1. Itini sapatikami no tarokos ci Pawlo to Kolosay Krisciyang, mihadakay to manan sapalimoˈot? (Nengnengen satapangan coka.)

TAROKOS ci Pawlo, sakinacecay mapalit i Loma, patikamiay to Kolosay a Krisciyang, itini i saka 60 tangasa 61 miheca. Itini tikami mitadtaday cingra, hano kalimelaan ko noˈadingoan a taneng. (Kolosay 1:9) Sanay ci Pawlo: “Saka, sowalen ako kamo, aka ka safanaˈ no koesanay a sowal no nimanima. Pinaˈon kamo to sakaecaaw ka saˈfit a mapalit no awaay ko epoc a noharatengan a fanaˈ. O nano tatoˈasan a nika tatorotorodan a lekakawa ato lisin a demak no hekal konini. Caay ko nano ni Kristo konini.” (Kolosay 2:4, 8) Ikor, mitadtaday ci Pawlo to samanay hano mararaway ko kaolahan no tamdaw a sasowalen, misolotay to cowa kalefot a tamdaw. O cecay lalangian i, mikikakaay ko taneng ato saaroˈan ako, sanay ko roma tamdaw. Araaw ni Pawlo mitilid toniya tikami, o papadama to Kolosay Krisciyang miconged tono tamdaw harateng ato mararaway a waywayan.—Kolosay 2:16, 17, 23.

2. Oniya lalakaw hano milengo to marariday maˈaraw a harateng?

² Tocerid misakahemaway ko tamdaw to safalod ni Yihofa, o harateng  nangra mamipalak to pakasoˈlin no falocoˈ ita. Anini, i taliyok ita matomesay kono hekal a harateng. Miedefay i kamok no tilifi, wangcan, katayalan ato picudadan. Mihaenay, wa mifolfol koniya lalakaw, sasamaan kita miliyas to pifiyor no hatiniay harateng. Dotoc nengnengen ita ko lima marariday maˈaraw a harateng no tamdaw, ato sasamaan miconged to hatiniay a harateng.

3. Iraay ko manan a piharateng no ˈalomanay tamdaw? Misamaanay?

³ “Ano caka pasoˈlin to Kawas, wa ngaˈay kako malo ngaˈayay tamdaw.” Itini adihayay kitakit, maceriday pasowal ko tamdaw to cowa pasoˈlin to Kawas, awaay ko pihakelongan no niyah. Mihaen ko sowal nangra, cowa pisongilaˈ misimsim to iraay ko Kawas matelek, o kaolahan aca no niyah ko midemakan nangra. (ˈOsien ko ˈOlic 10:4.) Citanengey kako sanay ko roma tamdaw, ano caka pasoˈlin to Kawas, kamayan makapah ko waywayan sanay.

4. Ano misiˈayaw to cowa pakasoˈlin to misangaˈay Tatapang a tamdam i, samaan kita padama cangranan misaharaterateng?

⁴ Awaay ko misangaˈay Tatapangan, sanay ko roma tamdaw, matatodongay koniya sasowalen han? Pakayni namisangaˈan ko sakaira no ˈorip, tano kakakan no tamdaw ko sapikilimaw to caˈof, telocto masasifoday no masakenaay a lihaf. Soˈlinay, madoloay ko caˈof, ano patirengan no tamdaw ko lomaˈ, o pinaˈorip i fafekang no cikiw, coko misaaliay to misangaˈay a Tatapangan han? O cecay kantangay a ˈaramat, mikikakaay to lomaˈ ko pasangar, misamanay hani? Samanen, o ˈaramat ngaˈayay mihoped ato mitodong a malenak, masadak ko malecaday a ˈaramat, o lomaˈ cowa kangaˈay mihaen. Mihaenay, o cima ko misafacoay a misangaˈ to ˈaramat hani? Caˈof no Fangcalay Cudad: “Caay ka eca ira ko misangaˈay to kahacecacecay a lomaˈ. Nikawrira, o Kawas ko misangaˈay to polong no maamaan.”​—Hipray 3:4.

5. Sowal no roma tamdaw, ngaˈay ko niyah misaˈosi to ngaˈayay ato tatiihay, samaan kita padama cangranan misaharaterateng?

⁵ Sowal no roma tamdaw, caka pasoˈlin to Kawas wa ngaˈay ko niyah misaˈosi to ngaˈayay tatiihay, samaan kita padama to hatiniay tamdaw misaharaterateng hani? Masowalay no Fangcalay Cudad ko cowa pasoˈlin to Kawas a tamdaw, o kalo a demak nangra ngaˈayay pakahemeken. (Loma 2:14, 15) Tinakoen, mangodoay, ciharatengay cangra to wama wina, kawrira o niyah ko misaˈosi to ngaˈayay ato tatiihay palinian, wa ikaka ko kangaˈay to patirengan no sidaˈitay misangaˈay Tatapangan a palinian han? (Isaya 33:22) Anini, mihayay ko ˈalomanay tamdaw ka adayayan ko pakayraan noniya hekal, edeng ko Kawas ko ngangaˈay palahedaw to pades. (ˈOsien ko Yirimiya 10:23.) Mihaenay i, hamaan a mifiyor kita, a ciharateng to caka pasoˈlin to Kawas, o niyahsa misaˈosi to ngaˈayay ato tatiihay, hawad sa midofdof to palinian no Kawas.​—ˈOlic 146:3.

6. Samaanay ko pinengneng no ˈalomanay tamdaw to pihakelongan?

⁶ “Awa ko pihakelongan, wa ngaˈay ko kaˈorip.” Mihayay ko ˈalomanay toniya harateng, samanen cowa pilingat ko pihakelongan to niyah, awaay ko kahemekan sanay. Hanaca, adihayay pihakelongan miowingay to cinamalay a cikok, paciciay pakiyaho, milengoay to mirikecay, matoleday ko tamdaw to pihakelongan. Mansa ko ˈalomanay tamdaw, awa ko pihakelongan ikakaay ko lipahak saan. Pasowal cangra to tao, maolahay to noˈadingoan a demak ko niyah, kawra awaay ko harateng micomod i pihakelongan.

7. O matatodongay pihakelongan samanay padama to tamdaw milifok to soˈlinay a hemek?

 ⁷ Awa ko pihakelongan wa soˈlin a mahemek han? O mararaway pihakelongan cowa pahemek to tamdaw, ira ko ngaˈayay kalalaˈed no tamdaw aci Yihofa ngaˈ ira ko soˈlinay a hemek, samanen ‘o mahemekay ko Kawas.’ (1 Timoti 1:11) O demak no Kawas sahetoay saka ciepoc no tamdaw, lipahakay kita malo sikawdan Ningra, samanen misamacayay kita padama to tamdaw. (Dmak 20:35) Padama kita to tamdaw mafanaˈto matatodongay pihakelongan, cipinang cangra samaan lipahakay ko paro no lomaˈ, mikangodo to ramod, misakareteng to miketonan i raramod, madimadi to ramod, pasifanaˈ to wawa mikangodo to tao ato paro no lomaˈ. O midokoay to Kawas a tamdaw, rihadayay i kasakopang, mahemekay malacafay to polong no hekal a salikaka midoko to Kawas.​—ˈOsien ko Isaya 65:13, 14.

8. Samanen ita misaka dademak ko Matay 5:3 mitadtad i tamdaw to samaan milifok to soˈlinay a hemek?

⁸ Caka pihodop to Kawas wa ngaˈay a mahemek sanay ko roma tamdaw, soˈlinay koniya sowal han? O manan a demak ko papakahemek to tamdaw hani? Malaˈosi ko tayal, miontoay demak, o kaolahan a salama wa parenec to tamdaw sanay. Kalacafay to paro no lomaˈ ato ciharateng to widang ngaˈayay ira ko hemek sanay ko roma tamdaw. Manaokaniw, pairaay to hemek konini, kawra ira ko mikikakaay a tatodong nokaˈorip ita ngaˈ matongal ko lipahak. O tamdaw cowa kalecad to ˈaˈadopen, ngaˈayay kita mafanaˈ to misangaˈay Tatapangan, mihodop Cingranan, mihaen kita mamilifok to soˈlinay a hemek. (ˈOsien ko Matay 5:3.) Tinakoen, mirienang to saˈopo, malacafay to salikaka midoko to Kawas milifokay kita to hemek ato sapakalalok. (ˈOlic 133:1) Masalalomaˈay no polong kasacefang no salikaka kita, lipahakay ko kaˈorip ato makapahay ko hatokel.

9. (1) Pakayni madadiˈiay samanay ko piharateng no roma tamdaw? (2) Misamaanay hano mirikec ko Fangcalay Cudad to potalay no ramod a kadadiˈi?

⁹ “Hano rarikecen ko potalay no ramod a kadadiˈi?” Sowal no roma tamdaw: “Hano mararamoday aca ko ngaˈay madadiˈi, ano cimato wa ngaˈay mihaen to demak,” sanay. Sa koniya sowal wa mihai ko Krisciyang to maˈodangay a demak, mararaway konini. Misamanay? Samanen mirikecay ko Fangcalay Cudad to maˈodangay. * (ˈOsien ko 1 Tisalonika 4:3-8.) Ci Yihofa ko misangaˈay kitanan, edeng Cingra ko mamisaˈosi to ngaˈayay ato tatiihay palinian. Ihekelay ko sarikec no Kawas mifanaˈ, mararamod ko faˈinayan ato fafahiyan ngaˈ ngaˈay madadiˈi. Maolahay ko Kawas kitanan, mansa pafeli toniya palinian, o saka ciepoc no mita koniya sarikec. Midofdof kita, paira to olah no paro no lomaˈ, makakangodo, irako lihaday. Oya padetengay misafelit to sarikec a tamdaw, cowa ko mamihai ko Kawas.​—Hipray 13:4.

10. Samaan ko Krisciyang miliyas to maˈodangay?

¹⁰ Pasifanaˈay ko kimad no Kawas kitanan, miliyas to maˈodangay, sapitooraw toni sinanoten ko minengnengan a demak. Sanay ci Yis: “Ano cima ko ciˈanofay ko falocoˈ a minengneng to fafahiyan i, o maˈodangayto cingra i falocoˈ ningra toya fafahiyan. Ano sakaciraraw iso ko kawanan a mata iso i, dicohen a mifalah.” (Matay 5:28, 29) Mihaenay, cowa ko ngangaˈay ko Krisciyang minengneng to kaacekan a lalakaw ato radiw.  Pakalalokay ko tarokos ci Pawlo to Krisciyang: “Patayen ko nohekalan a tatiihay a demak no tireng oya maˈodangay . . . a demak.” (Kolosay 3:5) O roma i, wa miˈimer kita to harateng ato sasowalen no niyah.​—Ifiso 5:3-5.

11. Hano micangacang ko ˈalomanay tamdaw to tayal noniyah?

¹¹ “Malaˈosi ko tayal, o saka hemek a malemed.” Pakalalokay ko tamdaw kitanan misamacay to tayal no niyah, malaˈosi ko tayal, wa ira ko saaroˈan, fadangalan ato hafay. Paisalakatan no ˈalomanay ko tayal i nokaˈorip, mamafiyor no hatiniay a harateng ko Krisciyang.

12. Malaˈosi ko tayal, wa soˈlin pairato hemek no tamdaw han?

¹² Malaˈosi ko tayal, ˈakawang ko saaroˈan wa soˈlin ira ko hemek han? Cowa ka hatira, haratengen ci Satan sapilifokaw cingra to fadangalan ato pidoko no tamdaw, kawra mangolaway cingra awaay ko hemak. (Matay 4:8, 9; Paˈarawan 12:12) Toniya hekal ira ko tayal no niyah saka hemak alatek, kawra pasifanaˈ to tamdaw cipinang to Fangcalay Cudad, padama cangranan milifok to tahadaˈocay ˈorip, coko aikaka ko hemek no mita ha? Oniya hekal miowingay to masasiayay a harateng, pairaay to maˈinapay a falocoˈ. Salikor sakatoled no tamdaw, o mihadakan a ˈicel “matiya o mirepetay to fali.”—Patnakay 4:4.

13. (1) Pakayni i tayal, pairaen ita ko manan matatodongay a harateng? (2) Sapatikami ni Pawlo to Tisalonika a tamdaw paihekalay, o manan ko saka hemek ningra?

¹³ Manaokaniw, ira ko tayal ita ngaˈ ngaˈay pakaen to paro no lomaˈ, mipiliˈ to kaolahan no niyah a tayal, cowa ko mararaway. Kawra, cowa ko sakakaay i nokaˈorip ko tayal ita. Sowal ni Yis: “Caay ka ngaˈay a tosa ko tapang no cecay a matayalay a koli. Nawhani ano haenen ningra i, kaˈosien ningra ko cecay, kaolahen ningra ko cecay. Ano eca i, kangodoen ningra ko cecay, epecen ningra ko cecay. Orasaka, ano palecaden namo ko harateng to saki Kawas ato saki dafong i, caay ka ngaˈay.” (Matay 6:24) Misarocod ko falocoˈ ita mihodop to Kawas, pasifanaˈ to tamdaw to Fangcalay Cudad, wa marenec ko falocoˈ ita. O sangaˈayay a tinakoan ci Pawlo, kaemang cingra na ngangaˈay ko tayal i Yutayakiyo. Ikor, padama cingra to tamdaw malo Krisciyang, maˈaraw ko kafalic nangra minanam to soˈlinay kimad, pairaay to soˈlinay hemek ningra. (ˈOsien ko 1 Tisalonika 2:13, 19, 20.) Soˈlinayto, awaay ko roma tayal to ngangaˈay parenec kitanan.

14. Hano mihai ko roma tamdaw to ngangaˈay ko tamdaw palahedaw to pades no hekal?

¹⁴ “Wangaˈay ko tamdaw palahedaw to pades no hekal.” Mihayay ko roma tamdaw toniya harateng. Samanay saw? Ano mahaen i, wangaˈay ko tamdaw haratengay saan ko demak, hamaanto ko sakayat no Kawas. Sowal no roma tamdaw, maˈesalay ko lalood, raraw, adada, ato manikaway, wa ngaˈay ko tamdaw palahedaw to pades no hekal sanay. O cecay safanaˈ: “Wa malingad ko kangaˈay no hekal, samanen misaˈicelay ko tamdaw misakapah toni hekal.” Sakoniya sowal, o micalilaway to tamdaw a pasangaray iraayto ko sapalahedaw han? Sapikilimaw to caˈof, folfolen ita koniya salicay.

15. Misamaanay hano pakidem ko pades no hekal hani?

¹⁵ O Lalood: Tosa a taˈangayay lalood no hekal, 6,000 ˈofad ko mapatayay tamdaw. Soˈlin hatira, ikor no Saka Tosa Lalood no Hekal, caayho kananam no tamdaw. 2015 miheca, 6,500 ˈofad tamdaw ko pakayniay lalood ato sapalak awaayto ko kitiraan. O tatiihay demak: Itini i roma pala, maˈesalay ko tatiihay demak, kawra o romaroma tatiihay demak macakatay, tinakoen no wanglo, i lomaˈ, katalawan a picoˈay, kafahekaˈan ko kacakat. Malingaday ko kaˈanof no tamdaw to payci, awaay ko pakayraan no tamdaw palahedaw to tatiihay demak. O adada: Soˈlin maˈmetay ko roma adada, kawra o safanaˈ i 2013 miheca, to mihecahecaan 900 ˈofad ko laenoay no 60 ko mihecaan a tamdaw, mapatayay tono falocoˈ adada, macongfongay, ekang, macahacahay a adada, tangniyawping, kafahekaan no tamdaw koniya safanaˈ. O manikaway: Safanaˈ no hekal, itini aca i Afrika, 1990 miheca pakidemay ko kanikaw a tamdaw, 2 ok 8,000 ˈofad ko adihay, tahinito 2012 miheca, matongalay tahini 3 ok 3,000 ˈofad ko ˈaloman.

16. (1) Misamaanay hano edeng o Hongti Kitakit no Kawas palahedaw to pades no tadmaw? (2) Mitiliday no Isaya ato ˈOlic paliˈayaway paira to manan sapalemed ko Hongti Kitakit?

¹⁶ O kicay ato mirikecay no hekal sahetoay o maˈanofay tamdaw ko mikowanay. Kawrira, awaay ko pakayraan nangra, palahedaw to lalood, tatiihay demak, adada, ato nikaw, edeng o Hongti Kitakit no Kawas ko ngangaˈay palahedaw to pades. Nengnengen ita samanen ni Yihofa palahedaw toniya pades. O lalood: Wa palahedawen no Hongti Kitakit no Kawas ko lalangian no lalood, o misatekeday harateng, maˈanofay, pasakitakitay a falocoˈ, mararaway pihakelongan, aci Satan. (ˈOlic 46:8, 9) O tatiihay demak: Pasifanaˈay to tamdaw ko Hongti Kitakit no Kawas masasiolaolah, ma kakangodongodo, cowa ko papakalaˈosi ko mirikecay no hekal tonini. (Isaya 11:9) O adada: Wa palemeden ni Yihofa ko finawlan Ningra, milifok cangra to tanoktokay a tireng. (Isaya 35:5, 6) O manikaway: Wa songilaˈen ni Yihofa palahedaw ko manikaway. Halo pahafay cangranan i noˈadingoan. O hatiniay lipahakay nokaˈorip, cowa ko mamacakay no payci.​—ˈOlic 72:12, 13.

17. Wa ngaˈay kiso misamaan miconged to harateng no hekal?

¹⁷ O harateng no hekal, ano mamipalak to pasoˈlin no falocoˈ iso, tangongolen a micekiw ko Fangcalay Cudad mitoor toniya lalangian, malalengo to malohemay Krisciyang. Haratengen: Misamanay hano misolot to tamdaw ko hatiniay harateng? Hano o mararaway ko hatiniay harateng? Wa ngaˈay kita misamaan pacoli to hatiniay harateng? Oha ngangaˈay kita midipot to niyah, miconged to harateng no hekal. Tatengilen ita ko sapalimoˈot ni Pawlo to Kolosay kasakopang: “Kafanaˈ kamo to malodademaken namo to saki mafukilay to Kawas a tamdaw. Kafanaˈ kamo to nika samaanen ko pipacaˈof to licay no kahacecacecay a tamdaw.”​—Kolosay 4:5, 6.