O Krisciyang mamidoedo to safalod no Fangcalay Cudad, mipiliˈ to matatodongay a hapakayraan a midipot to niyah. Mirikecay to tamdaw ko Fangcalay Cudad, mikalasaka dademak to kowang a midipot to niyah caka dokaˈ no tao. O lalangian hatiraay tora ilaenoay:

O fangcalay ko ˈorip sanay ci Yihofa, mangalefay ko ˈorip no tamdaw. Ci Tafiti somowalay, ci Yihofa o pipowalan no ˈorip sanay. (ˈOlic 36:9) Mihaenay haw i, o Krisciyang ano sapidipotaw to ˈorip no niyah, anca midipot to dafong no niyah i, aka a midokaˈ to ˈorip no tamdaw, mipatay to tamdaw.​—Limoˈot 22:8; ˈOlic 51:14.

Ano o mananto a dafong alatek sakapatay no tamdaw, kawra ano ira ko kowang, ano cowa ko mipadetengan ha, anca mapadetengay ha, madoloay a sakapatay no tamdaw. * O mariˈangay tamdaw, marawraway yaca ko falocoˈ, ano pakaˈaraw to kowang i, mangalefay a matirtir ko falocoˈ, midemak sato to katalawan a demak, mipatay anca midokaˈ to tamdaw.

ˈAyaw no mamapatay ci Yis a dadaya, palimoˈotan ko nisawawaan papiala to fonos, kawra cowa ko sapicoˈayaw to tamdaw. (Luka 22:36, 38) Mihaen ci Yis o sapipasifanaˈaw cangranan, soˈlinto tahasiˈayaw to cifonosay tamdaw, cowa ko ngangaˈay tano  fonos misaysay to demak. (Luka 22:52) Toya dadaya, sodoc sa ci Pitiro to fonos mitapaˈ to tangila no koli no saysi, saka celiˈ han ni Yis ci Pitiro: “Cofelen ko fonos iso!” Ikor, somowalay ci Yis to cecay matatodongay to aniniay Krisciyang a kalimlaan a kimad: “O mitatoyay to fonos a tamdaw i, o fonos ko sakapatay ningra.”​—Matay 26:51, 52.

O tamdaw no Kawas sapidofdofaw to safalod no Mika 4:3, sanay: “O papala kangkangen no tamdamdaw ko fonos nangra. O papala mamiyaen nangra ko ˈidoc nangra.” O Krisciyang anini, o rihadayay tamdaw ko pinengneng no tao cangranan, mitooray to sapalimoˈot ni Pawlo cangra: “Aka kao tatiihay ko sapicoˈay i cimacimaan. . . . Pisaˈicel kamo to sakararihaday namo ato tamdamdaw.” (Loma 12:17, 18) Soˈlin kinapinapinaay ci Pawlo tahalifa to adihayay katalawan, “makariˈang no kokong,” matooray ningra ko sowal ningra, cowa ka pisafelit to safalod no Fangcalay Cudad. (2 Korinto 11:26) Pakasoˈlinay ci Pawlo to sapalimoˈot no Fangcalay Cudad, mitiˈer to Kawas “ikaka no sapilood a lalosidan.”​—Patnakay 9:18.

Ikakaan no Krisciyang minengneng ko ˈorip to nika pinengneng to dafong. Sowal no Fangcalay Cudad, o ˈorip cowa ko pakayniay i dafong sanay. (Luka 12:15) Ano masiˈayaw ko mitatoyay to sapilood a lalosidan a kokong, kaepeden ko sowal a milalang, ano caka filo i, tengilen ko sowal ni Yis: “Aka picoˈay to miriˈangay tisowanan a tamdaw.” Alatek, “halo kafafangen” anca “halo ilalomaˈay a rikoˈ iso a paflien”, tatodong noni, pafeli han to saali nangra o sanay. (Matay 5:39, 40; Luka 6:29) * Nikawrira, o citanengay i, ano pasowalen ita to o Misawacayay Tamdaw ni Yihofa kita, o rihadayay tamdaw kita, cowa ka olah pasengi to dafong, alatek cowato ko mamidokaˈ kitanan.​—1 Yohani 2:16; Taneng 18:10.

Haratengen ko makapahay falocoˈ no romaroma. (Loma 14:21) Ano mafanaˈ ko salikaka, toha sapidipotaw to niyahan a ira ko kowang ita, wa macekok cangra, mapolin i noˈadingoan alatek. Ano miharatengan ita ko salikaka, soˈlinto mitooray to rikec cikowang kita, wa makahi a sawad saan to fadangalan no niyah a ira ko kowang hokira.​—1 Korinto 10:32, 33; 13:4, 5.

Saˈicelen no Krisciyang malo ngaˈayay a taˈarawan. (2 Korinto 4:2; 1 Pitiro 5:2, 3) Ano tooran no malohemay malitengay ko Fangcalay Cudad, mirikec to cecay Krisciyang, padotocho a ira ko kowang to sapidipotaw to niyah, wa cowa ito ko taˈarawan a Krisciyang cingra. Wa cowa ko ngangaˈay ira ko ˈinorong anca mikiriwiˈay a tayal i kasakopang. Ano cikowangay ko Krisciyang i katayalan ningra i, o citanengay demak, falicen kora tayal. *

O Krisciyang mamisamaan midpot to niyah, to paro no lomaˈ ato dafong no niyah, ao manan ko hatayal, o niyah ko mamisaˈosi. Kawra, o safalod no Fangcalay Cudad patahekalay to taneng no Kawas, ato olah Ningra i kitanan. O malohemay Krisciyang mamisakareteng toni safalod, cowa ko hasapidipotaw to niyah caka madokaˈ no tao a cikowang. Mafanaˈay cangra, edeng ano mitiˈer to Kawas, midofdof to palinian no Fangcalay Cudad, ngaˈ milifok to midaˈocay a rihaday.​—ˈOlic 97:10; Taneng 1:33; 2:6, 7.