O Sidaˈitay Sadama no Krisciyang
ˈAYAW no 60 miheca, itiniay i Kocilat no Intiya a niyaroˈ ko wama ni Yohani, micada to inoˈ malo Misawacayay Tamdaw ni Yohofa. O wina ato lalimaay salikaka ni Yohani mihakelongay to Tingsokiw, misafelitay cangra to pihakelongan no wama.
Cecay romiˈad, patoroday ko wama ni Yohani cingranan, pafeli to tikami i cecay salikaka. Toya papacem, mifohat ci Yohani to paetang i makelitay ko tarodoˈ no kamay, tangongolay ko dokaˈ. Kawra sapadamaaw ci Yohani to wama a pafeli to tikami, tafo hananay ningra ko madokaˈay a tarodoˈ, malingad a pafeli to tikami.
Tahira ci Yohani i lomaˈ no salikaka i, o fafahi aca i lomaˈay. O Misawacayay Tamdaw ni Yihofa cingra. Tiya micada to tikami i, maˈaraway ningra madokaˈay ko tarodoˈ ni Yohani, tangsol miala to cemel, patado ci Yohanian a misawsaw to dokaˈ. Dotoc pananom ci Yohanian to faedetay a ociya, sidaˈitay a milengo to Fangcalay Cudad ci Yohanian.
Oniya sidaˈitay a sadama no salikaka, mifalicay to pinengneng ni Yohani to Misawacayay Tamdaw ni Yihofa. Licayan ningra ko salikaka to tosa pakayniay pihakelongan a salicay. O Kawas ci Yis hokira, o Krisciyang wangaˈay pasayra ci Mariyaan mitolon hokira. Mahapinangay no salikaka ko nowina sowal ni Yohani, o Kocilat a sowal, tangsolay tano Kocilat a sowal ko saka sasowal cingranan, tano Fangcalay Cudad a pacaˈof to salicay ni Yohani, pafeli ci Yohanian to Ngaˈayay Lihaf no Hongti Kitakit a cudad.
Miˈosi ci Yohani toniya cudad i, o soˈlinay kimad konini sanay. Tayraay cingra i misasingsiay no kiyokay, milicay cingranan to mahecaday salicay. Cowa pakahadidi koya simpo, mangolaway tano Fangcalay Cudad a mitekol cingranan, celiˈ sanay cingranan: “Ci Satan kiso! Icowaay no Fangcalay Cudad ko somowalay to cowa ko Kawas ci Yis, ato cowa kangaˈay midoko ci Mariyaan! Pasowalen kako!” Macekiday ci Yohani to demak no simpo, sanay pasowal cingranan: “Cowato ko mamiliyaw kako micomod i Tingsokiw!” Soˈlinay cowato ka tayra ci Yohani.
Ikorto, mala cafayay ci Yohani to Misawacayay Tamdaw ni Yihofa a minanam to Fangcalay Cudad, micadaay cingra to soˈlinay kimad, misatapang a mihodop ci Yihofaan. Ikor no cecay liyad, o roma paro no lomaˈ ningra mala Misawacayay Tamdaw. Anini, itini i tarodoˈ ni Yohani, iraayho ko materekay a padiyac i ˈayaw no 60 miheca. Mahemekay cingra to sidaˈitay a sadama no Krisciyang, hongaˈay mafanaˈ to Kawas, hakelong no ˈorip mihodop to Kawas.—2 Korinto 6:4, 6.