SAKA CECAY hahekalan a Krisciyang misaˈicelay mitenak to ngaˈayay ratoh no Hongti Kitakit, o romaroma tayraay i roma a kitakit mitosil. (Matay 24:14) Patinakoen, ci Pawlo ya miliwko a mitosil, tangasaay to aniniay a Tureky a pala, mitosil to itiraay tamdaw. * Ikor no 2,000 miheca, isaka 2014 miheca, o Misawacayay Tamdaw ni Yihofa, iraay ko mikiriwiˈay a mitosilay demak itira. O manan ko araaw noni mitosilay demak hani? Cima ko mirienangay?

Anini, itini i Tureky maedeng 2,800 ko mitosilay, o polong no kaˈaloman no tamdaw itira mataˈlifay ko 7 patek 900 a ˈofad. Ano saˈosien i, lalomaˈ no 2 ˈofad 8 patek a tatamdawan, cecay o Misawacayay Tamdaw ni Yihofa. ˈAlomanay ko tatosilen a tamdaw, cowa ko madoloay a demak. Mihaenay haw i, ora mikiriwiˈay a demak araaw i, itini i ˈapotoay a tatokian patenak tora ngaˈayay a ratoh. Iraay ko 550 a mafanaˈay tono Tureky sowal a salikaka, naitiraay i roma kitakit tayra i Tureky, pacafay to itiraay a mitosilay mitenak to ngaˈayay ratoh. Samaanay ko minaroˈan hani?

Mapalosiyangay ko ngaˈayay ratoh. Itiniay i Istanpol kasakopang sanay patikami: “Maˈaraw no ˈalomanay kami i, milicayay: ‘Iraay ko mikiriwiˈay a taykay namo han? Talacowa o Misawacayay Tamdaw ni Yihofa!’” Itiniay i Icmir kasakopang sanay patikami: “O cecay matayalay i pikalican to haya a faˈinayan, milicay to malohemay malitengay: ‘O manan ko mafekaday hani? Hano rarid sa kamo tayni mitosil?’” Hay, oni mikiriwiˈay a demak, maˈaraway no ˈalomanay.

O naitiniay i roma kitakit tayra mirienang a tamdaw, lipahakay cangra mitosil i Tureky. Ci Stifen, naitiniay i Tenmak, sanay: “To romiˈamiˈad, mitosil to cowaho pakatengil ci Yihofaan tamdaw, soˈlinay kako paˈodingar to ngangan ni Yihofa.” Ci Tafiti, naitiniay i Frans, sanay cingra: “Itini i cecay a lalan, pinaay tatokian kami mitosil. O ˈalomanay tamdaw, cowa ka fanaˈ to Misawacayay Tamdaw ni Yihofa, makahiyay cangra mitengil to sowal niyam, patiriˈen cangra to ˈapotoay ika i, milayapay to cudad. Tada kahemekan koni!”

Oniya 550 a mirienangay salikaka itini tosa a lipay, o  mapalilamay nangra 6 a ˈofad a cacudadan! Mahapinangay to ngaˈayay ko minaroˈan, mapalosiyangay ko ratoh.

Matongalay ko ˈifowa to mitosilay demak. Ora mikiriwiˈay a demak iraay ko ngaˈayay pifiyor to itiniay i Tureky a salikaka, ˈalomanay salikaka misatapangay misakafah. Malaheci kora mikiriwiˈay a demak, lalomaˈ no 12 a fafoladan matongalay to 82 a misakafahay.

Tayraay midama tora mikiriwiˈay demak a salikaka, mapakalalokay cangra, minokayto i kitakit nangra, padadotocay a ˈifowa a mitosil. Ci Sirin naitiniay i Towic fafahiyan salikaka, sanay patikami: “Mitosil icowacowa kitiraan, tona halingodoay kaka, cowa ka dolo i takowanan. Mahemekay kako mirienang toni demak, mananamay ako nai Turekyay a salikaka, hanaca micerid a mitolon to Kawas, nohatini cowato ka halingodo kako, timoloayto kako palilam to tancang to mikalicay i kasoling a tamdaw!”

O naitiniay i Towic a Yohani sanay ko sowal: “Toniya demak malifokay ako ko epoc, o salikaka i Tureky misaˈicelay patengil to ˈalomanay tamdaw toni ngaˈayay ratoh, hato miˈametay to maamaan a toki, misawacay to tamdamdaw. Misetekay kako to falocoˈ, minokayto kako i kitakit i, oha mamihaen a mitosil. Soˈlinay mihaen kako, ˈalomanayto ko misawacayan ako i pitosilan.”

Naitiniay i Frans fafahiyan salikaka ci Cinip, sanay cingra: “Oniya mikiriwiˈay demak padamaay takowan, ira ko timolo a mitosil, matongalay ko pitiˈer ci Yihofaan.”

Makakedecay ko kalalaˈed ato salikaka. O naitiniay icowacowa pala a salikaka, masasi olahay makakedecay cangra, tada masemeray kako. Sanay ko sowal ni Tafiti: “Tada hinapafeliay hinalafangay ko salikaka, hato o salawina ko picada tamiyanan. Marariday kako i cudad no mita pakaˈosi, o mapolongay no kasakitakit a masacefang kita sanay, nohatini matinakoayto no mako koni sowal. Aakoˈiden ci Yihofa malo tamdaw Ningra kako, tada malikoay kako toni fadangalan.”

Naitiniay i Frans fafahiyan salikaka ci Keliw, sanay  cingra: “Ano o naitiniayto i Tenmak, Frans, Towic anca o i Turekyay salikaka, malo cecayay paro no lomaˈ kami. Malecaday tano sapisipasip ko Kawas a misipasip to konis no kasakitakit.”

Naitiniay i Frans a Stifani, sanay ko sowal: “Mikitini toni mikiriwiˈay demak mananamay niyam, cowa ko serangawan anca sasowalen ko palacecayay tamiyanan, ao nika olah niyam ci Yihofaan.”

O ˈalomanay naitiniay i roma kitakit a salikaka, maherek koni mikiriwiˈay demak ikor, misatapangay misahalaka to mamalinah tayra i Tureky, samanen ˈalomanayho ko cowa pakatengil to ngaˈayay ratoh. Iraayto ko malinahay tayra a mipadang, tada miakoˈiday ko itiraay a salikaka.

Patinakoen, itini i maraayay kasakomi, 25 ko mitosilay, cecayay ko malohemay malitengay. Isaka 2015 miheca, iraay ko aenem salikaka naitiniay i Helan ato Towic malinahay tayra, tada lipahakay ko itiraay a salikaka!

Oya tayraay i Tureky dademak a salikaka, samaanay ko kaˈorip nangra itira hani? Manaokaniw, cowa ka dolo, kawra adihayay ko malayapay nangra a sakaraheker. O nafalocoˈan no papina tamdaw kora ilaenoay:

Naitiniay i Sipanya ci Fitiriko, 41 ko mihecaan ciraramodayto a faˈinayan salikaka: “O harateng ako, ano caka hakowa ko dafong, iraay ko pasalat, hanaca ngaˈayay misarocod to masaka limlaan a demak.” Pakalalokay ci Fitiriko to salikaka tayra i taˈangayay ko saali a kilac mitosil han? Sanay ko sowal ningra: “Mana eca saw! Toha sapadamaaw to tamdaw mafanaˈ ci Yihofaan, malinah tayra i roma kitakit, patoroden ko niyah i kamay ni Yihofa, mihaen kiso, mamatinako ko nika pidipot ni Yihofa tisowanan.”

Naitiniay i Helan ci Ruty, 57 ko mihecaan ciraramodayto, sanay ko sowal: “Tayra i misaaliay to mitosilay a kilac dademak, mitosil to cowa pakatengil to kimad a tamdaw, marenecay ko falocoˈ ako. Maˈaraw ko nika hemek nora micadaay to kimad a tamdaw, mahemekan nanay kami.”

 Naitiniay i Towic ci Sasca, 42 ko mihecaan, cingra ato fafahi, malinahay tayra i Tureky, sanay ko sowal: “Mitosil kako i, malitemohayto ko cowa pakatengil to ngaˈayay ratoh a tamdaw, padama to mahaenay tamdaw mafanaˈ ci Yihofaan, tada marenecay ko falocoˈ ako.”

Ci Aceko 36 ko mihecaan ciraramodayto a fafahiyan salikaka, naitiniay i Dipong, sanay ko sowal: “Iˈayaw caloh sanay kako to sakairaaw no Armakiton, kawra malinahto tayra i Tureky i, miakoˈiday kako to nika pihadidi ni Yihofa. Maˈaraway ako to samaanay mikayat ci Yihofa to mitosilay demak i polong no hekal, matongalay ko falocoˈ to sapiingidaw Cingranan.”

Ci Alisa 31 ko mihecaan, naitiniay i Rowasiya, sanay ko sowal: “Tayni i taˈangayay ko saali a kilac matayal saki Yihofa, mahapinangay ako ko nika ngaˈay Ningra.” (ˈOlic 34:8) Dotoc a sowal ningra: “O Wama ako ci Yihofa, o sangaˈayay a widang ako, itini i masasi romaay a kitiraan maˈorip, mangalefay ko nika fanaˈ Cingranan. Tada mahemekay kako, o nokaˈorip matomesay ko kalipahakan a milifetan ato kadofahay a sapalemed!”

Pakayni toni mikiriwiˈay a mitosilay demak, tahatengilay ko ˈalomanay a Tureky a tamdaw to ngaˈayay ratoh. Kawra, adihayayho a kilac awaay ko mitosilay tamdaw tayra milisoˈ. O malinahay tayra i Tureky a roma kitakit a salikaka, to romiˈamiˈad malitemohay ko cowaho pakatengil ci Yihofaan a tamdaw. Kiso i, maolahay tayra to hatiniay a kilac a mitosil han? Yohani 4:35 sanay ko sowal: “Caˈngawen a minengneng ko omah. Marahrahto, o papanayento.” Ano ngaˈay tayra kiso tora “marahrahayto, o papanayento” a kilac a mipadang to mitosilay demak i, nohatiniho misahalaka mitoor tora patosokan iso. Papasoˈlinen iso ko cecay a demak: Ano mirienang kiso to paratohay “tangasa i tolas no hekal” a demakan i, o papaira to taˈangayay a sapalemed i tisowanan!—Dmak 1:8.