Tarokos ci Pawlo mafanaˈay to masaka talawan ko sasinting ni Satan, ˈarawhan, romaroma Krisciyang cowa ka talipaˈelal ko falocoˈ. Patinakoen, o itiniay i Korinto a salikaka, pakinaliay a pakasoˈlin to niyahan, miharateng to fafanekfek kami i kimad, cowa ko mamapolin nasaan. (1 Korinto 10:12) Hato palimoˈotan ni Pawlo cangra: “O katalawan ako i, o nika saˈfit namo a matiya o nipisaˈfit no ˈoner ci Ifaan. Ta maˈoning ko falocoˈ namo. Misawad kamo to soˈlinay a makoracay a falocoˈ to saki ci Kristoan.”​—2 Korinto 11:3.

Mahapinangay ita, itira tora sapalimoˈot ni Pawlo, aka pisakahemaw ko Krisciyang, miharateng to cowa ko mamafiyor ni Satan ko niyah. ano sapidipotaw to harateng no niyah, mafanaˈho to nika masaka talawan ko sasinting ni Satan, naˈonen ko falocoˈ a miliyas.

O manan ko sasinting hananay hani? Tano makaniway lihaf a misaˈfit to harateng ato waywayan no tamdaw o sanay. Sasinting hananay mahecaday o “misamangahay, miˈikongay, miontingay, miˈimeray to falocoˈ, mipaelay to falocoˈ, midengaˈay to harateng ato misafanaˈ”, milingatay to “mararaway waywayan, tatiihay, caay ka moecel a pakayraan.”—Sasinting ato Misamangah to Sowal.

Hakowaay ko nika masaka talawan hani? Mahecaday o ciwarakay a fali, caka hanek caka ˈaraw, palidlid sanay micomod i harateng no tamdaw, cowa ka hapinang madokaˈayto. O ˈalomanay tamdaw cowa ka fanaˈ to mafiyorayto no sasinting ko niyah, matira o sowal ni Wansi, ya matanengay tono waywayan demak a tamdaw, sanay ko sowal:  “ˈAlomanay tamdaw mafiyoray ato maˈimeray no sasinting, tada pakidemay ko nika pifiyor.” Sanay ko cecay a cudad: “Marariday a singki sa ko tamdaw a midokaˈ to tao.” Mahecaday i kalaloodan, mipatay to roma finacadan tamdaw, mipaekel to pidoyongan anca roma finacadan.​—O likisi no Misintingay—Misamangahay to Tamdamdaw.

Ano o tamdaw masafanaˈ no sasinting i, ci Satan coko mamilipalaw to tamdaw a nimaan? Namasangaˈ ko tamdaw i, misolapay to waywayan no tamdamdaw cingra. Nohatini maˈimeray ningra ko “hekal a maemin” mana eca pisaka dademak cingra to maamaan noni hekal a palosiyang to misamangahay a sowal. (1 Yohani 5:19; Yohani 8:44) Tano sasinting a mipohaw ci Satan to cowa pasoˈlin a tamdaw, “misawiay cingra a pamoraraw to polong no tamdaw i hekal.” (2 Korinto 4:4; Paˈarawan 12:9) Wa pakacoˈay kiso to sasinting ningra han?

Pafeliay ci Yis to hapakayraan a micoˈay to sasinting, sanay: “Ta mafanaˈ kamo to [kimad]. O sowal no Kawas ko mamitedal tamowanan.” (Yohani 8:31, 32) Ano malalaood ko sofitay, sakafanaˈaw to lihaf no ˈada, tona marariday palosiyang to makaniway lihaf ko ˈada, awaay ko pinang nangra to soˈlinay. Wa icowa kita mikilim to soˈlinay kimad, ho caka malipalaw hani? Ora pakayraan i, micekiw to Fangcalay Cudad. Itini i kimad no Kawas pakahela kita to pakayraan, mahapinang ko kadaw no sasinting.​—2 Timoti 3:16,17.

Mafanaˈay ci Satan tonini, kalasaka dademakan ningra ko hekal a miconged kitanan micekiw to Fangcalay Cudad. Aka a malipalaw kita! (Ifiso 6:11) Oha mamisarocod a “mihapinang” kita to kimad, misaˈicel a micekiw to Fangcalay Cudad. (Ifiso 3:18) O sowal ni Noam Komesko: “Awaay ko cima to mamiteli to kimad i ponoˈ iso. O kiso ko mamikilim,” sanay. Ano “mitiriˈ to Fangcalay Cudad to romiˈamiˈad” kita, o mamakilim ko soˈlinay kimad.​—Dmak 17:11.

Nikawrira, cowa ka olah ci Satan misongilaˈ misimsim kita to demak. Misamaanay hani? Samanen, “ano awa ko harateng no tamdaw i, madoloay a micomod i ponoˈ ko sasinting”, sanay ko sowal no cecay cudad. (O Sinpon no Hekal Isaka 20 Hahekalan) Aka a  saolatekay saan pakasoˈlin to matengilay iso. (Taneng 14:15) Kalasaka dademaken ko sapafeli no Kawas a taneng a miforfor to demak.​—Taneng 2:10-15; Loma 12:1, 2.

O sofitay marariday tano sasinting a mipadik to ˈada, milonay to sapiloodaw nangra. Misaˈfit to ˈada a mapapatay ko niyah, anca pasiwatik a miliyas to kapot. O cecay tapang no sofitay no Towic, sanay ko sowal “o sasinting no ˈada, mahecaday o ˈoner miorat to takolil, misaˈfit to tamdaw.” Mihaenay ci Satan a paliwasak to kasakopang. Patinakoen, mikidatay to lacongis ilalomaˈ no salikaka, macangalen anca cowa ka sadafdaf saan a miliyas to likakawa no Kawas.

Aka a masaˈfit! Papikeriden ko Kimad no Kawas. Patinakoen i, toha sakala cecayaw ato salikaka, padadotoc a “kasasisolol” sanay ko limoˈot no Fangcalay Cudad, kalikien a misaysay ko lacongis sanay. (Kolosay 3:13, 14; Matay 5:23, 24) Aka pisiwatik to kasakopang sanay a palimoˈot kitanan. (Taneng 18:1) Lifeten ko niyah, to papaka coˈay to safiyor no sasinting ni Satan hokira. Haenen ko niyah a milicay: “Iˈayaw tiya masafafelit ko harateng ako ato salikaka i, papikayatan ako ko fangcalay saocor ha, anca mafiyoray noni hekal kako han?”​—Kalatiya 5:16-26; Ifiso 2:2, 3.

O sofitay ano caka madimadi to tapang ningra i, awato ko saloˈingan ningra misaˈicel a milood. Mafanaˈay ko ˈada toninian, saka mihaenay a mipalak to nika pitiˈer no sofitay to tapang. Wa mihaen cingra a misinting: “Aka pasoˈlinen ko tapang iso! Ano tengilen iso cingra, o mamapatay kiso!” Alatek sadaken ningra ko manan a raraw nora tapang, hato pakasoˈlin sato kiso. Mahaenay ci Satan, mitanamay to masamaamaanay a pakayraan, toha sakacisasaaw no falocoˈ iso to pikerid ni Yihofa.

Misamaan kiso a micoˈay hani? Seteken ko falocoˈ mitoor to likakawa ni Yihofa, soˈlinto cowa ka lefot ko mikeriday tamdaw, papadadotoc a madimadi a midama cangranan. (1 Tisalonika 5:12,13) Ano masamaamaan ko sowal no misafelitay to kimad a tamdaw, anca ano tengilen hato o soˈlinay, “aka ka  rawraw, aka ka siwala ko falocoˈ.” (2 Tisalonika 2:2; Titus 1:10) Tooren ko sapalimoˈot ni Pawlo ci Timotian, tafoen ko minanamanto iso a kimad, aka mapawan to naicowaay kiso a minanam sanay. (2 Timoti 3:14,15) Adihayay ko wacay ita, toniya 100 a mamihecaan, kalasaka dademakan ni Yihofa ko madimadiay citanengay koli a mikerid kita, romakat i lalan no kimad, mihaenay haw i, sarocoden ita ko nika pakasoˈlin tora mapasimalay a salikaka.​—Matay 24:45-47; Hipray 13:7, 17.

O sasinting ni Satan marariday cowa ka hapinang, nolatekay kalasaka dademakan ningra ko sapatalaw milood kitanan. O sowal no cecay cudad: “O sapatalaw a pakayraan i, o salitengay a sasinting,” sanay. (O likisi no misintingay—Misamangahay to Tamdamdaw) O Assiriya tamdaw, patinakoen, tano “sapatalaw ato sasinting” a miˈimer to tamdaw, sanay ko Hakasi no Ikok ci Filip Taylo. Mihaenay ci Satan patalaw to tamdaw, matalaw a maroero, matalaw a mapatay, ato romaroma a misawiˈay a harateng a miˈimer to tamdaw, sawad sato cangra midoko ci Yihofaan.—Isaya 8:12; Yirimiya 42:11; Hipray 2:15.

Aka pasalaten ci Satan a patalaw a milonay to falocoˈ iso, cato ka madimadi to Kawas. Sanay ci Yis: “Ano mipatapatay to tireng no tamdaw ko mipatayay a tamdaw i, iikor nonini ano caayto pakapimaan cingra i, aka ka talaw kamo.” (Luka 12:4) Pakasoˈlinen ita ko sakiˈok ni Yihofa, misawacayay Cingra to mamidimokos kitanan, pafeli to “tadamaanay a ˈicel”, padama kitanan pakalowid to talaw.​—2 Korinto 4:7-9; 1 Pitiro 3:14.

Manaokaniw, nolatekay, iraay ko manan a katalawan ita, malonayen ko falocoˈ. Itiya, haratengen ko sowal ni Yihofa ci Yosuwaan, sanay Cingra: “Saˈicelen, safaˈinaˈinayen ko falocoˈ iso. Aka ka talaw, aka ka toled. Nawhani ano talacowacowa kiso i, ira Kako [ci Yihofa] a Kawas iso a mikapot i tisowanan.” (Yosuwa 1:9) Ano marawraw ko falocoˈ i, tangsolen mitolon ci Yihofa, fowahen ko kacalemceman i Cingranan. Papasoˈlinen ita, o sapafeli no Kawas a rihaday, o “mamisimaw to falocoˈ ato harateng” ita, ira ko ˈicel ita midipot to harateng ita, caka mafiyor no sasinting ni Satan.​—Filipi 4:6, 7, 13.

Maharatengayho iso koya tapang no sofitay no Assiriya, misamaanay a patalaw to finawlan no Kawas han? Awaay ko mamipaˈorip to Yutaya tamdaw pakaliyas to Assriya, ano o Kawasto no Israil ci Yihofa, awaay ko ˈicel sanay. Malitaˈang ko sowal ningra, o ci Yihofa ko miocoray tamiyanan papipalaˈafo tamowanan sanay. Nikawrira, haenan ni Yihofa pasowal ko finawlan Ningra: “Aka ka talaw kamo to nipilikaf no Assiriya a tamdaw a somowal.” (2 Hongti 18:22-25; 19:6) Ikorto, ocoran ni Yihofa ko cecay a coyoh, mipatay to 185,000 sofitay i cecay a dadaya.​—2 Hongti 19:35.

Ano minengneng kiso to ika i, maˈaraw ko iikaay tamdaw masafanaˈ no tao i, sapilekalaw kiso: “Aka a pakasoˈlin tora tamdaw, misakaniway tisowanan cangra!” Wa saan kiso han? Matiraay ko coyoh, mitapal cangra kitanan i kakarayan maˈaraw kita i, mihaenay sapipasowalaw kitanan: “Aka a malipalaw ni Satan!” Sanay.

Aka a pitengil to sasinting ni Satan. (Taneng 26:24,25) Tengilen ko sowal ni Yihofa, ano i maananto a demakan tiˈeren Cingra. (Taneng 3:5-7) Maolahay ci Yihofa kitanan, pakalalok kitanan, saan ko sowal: “Wawaaw Ako, kao citanengay kiso, ta lipahak ko falocoˈ Ako.” (Taneng 27:11) Ano tooren ita ko sowal no Kawas, o papakalowid kita to harateng ita.