1. Tona mirocokay to raraw ko tamdaw, o sikawdan no Kawas iraay ko samaanay harateng?

“AYA: kako o tadancaay a tamdaw!” (Loma 7:24) ˈAlomanay sikawdan no Kawas mihayay toni sowal ni Pawlo. Maolahay kita mahemek ko Kawas, tona mirocokay to raraw kita, marariday mararaw ko demak caka hemek ko Kawas, itiya tadancaay tamdaw kita sanay ko harateng to niyahan. O roma Krisciyang miharateng to nano karetengay a raraw no niyah, cowa ko sasododen no Kawas cangra sanay.

2. (1) Naitini i ˈOlic 34:22, o sikawdan no Kawas hano caka marawraw to mamapaekel no matoleday a falocoˈ? (2) Oniya lalakaw mamilengo to manan? (Nengnengen ko sapatongal lalakaw, “ O Pilimekan a Niyaroˈ Iraay ko Mitaypiyawan a Tatodong Han?”)

² ˈArawhan, mikiˈokay ko Fangcalay Cudad, mitiˈeray ci Yihofaan a milimek a tamdaw, aka marawraw to mamapaekel no matoleday a falocoˈ. (ˈOsien ko ˈOlic 34:22.) Mitiˈer ci Yihofaan a milimek sa i, o manan ko tatodong hani? Misamaan to demak kita hongaˈ milifok to sidaˈit ato sasodod ni Yihofa hani? Toha sakafanaˈaw to caˈof noni salicay, mafanaˈho to limasmas no pilimekan a niyaroˈ ngaˈ. Oni limasmas o mikitiniay i Rikec a mipatireng, isaka 33 miheca  Kocinsic malasawadayto. Tona naitiniay ci Yihofaan ko Rikec, ano cipinang kita to limasmas no pilimekan a niyaroˈ, o mamafanaˈ to pinengneng ni Yihofa to raraw, to mararaway tamdaw ato pasasiyoray a tamdaw. Saˈayaw, nengnengen ita ko araaw a mipatireng toni pilimekan a niyaroˈ, ato samaanay ko pisaka dademak.

3. Nolitengan a Israil, misamaanan misaysay ko padetengay a mipatayay tamdaw?

³ Karetengay ko pinengneng ni Yihofa to mipatayay a demak. Itini nolitengan a Israil, o padetengay a mipatayay tamdaw, o papatayen no sangataay a faˈinayan salawina nora mapatayay, o sowal no Fangcalay Cudad o “malininaay noya mapatayay” hananay cangra. (Saˈosi 35:12, 19) Patayen no pacoˈayay a malininaay ko mipatayay a tamdaw, o sapatefoc to ˈorip nora mapatayay. Ano caka tangsolen mipatay kora mariˈangay tamdaw, o pakaditay to sera kora. Palimoˈotay ci Yihofa: “Aka pipaacek kamo to kamaroˈan namo a sera,” sanay.​—Saˈosi 35:33, 34.

4. Samaanan no Israil misaysay ko coko padetengay a mipatayay hani?

⁴ Samaanan no Israil misaysay ko coko padetengay a mipatayay hani? Soˈlin o coko padetengay a mipatayay to tamdaw, kawra milakis to remes o raraw kora. (Satapangan 9:5) Nikawrira, coko padetengay a mipatayay a tamdaw o sasidaˈiten, milaliw to miˈodisay a tamdaw, tayra i cecay noya 6 a pilimekan a niyaroˈ. O mamadipot cangra i lalomaˈ no niyaroˈ, kawra o mamaterek cingra i pilimekan a niyaroˈ tangasa mapatay ko sakakaay a saysi.—Saˈosi 35:15, 28.

5. O limasmas noni pilimekan niyaroˈ, hano matongal ko kafanaˈ ita ci Yihofaan hani?

⁵ Patireng toni pilimekan niyaroˈ cowa ko harateng no Israil tamdaw, ao ni Yihofa a limasmas. Palimoˈotan ni Yihofa ci Yosuwa papipatireng to pilimekan a niyaroˈ, oniya niyaroˈ o fangcalay a kitiraan. (Yosuwa 20:1, 2, 7, 8) Hay ano ci Yihofa ko papipiliˈay toniya niyaroˈ, misamaanay mahapinang ita ko sidaˈit ni Yihofa hani? Mikitini toni limasmas, mamananam ita to mamisamaan a mitiˈer ci Yihofaan a milimek anini?

6, 7. (1) O manan ko saaroˈan no matoˈasay itini pisaysay to coko padetengay a mipatayay a demak? (Nengnengen ko satapangan coka.) (2) Misamaanay hano pasowalen no coko padetengay a mipatayay ko matoˈasay tora nano demak?

⁶ Ano malipalaw a mipatay to tamdaw i, kalikien ningra milaliw tayra i pilimekan a niyaroˈ, tayra i fawahan no niyaroˈ, “pasowalen ko matoˈasay no niyaroˈ to nano demak.” O sasangaˈayen a micada cingra. (Yosuwa 20:4) Ikor no cecay liyad, patayraen no matoˈasay cingra toya pipatayan ningra a niyaroˈ, o sasawkiten no itiraay matoˈasay cingra. (ˈOsien ko Saˈosi 35:24, 25.) Ano sawkitento no matoˈasay to malipalaway a mipatay cingra ngaˈ, patikoren cingra i pilimekan a niyaroˈ.

⁷ Hano o matoˈasay ko mamisaysay tora demak hani? O sapidipotaw to nika korac no finawlan, halo mapadama kora coko padetengay a mipatayay tamdaw tahacada to sidaˈit ni Yihofa. O cecay matanengay tono Fangcalay Cudad a tamdaw sanay ko sowal, ano caka tayra kora coko padetengay a mipatayay pasowal to matoˈasay tora nano demak i, o saka tatiih ningra, samanen cowa pidoedo cingra to limasmas no Kawas a mikilim to sadipot, ano mapatay cingra ono niyah a raraw. Ora coko padetengay a mipatayay o ngangaˈay milifok to sapadama, kawra oha mamikiˈayaw cingra misaali to sapadama, halo micada toni limasmas. Ano caka tayra cingra milaliw i pilimekan a niyaroˈ i, wa ira ko fadangalan no malininaay nora mapatayay a mipatay cingranan.

8, 9. O Krisciyang ano karetengay ko raraw i, hano mikilim to sapadama no malohemay malitengay?

 ⁸ Anini, o Krisciyang ano kareteng ko raraw, o tatayra i malohemay malitengay no kasakopang mikilim to sapadama, ho patikor ko nika lalaˈed ato Kawas. Hano masaka limelaan koni hani? Toloay ko lalangian. Saka cecay, mamisaysay ko malohemay malitengay to karetengay raraw sanay ko Fangcalay Cudad. (Yakop 5:14-16) Saka tosa, oniya limasmas papadama to pasasiyoray a mararaway milifok to hemek no Kawas, ho cato ka miliyaw mararaw. (Kalatiya 6:1; Hipray 12:11) Saka tolo, mapanilnilay ato pahatatanaman cangra, misayar to pasasiyoray a mararaway, padama cingranan milifok to rihaday, cato ka pakinali mirikec to niyahan. Sowal ni Yihofa, malohemay malitengay o “pikiˈadingan to faliyos,” sanay. (Isaya 32:1, 2) Oniniya limasmas coko mamahapinang iso to sidaˈitay ko Kawas han?

⁹ ˈAlomanay sikawdan no Kawas, tona mikilimay to sapadama no malohemay malitengay a masayar ko falocoˈ. Patinakoen, o cecay ci Taniil hananay salikaka na karetengay ko raraw, kawra pinaayto folad, cowaho pasowalen ko malohemay malitengay. Sanay ci Taniil: “Halafinto kora demak, cowa ko mamapadama no malohemay malitengay sa kako. Falihenaw sa ko falocoˈ ako, matalaw to mamafanaˈ ko tao to raraw ako. Ano mitolon ci Yihofaan i, isaˈayawan ako miliˈay ko Kawas tora raraw ako.” Salikor, misaˈosiay ci Taniil mikilim to sapadama no malohemay malitengay. Tikoren ningra miharateng kora demak, sanay ko sowal: “Itiya soˈlinay matalaw kako pasowal to malohemay malitengay, kawra ikorto, hato iraay ko miepoday to karetengay a koyod ako. Nohatini, ngaˈayayto kako mifowah to falocoˈ ci Yihofaan.” Tingalawayto ko falocoˈ ni Taniil nohatini, mapanilnilay malo padamaay a sikawdan.

10. Misamaan a misetek to demak ko malipalaway mipatayay a tamdaw, hongaˈ malifok ko sidaˈit?

¹⁰ O coko padetengay a mipatayay tamdaw milaliw tayra i sangataay a pilimekan a niyaroˈ wa ngaˈ, milifok to sidaˈit cingra. (ˈOsien ko Yosuwa 20:4.) Ano sapitafoaw to ˈorip ko  coko padetengay a mipatayay, kalikien ningra tayra i pilimekan a niyaroˈ, materek i lalomaˈ no niyaroˈ! O mamikinafalah cingra, misawad to tayal no niyah, lomaˈ no niyah. Ano caho ka mapatay ko sakakaay a saysi, cowa ko ngangaˈay a miliyas tora pilimekan a niyaroˈ. * (Saˈosi 35:25) Cowa ko madoloay i cingranan koni, kawra tada masaka limelaan. Ano miliyas cingra tora pilimekan niyaroˈ, patahekalay to cowa ciharateng cingra tora mapatayay, ano mihaen i, o kakatalawan to mamapatay no tao ko ˈorip ningra.

11. O pasasiyoray a mararaway tamdaw, mamisamaan to demak, patahekal to cowa pisaloya to sidaˈit no Kawas?

¹¹ Anini, o pasasiyoray a mararaway tamdaw mamitatoy to demak, wangaˈ milifok to sidaˈit. O sasahecien ningra miliyas ko mararaway a waywayan, hanaca mamiliyas to maamaan mamikidat to karetengay raraw a demak, ano o mimingay a raraw o laliyasen ningra. Somowalay ci Pawlo to pasasiyoray a demak no Korinto kasakopang, sanay cingra: ‘O nai Kawasay a rarom namo, o papakalalok tamowanan faedet ko falocoˈ! Kiemelay kamo mikorac, ˈinteh to mararaway, mangodo to Kawas, makalim a mifalah to cikaditay a ngangan!’ (2 Korinto 7:10, 11) O mararaway tamdaw ano mitatoy to demak a miliyas to mararaway waywayan i, patahekalay ci Yihofaan to ciharatengay cingra to raraw no niyah, cowa pisaloya to sidaˈit ni Yihofa.

12. Toha sapicadaaw to sidaˈit no Kawas, mamifalah to manan ko Krisciyang hani?

¹² Toha sapilifokaw to sidaˈit no Kawas, mamifalah to manan ko Krisciyang hani? O mamifalah cingra to mamikidat cingranan mararaw a maamaan a demakan, ano soˈlin o kaolahan ningra a demak, o fafalahen ningra. (Matay 18:8, 9) Ano iraay ko widang mifiyoray tisowanan a midemak to kaketeran ni Yihofa a demak i, o sasawaden iso cangra a micawmaˈ han? Ano misaˈicelay kiso a miˈmet to adihayay epah, o laliyasen iso ko haliepahay tamdaw han? Ano misaˈicelay kiso micoˈaˈang to mararaway a harateng, o mamiliyas kiso to kaacekan a ika, wangcan anca demak han? Aka mapawan, toha sapitafoaw to madimadi ci Yihofaan, makahi a mifalah to maamaan a demak o ciepocay kora. Awaay ko harateng ita misawad to kalawidang aci Yihofa. Awaay ko maamaan a demakan to mamikiˈayaw to “midaˈocay olah” no Kawas, mirenec to falocoˈ ita.​—Isaya 54:7, 8.

13. Tadtaden ano itiraay i pilimekan a niyaroˈ ko coko padetengay a mipatayay, hano ngangaˈay rihaday a marenec ko ˈorip nangra.

¹³ Ano tayraay milaliw i pilimekan a niyaroˈ ko coko padetengay a mipatay tamdaw, o mamadipot cingra itira. Somowalay ci Yihofa toni niyaroˈ, sowal sa: “Patoneken ko cecay a niyaroˈ to malo pilimekan a niyaroˈ.” (Yosuwa 20:2, 3) Cowa pisaali ci Yihofa papiliyaw a misawkit to coko padetengay a mipatayay, cowa pihayda to miˈodisay tamdaw micomod i pilimekan niyaroˈ a mipatay toya tamdaw. Mansa i, hamaan matalaw to aira ko miˈodisay tamdaw, samanen dadipoten ni Yihofa ko materekay i pilimekan a niyaroˈ. Cowa ko pirofoan to tamdaw koni, ngangaˈay cangra matayal i niyaroˈ, mipadang to tao, itira i rihadayay kitiraan a midoko ci Yihofaan, mahemek a marenec ko ˈorip nangra!

14. O mararaway Krisciyang pasasiyorto ikor i, wa ngaˈay pakasoˈlin to manan?

¹⁴ Romaroma sikawdan no Kawas na ciraraway to karetengay a raraw, soˈlin pasasiyorayto, kawra matoledayho ko falocoˈ to nano raraw nangra, miharateng to cowa ko mamatawal ni Yihofa ko raraw nangra. Ano iraay ko mahaenay a falocoˈ, serayen ko falocoˈ iso, misododanto ni Yihofa kiso, sidaˈitan Ningra kiso. Ci Taniil ya nisowalan isawni,  iraay ko mahaenay falocoˈ ningra. Salofento no malohemay malitengay padama cingra patikor a tingalaw ko falocoˈ ikor, sanayto ko sowal: “Hato ngaˈayayto paselaˈ kako. Mitatoyto kako to matatodongay demak ikor, cowato ka cikiyamen ko falocoˈ ako. Miliyasto to mararaway ikor, mira:ayayto koni raraw i takowanan. Mahaen nano sowal ni Yihofa, o hahepolen Ningra ko karetengay a koyod iso, miala tora koyod, ikor malahedawayto kora koyod.” Matira o coko padetengay a mipatayay, milaliw tayra i pilimekan a niyaroˈ i, cato ka calemcem to mamipatay ko miˈodisay tamdaw, malecaday, sododento ni Yihofa ko raraw ita i, akato calemcem to mamikadkad to nano raraw ita Cingra, anca tanoyaan telang a raraw a misawkit kitanan.​—ˈOsien ko ˈOlic 103:8-12.

15, 16. O paˈoripay ci Yis ato sakakaay a saysi, samaanay paˈicel to nika pakasoˈlin ita to sidaˈit no Kawas?

¹⁵ Ano palalinien to nolitengan a Israil, iraay ko wacay ita to mamilifok to sidaˈit ni Yihofa. Tona cowa ka lefot a midofdof ci Pawlo ci Yihofaan, marorayan nanay ko falocoˈ, kawra sanay ko sowal: “O kakansiyaen ako ko Kawas! Pakaynien Ningra i Tapang ita ci Yis Kristoan ko nipipaˈorip i takowanan!” (Loma 7:25) Misaˈicelay ci Pawlo micoˈaˈang to mararaway pinangan, masomaday to raraw no itiyaho, kawra kamayan pasoˈlin to papakaynien no Kawas i sapatefoc ni Yis misodod cingra. O paˈoripay ci Yis kitanan, tingalaw ko falocoˈ ita, rihaday ko kemod no falocoˈ. (Hipray 9:13, 14) Ci Yis o sakakaay saysi ita, “pakafilo cingra . . .misongilaˈ a mipaˈorip to miraoday to Kawas pakayni i cingraan. Kalaˈorip han ningra ko pipatado to tamdaw a mingitangit a mitolon to Kawas a tahadaˈoc.” (Hipray 7:24, 25) Ano ngaˈayay ko nolitengan a sakakaay saysi mipadang to Israil, misodod to raraw nangra, ci Yis o sakakaay a saysi ita, coko papadama kitanan a nimaan, “ano ira ko maan no ˈorip ita i, padamaen ningra a siniˈada.”—Hipray 4:15, 16.

¹⁶ Ano pasayra ci Yihofaan kita mikilim to sadipot, pakasoˈlin to sapatefoc ni Yis ngaˈ. Cowa ko nika pasoˈlin aca to caciepoc ko ˈalomanay, papakasoˈlinen to ciepocay i tisowanan. (Kalatiya 2:20, 21) Pakasoˈlin to sapatefoc ngaˈ, masodod ko raraw no miso, ira ko midaˈocay a ˈorip no miso. Kinafalah ci Yis to ˈorip pasadak to sapatefoc, o sapakaolah ni Yihofa i tisowanan.

17. Hano ciharateng kiso to sapasayraaw ci Yihofaan a mikilim to sadipot hani?

¹⁷ O limasmas no pilimekan niyaroˈ, patahekalay to sidaˈit ni Yihofa, pakayni toni limasmas, pasifanaˈay ko Kawas to nika fangcal no ˈorip, ato misamaanay padama ko malohemay malitengay kitanan, pasasiyoray tamdaw mamisamaan ko demak, ato misamaanay misaheci ko pisodod no Kawas. Pasayraay kiso ci Yihofaan a mikilim to sadipot han? O sadipayalay a pilimekan itira. (ˈOlic 91:1, 2) Ilaenoay lalakaw mamilengo, limasmas no pilimekan niyaroˈ, mamisamaan padama kitanan mitodong ci Yihofaan patahekal to masadafdafay ato sidaˈitay.