1, 2. Itini toni lekakawa noni hekal, hano iraay:to ko manikaway tamdaw?

ANINI, o lekakawa no kicay noni hekal, cowa ka sadafdaf. Awaay ko katayalan no kaemangay tamdaw. O roma kinafalah sanay to ˈorip, tayra i kadofahay a kakitakitan. ˈAlomanay ko manikaway, ano itinito i kadofahay a pala, iraay ko manikaway. Adihay adihay ko payci no cihafayay, awa awa ko payci no manikaway. O mitiwcaan no tamdaw, 1% (1 pesento) a cihafayay noni hekal, maedeng mahecaday to komodan no payci no 99% (99 pesento) a tamdaw. Itini paro no kakarayan pinaay a walwalan ko manikaway tamdaw, ˈarawhan o cihafayay cowa ko mamaemin ko payci nangra. Saka mararomay ci Yis a pasowal: “Mararid a ira i tatihi namo ko pakoyoc a tamdaw.” (Marko 14:7) Misamaanay hano mahaen ko nika masakakinih hani?

² Mafanaˈay ci Yis, irato ko Hongti Kitakit no Kawas ngaˈ, mafalic ko lekakawa no kicay noni hekal. Oya nisowalan i Paˈarawan 18:3 a “mipatiyamay noni hekal”, mitoroan onini maˈanofay a lekakawa no misasingdiay. O lekakawa no misasingdiay, mirikecay ato mararaway a pidoyongan oni Satan. O tamdaw no Kawas misaheciay a miliyas to mirikecay ato mararaway a pidoyongan,  kawra ˈalomanay nangra cowaho ka pisaheci a miliyas to lekakawa no misasingdiay ni Satan.

3. O haharatengen ita ko manan a salicay?

³ Kita o Krisciyang, oha mamisinanot to nika pinengneng to lekakawa noni hekal. Licayen ko niyah: ‘Samaanen ako kalasaka dademak ko dafong ako, patahekal to nika madimadi to Kawas hani? Misamaan kita caka mala koli no lekakawa no misasingdiay noni hekal hani? Itini toni pasangaray lintad, misamaanay paihekal ko tamdaw to nika pitiˈer to Kawas?’

4, 5. (1) Itini i sapatinako ni Yis, masiˈayaway nora matayalay ko manan pakayraan? (2) Pafelian ni Yis ko sikawdan to manan a sapalimoˈot?

⁴ ˈOsien ko Luka 16:1-9. Patinakoay ci Yis to cecay a caay ka moecel ko demak a matayalay. Ora matayalay mapakokotay to misaloyaay to payci no tawki, kawra matanengay cingra a “misawidang” to tamdaw, ano malahedawto ko tayal ningra i, wa ira ko mamipadang cingranan. * Cowa pakalalok ci Yis to nisawawaan, mihaen a caka moecel ko pakayraan toha sakaˈoripaw toni hekal, samanen ora nidemakay o tamdaw noni hekal sanay ci Yis. O saka somowalaw ci Yis to cecay masaka limlaan a kimad.

⁵ Mafanaˈay ci Yis, o ˈalomanay a sikawdan, oha mamisiˈayaw toni cowa ka sadafdaf a lekakawa no misasingdiay, mikilim to sakaˈorip, o nika pasangar mahecaday to malifaay nora sapatinako a matayalay. Sanay ci Yis palimoˈot: “Kao dafong no hekal [caay ka moecel a hafay] ko sapisawidang namo ta ano awaayto koya dafong i, oya widang [ci Yihofa aci Yis] ko mamihamham tamowanan a pacomod i midaˈocay a kamaroˈan.” Mikitini toni sapalimoˈot mamananam ita ko manan hani?

6. Hano mafanaˈ kita cowa ka masalalomaˈ no araaw no Kawas ko lekakawa no misasingdiay hani?

⁶ Cowa pitadtad ci Yis o “dafong no hekal” hano caay ka moecel. Kawra o sowal no Fangcalay Cudad, o lekakawa no misasingdiay, cowa ka masalalomaˈ no araaw no Kawas. Itini i Itin ci Atam aci Ifa, kadofahan ni Yihofa pafeli to maamaan a saali nangra. (Satapangan 2:15, 16) Isaka cecay hahekalan, matemeray no fangcalay saocor ko mapasimalay Krisciyang, itiya “sakapolongan han nangra ko dafong nangra a maemin.” (Dmak 4:32) Paliˈayaway ci Isaya, ikor o rarihaked a milifok ko tamdaw to maamaan noni cikiw. (Isaya 25:6-9; 65:21, 22) Nikawrira, ˈayaw no aira ko lakoing, o Krisciyang mamikiemel a pahemek to Kawas, hanaca mamataneng a kalasaka dademak to “dafong no hekal” a mietan to sakaˈorip.

7. Misadakay to manan a sapalimoˈot ko Luka 16:10-13?

⁷ ˈOsien ko Luka 16:10-13. Tora sapatinako, misawidangay to sakangaˈayaw aca no niyah koya matayalay. Kawra, palimoˈotay ci Yis, o pakayniay i cowa pisateked a lalangian kita, misawidang to ikakarayanay a widang. Dotoc a sowal ningra, kalasaka dademaken ko “dafong no hekal” a madimadi to Kawas sanay. Ora kalimlaan i, ano kalasaka dademak to payci, paihekalen ko nika madimadi. Wa misamaan a mihaen to demak hani?

8, 9. Sadaken ko tinakoan, misamaanay kalasaka dademak ko roma salikaka to dafong no hekal, paihekal to madimadi no niyah to Kawas.

⁸ O cecay hapakayraan a paihekal to nika  madimadi no niyah i, kalasaka dademaken ko payci a midama to nisowalan ni Yis i Matay 24:14 a mitosilay demak. O cecay itiniay i Intiya a kaemangay fafahiyan wawa, misawaday a micakay to tasalamaan, misopedan ko payci i hako. Matomesto kora hako i, pasadakan ningra pakiyaho kora payci midama to mitosilay demak. O cecay faˈinayan salikaka i Intiya, paliwalay to heci no ˈafinong. Pakiyahoan ningra i mihongyakay to Malayalam sowal a pihongyakan, hay ano mamicakay to ˈafinong cangra, kao patayra han ako ko ngaˈay sanay cingra. O matanengay a demak koni. Itiniay i Krisiya a salikaka marariday a pakiyaho to simal no olif, hacol ato romaroma a kakaenen to itiraay Pitil.

⁹ O cecay Sri Lanka a salikaka, itiniay ko ˈaro i roma kitakit, pasadakan ningra ko iniyaroˈay a sera ato lomaˈ, malo kasaˈopoan, pitaykayan ato pikilomaˈan no mieminay to toki a sikawdan. Oni salikaka mikinafalahay to dafong, mipadang to itiraay manikaway a salikaka. Itini i makecengay ko demak a kitakit, o roma salikaka kalasaka dademakan ko lomaˈ a malo kasaˈopoan, mipadang to misakafahay ato manikaway salikaka ho caka kareteng ko ˈinorong pasadak to payci.

10. Ano hinapaladaˈ kita to tao, wa ira ko manan a sapalemed?

¹⁰ Ora tinakoan i fafekang paihekalay, o tamdaw no Kawas itini i “mamangay a demak” madimadiay cangra. Tatodong nora misangaˈayay kalasaka dademak cangra to payci. (Luka 16:10) Samaanay ko harateng nora widang ni Yihofa to pikinafalah nangra hani? Mafanaˈay cangra hinapafeli i, o mamilayap cangra to “soˈlinay” a hafay. (Luka 16:11) Cecay fafahiyan salikaka marariday pakiyaho, somowalay to macadaay ningra sakaraheker: “To nika hinapaladaˈay kako, malifetay ako ko adihayay a sapalemed. Ano paladaˈ kako to tao, mafalicay ko falocoˈ ako pakayni i tao. Makahiyayto kako misodod, mihadidi to tao, makahiyay micada to sapalimoˈot ato katoledan no falocoˈ.” Malifetay no ˈalomanay, ano hinapafeli to tao, wa kadofa i noˈadingoan.​—ˈOlic 112:5; Taneng 22:9.

11. (1) Misamaanay hano hinapaladaˈ paihekalay to matanengay a waywayan? (2) Tamdaw no Kawas samaanay kalasaka dademak to sapakiyaho? (Nengnengen ko satapangan coka.)

¹¹ Ano kalasaka dademaken ita ko dafong micowat to demak no Hongti Kitakit, o patalahekalay to matanengay a waywayan. Mamafanaˈ tano dafongen a mipadang ko tao. O romaroma salikaka iraay ko payci, awaay ko pakayraan malinah tayra i roma kitakit, anca misakafah, kawra mahemekay tano payci a pakiyaho a midama to roma tamdaw a mitosil. (Taneng 19:17) O roma manikaway pala, kalikiay macakat i noˈadingoan, o sapakiyaho ita papadama to mitosilay demak no itiraay, ho ira ko Fangcalay Cudad nangra. Patinakoen, itini i Kangko, Matakaska ato Rowanta, nolatek o ˈaca no cecay Fangcalay Cudad maedeng o cecayay folad a lifon no tamdaw, ano  micakay to Fangcalay Cudad cangra, wa awato ko kakaenen no paro no lomaˈ. Ira ko sapakiyaho no ˈalomanay, o likakawa ni Yihofa ngaˈay mihongyak to Fangcalay Cudad, pafelien ko salikaka ato mipacekiwan a tamdaw. (ˈOsien ko 2 Korinto 8:13-15.) Mihaen to demak, ano o micadaay to sapadang anca mipadangay tamdaw, ngangaˈay mala widang ni Yihofa.

12. Samaanay ci Apraham paihekal to pitiˈer to Kawas?

¹² Ano sakala widangaw ni Yihofa, sangaˈayen kalasaka dademak ko dafong, micangacang to soˈlinay a hafay, aka mala koli no lekakawa no misasingdiay. Ci Apraham mitiˈeray ci Yihofaan, sapisawidangaw Cingranan, mitengil to sapalimoˈot no Kawas miliyas to Ur, mikilomaˈ to pakopangan. (Hipray 11:8-10) O Kawas ko mitiˈeran ni Apraham cowa ko hafay, paihekalay to pasoˈlinay a falocoˈ. (Satapangan 14:22, 23) Pakalalokay ci Yis to tamdaw palahad to mahaenay noka pasoˈlin, sanay to cecay cihafayay a kapah: “Ano mangalay kiso a misongilaˈ i, olili. Pacakayen ko dafong iso a maemin ta paladaˈen ko pakoyoc a tamdaw to payso. Ngaˈay cidafong kiso i kakarayan. Ta katayni a mitoor i takowanan.” (Matay 19:21) Awaay ko matiraay ni Apraham a pasoˈlinay falocoˈ nora kapah, kawra o romaroma patahekalay to nika misongilaˈay a mitiˈer to Kawas.

13. (1) O manan ko sapalimoˈot ni Pawlo toya mieminay to toki a Timotian? (2) Ano mitengil kita to limoˈot ni Pawlo, sasamaan ko demak ita?

¹³ Ci Timoti o pasoˈlinay ko falocoˈ a tamdaw. “Sofitay ni Yis Kristo”, hananay ni Pawlo cingra, pakalalok cingranan “o mala sofitayay a tamdaw i, caay piharateng to romaroma a tayal [anca misasingdiay demak]. Deng o sapalipahakaw ningra to mikowanay cingraan a tapang a sofitay.” (2 Timoti 2:3, 4) O mitooray ci Yisan anini, mataˈlifayto ko 100 a ˈofad mieminay to toki a mitosil, mitengilay to sapalimoˈot ni Pawlo. Kiemelay cangra micoay to sakayhid no kowangkaw no misasingdiay, paifalocoˈan ko safalod no Fangcalay Cudad: “O mikiyamay a tamdaw i, o koli no pikiyaman ningra a tamdaw.” (Taneng 22:7) Misahalakaay ci Satan kitanan mihaemin to toki ato ˈicel itini to misasingdiay a demakan. O roma tamdaw pinaayto a mihecaan cikiyam, micakay to lomaˈ, matekesay ko ˈaca a tosiya, taykowan no micudaday wawa, anca mipalak to adihayay payci to sapakaetim, taˈangayay ko piroero to tamdaw. Ano mataneng ko waywayan ita, misadolo to nokaˈorip, milowan to kiyam ato mipalakan a payci, wa irato ko pasalat ita midoko to Kawas, cowato ka mala koli no lekakawa no misasingdiay.​—1 Timoti 6:10.

14. Seteken ita ko falocoˈ micangacang to manan? Sadaken ko tinakoan.

¹⁴ Misadolo to nokaˈorip a cecay pakayraan i, isalakaten micangacang ko Hongti Kitakit no Kawas. O cecay mararamoday, iraay ko ngaˈayay a singdi nangra. Miharatengay to sapiliyawaw mala misakafahay, paliwalan nangra ko singdi nangra, tamina ato romaroma dafong. Tayra i Worwik, Niwyok a congpo mipadang to patirengay a demak. Tada sakalipahak nangra koni, mala cafay to wawa ato kadafo matayal i Pitil, o wama wina no kadafo pinaay lipay a miteko cangranan a matayal. O cecay fafahiyan salikaka i Kolorato no Padaka, cowa piemin to toki a matayal i kingko. Mahemekay ko kakeridan no kingko to tayal ningra, milicay cingranan to mamaolah a mihaemin to toki a matayal hokira, wa tolo ko nika adihay no lifon to iˈayaway. Kawra, cowa ito ko ngangaˈay misamacay to mitosilay  demak, lalang hananay koni demak. O ˈalomanay sikawdan ni Yihofa matiraay tora salikaka, mikinafalah pakayni i Hongti Kitakit. Seteken ita ko falocoˈ isalakaten a micangacang ko Hongti Kitakit, patahekal to misalimlaay to nika lawidang ato Kawas, misakareteng to noˈadingoan a hafay, cowa ko hafay noni hekal.

15. O manan a hafay papaira to taˈangayay a hemek?

¹⁵ Ano cihafay kita o sapalemed no Kawas koni cowa ka saan, kawra o papalemeden ni Yihofa ko kadofahay to ngaˈayay demak a tamdaw. (ˈOsien ko 1 Timoti 6:17-19.) Patinakoen ci Lusiya Mawsanity *, fafahiyan salikaka, mafanaˈ cingra to misaaliay to mitosilay ko Alpania i, malinahay tayra isaka 1993 miheca nai Itali, awaay ko payci ningra itiya, kawra mitiˈeray ci Yihofaan. Ikor malaymayay to sowal no Alpania, mipadang to mataˈlifay ko 60 a tamdaw micada to inoˈ. Kita alatek awaay ko mahaenay a minaroˈan i kilac ita, kawra, ano mipadang to tamdaw mafanaˈ to kimad, mala widang no Kawas, ora nidemakan ita maamaan iraay ko epoc.​—Matay 6:20.

16. (1) Sasamaan ko teloc no lekakawa no misasingdiay noikor? (2) Mafanaˈ to mamafekad a demak noikor, hano mifalic to kapinengneng ita to payci?

¹⁶ Itini i Luka 16:9, sanay ci Yis: “Ta ano awaayto koya dafong i”, ora sowal alatek cowa ka saan. Itini i saikoray romiˈad o nika pingko no kingko cowa ko manan kora, aaira ko mikikakaay ko nika pakidem a demak mamafekad. Polong a lekakawa ni Satan, mahawpay ko mirikecay, mararaway pidoyongan ato misasingdiay o mamapelal. Paliˈayaway ci Icikil aci Cifaniya, o ekim lingkim oni kalimlaan dafong no misasingdiay, o mamalahedaw ko epoc sanay. (Icikil 7:19; Cifaniya 1:18) Haratengen ano mamapatayto kita, mahapinang saho tora mitalingan no niyah a “dafong no hekal”, nao cowa ko soˈlinay hafay i, wa samaan ko harateng ita hani? Mahecaday ano mihoped to payci ko tamdaw to hakelong no ˈorip, ˈarawhan o makaniway a payci kora. (Taneng 18:11) O dafong noni hekal o mamalahedaw ko epoc, mankora nohatiniho miamet to toki, kalasaka dademak to payci toha “sapisawidang” to ikakarayanay a widang. Ano kinafalah kita to saki Hongti Kitakit ni Yihofa, o mamapalemed a cihafay i noˈadingoan a demak.

17, 18. O widang no Kawas wa ira ko manan a sapalemed noikor?

¹⁷ Ano irato ko Hongti Kitakit no Kawas i, cowato ko papateli tono lomaˈ, taykowan, sapaising a payci, cowato ko mamicakay to kakaenen anca calemcem to cacangoˈot ko kakaenen. O mamidaˈoc ko ˈorip i sera a tamdaw, o rarihaked a milifok to maamaan a kinaira no sera. O ekim ato odoˈ cowa ko papaliwalen anca talingen, ao sakaeres no tireng ita. Sao haratengay saan kita miala to makapahay kilang, ekim a mipatireng to lomaˈ. O widawidang mamikifalocoˈ a mapadapadang, cowa ko mamilipayci. Itini faelohay hekal, mamapolong kita rihaked to dafong no cikiw.

¹⁸ Ano misawidang to ikakarayanay widang, o mamilayapho to romaroma hafay. Tahirato mapolong ko tamdaw mahemek a mitengil to sowal ni Yis: “Katayni kamo o mapalemeday no Wama ako a tamdaw a micomod to nikowanan no Wama ako a kitakit oya nipatalaan to saki tamowanan nai satapangan no nipisangaˈ to hekal a kamaroˈan.”​—Matay 25:34.