1-3. (1) Ihacowaay mitiliday to ˈOlic 147 fedengan? (2) O manan ko mamananam ita nai ˈOlic 147 fedengan?

ANO madangar no cima ko manan demak, anca iraay ko makapahay a capeling no Krisciyang ningra, o papahemeken no tao cingra. O nisangaˈan no Kawas a maamaan, tada patahekalay too ciˈicelay Cingra. Maolahay ko Kawas kitanan, pafeli to wawa Ningra malo sapatefoc. Mankora, coko iraay ko lalangian ita pahemek ci Yihofaan han?

² O mitiliday to ˈOlic 147 fedengan, makalimay pahemek ci Yihofaan. Hanaca pakalalokay to romaroma a mihaen a pahemek to Kawas.​—ˈOsien ko ˈOlic 147:1, 7, 12.

³ Caka fanaˈ kita to cima ko mitiliday to ˈOlic 147 a fedengan. Kawra, itiniay maˈorip tiya matedalto ko Israil nai Papilon, minokay i Yirusalim alatek. (ˈOlic 147:2) Tona patikorto i niyaroˈ a midoko to Kawas, masemeray ko falocoˈ ningra pahemek ci Yihofaan. Somowalayho to roma lalangian a pahemek to Kawas. O manan hani? O manan ko lalangian ita milekal to “Haliloya” a pahemek ci Yihofaan hani?​—ˈOlic 147:1; Paˈarawan 19:1.

4. Tiya mitedal ci Kirus to Israil tamdaw i, samaanay ko falocoˈ nangra? Misamaanay hani?

⁴ Haratengen hena, ta miliyas ko Israil to Papilon i, samaanay ko falocoˈ nangra. “Dada, karomadiw to saki tamiyanan to radiw no Cion,” hananay no ˈada a milokes cangra. Itiya, malaˈafoayto ko Yirusalim, caayto ka lipahak ko Israil midoko ci Yihofaan. (ˈOlic 137:1-3, 6) Awaayto ko saka romadiwaw nangra, mararomay ko falocoˈ, misaaliay to hahahinomen. Nikawrira, paliˈayaway ko Kimad no Kawas, o hongti no Pirsiya ci Kirus o mamitedal cangranan. Mipadikan ningra ko Papilon, mihaen a milasil: “Ci [Yihofa] . . . papipatireng Cingra takowanan i Yirusalim no Yuta to cecay a pitaˈongan to saki Cingraan. Imatini, kamo o polong no finawlan no Kawas katayrato kamo, nanay mikapot i tamowanan ko Tapang a Kawas namo.” (2 Rayray 36:23) Oya itiniayho i Papilon a Israil tamdaw, ira ko hatiniay teloc, tada mahemekay cangra!

5. Pakayni to ˈicel ni Yihofa a miadah to dokaˈ no falocoˈ, o manan ko sowal no ˈOlic?

⁵ Cowa aca ko polong no kitakit ko mihinoman ni Yihofa, ano o kahacecay a tamdaw mihinoman Ningra. Mahecaday anini. Sanay ko sowal no ˈOlic: “O mihinomay Cingra to mararomay a tamdaw, o mitafoay Cingra to dokaˈ nangra.” (ˈOlic 147:3) Hay, mihinoman ni Yihofa ko adadaay anca mararomay ko falocoˈ a tamdaw. Anini, makalimay ci Yihofa mihinom to somad no falocoˈ ita, paˈicel kitanan. (ˈOlic 34:18; Isaya 57:15) Pafelian ni Yihofa kita to taneng ato ˈicel, padama kitanan miremo to pasangar.​—Yakop 1:5.

6. O manan ko mamananam ita nai ˈOlic 147 fedengan saka 4 sinael? (Nengnengen ko satapangan coka.)

⁶ Dotoc somowalay ko ˈOlic to ikakarayanay a foˈifoˈis, sowal sa: “O nisaˈosian [ni Yihofa] ko adihay no foˈis, mahacecay Ningra a mipangangan ko foˈis.” (ˈOlic 147:4) Soˈlin maˈaraway no mata nora mitiliday to ˈOlic ko foˈis, kawra cowa ka fanaˈ to hakowaay ko nika adihay. Anini, ngaˈayay tano paˈesolay a dadingoan (foingkyo) a maˈaraw ko adi:hayay a foˈis. O sowal no tamdaw, itini i kakarayan, masawalwalay masacawcaway ko kaadihay no foˈis sanay! Cowa ko mamasaˈosi ko nika adihay no foˈis. ˈArawhan panganganan no misangaˈay a Tatapangan ko kahacecay no foˈis, mikiriwiˈan ni Yihofa minengneng ko cecacecay. (1 Korinto 15:41) Hay ano mafanaˈay ko Kawas to cecacecay foˈis i, coko mamihaen a mafanaˈ kitanan kahacecay a tamdaw, mafanaˈ to falocoˈ ato saali no mita a nimaan!

7, 8. (1) Ano padama ci Yihofa kitanan miremo to pasangaray i, samaanay ko harateng Ningra kitanan? (2) Mafanaˈay ci Yihofa to falocoˈ ita han? Sadaken ko tinakoan.

⁷ Cowa ko nika ciharateng aca ni Yihofa kitanan, hanaca mafanaˈayho to tatirengan no mita, iraay ko ˈicel padama kitanan miremo to pasangar. (ˈOsien ko ˈOlic 147:5.) Nolatek tada pakidemay ko pasangar, cato pakafilo kako a mitamorong wa saan kiso alatek. Mafanaˈay ko Kawas to tolas no ˈicel iso, samanen “maharateng Ningra ko nika o nano sera kita.” (ˈOlic 103:14) Cowa ko malefotay kita, marariday mararaw to malecaday a raraw, marariday mararaw ko sowal, maˈinap to tao anca ira ko tatiihay ˈanof, ikor pacekos ko falocoˈ. O tada malefotay ci Yihofa, awaay ko maamaan a dangoc, ˈarwhan macalepay ko kafanaˈ to harateng ato falocoˈ ita.​—Isaya 40:28.

⁸ Alatek matinakoayto iso ko ˈicel ni Yihofa padama tisowanan a tanoktokto. (Isaya 41:10, 13) O cecay misakafahay fafahiyan salikaka ci Kyoko, mafalic ko kilac  ningra i, matoleday ko falocoˈ. Samaanan ni Yihofa patalahekal to mafanaˈay Cingra tora pasangar ningra hani? Itini i faelohay kasakopang, ˈalomanay ko salikaka to mikiharay cingranan, mafanaˈ to falocoˈ ningra. Hato mihaenan ni Yihofa cingra a pasowal: “Maolahay Kako tisowanan, cowa ko nika o misakafahay kiso, samanen o wawa Ako kiso, ono Mako kiso. Nanay lipahak kiso malo Misawacayay Tamdaw Ako.” Kiso i, samaanay matinako iso ko “caay ko mamalalat” a taneng ni Yihofa a mafanaˈ i tisowanan hani?

9, 10. Isaˈayaway a mirenec ko Kawas to manan a saali ita? Sadaken ko tinakoan.

⁹ Alatek o saali no tireng ko saali iso. Nolatekay, calemcemay kiso cangoˈotay ko kakaenen. O ci Yihofa ko misangaˈay palengaw to pinaloma malo kakaenen ita, ano o ciwciwto no palang paliliˈan ni Yihofa! (ˈOsien ko ˈOlic 147:8, 9.) Ano padotocan ni Yihofa paliliˈ ko palang, o ngangaˈay kiso pasoˈlin ci Yihofaan to papafeli Cingra to saali no sakaˈorip iso.​—ˈOlic 37:25.

¹⁰ Masaka limlaan i, pafeliay ci Yihofa to noˈadingoan a kakaenen, malifok ita ko “ikakaay no niharatengan no tamdaw a nano Kawas a rihaday ko mamisimaw to falocoˈ.” (Filipi 4:6, 7) Nengnengen ko malifetay ni Mucuyo ato fafahi ningra, matinako nangra ko nika paˈicel ni Yihofa i cangranan. Isaka 2011 miheca, maˈatoray ko Dipong ira ko conami, ci Mucuyo ato fafahi tayra i fadahong no lomaˈ, hato caka maˈalol no nanom. Maeminay malahedaw ko maamaan nangra. Manawnaw ko lomaˈ itiniay i saka tosa tingloh no lomaˈ toˈeman sienaw a misalafiiˈ cangra. To cila romiˈad, mikilimay to sapakalalok a lalakaw. Edengan o 2006 Ninkang no Misawacayay Tamdaw ni Yihofa ko mahelaay. Tangsolay maˈaraw ko “Sataˈangayay Conami” sanay a lalangian. Somowalay kora lalakaw, 2004 miheca itini i Sumatara taˈangayay ko ˈatoray, makidatay ko sataˈangayay a conami. Tomangic cangra miˈosi tora cudad, malifet nangra ko olah no Kawas, ciharateng to saali nangra, mihinom a midama cangranan. O romasa, pakaynian ni Yihofa i salikaka mipawsa to dafong, pafeli to kakaenen, cawfan ato rikoˈ. Kawra ora kasemeran nangra i, tayraay ko taypiway no likakawa no Kawas, milisoˈ to kasakopang nangra. Sanay ko sowal ni Mucuyo: “Hato i tatihiyay niyam ci Yihofa, tada ciharatengay Cingra tamiyanan, masemeray ko falocoˈ niyam!” Mahapinangay itini, isaˈayaway ko Kawas mirenec to noˈadingoan a saali ita, kawra o papafeli to dafodafong i kitanan.

11. Misamaan kita ngaˈ, malayap ko sapadama no Kawas?

¹¹ Ci Yihofa kalamkamay a mipadang, “palowaden Ningra ko tadancaay a tamdaw.” (ˈOlic 147:6) Hay, wa misamaan milayap kita to sapadama no Kawas hani? Ira ko ngaˈayay noka lalaˈed ita i Cingranan ngaˈ. Palahaden ita ko misapoeneray damsayay a capeling. (Cifaniya 2:3) Mihadidiay a mitala ko misapoeneray a tamdaw, to mamisalof ko Kawas to demak, pakasoˈlin to papalahedawen Ningra ko dokaˈ nangra. Itini i mata ni Yihofa, o kaolahan Ningra ko matiniay a tamdaw.

12, 13. (1) Ano mamilayap to sapadama no Kawas, cowa ka ngaˈay kita misamaan to demak? (2) Maolahay ci Yihofa to masamaanay a tamdaw?

¹² O romasa i, Kawas ita o “tatefaden  Ningra ko tatiihay a tamdaw.” (ˈOlic 147:6) O tadaciˈicelay koni sowal! Ano sapilayapaw to midaˈocay a olah ni Yihofa i, kaˈintehen ko miˈintehan Ningra a demak wangaˈ. (ˈOlic 97:10) Liyasen ita ko mamikidat to sakaˈodangaw a demak, mahawpay ko kaacekan a lalakaw. (ˈOlic 119:37; Matay 5:28) Cowa ko madoloay a noka pilood koni, kawra to sakahemekaw ni Yihofa, o sasarocoden a mikiemel, o ciepocay konini.

¹³ Ano milood kita to mararaway harateng i, tatiˈeren ci Yihofa, ao cowa kono niyah a naˈicelan. Sowal no Fangcalay Cudad: “Caay ko ˈicel no efa ko kangalayan Ningra, caay ko cicodahay a sofitay ko karahekeran Ningra.” Mihaenay, cowa ko mamitiˈer to niyahan anca ˈicel no tao, mikitini to “ˈicel no efa” anca “cicodahay a sofitay” mikilim to sapadama, samanen mihaen to demak cowa ko mamahemek ko Kawas. (ˈOlic 147:10) Ingiden ita ko Kawas, mingitangit to sapadama Ningra. Cowa ka lecad ci Yihofa to tamdaw, ano saliyaliyaw han ita mingitangit Cingra, cowa ko mamaesam Cingra. Sowal no Fangcalay Cudad: “Maolah Cingra to mangodoay Cingraan a tamdaw, maolah Cingra to mitiˈeray to siniˈada Ningra a tamdaw.” Sanay. (ˈOlic 147:11) Papasoˈlinen ita to maolahay ci Yihofa kitanan, o mamipadang kitanan, midama kitanan pakalowid to mararaway a harateng.

14. O manan ko paˈicelay to nika pakasoˈlin no mitiliday to ˈOlic a tamdaw?

¹⁴ Mikiˈokan ni Yihofa ko finawlan Ningra, ano misaali cangra i, o mamipadang cangranan. Maharateng noya mitiliday to ˈOlic a tamdaw, to papatikoren a patireng ko Yirusalim i, hemek sa romadiw: “Cingra ko patanektekay to ˈadawang no niyaroˈ iso, Cingra ko palemeday to wawa iso. O misimaway Cingra to salawacan no kitakit iso a parihaday.” (ˈOlic 147:13, 14) Mafanaˈ to papatanekteken no Kawas ko ˈadawang no niyaroˈ, misimaw to finawlan, mapaˈicelay ko nika pakasoˈlin ningra.

15-17. (1) O pasangar nokaˈorip alatek papaira to manan a harateng ita? Kawra, samaanan ni Yihofa pakayni to Kimad Ningra padama kitanan? (2) Samaanay a “tangsol a matenak ko sowal” no Kawas sa hani? Sadaken ko tinakoan.

¹⁵ Nolatekay, o pasangar nokaˈorip, pacariraway i tisowanan, kawra o papafeli ci Yihofa to taneng, padama tisowanan pakaremo a misiˈayaw. Sanay ko sowal no mitiliday to ˈOlic: “Palimoˈot han Ningra ko hekal i, tangsol a matenak ko sowal Ningra.” Dotoc somowalay cingra to soeda, mihaen ko sowal: “Folesaken Ningra ko . . . soeda, awaay ko pakahadidiay” dotoc a sowal “palimoˈot han Ningra i, lasoˈor saan ko soeda.” (ˈOlic 147:15-18) O taneng ato ˈicel no Kawas awaay ko tolas, ano pakaˈemetay to soeda Cingra, o ngagnaˈay padama tisowanan a pakaremo to pasangar.

¹⁶ Anini, pakaynian ni Yihofa i Kimad Ningra mikayat kita, “tangsol a matenak ko sowal Ningra”, sanay, tatodong nora ano ira ko saali ita i, tangsolay ko Kawas mikayat to noˈadingoan ita. Miˈosi kita to Fangcalay Cudad, to mitepangan a cudad, minengneng to tilifi no JW, tayni i jw.org a wangcan, masasowal ato malohemay malitengay ato salikaka i, coko makowaday kiso a nimaan! (Matay 24:45) Coko maˈaraway iso, to tangsolay a mikayat ci Yihofa tisowanan saw?

¹⁷ Ci Simoni, o cecay fafahiyan salikaka, matinakoay ningra ko ˈicel no Kimad no Kawas. Nao misalaenoay to niyahan, miharateng cowa ko kaolahan no Kawas kako saan. Kawra masomad ci Simoni i,  cowa pisawad a mitolon to Kawas, micerid a micekiw to Fangcalay Cudad, sanay ko sowal ningra: “Matinakoayto ako ko nika pafeli ni Yihofa to ˈicel i takowanan, mikayat to lalan ako.” Mitolon ato micekiw soˈlinay padama ci Simonian misaˈicel a malatil ko falocoˈ.

18. Hano mafanaˈay kiso to maolahay ko Kawas tisowanan hani? Iraay ko manan a lalangian ita milekal a “pahemek ci Yihofaan”?

¹⁸ Ya mitiliday to ˈOlic a tamdaw mafanaˈay to tada maolahay ko Kawas to finawlan Ningra. Itini nolitenganho, edengan o finawlan Ningra ko mipafelian to “sifanaˈ ato rikec Ningra.” (ˈOsien ko ˈOlic 147:19, 20.) Anini, kita aca ko malo ilaenoay no ngangan no Kawas a tamdaw, tada o taˈangayay a fadangalan koni! Tada miakoˈiday kita mafanaˈ ci Yihofaan, makayat no Kimad Ningra, ngaˈayho mala widang Ningra. Malecaday toya mitiliday to ˈOlic a tamdaw kita, adihayay ko lalangian milekal “pahemek ci Yihofaan” halo pakalalok to romaroma tamdaw pakahemek i Cingranan!