SANAY ko sowal ni Aylon: “Malinah i faelohay kasakopang marawraway kako, calemcemay awa ko macawmaˈay a widang, cakangaˈay a maenep i faelohay kasakopang.” * Nai niyaroˈningra 1,400 kongli ko raay no faelohay a kasakopang ni Aylon.

Ano malinah kiso i faelohay kasakopang, wa marawraw halatek. Mihaenay, o maanan ko papadama tisowanan, mananam i faelohay kasakopang hani? O kananaman a toki, ano sahalafin sa, wa misamaan ko demak iso hani? O roma, ano ira ko faelohay salikaka i kasakopang, sasamanen iso a padama ho kahaenay cangra a mananam i faelohay kitiraan hani?

Haratengen: Ano linahen iso ko kilang i faelohay kitiraan, cowa ko madoloay. Tocerid mikolkol to kilang, kaketonen ko pina a lamit, ngaˈay ko pionpang. Palomaento i faelohay kitiraan ko kilang, ranikay a malengaw ko faelohay a lamit, ngaˈpadotoc maˈorip. Mahecaday, malinah i faelohay kasakopang, cowa ko madoloay, samanen palamitay to kiso i telang a kasakopang, sakoniya sowal adihayayto ko widang iso i kasakopang, palahaday to ngaˈayay noˈadingoan a nanaman. Nohatini, miliyaw kiso a palamit i faelohay kasakopang, ngaˈpadotoc a lomahad. Hatiraay, sasamaan ko demak iso hani? Saka dademaken ko safalod no Fangcalay Cudad. Dotocto, nengnengen ita ko pina a safalod.

Marariday a miˈosi to Sowal no Kawas a tamdaw, “matiya cingra o nipalomaan i tatihi no ˈalo a losay a kilang, maraod ko kacihecian i, ciheci. Caay ka rasras ko papah. Ano o maan ko nidemakan ningra i, malaheci a maemin.”​—ˈOlic 1:1-3.

Maedeng ko miselipan no kilang a nanom ngaˈpadotoc a tanoktok, wa micerid ko Krisciyang a miselip to Sowal no Kawas, ngaˈpadotoc tanoktok i noˈadingoan. Mihaenay, to romiˈamiˈad a miˈosi to Fangcalay Cudad, micerid mirienang to saˈopo, ira ko pakalomaˈay pidoko ato notekedan a picekiw. Ya ngaˈayay nanaman iso padotocen i faelohay kasakopang.

“O halipaladaˈay a tamdaw i, mangalef a matongal ko nika cakat ningra, o pipadama to tao i, o sakaciepoc no tireng.”​—Taneng 11:25.

Misarocod mirienang to mitosilay mapakalalok kiso, kaleki mananam i faelohay kitiraan. O cecay ci Kaywen a malohemay malitengay sanay: “Malinah kami i faelohay kasakopang caka halafin, misatapang to padamaay misakafahay, taˈangayay ko sadama tamiyanan. Kalekiay kami mafanaˈto salikaka i faelohay kasakopang, misakafahay ato pitosilan a kilac.” O faelohay kasakopang ni Loci 1,600 kongli ko raay to kitiraan i salakat, sanay, “saka nanamaw to faelohay kasakopang, misaˈicel mirienang to mitosilay demak. O roma, pasowalen ko malohemay malitengay to makahiay kiso, midama to tayal no kopang, tinakoen: Miasik to kasaˈopoan, mikotay to kamok anca pahatatanamay a kimad, pakalic to tao mirienang to saˈopo. Maˈaraw no salikaka ko kinafalahay a harateng ita, wa makalim misawidang kitanan.

“Sakakahad to falocoˈ.”​—2 Korinto 6:13.

Cowaten ko micawmaˈan, paihekal tono salikaka  a olah. Malinah ca Milisa tayra faelohay kasakopang, misaˈicelay micawmaˈto faelohay widang, sanay: “Marataray kami tahira kasaˈopoan, maosoyay miliyas, adihayay ko toki macacawmaˈto salikaka, cowa ko pikawih aca.” Padamaay koni cangranan mafanaˈto ngangan no salikaka. O roma, hinalafangay cangra, matongalay ko kalawidang nangra ato salikaka. Sowal ni Milisa: “Mafafalicay kami to fangko no tingwa, ngaˈay mararinnak, mirienang to noˈadingoan a demak no kasakopang.”

Ano pasangaray kiso talaˈayaw masasowal to faelohay widang, kitinien i madoloay a demak misatapang. Tinakoen, masedi ko pising. Soˈlin mangodo kiso i salakat ngaˈay to masedi ko pising ngaˈayay palaliingid kisowanan ato salikaka. Malinahay ci Lowiciw i miraayay to niyaroˈa pala, sanay cingra: “Maomoyay kako. Tahira faelohay kasakopang, mipaciˈciyan ko niyah a masasowal to salikaka. Nengnengen ako ko cima cecayay maroˈi kasaˈopoan, miraod tora tamdaw a micawmaˈ. Halatek mahecaday takowanan a kalingodo cingra.” Ngaˈay patireng ko patosokan, ˈayaw anca harek no cecacecay saˈopo tanamen masasowal to cecay kafahalan a salikaka.

O roma i, malinah i faelohay kasakopang to pina lipay mahemekay kiso mafanaˈto faelohay widang, mataˈlif ko cecay liyad, palidlid sanay malahedaw i salakatay a hemek. Mihaen, tatongalen iso misaˈicel, ngaˈpadotoc micawmaˈto faelohay a widang.

O roma kilang misaeliay to koˈedaway a toki ngaˈpalamitay i faelohay kitiraan. Mahecaday, cowa ka hahecahecad ko kananam no tamdaw i faelohay kasakopang. Ano halafinayto kiso malinah i faelohay kasakopang, kamayan caka enep i faelohay kitiraan, saka dademaken ko laenoay safalod no Fangcalay Cudad wa ngaˈay padama tisowanan.

“Aka ka rarima kita to ngaˈayay a demak. Ano caay ka toled kita, ano maraodto ko romiˈad i, o mamalayap ita ko tatodong no ngaˈayay a demak ita.”​—Kalatiya 6:9.

Pafelien ko niyah to adihayay toki mananam to faelohay kitiraan. Tinakoen, ˈalomanay micudiyapay i Kiliyat a Picudadan milakowitay to riyar a mitosilay manilnil i roma kitakit i, tocerid pinato miheca ngaˈminokayay milisoˈto salawina. Mihaen cangra matongal ko kafanaˈto salikaka, kaleki mananam to cowa kalecad a pinangan.

Ci Yalihangtelo kinapinapinaay malinah, mafanaˈay cingra saka enepaw i faelohay kitiraan, cowa kangaˈay macaloh, sanay cingra: “Malinah anini, pasowalay ko fafahi takowanan: ‘O ngaˈayay widang ako itiraay maemin i telang kopang,’ sanay!” Patalipaˈelalan ni Yalihangtelo ko fafahi, ˈayaw no tosa miheca mahecaday ko sowal ningra. Kawra toni tosa miheca, talaˈayaway cingra ciharateng to tao, telocto o cowa kafanaˈan ningra a salikaka malo ngaˈayayto a widang.

“Aka pasowal toya, ‘nawiro ikaka no aniniay ko nika ngaˈay no iti:yaayho a romiˈad saw?’ Caay kono citanengay a licay konini.”​—Patnakay 7:10.

Aka a pararinien ko saˈayaway ato aniniay a kasakopang. Halatek cowa kananam kiso to pakayraan no salikaka a somowal nohatini, tinakoen cowa ka hecad to telangay a kasakopang a samadah anca samoecel sanay a somowal. Ano samaanto, samacayen i ngaˈayay nangra ko harateng, mahaen tisowanan mitokel to tao minengneng to ngaˈayay iso. O  malinahay i faelohay kasakopang a salikaka mihayay, maharek malinah cangra miharatengay: “Soˈlinay kako a maolah to kasacefang no salikaka han?”—1 Pitiro 2:17.

“Pingitangit ta mapafeli kamo. Pikilim ta pakatama kamo.”​—Luka 11:9.

Padotoc mitolon micangacang to sadama ni Yihofa tisowanan. O cecay ci Taywi a malohemay malitengay sanay: “Hamaan paciˈcien koniyah, saka laˈosiaw no adihayay demak misaeliay kita to sadama ni Yihofa, kalimelaan ko satolon!” Ya masowalay i fafekang a Lowiciw mihayay tonini, sanay: “Ano cowa kalangaˈay kami to kasakopang ano sanay ko harateng, mitolonay kami ci Yihofaan pakayni toniya demak, micangacang Cingranan ‘pasifanaˈtamiyanan midemakay to maanan, hato pasangar ko tao a miingid’. O roma, tanamay kami misaadihay to toki a kalacafay to salikaka.”

O wama wina, ano pasangaray ko wawa iso mananam i faelohay kasakopang, palaken ko toki malacafay to wawa a mitolon. Patadoen ko wawa milimasmas to ciepocay a lawla, padama cangranan micawmaˈto faelohay widang.

Wa samaan kiso a padama to faelohay malinah a salikaka hani? Satapang saˈicelen malo soˈlinay a widang. Tanamen iso miharateng ano malinah ko niyah i faelohay kasakopang, mitokelay kiso to manan a sadama no tao, ikor talaˈayaw a padama to faelohay a tamdaw. (Matay 7:12) O faelohay salikaka wa ngaˈay mirienang to pakalomaˈay pidoko anca malacafay tamowanan minengneng to JW Tilifi han? Wa ngaˈay kiso mitahidang cangranan malacafay mitosil han? Soˈlin kinacecay aca malacafay a komaen, o mamaharateng nangra to hinalafangay kiso. Cowa konini aca, wa ngaˈayho kiso misamaan padama to faelohay salikaka hani?

Sowal ni Kalos sanay: “Tahira kami i faelohay kasakopang, pafeliay ko cecay fafahiyan salikaka to kitiraan no picakayan a singdi, mafanaˈkami icowaay ko madoloay dafong, taˈangayay ko sadama tamiyanan.” O faelohay salikaka ano cowa ka nanam to romiˈad itini, o mamikoˈid cangra to pasifanaˈiso cangranan to sasamaan mipiliˈto matatodongay caˈedong. Wa ngaˈay padamaen cangra cipinang to likisi ato pihakelongan no niyaroˈ, mihaen wa ciepoc ko pitosil nangra.

O masowalay satapangan no lalakaw ci Aylon cecayayto miheca i faelohay kasakopang, sanay: “Satapang paciˈcian ako ko niyah a mafanaˈto salikaka, nohatini mahecaday o paro no lomaˈako cangra, lipahakayto kako itini.” Mahapinangay ni Aylon malinah cingra i faelohay kasakopang cowa ka lahedaw ko widang, matongalay ko adihayay a ngaˈayay widang.