1. O kaemangay tamdaw mamisamaan misahalaka to nokaˈorip no niyah? Kawra hano cowa ko papakidem a calemcem ko falocoˈ nangra. (Nengnengen ko satapangan coka.)

KAMO kaemangay tamdaw alatek mihaiyay, ano mamiliwko i, o mamisahalakaho kiso. O nokaˈorip mahecaday o miliwkoay, nano kaemangho misatapangto misahalaka to rarakaten iso. Cowa ko madoloay koni, o cecay ci Sera ko ngangan a fafahiyan, sanay ko sowal: “Maharatengho to mamifiyor ko nisahalakaan ako to hakelong nokaˈorip i, matalaway kako.” Kawra satimoloen. Sanay ci Yihofa pasowal to tamdaw Ningra: “O Kawas namo Kako. O maanho ko katalawan namo saw? O papatanekteken Ako kamo a mipadama.”​—Isaya 41:10.

2. Hano mafanaˈ kiso mitokelay ci Yihofa tisowanan mataneng a misahalaka to hanoikoran iso, lipahak ko hakelong nokaˈorip?

² Mitokelay ci Yihofa tisowanan mataneng a misahalaka to hanoikoran iso. (Patnakay 12:1; Matay 6:20) Maolahay ci Yihofa mahemek kiso. Patinakoen, matengil maˈaraw iso ko makapahay a maamaan, matinac ko kaˈesoˈay kakaenen, paihekalay koninian. O romasa i, pasifanaˈan kita, too manan ko sangaˈayay a nokaˈorip, mihaenay ciharateng ko Kawas kitanan. Pakayra toya micoliay to sapalimoˈot ni Yihofa  a tamdaw, sanay ko sowal Ningra: “Padeteng sa kamo a caay pihakelong i Takowanan a midemak to caay ko kalipahakan Ako a tatiihay a demak. . . . O mamalipahak [ko sikawdan Ako], nikawrira, o mamapakangodo kamo. O lalipahak cangra a romadiw.” (Isaya 65:12-14) Ano mataneng ko saˈosi no sikawdan Ningra i, o papaˈodingar ci Yihofaan.​—Taneng 27:11.

3. Mitokelay ci Yihofa tisowanan mamisamaan misahalaka to hanoikoran iso hani?

³ Mitokelay ci Yihofa tisowanan mamisamaan misahalaka to hanoikoran iso hani? Misangaˈ to tamdaw Cingra, o ngangaˈay mikitini noka fanaˈ Cingranan, ato noka pidoko i Cingranan a lipahaken. (ˈOlic 128:1; Matay 5:3) Misangaˈ to ˈaˈadopen, cowa ka mahaen, mafecolho cangra, ciwawaho marenecayto cangra. Kawra mitokelay ko Kawas tisowanan, misahalaka kiso to hanoikoran i, lipahak ato ira ko epoc. O lipahakay ciolahay ko Kawas, paringian i Cingranan a misangaˈ ko tamdaw. (2 Korinto 13:11; 1 Timoti 1:11; Satapangan 1:27) Ano todongen iso kora ciolahay a Kawas, o lalipahak kiso. Itini i Dmak 20:35 sanay ko sowal: “Ikaka no nika lemed no milayapay ko nika lemed no mipafeliay.” Soˈlinay kora sowal, mihaiyay kiso han? O tokel ni Yihofa tisowanan, misahalaka to hanoikoran i, o noka olah to Kawas ato tamdaw ko patosokan nokaˈorip iso.​—ˈOsien ko Matay 22:36-39.

4, 5. O manan ko palipahakay ci Yisan hani?

⁴ Ci Yis o ngaˈayay taˈarawan no kaemangay tamdaw. O wawaho ci Yis i, maedeng lipahakay cingra a misalama, mahaen o sowal i Patnakay 3:4, sanay: “Ira ko kalipahakan a romiˈad. . . . Ira ko kasakeroan a romiˈad.” Ci Yis pakayniay i picekiw to Fangcalay Cudad a miingid ci Yihofaan. Ta 12 ko mihecaan ni Yis, o singsi i fangcalay sefi “fahekaˈ a maemin to nika fanaˈ ni Yis a pacaˈof.”​—Luka 2:42, 46, 47.

⁵ Lomahadto ci Yis i, o lipahakay a tamdaw cingra. Misamaanay hani? Mafanaˈay cingra, o tokel no Kawas i cingranan, o “mamipatenak to ngaˈayay a ratoh i pakoyoc a tamdaw” ato paparatoh to “sakafohataw no mata no mapohaway.” (Luka 4:18) Midofdof ci Yis to sapalmoˈot no Kawas palipahakay cingranan. O sowal i ˈOlic 40:8, sanay: “Kawasaw ako, tada maolah kako a midoedo to nafalocoˈan Iso. Kaˈimeren ako a pakifalocoˈ ko sifanaˈ Iso.” Tada maolahay ci Yis pasifanaˈ to tamdaw mafanaˈ to Wama. (ˈOsien ko Luka 10:21.) Ya pasifanaˈ ci Yis to cecay fafahiyan ikor, hananay ko nisawawaan: “O nipidoedo to nafalocoˈan no miocoray i takowanan ato nipilaheci to tayal Ningra ko malo kakaenen Ako.” (Yohani 4:31-34) Maolahay ci Yis to Kawas ato tamdaw, mansa lipahakay cingra. Mitodong ci Yisan o lalipahak kiso.

6. Hano salalicayen ko malohemay Krisciyang to nisahalakaan iso hani?

⁶ ˈAlomanay Krisciyang kaemangho misakafahayto, palipahak cangranan. Tanamen a misalalicay cangra tono miso a misahalakaan mamaan? Taneng 15:22 sanay ko sowal: “Ano caka pisalalicay to tamdaw i, cowa ko mamalaheci ko demak, adihay ko sapaini a sowal ngaˈ malaheci ko demak.” Alatek o papasowalen nangra kiso, o mananamay iso naitini pisakafahan, o papaepoc to hakelong no ˈorip iso. Itini i kakarayan pasifanaˈan no Wama ci Yis, taynito i sera i, padadotocay cingra minanam. Patinakoen, mananamay ningra misamaan milifok to lipahak i pitosilan to ngaˈayay ratoh ato madimadi itini i sapalifet a lipahaken. (ˈOsien ko Isaya 50:4; Hipray 5:8; 12:2) Dotoc i, o mamilengo kita to misamaanay hano palipahak ko misakafahay a demak i tisowanan.

7. O roma kaemangay tamdaw hano maolahay padama to tamdaw malo Krisciyang?

⁷ Pasowalay ci Yis: “Katayra kamo a pala nisawawaan ako . . . pasifanaˈen cangra.” (Matay 28:19, 20) Ano sapipadamaaw kiso to tamdaw malo  Krisciyang, papasoˈlinen iso too papaˈodingar to Kawas, hanaca o sakarenec no miso a demak koni. Kawra mahaenay to romaroma tayal, halafinto i, fanekfekto kiso. O cecay faˈinayan salikaka ci Timoti, nano 19 ko mihecaan misatapangayto misakafah, sanay cingra: “Mahemekay kako miemin to toki to demak no Kawas, samanen maolahay kako to Kawas. Isaˈayaw i, awa awaay ko mipacekiwan ako, tayrato i roma kilac i, kalikiay irato ko papina pacekiwan, o cecay masaˈopoayto. Ikor, mirienangay kako to tosaay folad a Pahatatanamay to Caay Ciraramod a Faˈinayan Salikaka (BSSB) *, ikor, tayraay kako i faelohay kilac, itira sasepatay ko pacekiwan ako. Maolahay kako pasifanaˈ to tamdaw, samanen maˈaraway to samaanay padama ko fangcalay saocor cangranan a mala ngaˈayay a tamdaw.”​—1 Tisalonika 2:19.

8. O roma kaemangay tamdaw misamaanay padama to tamdaw malo Krisciyang?

⁸ O romaroma kaemangay tamdaw, minanamay to sowal no roma kitakit. Patinakoen, naitiniay i Padaka a Yakopan, sanay ko sowal: “Pitoho ko mihecaan ako i, ˈalomanay ko Finam a selal i picudadan. Mangalayay kako pasowal cangranan to sifanaˈ ni Yihofa, saka, sapihatatanamaw to sowal no Finam. Halitosaan minengneng kono Finam ato Padaka a Mikecolay, palalini a mihatatanam tono Finam a sowal. Misawidangan ako ko Finam a salikaka. Tangasato 18 ko mihecaan, misakafahay kako. Ikor, mirienang to BSSB. Oni pahatatanamay tada taˈangayay ko nika padama to misakafahay a demak ako, nohatini itiniay i Finam kapot dademak, edengan a cecay malohemay malitengay kako. ˈAlomanay a Finam tamdaw masapaay to nika fanaˈ ako to sowal nangra. Ano mitosil i, papicomodan kako i lomaˈ nangra, makahiyay milengo to Fangcalay Cudad, o roma nangra micadaay to inoˈ.”​—Nengnengen ko Dmak 2:7, 8.

9. Padama to tamdaw malo Krisciyang wa mananam iso ko manan?

⁹ Padama to tamdaw malo Krisciyang, papadama tisowanan palahad to ngaˈayay a pinangan a dademak, inaneng a misacaciyaw to tao, rihakeden to niyahan. (Taneng 21:5; 2 Timoti 2:24) Masaka hemekan i, onini demak padama tisowanan mafanaˈ mikalasaka dademek to sinael. Roma i, mamafanaˈ kiso misamaan mikapot ci Yihofaan a dademak.​—1 Korinto 3:9.

10. Ano soˈlinto caka olah ko ˈalomanay tamdaw to ngaˈayay ratoh, hano kamayan a matanam iso ko lipahak to padamaay to tamdaw malo Krisciyang a demakan hani?

¹⁰ Ano soˈlinto caka olah ko ˈalomanay tamdaw to ngaˈayay ratoh, kamayan matanam iso ko lipahak, itini i padamaay to tamdaw malo Krisciyang a demakan. O makakapotay koni demak, mapolongay ko kasakopang mikilim to mangalayay to kimad a tamdaw. Soˈlin o cecayay aca salikaka ko padamaay to makahiyay micekiw a tamdaw, kawra mapolongay kita milifok to minaroˈan ato lipahak. Patinakoen, ci Polanten siwaay miheca dademak i cowa ka ngaˈay a kakilacan. Saan ko sowal ningra: “Maolahay kako mitenak to ngaˈayay ratoh, samanen o sapalimoˈot ni Yihofa koni. Micudiyap kako nai kawcong, misatapang a misakafah kako. Maolahay kako pakalalok to kaemangay, mahemekay maˈaraw ko nika cakat nangra i noˈadingoan. Dotoc mirienangay kako to BSSB, ikor manilnilay tayra i faelohay kilac. Soˈlina awaay ko mipadamaan ako a malo Krisciyang, kawra iraay kono romaroma a salikaka, lipahakayho kako mikiemel a mirienang to padamaay to tamdaw a malo Krisciyang a demak.”​—Patnakay 11:6.

11. ˈAlomanay kaemangay tamdaw mirienangay to manan fangcalay a demak?

¹¹ Dademak saki Yihofa adihayay ko hapakayraan. Patinakoen, o kaemangay tamdaw dademakay  i mipatirengay a demak. Icowacowa pala misaaliayho to adihayay kasaˈopoan, mipatireng to kasaˈopoan o fangcalay a demak, papalipahak tisowanan, oha papaˈodingarho to Kawas. Oniniya demak malecaday to romaroma fangcalay demak, o ngangaˈay kiso mikala cafay to Krisciyang a lipahaken. O mipatirengay demak no likakawa no Kawas, aadihay ko mananamay, matira misamaan misinanot to katalawan, tawlik a dademak, mitoor to kakeridan no demak.

12. Misakafahay demak misamaanay paira to roma fangcalay a demak?

¹² O cecay ci Kacaw hananay a faˈinayan salikaka, sanay ko sowal: “Nano wawaho kako, miharatengayto to sapieminaw to toki a dademak saki Yihofa. 19 ko mihecaan misatapang misakafah kako. Cecay lipay pinaay romiˈad kako matayal misamokong ato salikaka, a midama to sakaˈorip ako. Minanamay kako misafadahong, patireng to fawahan ato sasingaran. Ikor i, tosaay miheca matayal kako i mipadangay to mapadesay, patireng to kasaˈopoan, lomaˈ no salikaka. Matengil ako to misaaliay to mipatirengay tamdaw i Nanfi i, makalimay kako, ikor matahidangto a tayra mipadang. Itini i Afrika, pinapina lipay malinahayto i roma kitiraan, mipadang a mipatireng to kasaˈopoan. Oniya kapot no patirengay malecaday o paro no lomaˈ, marariday kami mala cafay a dademak, micekiw to Fangcalay Cudad. Maolahay kami pacafay to itiraay a salikaka mitosil to lipalipay. Mahaenay, nano wawaho a nisahalakaan ako, malaˈosiayto hanaca palipahakay takowanan.”

13. O demak i Pitil misamaanay palipahak to kaemangay tamdaw?

¹³ Anini o matayalay i Pitil a Krisciyang, nao misakafahay isalakat. O demak i Pitil o lipahakay nokaˈorip, samanen sahetoay o saki Yihofa. O sakakaay demak no Pitil, o mipawsaay to  noˈadingoan a kakaenen. O cecay matayalay i Pitil ci Tastin, sanay cingra: “Siwa ko mihecaan ako, o patosokan ako i, sapieminaw to toki malo misakafahay, micudiyap nai kawcong misatapangayto. Ikor no cecay ira ko kalitosa a miheca, matahidangay kako tayra i Pitil. Itini mihatatanamay to sapitolic a kikay, ikor mihatatanamay tono tingnaw a demak. Itini i Pitil, kinaˈayaway pakatengil to nika cowat no icowacowaay a mitosilay demak. Maolahay kako to Pitil a demak, samanen o nidemakan itini sahetoay o sapipadamaaw to tamdaw miingid ci Yihofaan.”

14. Misamaan kiso misahalaka a miemin to toki dademak tono Krisciyang hani?

¹⁴ Misamaan kiso misahalaka a miemin to toki dademak tono Krisciyang hani? Toha sapisarocodaw midoko ci Yihofaan, palahad to noˈadingoan capeling, tada o masaka limlaan. Malalok kiso micekiw to Fangcalay Cudad, calepen misimsim ko tatodong no sinael, itini i saˈopo misaˈicel a patahekal to pasoˈlinan no falocoˈ. Ano o micudadayho kiso, ngaˈayay misalof to inaneng a mitosil. Ngaˈay mihatatanam kiso misamaan cikihar to tamdaw, mafanaˈ misalalicay to harateng no tao, halo misongilaˈ a mitengil to caˈof nangra. O roma i, kinaˈayaw a dademak tono kasakopang a tayal, mipadang a miasik ato mitomadaw to kasaˈopoan. Maolahay ci Yihofa kalasaka dademak to misapoeneray ato mangalayay dademak a tamdaw. (ˈOsien ko ˈOlic 110:3; Dmak 6:1-3) Tahidangan ni Pawlo ci Timoti, mikapot cingranan milisoˈ to kasakopang, o cecay lalangian i, samanen mahemekay ko itiraay a salikaka cingranan.​—Dmak 16:1-5.

15. Toha sapikilimaw to matatodongay a tayal, misamaan ko demak iso?

¹⁵ Ano misakafah kiso i, o mamatayal to sakaˈorip no niyah. (Dmak 18:2, 3) Nolatekay, o ˈapotoay a sapahatatanam, pananamay to inaneng a matayal, ho mahela ko caay pihaemin to toki a tayal. ˈAyaw no misahalaka kiso i, lengoen ko kasakilac kantok anca romaroma misakafahay tora saˈosi iso, licayen o maanan tayal matatodongay to misakafahay. Kawra masaka limlaan i, matira o sowal no Fangcalay Cudad, “patorod han [ci Yihofaan] ko polong no nisahalakaan iso a demak”, hongaˈ malaˈosi ko demak iso.​—Taneng 16:3; 20:18.

16. Kaemangho misakafahto, hano papadama to tamdaw misaday to hanoikoran?

¹⁶ Pakasoˈlinen iso ci Yihofa, makalimay tisowanan a “pakaala to soˈlinay a ˈorip”, ira ko lipahakay a hanoikoran. (ˈOsien ko 1 Timoti 6:18, 19.) Ano misakafah kiso, iraay ko toki mikapot to romaroma a misakafahay Krisciyang. Papadama tisowanan malo malohemay a Krisciyang. O romasa, ˈayaw no ciraramod misakafahto i, papadama cangranan lipahak ko kararamod. Cowa koninian aca, ngangaˈay padadotoc a mala cafay cangra tatosa a misakafah.​—Loma 16:3, 4.

17, 18. Misahalaka to demak i, hano sinanoten ko falocoˈ iso?

¹⁷ Ano misahalaka to demak i, sinanoten ko falocoˈ. ˈOlic 20:4 sanay somowal ci Yihofaan: “Nanay palahecien Ningra ko nisafalocoˈan iso, nanay palahecien Ningra ko nisahalakaan iso a maemin.” Mihaenay haw i, sinanoten iso to mamisamaan kiso kalasaka dademak to hakelong no ˈorip iso. Sinanoten miharateng, o nidemakan ni Yihofa nohatini, oha mamisamaan kiso misaˈicel a mipadang. Ikorto i, songilaˈen a misahalaka ko nokaˈorip iso, palipahak to falocoˈ no Kawas.

¹⁸ Misarocod a midoko ci Yihofaan paparenec to falocoˈ iso, samanen o papaˈodingar to Kawas. Hay, pakasoˈlinen iso, “pipasayra [ci Yihofaan] milongoc to sakalipahak, ta pafelien Ningra kiso to kangalayan iso.”​—ˈOlic 37:4.