Hato matatodongay to Hipray 12:16, tora sinael somowalay ‘caay ka ngodo to fangcalay demak no Kawas’ ci Isaw, hato “falic han ni Isaw to cecay a kaen ko todong no sapirocok ningra a fisac a ngangan.” Toni sinael maˈaraway ita, milifokay ci Yakop to “fisac a ngangan”, saka mala tatoˈasanto ni Misiya cingra sanay.​—Matay 1:2, 16; Luka 3:23, 34.

Nikawrira, ano sinanoten ko pina maˈoningay i Fangcalay Cudad, mamafanaˈo matiliday kadadoedo no tatoˈasan ni Misiya, cowa ka saheto saan o fisac a wawa. Haratengen ko ilaenoay a tinakoan:

O fisac wawa ni Yakop (Israil) ci Riupin, nihofocan ni Liya. Ikor, saka cecay wawa no kanonoˈan a fafahi ni Yakop ci Rakil i, ci Yosif. Midemak to karetengay raraw ci Riupin i, pataynian ci Yosifan ko cinganganay to fisac a wawa. (Satapangan 29:31-35; 30:22-25; 35:22-26; 49:22-26; 1 Rayray 5:1, 2) O matiliday a kadadoedo no tatoˈasan ni Misiya, cowa ci Riupin, cowa ci Yosif, na oya nihofocan ni Liya a saka sepat wawa ci Yuta.​—Satapangan 49:10.

Luka 3:32 mitiliday to kadadoedo no tatoˈasan ni Misiya, o lalima sahetoay o fisac a wawa. O wawa ni Powac ci Opit, ci Yisi ko  wawa ni Opit.​—Rucu 4:17, 20-22; 1 Rayray 2:10-12.

Kawra, o fisac wawa ni Yisi i, cowa ci Tafiti. Fafaloay ko wawa ni Yisi, o sasafaay ci Tafiti, ˈarawhan malo tatoˈasan ni Misiya cingra. (1 Samuil 16:10, 11; 17:12; Matay 1:5, 6) O wawa ni Tafiti ci Solomon i, cowa ko fisac a wawa.​—2 Samuil 3:2-5.

Caay ko kalimelaan ko fisac a wawa, cowa ka saan, o fisac wawa iraay ko mikiriwiˈay fadangalan, mamalo kakeridan no ngasaw cangra noikor. Mamililam cangra to tosaay ko nika adihay a hafay no lomaˈ.​—Satapangan 43:33; Limoˈot 21:17; Yosuwa 17:1.

Soˈlin hatira, ngangaˈay linahen ko cinganganay to fisac a wawa i roma salikaka. Ya laplapen ni Apraham ci Ismail i, ci Isakto ko cinganganay to fisac a wawa. (Satapangan 21:14-21; 22:2) Masowalay i kaˈayaw, o ngangan no fisac wawa ni Riupin pafelian ci Yosif.

Liyawen minengneng ko Hipray 12:16: “Latek malamaˈodangay ano eca i, malamitodongay ci Isawan,” caay ka ngodo to fangcalay demak no Kawas, “falic han ni Isaw to cecay a kaen ko todong no sapirocok ningra a fisac a ngangan.” Maanan ko tatodong noni sinael hani?

Cowa koha mamilengo ci Pawlo itini to kadadoedo no tatoˈasan ni Misiya, nao palimoˈotay to Krisciyang “kararid a pakayra i moecelay a lalan a romakat.” Ano maˈodang cangra i, o ‘mamalakisaw ko siniˈada no Kawas.’ O kadayayan ko teloc nora. (Hipray 12:12-16) Pakayniay i coos no tireng a mifalah ci Isaw to ‘fangcalay demak no Kawas.’ O Krisciyang ano maˈodang i, o mamahaen ci Isawan.

Itiniay i lalintadan no kakeridan no ngasaw a maˈorip ci Isaw, nolatekay iraay ko fadangalan patoˈaya ci Yihofaan. (Satapangan 8:20, 21; 12:7, 8; Yopu 1:4, 5) Kawra toor hananay ningra ko coos no tireng, pakayni i cecay kaysing a kahengangay a raˈraˈa mifalah tora sapalemed. Paliˈayaway ci Yihofa to mamakariˈang ko fofofofo ni Apraham, latek cowa kakahi ci Isaw a marorayen, saka sawad han ningra ko ngangan no fisac a wawa. (Satapangan 15:13) Cifafahiyay ci Isaw to cowa pidoko to Kawas a fafahiyan, pasomad to wama wina ningra, patahekalay to maolahay cingra to hekal, cowa piakoˈid to fangcalay demak no Kawas. (Satapangan 26:34, 35) Nikawrira, ci Yakop i, o midokoay to Kawas a fafahiyan ko mipiliˈan ningra to hararamod.—Satapangan 28:6, 7; 29:10-12, 18.

Mikitini i matiliday a kadadoedo no tatoˈasan ni Yis Misiya, mananamay ko manan kalimelaan hani? O kadadoedo no tatoˈasan ni Misiya, nolatekay o fisac wawa ko parocokan, kawra nolatek cowa. O Yutaya tamdaw mihaiay toni harateng, samanen mafanaˈay cangra, o sasafaay a wawa ni Yisi ci Tafiti, o tatoˈasan ni Yis ci Tafiti.​—Matay 22:42.