Itini toninian a demak, o mararamoday a Krisciyang o mamilalat to pakayniay a lalakaw ato safalod no Fangcalay Cudad, o saˈosi nangra hongaˈ tingalaw ko falocoˈ nangra ikaˈayaw no Kawas.

Hananay ni Yihofa palimoˈot ci Atam, ci Ifa aci Nowa: “Kahofoc kamo to ˈalomanay a faˈinayan ato fafahiyan a wawa.” (Satapangan 1:28; 9:1) Kawra, oni limoˈot cowa ka tatodong to Krisciyang. Mihaenay haw i, kahacecay a mararamoday, oha mamisaˈosi cangra to mamisamaan milowan to wawa, ano hacowa a ciwawa. Kawra, mamisinanot cangra to maanan a demak hani?

O dadadoedoen no Krisciyang ko safalod no Fangcalay Cudad, misaˈosi to hapakayraan caka ciwawa. O Krisciyang cowa ko ngangaˈay padeteng sa pasadak to poyapoy. Sakaretengen ko ˈorip sanay ko Fangcalay Cudad, ano padeteng sa pasadak to poyapoy i, misafelitay toni safalod. O Krisciyang cowa ka ngaˈay padeteng sa mipatay to poyapoy. (Kasadakan 20:13; 21:22, 23; ˈOlic 139:16; Yirimiya 1:5) Hay, wa ngaˈay ko Krisciyang pacomod to sapiateng to poyapoy a dafong (IUD) ilalomaˈ no sawawaan han?

O pakayniay a lalakaw, iraay i Mikecolay 1979/12/1, 31-32 fiedac (no Kowaping). Itiya tora lalintadan, matenakay ko tamdaw a pacomod to IUD i sawawaan. Somowalay kora lalakaw, itiya a tamdaw, cowa ka tada mafanaˈ ko IUD, sanay. O sowal no ˈalomanay matanengay, oni IUD hananay micongeday  to soloy a makakadep ato piras sanay. Ano caka makakadep ko soloy ato piras i, cowa ito ko caciwawa.

Ano pacomod toni IUD latelatekay mapasoloyay ko piras, lomahad ilalomaˈ no sawawaan anca ipapotal no sawawaan. Kawra, o aniniay a tinakoan patahekalay, onini IUD mikalisangaay to saka lomahadaw no mapasoloyayto a piras i sawawaan, maˈorip a mala wawa, mahecaday o padetengay mipatay to poyapoy kora sanay. O sowal nora Mikecolay, sanay: “O Krisciyang ano calemcemay to hangangaˈay pacomod to IUD hokira, sinanoten ko safalod no Fangcalay Cudad, misakareteng to ˈorip ngaˈ.”​—ˈOlic 36:9.

Ikor nora isaka 1979 miheca a Mikecolay, o ising ato kakakosiya iraay ko nika cakat itini toni a demak han?

Tosaay ko matenakay a IUD nohatini. O cecay, o cifodaway a IUD, isaka 1988 a miheca matenakay i Padaka; o roma, o hormon a IUD, itiniay isaka 2001 miheca a misatapang aira. Pakayni toni tosa a IUD, o mamafanaˈ kita to manan hani?

Cifodaway a IUD: Mahaen nisowalan isawni, onini IUD miatengay to soloy a micomod i sawawaan a makakadep ato piras, mipatayay to soloy. * O roma i, o hatiniay a IUD misakifetolay to lalomaˈ no sawawaan sanay.

Hormon a IUD: Onini IUD iraay ko hormon, mahecaday oya mikaenan a sapiateng to poyapoy a cemel. O matiniay a IUD pasadakay to hormon tayra i sawawaan, miemet to piras. Ano awa ko piras nanima mapasoloy. O masadakay a hormon mipakihepicay to sawawaan. * O roma i, mitongalay to copnat no liˈel no sawawaan, miconged to soloy tayra ilalomaˈ no sawawaan.

Onini tosa a IUD mifalicay to lalomaˈ no sawawaan. Kawra ano mapiras sato i, wa samaanto koya mapasoloyay a piras hani? Tona kihepicayto ko lalomaˈ no sawawaan, cowa ito ko lalomahad ko mapasoloyayto a piras i sawawaan, satapang saho mapoyapoy ko fafahiyan i, pakatiih sa a mahadak ko wawa. Kawra, cowa ka adihay ko hatiniay a tinakoan sanay ko ising, mahaen ano komaen to sapiateng to poyapoy a cemel i, nolatekay pakatiihay a mahadak ko wawa.

Soˈlin awaayho ko pinang no tamdaw, oniya cifodaway a IUD anca hormon a IUD o mamisaheci a miateng to piras a mapasoloy hokira, kawra o wacay no kakako patahekalay, ano pacomod ko fafahiyan toniya tosa a IUD i, cowa ka dolo a mapoyapoy sanay.

O mararamoday a Krisciyang ano misinanot to papacomod to IUD hokira, isalakaten a milengo ko ising, iraay ko masamaanay a sapiateng to poyapoy a dafong, pakayni to fafahi iraay ko manan a epocan ato manan a katalawan. Cowa ko ngangaˈay cangra papipatadoen ko tao anca o ising a misaˈosi to manan ko sapiateng to saka ciwawaaw nangra. (Loma 14:12; Kalatiya 6:4, 5) Ono tekedan a saˈosi koni. O sasasinanoten no mararamoday i, o saˈosi nangra mamahemek ko Kawas hokira, hanaca ira ko tingalaway a falocoˈ ikaˈayaw no Kawas.​—Nengnengen ko 1 Timoti 1:18, 19; 2 Timoti 1:3.