1. Ano romadiw kita wa ngaˈay a misamaan?

O SOWAL no cecay paˈolicay to radiw a tamdaw sanay: “O sowal mikidatay to harateng, o radiw mitemeray to falocoˈ, ano romadiw i, micalepay i falocoˈ ko harateng.” Maolahay ci Yihofaan kita, pahemek Cingranan, ano tano radiwen a patahekal ko olah to Wamaan, coko ngaˈayay han? Ano cecayay aca anca mapolong ko kasakopang a romadiw pahemek to Kawas, o pidoko ci Yihofaan kora, samanen o masaka limelaan ko romadiway i soˈlinay a pidoyongan.

2, 3. (1) O roma salikaka ano malacafay a romadiw to ˈalomanay, samaanay ko harateng nangra? (2) Oniya lalakaw mamilengo to manan a salicay?

² Ano kalacafay romadiw ato kasakopang i, mahemekay kiso han? Anca mangodoay kiso han? Itini i romaroma serangawan, mangodoay ko tamdaw romadiw i kaˈayaw no ˈalomanay. O mahaenay harateng wa mifiyor to kasakopang. Mangalefay o mikeriday a salikaka ano caka pikihatiya a romadiw, anca matayal to roma demak ano romadiw ko ˈalomanay.​—ˈOlic 30:12.

³ Ano o mahawpay i noka pidoko ita, ano han a minengneng ko romadiway i, cowa ito ko mamilawa a romadiw, samanen o masalalomaˈay no saˈopo kora demak. Mankora licayen ita ko  niyah: ‘Samaanay ko pinengneng ako to romadiway i saˈopo hani? Misamaan kako miremo to talaw, mahemeken a romadiw hani? Misamaan kako mikifalocoˈ a romadiw hani?’

4, 5. Itini midokoay a demak nolitengan a Israil tamdaw, hakowaay ko nika masaka limelaan no romadiway hani?

⁴ O madimadiay sikawdan ni Yihofa halafinayto tano radiw a pahemek Cingranan. O nolitengan a Israil tamdaw ano madimadi a midofdof to araaw ni Yihofa i, o romadiway itini i noka pidoko nangra, iraay ko masaka limelaan a saaroˈan. Patinakoen, milikakawaan ni Tafiti ko 4,000 a Lifi tamdaw matayal i fangcalay sefi, midatok a pahemek ci Yihofaan. Lalomaˈ nangra 288 a tamdaw “o tadamafanaˈay tono radiw . . . o nao minanamayto to radiw.”​—1 Rayray 23:5; 25:7.

⁵ Ya mipacakat to Pitaˈongan a sefi i, o radiw ato romadiway tada o tadamaanay a demak. O sowal no sinael: “Yo mipahemek to Tapang [Yihofa] a romadiway ko paradiway a tamdaw i, mipahakelong a pasoni to laepa ato simpar ato romaroma a datok cangra, tada makapah a tengilen. Paˈolic sa cangra a romadiw . . . mapatedi no ˈdil [ni Yihofa].”​—2 Rayray 5:13, 14; 7:6.

6. Sowalen hena, ya keriden ni Nihimiya ko Israil patireng to ˈadipel i, iraay ko manan a romadiway a limasmas?

⁶ Ya keriden ni Nihimiya ko madimadiay a Israil tamdaw, patireng to ˈadipel no Yirusalim i, milikakawaan ko Lifi a ngasaw romadiw ato midatok. Malahecito masangaˈ ko ˈadipel i, milimasmasan ni Nihimiya ko “tosa kasacefang a miˈahowiday a romadiway,” oni tosa kasacefang masasilikoray a mikoniyor to ˈadipel a talaˈayaw a romakat, salikor malalitemohay i ngata no Pitaˈongan sefi a ˈadipel, o ngihaˈ no radiw nangra pafeselay tayni i ra:ay, mitongal to kalipahak noni demak. (Nihimiya 12:27, 28, 31, 38, 40, 43) Matengil ni Yihofa pahemek a romadiw ko finawlan Ningra, maedeng mahemekan nanay Cingra.

7. Misamaanay ci Yis misakareteng to masaka limelaan ko saaroˈan no romadiway demak?

⁷ Mapatirengto ko Krisciyang a kasakopang i, o romadiway demak kamayanay ira ko masaka limelaan a saaroˈan. Ya patireng ci Yis to Lafi no Tatapangan, oni masaka limelaan a dadaya i likisi no tamdaw i, romadiway cangra a milaheci toni saˈopo.​—ˈOsien ko Matay 26:30.

8. Saka cecay hahekalan a Krisciyang, itini i romadiway pahemek ci Yihofaan patirengay to manan a taˈarawan?

⁸ Saka cecay hahekalan a Krisciyang patirengay to taˈarawan, mapolong a romadiw pahemek ci Yihofaan. Soˈlin itiraay aca i lomaˈ no salikaka masaˈopo cangra, cowa ka piconged to karomadiw nangra a pahemek ci Yihofaan. Itini i sapatemer no fangcalay saocor, sanay pasowal ci Pawlo to salikaka: “Kao ˈolic ato fangcalay a radiw ato noˈadingoan a radiw ko sapikansiya no falocoˈ namo to Kawas a romadiw.” (Kolosay 3:16) O fangcalay a radiw ita o miakoˈiday a “noˈadingoan a radiw”, o noˈadingoan a kakaenen koni, o madimadiay citanengay a koli ko misadayay toni.​—Matay 24:45.

9. (1) O manan a lalangian alatek matalaw kita misataˈangay to ngihaˈ a romadiw pahemek ci Yihofaan hani? (2) Samaanen ita romadiw pahemek ci Yihofa? O cima ko mamikerid a romadiw i kasakopang? (Nengnengen ko satapangan coka.)

⁹ Alatek cowa ka nanam kiso a romadiw,  tona pakayniay kalomahadan iso, serangawan iso alatek. Anca o pakayniay noka cakat no milokoingay a lalosidan no hekal, matengil iso ko maradiway tamdaw a romadiw i, caay ka ngaˈay ko ngihaˈ ako wa saan a masawien kiso. Nikawrira, onini lalangian cowa ko mamiconged kisowanan a romadiw pahemek ci Yihofaan. Mihaenay haw i, saˈakawangen a mitatoy ko fangcalay radiw a cudad, micaˈa to falohang, naitini i falocoˈ a miakoˈid a pahemek ci Yihofaan. (Icra 3:11; ˈOsien ko ˈOlic 147:1.) Itini i ˈalomanay kasaˈopoan, ngaˈayay itini i tilifi a minengneng to ˈolic no radiw, ho ngaˈay misataˈangay to ngihaˈ a romadiw. Itini i Sapahatatanam to Ciˈinorongay a Kantok a Saˈopo, romadiway ko salikaka, patalipaˈelal cangranan mamikerid cangra romadiw i kasakopang.

10. Hano hamaan matalaw misataˈangay to ngihaˈ a romadiw to fangcalay radiw hani?

¹⁰ O roma tamdaw caka pisataˈangay a romadiw, alatek matalaway afesaˈ ko radiw no niyah. Kawra haratengen ano caciyaw kita i, iraay ko “patelac a sowal” ita. (Yakop 3:2) Hatiratira i, cowa ka hawad sato caciyaw kita. Mihaenay haw i, soˈliˈlin caka ngaˈay ko ngihaˈ ita, aka sawad saan romadiw pahemek ci Yihofaan.

11, 12. Iraay ko manan a sapasifanaˈ misalof to ngihaˈ ita?

¹¹ O roma tamdaw matalaway romadiw, samanen cowa ka fanaˈ to sasamaan a romadiw. Ano mahaenay i, ngaˈayay kalasaka dademaken ko sapasifanaˈ a misalof to ngihaˈ. *

¹² Ano matatodong a pasaselaˈ wa taˈangay ko ngihaˈ. Mahecaday ira ko tingki ngaˈ malikatay ko dawdaw, helipen ko matatodong ko kaadihay no fali, caciyaw anca romadiw i, wa ira ko ˈicel. O ngihaˈ  noka romadiw ato ngihaˈ noka caciyaw palecaden a taˈangay, latek ikaka ko nika taˈangay. (Nengnengen ko Sapasifanaˈ no Kawas Ciepocay Tisowanan—Pahatatanamay to Mitosilay a Cudad, 181-184 fiedac, laeno no lalangian “ˈImeren ko Saselaˈan Iso.”) O matiliday i Fangcalay Cudad a romadiway to fangcalay radiw, somowalay to “satataˈangen ko ngihaˈ a romadiw,” sanay.​—ˈOlic 33:1-3.

13. Tadtaden, samaan a fanekfeken ko falocoˈ to ngihaˈ no niyah.

¹³ Itini paro no lomaˈ a picekiw, ngaˈayay tooren iso kora ilaenoay sapasifanaˈ a mihatatanam: Piliˈen ko cecay kaolahan iso a radiw. Dotoc fanekfeken ko falocoˈ a misataˈangay miˈosi tora ˈolic, ikor haenen a misataˈangay ko ngihaˈ a romadiw, pakinacecay han no saselaˈan milaheci miˈosi ko cecay sowal, ikor haenen palecad romadiw to cecay a sowal. (Isaya 24:14) Mihaen kiso wa kifetol a ciˈicel ko ngihaˈ iso, alatek mamahapinang iso to ngaˈayay tengilen ko ngihaˈ iso!

14. (1) Ano romadiw sangatowaˈen ko ngoyos, iraay ko manan a epocan? (Nengnengen ko sapatongal lalakaw “ Samaanen Misalof ko Ngihaˈ Iso.”) (2) Icowaay sapasifanaˈ matatodongay tisowanan?

¹⁴ O cecay hapakayraan misakifetol to ngihaˈ i, ngatowaˈen ko ngoyos, ikakaen ko pisangatowaˈ to kalo caciyaw, hongaˈ macelak ko takolaw ciˈicel masadak ko ngihaˈ. Kawra ano marihaw ko ngihaˈ iso anca pakinali a ˈaretic i, wa samaanto hani? Sapasifanaˈ no Kawas Ciepocay Tisowanan—Pahatatanamay to Mitosilay a Cudad, saka 184 fiedac, sapatongal lalakaw “Salofen ko Pasangar,” iraay ko sapasifanaˈ.

15. (1) Isaka 2016 miheca saka 10 folad a mikiriwiˈay saˈopo, milasilay to manan a cudad? (2) Mitepang toni faelohay fangcalay radiw o manan ko araaw?

¹⁵ Isaka 2016 miheca, itini i mikiriwiˈay  saˈopo no Misawacayay Tamdaw to mihecahecaan to saka 10 folad, salikaka ci Stifen Let, o mikayatay malohemay malitengay i Congpo, milasilay to faelohay fangcalay radiw,“Pahemeken Romadiw ci Yihofa,” oni faelohay fangcalay radiw o kakalasaka dademaken i saˈopo ano ikor. O araaw noni faelohay fangcalay radiw, o sapalecadaw toya misalofan isaka 2013 a miheca a Fangcalay Cudad Faelohay Hekal Mihongyakan. Oniya Fangcalay Cudad misawadan ko telang a sasowalan, palecadan koni faelohay fangcalay radiw, hanaca mihawpan ko pakayniay i mitosilay ato piakoˈid to sapatefoc ni Yis a radiw. O romadiway a demak tada o masaka limelaan itini i pidoyongan ita, o mikeriday malohemay malitengay i Congpo sapisangaˈaw to makapahay radiw, safaco no papotal nora radiw a cudad palecadan to misalofan a Fangcalay Cudad Faelohay Hekal Mihongyakan.

16, 17. Iraay ko manan mikiriwiˈay noni faelohay a fangcalay radiw?

¹⁶ Toha sakadoloaw mikalasaka dademak toni “Pahemeken Romadiw” ci Yihofa, tano lalangian a misilsil koni radiw. Patinakoen, saˈayaw a 12 a radiw o pakayniay ci Yihofaan, dotoc a 8 radiw o pakayniay ci Yisan ato sapatefoc ningra. Iraay ko pirorodan ilalikor no cudad, hongaˈ madolo mikilim ko mikimaday salikaka to haradiw.

¹⁷ Toha sapitemeraw to falocoˈ no tamdaw, misalofan ko romaroma ˈolic no radiw, mifalahan ko caayto ka sakadademaken ita a sowal, hongaˈ isekal a radiwen. O cecay lalangian i, “Dipoten ko falocoˈ iso” sanay, misalofan pao ““Dipoten ko falocoˈ ita” sanay, misamaanay hani? Samanen itini saˈopo anca taykay, ˈalomanay ko faelohay tamdaw, mahemekay to Fangcalay Cudad a tamdaw, kaemangay tamdaw, fafahiyan, ano romadiw cangra toni radiw i, hato mirikecay ko niyah to tao wa saan, cowa ka tada matatodong, mansa falic hananay ko lalangian ato ˈolic noniya radiw.

18. Hano mamisaˈicel kita a minanam to faelohay fangcalay radiw? (Nengnengen ko ilaenoay safanaˈ.)

¹⁸ Ilalomaˈ noni “Pahemeken Romadiw ci Yihofa”, ˈadihayay ˈolic no radiw tano mitolonay a pakayraan a radiwen, ano romadiw kiso toni fangcalay radiw i, ngaˈayay pasayra kiso ci Yihofaan a patahekal to falocoˈ iso. O romaroma a radiw, papadama to salikaka “sakasasiolah ato sakangaˈayaw no demak.” (Hipray 10:24) Saˈicelen ita mafanaˈ to hacong ato ˈolic nora radiw, itini i lomaˈ rariden a minanam, mamafanaˈto kiso tora fangcalay radiw ita, halo fanekfek ko falocoˈ iso a paˈolic to harateng. *

19. Kahacecay a tamdaw no kasakopang, wa ngaˈay misamaan midoko ci Yihofaan?

¹⁹ Haratengen, o masaka limelaan ko romadiway demak i soˈlinay pidoyongan, o ngangaˈay a patahekal to olah ato piakoˈid ci Yihofaan. (ˈOsien ko Isaya 12:5.) Ano mahemek a romadiw kiso, o mamikowad to tao a fanekfeken a mikihatiya a romadiw. Hay, kahacecay a tamdaw, ano matoˈasayto, kaemangayto, faelohay tamdaw, ngaˈayay tano fangcalay radiw a midoko ci Yihofaan. Mankora, aka matalaw a misataˈangay to ngihaˈ a romadiw, tooren ko sowal no mitiliday to ˈOlic: “Pipasayra ci [Yihofaan] a romadiw!” Nanay sataˈangayen ita ko ngihaˈ a romadiw!​—ˈOlic 96:1.