Makahi kita “milonok” a midemak to ngaˈayay, makapah ko demak i salikaka. (ˈOsien ko Matay 6:1-4.) Ci Ananiyas aci Sapfira, cowa pihaen to demak. Miliflifay a misakaniw to sapakiyaho payci, teloc kadayayan a mapatay cangra. (Dmak 5:1-10) Ano soˈlinay ko olah ita to salikaka, o lalipahak a matayal saki cangranan, cowa ko papakayni tora demak a misaˈakawang to niyahan. Patinakoen, oya mipadangay a misaday to noˈadingoan lalakaw to Mikayatay Malohemay Malitengay i Congpo a faˈinayan salikaka, cowa pasadak to ngangan cangra, caka olah misaˈakawang to niyahan, cowa ka pifanaˈ to manan ko demak nangra.

10. Itini i misakaretengay to tamdaw mamisamaan kita to demak?

¹⁰ Masasi misakareteng to tamdamdaw. (ˈOsien ko Loma 12:10.) Makahiyay ci Yis midemak to salaenoay a tayal, misakareteng to tao, patireng to taˈarawan ita. (Yohani 13:3-5, 12-15) Mamisaˈicel kita palahad to misapoeneray a capeling, hongaˈ mafanaˈ a misakareteng to tamdaw. Soˈlin mikotoday ko tarokos ci Yisan, kawra tiya caho ka cada nangra ko fangcalay saocor i, cowa ka fanaˈ to nidemakan ni Yis. (Yohani 13:7) Alatek kita soˈlin cihafayay, ˈakawangay ko picudadan, anca iraay ko mikiriwiˈay a tayal, cowa ko mamalitaˈang, mihaen to demak o misakaretengay to tamdaw. (Loma 12:3) Ano mapakahemek ko tao, cowa ko mamapodoh cangranan, soˈlin mahecaday ko katayal ita, o lalipahak cangranan.

11. Ano pakahemek kita to tao hano mikitini i falocoˈ wangaˈ?

¹¹ Kitinien i falocoˈ a pakahemek ko salikaka. Rariden a pakahemek ko salikaka, samanen papaˈicel cangranan ko mahaenay a sowal. (Ifiso 4:29) Ano pakahemek kitinien i falocoˈ, ano caka pihaen mahecaday misakaniway to tao, anca sapisawadaw miparikec to tamdaw. (Taneng 29:5) Somowal a pakahemek to tamdaw, kawra ilalikor ningra somowal to tatiihay ningra, o misamangahay demak koni. Cowa ka pihaen to tamdaw ko tarokos ci Pawlo, mikifalocoˈay pakahemek to tamdaw cingra, patireng to ngaˈayay taˈarawan no mita. Patinakoen, tona ngaˈayay ko waywayan no Krisciyang i Korinto, mikifalocoˈ a pakahemek cangranan. (1 Korinto 11:2) Nikawrira, ya caka tatodong ko demak nangra i, patahekalay to siniˈada ci Pawlo, misongilaˈay a mitadtad to misamaanay hano rikecen cangra.​—1 Korinto 11:20-22.

12. Misamaan kita patahekal to soˈlinay ko falocoˈ a hinapaladaˈ to tao?

¹² Hinapaladaˈ. Palimoˈotay ci Yihofa kitanan hinapaladaˈ to salikaka. (ˈOsien ko 1 Yohani 3:17.) Kawra, ano patahekal kita to hinapaladaˈay i, aka pairaen ko misatekeday a falocoˈ. Licayen ita ko niyah: “Ano patahekal kako to hinapaladaˈay i, o miharatengan ako, oyaan aca widang ako, ciˈinorongay a salikaka anca oya iraay ko ˈicel patiko a tamdaw han? Na cowa ka harateng  koya cowa ko kananaman, anca awaay ko ˈicel patiko a tamdaw han?” (Luka 14:12-14) Ano mararaway ko saˈosi no salikaka a misaali to sapadama, anca matawal no salikaka miakoˈid ko nika pihamham ita cangranan i, wa tatooren ita ko sapalimoˈot no Fangcalay Cudad: “Kasasi hamham kamo. Aka ka ngaliwngiw.” (1 Pitiro 4:9) Ano mihaen to demak kita, tona soˈlinay ko falocoˈ ita mipadang to tao a lipahaken.​—Dmak 20:35.

13. (1) Itini i masamaanay pakayraan, papatahekal kita to mihadidiay? (2) Sasamaanen ita midama ko malonayay tamdaw?

¹³ Damaen ko malonayay tamdaw. Pakalalokay ko Fangcalay Cudad kitanan midama to malonayay tamdaw, kodait a micada to polong a tamdaw, iraay hokira ko soˈlinay olah ita milingatay toni sapalimoˈot. (1 Tisalonika 5:14) ˈAlomanay isaˈayaw matoleday ko falocoˈ a salikaka, ikor tanektekayto cangra. Kawra, o romaroma alatek o hahadidien ita cangra, dotocen a mipadama cangra. Lengoen ita cangra to mikowaday sowal no Fangcalay Cudad, ataen cangra mitosil, anca palaken ko toki mitengil to falocoˈ nangra. Tohatiniay tanektekay kita, kawra nolatek iraay ko kalonayan, mansa ano malonay ko salikaka i, aka pakihater han, ano ci Pawloto somowalay to nika tadanca no niyah. (2 Korinto 12:9, 10) Mihaenay haw i, kita kahacecay a Krisciyang oha mamasasi damadama a mipadang.

14. Sasamaanen ita misaˈicel a mararihaday ato salikaka?

¹⁴ Micowat to rihaday. Mamisaˈicel kita rihaday ato salikaka, soˈlin ano mapakararaw no tao, anca caka sadafdaf ko picada no tao, mamihaen kita to demak. (ˈOsien ko Loma 12:17, 18.) Ano, o kita ko pakararaway, tayra kita miliˈay to tao, hanaca naitinien i falocoˈ. Ano midokaˈ ko sowal ita to tao i, haiyen ko raraw no niyah, pasowalen: “Kangodoanto, midokaˈ ko sowal no mako tisowanan.” Aka haenen ko sowal: “Kangodoanto, hatira ko harateng iso mitengil to sowal ako.” Itini noka raramod, masaka limelaan ko rihaday. O faˈinay ato fafahi, itini ˈaˈayaw no tao, hato makakaolahay, ˈarawhan cowa ka caciyaw no tekedan, anca maloka milokes ko sowal, malatiˈil.

15. Sasamaanen ita mikifalocoˈ a misodod ko tao?

¹⁵ Kifalocoˈen a misodod ko tao. Ano misodod kita to tao, wa makahi kita miliˈay to tamdaw, aka ˈinteh ko falocoˈ. O Krisciyang oha tatano olah a masasi mihadidi, tano rihaday a mitafo to nika lacecay, saˈicelen a mitafo ko mipairaan no fangcalay saocor a nika lacecay no mita. Alatek cowa ka fanaˈ ko tamdaw to mapakararaway nangra kita, ano mahaenay i, makahiho kita misodod cangranan. (Ifiso 4:2, 3) Ano mikifalocoˈ a misodod to tao, ˈimeren ita ko harateng, ho caka “pitafo i falocoˈ to tatiih no tao.” (1 Korinto 13:4, 5) Ano tatafo han i falocoˈ ko tatiih no tao, o mamipalak to kalalaˈed  ita ato salikaka, latek malahedaw ko noka lawidang aci Yihofa. (Matay 6:14, 15) Ano mitolon kita to pakararaway kitanan a tamdaw, patahekalay to kifalocoˈay kita misodod cingranan.—Luka 6:27, 28.

16. Sasamaanen ita minengneng ko tayal i likakawa ni Yihofa?

¹⁶ Kinafalah to sakangaˈay no niyah. Ano iraay ko mikiriwiˈay a tayal i likakawa ni Yihofa i, “aka kao sakangaˈay no tireng a cecay ko haratengen. Kao sakangaˈay no tao ko haratengen.” (1 Korinto 10:24) Ano mihaen kita, o toki koni patahekal to olah han a minengneng kora tayal. Patinakoen, o romaroma faˈinayan salikaka, o militemohay to micomoday i pitaykayan a tamdaw ko tayal, cangra ngaˈayay kinaˈayaw a micomod i pitaykayan. Kawra cowa ko mamikiˈayaw miterek anca patado to paro no lomaˈ miterek to sangaˈayay a kamaroˈan, o mamakahi cingra mipiliˈ i katayalan no niyah kilac to kamaroˈan. Mihaen cangra mikinafalah a patahekal to cowa pisateked a olah. O tatodongen iso ko taˈarawan nangra han?

17. Ano ciraraw to karetengay raraw ko Krisciyang i, soˈlinay olah mamicoroh cingranan misamaan ko demak?

¹⁷ Mihayi to raraw, aka pisimed to raraw. O roma Krisciyang ano ciraraw to karetengay raraw, matalaway mangodoen, matalaway to mamasomad ko tao, hato misimeday to raraw no niyah. (Taneng 28:13) Nikawrira, o mahaenay pakayraan cowa ko olah, samanen o mamiconged to fangcalay saocor no Kawas, halo mamifiyor to sakarihaday no kasakopang. (Ifiso 4:30) Ano iraay ko soˈlinay olah, oha tatayra i malohemay malitengay a pasowal to raraw, misaali to sapadama no malohemay malitengay.​—Yakop 5:14, 15.

18. Hakowaay ko nika masaka limelaan no soˈlinay olah?

¹⁸ O olah hananay o sakalimelaan a capeling. (1 Korinto 13:13) O patahekalay koni to nisawawaan ni Yis ko niyah, mitodongay toya Pipowalan no olah ci Yihofa. (Ifiso 5:1, 2) “Ano caay ka olah kako to tamdaw i, awaay ko epoc ako,” sanay ci Pawlo. (1 Korinto 13:2) Nanay padadotoc kita patahekal to olah, itini i sasowalen, itini i soˈlinay a waywayan.