1, 2. (1) Samanay ko pinengneng ni Yis to sarikec no Kawas? (2) O pasifanaˈay to Rikec ato Farisay samanay miraraway to sarikec no Kawas?

MAOLAHAY ci Yis to Sarikec ni Mosi, cowa ka fahekaˈ kita tonini, samanen mikitiniay ci Yihofaan koniya sarikec. Pakaynien ci Yisan ko sowal, sakakaay ci Yihofa. Paˈayaway ko ˈOlic 40:8 maolahay ci Yis to sarikec no Kawas, sanay ko sowal: “Kawasaw ako, tada maolah kako a midoedo to nafalocoˈan Iso. Kaˈimeren ako a pakifalocoˈ ko sifanaˈ Iso.” Tano sowal ato waywayan a misawacay ci Yis to malefotay ko sarikec no Kawas, saka ciepoc no tamdamdaw, hanaca o mamalaˈosi ko sarikec.​—Matay 5:17-19.

² Kawrira, o pasifanaˈay to Rikec ato Farisay miraraway to sarikec no Kawas, maˈaraw ni Yis koniya demak, adadaay ko falocoˈ! O mimingay no sarikec ko midofdofan nangra, “pacakaten namo ko cecay no moetepay a hakeka ato inon ato komin hananay.” Mitoroˈan ni Yis ko raraw nangra: “O kakalimelaan a dadoedoen a Rikec to moecelay a demak ato adayayay a falocoˈ ato soˈlinay a falocoˈ i, caay ka doedo namo.” (Matay 23:23) Cowa ka hecad ci Yis to misatakaraway a Farisay tamdaw, cipinangay cingra to safalod no sarikec, paihekalay ko limoˈot to maanan a capeling no Kawas.

3. Oni lalakaw mamilengo to manan a salicay?

 ³ O Krisciyang, cowa ko mamidofdof kita to Sarikec ni Mosi. (Loma 7:6) Tiliden ni Yihofa ko Sarikec ni Mosi i Fangcalay Cudad, o araaw cowa ko mamisakareteng to mimingay a demak, o mamisinanot to “kalimelaan” a demak, o safalod no sarikec, ato sakadademaken. Wa ngaˈay kita mikitini limasmas no pilimekan a niyaroˈ minanam to kalimelaan a safalod. Tinakoen, i saˈayaway a lalakaw mitadtaday o demak no coko padetengay a mipatayay mananam ko maanan. Oniya lalakaw wa padama kitanan mikitini pilimekan a niyaroˈ matongal ko kafanaˈ ci Yihofaan. Cipinang to samaan paihekal to capeling Ningra. Dotoc wa milengo kita to tolo salicay: O limasmas no pilimekan a niyaroˈ samaan mahapinang to matomesay ko sidaˈit ni Yihofa? Samanay ko pinengneng no Kawas to ˈorip? Oniya limasmas samanay paihekal to masadafdafay no Kawas? O caˈof noniya salicay wa padama kitanan misaˈicel mitodong to kakarayan Wama.​—ˈOsien ko Ifiso 5:1.

4, 5. (1) Sakatayraaw i pilimekan ko coko padetengay mipatay i pilimekan niyaroˈ hano coko pasangaray? Tadtaden. (2) Mikitini limasmas no pilimekan niyaroˈ, mahapinang ita to samanay a Kawas ci Yihofa?

⁴ Sakatayraaw no coko padetengay a mipatay i enem pilimekan a niyaroˈ cowa ko pasangaray. Palimoˈotan ni Yihofa ko Israil tamdaw i tosa lawac no Yortan ˈAlo mamisadak to tolo a niyaroˈ malo pilimekan a niyaroˈ, mihaen wa tangsol ko coko padetengay a mipatay malimek itira. (Saˈosi 35:11-14) O roma, makapahay ko lalan tayra pilimekan a niyaroˈ. (Limoˈot 19:3) Tooren ko pinangan no Yutaya tamdaw, oniya pina lalan pairaen ko tahapinangan, mikayat to coko padetengay a mipatay milaliw tayra i pilimekan niyaroˈ. Samanen iraay ko pilimekan niyaroˈ a limasmas, cowa ko mapacieci cangra milaliw tayra roma kitakit, makayhidto midoko to makaniway kawas.

⁵ Saˈosi ni Yihofa papatayen ko padetengay mipatay a mararaway tamdaw. Kawra midipotay to coko padetengay mipatay a tamdaw, paihekal cangranan to siniˈadaay falocoˈ. Sowal no cecay tamdaw to pilimekan a niyaroˈ, sanay: “Oniya limasmas katanengay a ihekal, paihekalay to sidaˈitay ko Kawas.” Ci Yihofa o ciolahay a misawkitay, ‘taˈangayay ko sidaˈit’ Ningra, cowa ka ciharateng to sapisayfangaw to sikawdan Ningra.​—Ifiso 2:4.

6. O waywayan no Farisay tamdaw ato sidaˈit no Kawas o manan ko cowa kalecad?

⁶ Cowa ka hecad ko Farisay tamdaw, cowa kakahi cangra paihekal to sidaˈit i tamdaw. Tooren ko pinangan nangra, ano kinatolo mapakararaw ko tamdaw to malecaday a demak, cato ko sasododen cangra. Milengo ci Yis to waywayan nangra i somowalay to cecay tinakoan, o cecay Farisay tamdaw sanay i satolon: “Kawasaw, mikansiya kako i Tisowanan. Nawhani caay ka matiya o tao  kako a macoos. Caay ko tatiihay, caay ko maˈodangay a tamdaw kako. Caay ka matiya ora milisataay a tamdaw kako.” Kawra, oya tomirengay i tihi ningra a milisataay nisapoeneray to falocoˈ a micangacang to Kawas sidaˈit cingranan. Hano cakakahi ko Farisay tamdaw paihekal to sidaˈit i tamdaw hani? Sowal no Fangcalay Cudad ‘misakahemaway to tao’ cangra.​—Luka 18:9-14.

7, 8. (1) Ano pakararaw ko tao kisowanan i, samaan kiso mitodong ci Yihofaan hani? (2) Misamaanay hano paihekal to misapoeneray falocoˈ ngaˈ ngaˈay misodod to tao?

⁷ Todongen ci Yihofa paihekal to siniˈadaay falocoˈ, hamaan mahaen o Farisay tamdaw. (ˈOsien ko Kolosay 3:13.) O pakayraan paihekal to siniˈadaay falocoˈ makahi a misodod to tamdaw. (Luka 17:3, 4) Ngaˈayay licayen ko niyah: “Ano kinapina pakararaw ko tamdaw takowanan, kamayan makahi kako misodod cingranan han? Misaˈicelay kako malakangaˈay to pakararaway midokaˈay takowanan a tamdaw han?”

⁸ Sapisododaw to tamdaw, kalimelaan ko misapoeneray falocoˈ. Cowa kakahi ko Farisay tamdaw misodod, samanen misakahemaway cangra to roma tamdaw. Kawra, o Krisciyang, wa misapoener kita, “ikakaay no mako ko tao, han ko falocoˈ namo a masasingodongodo.” O sasododen a tamdaw han ko pinengneng cangranan. (Filipi 2:3) Mitodongay kiso ci Yihofaan paihekal to misapoeneray falocoˈ han? Ano pakararaw ko tao kisowanan i, wa makahi kiso misodod to tamdaw, ho awa ko saconged no misododay a lalan han? Makahi kita a paihekal to sidaˈitay, hamaan ranikay maketer.​—Patnakay 7:8, 9.

9. Samanay ci Yihofa pahapinang to Israil tamdaw o fangcalay ko ˈorip?

⁹ Araaw a patireng to pilimekan niyaroˈ i, ho eca pitamorong ko Israil tamdaw to palakisay to ˈirang a raraw. (Limoˈot 19:10) Maolahay ci Yihofa to ˈorip, ˈintehay to padetengay mipatay to tamdaw a waywayan. (Taneng 6:16, 17) Masadafdafay a makorac ko Kawas, soˈlin coko padetenagay mipatayay to tamdaw a demak, cowa pisilikol Cingra. Sapilifokaw to sidaˈit ko coko padetengay mipatay a tamdaw, pafanaˈen ko malohemay malitengay to mifekaday demak. Ano sawkiten to coko padetengay mipatay, wa tayra i pilimekan niyaroˈ cingra tahira kapatayan no taˈangayay saysi. Sakoniya sowal hakelong no ˈorip wa materek cingra itira. Oniya limasmas patalipaˈelalay to Israil tamdaw fangcalay ko ˈorip. Mikangodo cangra to pafeliay to ˈorip a Kawas, oha mamiliyas to mamidokaˈ to ˈorip no finawlan a demak.

10. O pasifanaˈay to Rikec ato Farisay tamdaw hano cowa ka ciharateng to ˈorip no roma tamdaw hanko sowal?

¹⁰ Pasifanaˈay to Rikec ato Farisay tamdaw cowa kalecad ci Yihofaan, cowa pisikol cangra to ˈorip no roma tamdaw. Sanay ci Yis pasowal cangranan: ‘Alaen namo ko safawah no sifanaˈ, caka picomod ko niyah, oya mamicomod a tamdaw, calaen namo!’ (Luka 11:52) Na papasifanaˈ cangra i tamdaw to sowal no Kawas, padama to tamdaw romakat i tahadaˈoc no ˈorip a lalan, kawra micongedan nangra ko tamdaw miingid to ‘papaˈorip to tamdaw a ˈaˈideman ci Yisan’, a pasayra sakalaˈafo a romakat. (Dmak 3:15) O Pasifanaˈay to Rikec ato  Farisay tamdaw misatakaraway a misateked, cowa ka ciharateng to ˈorip ato sakangaˈay no finawlan. Tada awaay ko olah nangra!

11. (1) Samanay ko demak ni pawlo, paihekal tano harateng no Kawas ko pinengneng noniyah to ˈorip? (2) Itini pitosilan samaan kita ngaˈ mitodong to harateng ni Pawlo?

¹¹ Wa ngaˈay kita misamaan mitodong ci Yihofaan, miliyas to waywayan no pasifanaˈay to Rikec ato Farisay tamdaw hani? Kangodoen a misalimela ko ˈorip. Misongilaˈay misawacay ci Pawlo, paihekal to mikangodoay to ˈorip. Mansa mihaen ko sowal ningra: ‘O makoracay kako, cowa citadah to palakisay to remes a raraw.’ (ˈOsien ko Dmak 20:26, 27.) Kawra, mitosil ci Pawlo i tamdaw, cowa ko ˈinorong aca, pakayniay kaolah to roma tamdaw, misalimela minengneng to ˈorip. (1 Korinto 9:19-23) Wa misaˈicel kita tano harateng no Kawas a minengneng to ˈorip, tokel ni Yihofa nanay ‘pasasiyor ko tamdamdaw,’ sanay. (2 Pitiro 3:9) Mitodong kiso ci Yihofaan, palahad to sidaˈitay capeling, wa matongal ko faedet no falocoˈ mitosil, matongal ko hemek.

12. Misamanay hano mamisinanot ko finawlan no Kawas to sanawsaw?

¹² Misinanot sanawsaw, wa ngaˈay paihekal kita tano harateng no Kawas minengneng to ˈorip. Ano palakat to paliding ato matayal wa misinanot, patireng, mingasaw, i lalan tayra kasaˈopoan wa misinanot to sanawsaw. O tanoktok no tireng ato ˈorip ikakaay no payci, lingad no tayal. O masadafdafay ko Kawas ita, o demak Ningra sahetoay o matatodongay, oha tatodongen ita Cingra. Mangalef o malohemay malitengay wa misinanot to sanawsaw no niyah ato tao. (Taneng 22:3) mihaenay, ano patalipaˈelal ko malohemay malitengay tisowanan sinanoten ko safalod ato saˈosi no sanawsaw, tatengilen mihakelong ko limoˈot ningra. (Kalatiya 6:1) Mahecad kita ci Yihofaan mikangodo to ˈorip, ecato ‘pitamorong to palakisay to remes a raraw.’

13, 14. O malohemay malitengay no Israil samaan paihekal to masadafdafay ni Yihofa?

¹³ Misaeliay ko Kawas to malohemay malitengay no Israil mitoor to palinian Ningra a dademak. Salakat, kakilimen no malohemay malitengay ko soˈlinay mifekaday a demak. Dotoc, sasimsimen nangra ko naifalocoˈay harateng, waywayan, no coko padetengay mipatay a tamdaw, itiya sato misaˈosi papaihekelen to sidaˈitay hokira. Sapahecadaw ko malohemay malitengay to Kawas a masadafdaf ko pisawkit, wa mitiyawca to iraay ko ˈintehay harateng no coko padetengay mipatay hokira. (ˈOsien ko Saˈosi 35:20-24.) Ano iraay ko pakaˈaraway tamdaw to mifekaday a demak, awaawasa tatosa ko misawacayay a tamdaw, ngaˈ ngaˈay saˈosien ko raraw no mipatayay.​—Saˈosi 35:30.

¹⁴ Masaˈosi tono malohemay malitengay ko mifekaday demak, o haharatengen cowa ko nano demak no coko padetengay mipatay a tamdaw, haratengenho to samanay a tamdaw cingra. Kalimelaan ko sapihapinang a ˈicel no malohemay malitengay, o hatiniay a ˈicel ngaˈay padama cangranan mihapinang to polong no demak. Sakakaay i, misaaliay cangra to sadama no fangcalay saocor ni Yihofa mihapinang to demak, paihekal to sidaˈit ato misadafdafay.​—Kasadakan 34:6, 7.

15. O pinengneng ni Yis ato Farisay tamdaw to ciraraway tamdaw samanay caka hecad? Tadtaden.

¹⁵ O Farisay tamdaw o demak aca no mararaway tamdaw ko misinanotan, cowa pisinanot to nafalocoˈan ningra. Tiya maˈaraw no Farisay tamdaw komaen i lomaˈ ni Matay ci Yis i, milicayay to misawawaan ni Yis: “Nawiro mikapot ko singsi namo to matiniay a tamdaw a komaen saw?” Matengil ni Yis sanay ko sowal: “O tanoktokay a tamdaw i, caay ko papaisingen. Deng o adadaay ko papaisingen. Oya maolah Kako to adayay no tamdaw. Caay ka olah Kako to pipatoˈaya no tamdaw, sanay a sowal a matilid i Fangcalay Cudad i, o maan ko tatodong nonini saw? Pinanamho kamo. O sakatayni ako i, caay ko mitahidangay to moecelay ko falocoˈ a tamdaw, o mitahidangay kako to ciraraway a tamdaw.” (Matay 9:9-13) Cowa ko patadoay ci Yis to mararaway tamdaw a pasowal. Sakakaay araaw ni Yis mitosil o papadama to mararaway a  tamdaw pasasiyor. (Matay 4:17) Mahapinangay ni Yis i lalomaˈ no “milisataay ato romaroma a ciraraway hananay no Yutaya a tamdaw,” iraay ko makahiay a mafalic. Tayra cangra i lomaˈ ni Matay cowa ko a komaen aca, o sapihakelongaw ci Yisan. (Marko 2:15) Kawraan, o Farisay tamdaw cowa kalecad ci Yisan a minengneng to tamdaw. Sowal nangra midokoay ko niyah to Kawas sanay, kawra cowa pitodong to masadafdafay ato sidaˈitay no Kawas. O mararaway sanay ko pinengneng nangra to finacadan, somowal to awaay ko hatokel noniya tamdaw sanay.

16. Ano misaysay ko miiingay to demak i sasamaan ko hademak?

¹⁶ Anini, o malohemay malitengay wa mitodong ci Yihofaan ‘maolah to masadafdafay.’ (ˈOlic 37:28) Salakat, oha ‘mamitiyawca, misongilaˈ a milicay,’ ngaˈ misaˈosi to ciraraway kora tamdaw. Ano soˈlinay ciraraw, tatooren no malohemay malitengay ko safalod no Fangcalay Cudad a misaysay to demak. (Limoˈot 13:12-14) O mamiiingay a malohemay malitengay wa misongilaˈ malalengo, ngaˈ misaˈosi to soˈlinay pasasiyor kora mararaway. Kawra sapihapinangaw to pasasiyoray falocoˈ no tamdaw cowa ko madoloay, samanen milingatay konini to kemoday falocoˈ ato samanay ko pinengneng ningra to raraw no niyah. (Paˈarawan 3:3) Sapilifokaw ko ciraraway to sidaˈit, kalimelaan ko sapasasiyoraw. *

17, 18. O malohemay malitengay samaan mihapinang to soˈlinay pasasiyor ko mararaway tamdaw? (Nengnengen ko satapangan a coka.)

¹⁷ Ci Yihofa aci Yis ihekalay mafanaˈ to nai falocoˈay a harateng no tamdaw, kawra cowa kafanaˈ ko malohemay malitengay. Ano, o malohemay malitengay kiso, samaan ngaˈ mahapinang iso to soˈlinay pasasiyor ko tamdaw hani? Saka cecay, cangacangen ko Kawas pafeli to taneng, hongaˈay kiso pafafidaˈ to demak. (1 Hongti 3:9) Saka tosa, cekiwen ko Fangcalay Cudad ato mitepangan no madimadiay koli a cudad, o papadama tisowanan mihapinang to “kalo rarom” anca “o matatodongay i nafalocoˈan no Kawas a rarom.” (2 Korinto 7:10, 11) Ngaˈayay nengnengen samanay milengo ko Fangcalay Cudad to sasiroma no pasasiyoray ato cowa kakahi pasasiyor a tamdaw, sinanoten samanay ko sinael mitadtad to harateng ato waywayan noniya tosa tamdaw, ato samanay ko harateng to nano raraw no niyah.

¹⁸ Saka tolo, mamisaˈicel ko malohemay malitengay a cipinang to mararaway tamdaw. Haharatengen ningra ko pinangan, harateng, ato tolas no ˈicel ningra. Malengo ko Fangcalay Cudad to ˈaˈideman no kasakopang ci Yis i, sanay: “Caay pakaynien ningra i maˈaraway ningra ato matengilay ningra a lihaf ko nipihapinang ningra to dademaken a mikowan. O caay pisakakinih ko demak ningra a mihapinang to pakayniay i pakoyoc a tamdaw ato nipipatado ningra a mipaˈading to masamsamay a tamdaw.” (Isaya 11:3, 4) O malohemay malitengay, o laenoay ni Yis a pakaenay kako, o papadamaen ningra kamo ano miiing to demak i paihekal to masadafdafay ato sidaˈitay. (Matay 18:18-20) Tada akoˈiden ko malohemay malitengay mihaen a ciharateng kitanan, mikoˈid to karoray nangra, padama kitanan tano sidaˈitay ato masadafdafay a micada to tamdaw.

19. Pakayniay pilimekan niyaroˈ a maˈoningay, saka dademakaw kiso to maanan a safalod?

¹⁹ O Sarikec ni Mosi mahawpay ko ‘satoko no sifanaˈ ato soˈlinay kimad’, cipinang kita to Sarikec ni Mosi, matongal ko kafanaˈ ci Yihofaan ato palinian Ningra. (Loma 2:20) Tinakoen, o pilimekan niyaroˈ a limasmas padamaay to malohemay malitengay “kao moecelay ko demak namo,” mananam ho ita, “kao masasiniˈadaay kamo a masasiadaay.” (Cikariya 7:9) Soˈlin cowa ko mamidofdof kita to Sarikec ni Mosi, kawra cowa kafalic ko palinian ni Yihofa, kamayan Cingra paihekal to masadafdafay siniˈadaay. Ngaˈay kita midoko to misangaˈay kitanan a Kawas, mitodong to capeling Ningra, halo picangacang to sadipot ningra, tada taˈangayay sakaliko konini!