1. Misamaanay hano pakasoˈlin kita, ciˈicelay ko Sowal no Kawas? (Nengnengen ko satapangan coka.)

TAMDAW ni Yihofa pakasoˈlinay cangra, o Sowal no Kawas tada “o ciˈicelay.” (Hipray 4:12) Ilalomaˈ no mita ˈalomanay ko pakayniay noka pinanam to Fangcalay Cudad a mafalic ko nokaˈorip. ˈAyaw no mafanaˈ to kimad, o romaroma salikaka na mitakaway, mihelipay to ciwarakay anca, maˈodangay ko waywayan. O romaroma salikaka, na cihafayay iraay ko ˈakawangay saˈaroan, kawra tafihawayho ko nokaˈorip. (Patnakay 2:3-11) Adihayay ko tinakoan ita, to ciˈicelay ko Fangcalay Cudad mifalic to nokaˈorip no tamdaw, pakatamato cangra to hano ikor a ˈorip. Maolahay ko ˈalomanay toya “Mifalicay to Nokaˈorip no Tamdaw ko Fangcalay Cudad”, sanay a lalakaw. O soˈlinay a nalifetan no tamdaw kora. Alatek mafanaˈay kiso to cima salikaka, ikor no inoˈ kamayanay tahacada to ˈicel nai Fangcalay Cudad, padadotoc a macakat.

2. Samaanay padama ko Sowal no Kawas to isaka cecayay hahekalan a mapasimalay a Krisciyang?

² Anini, minanamto ko tamdaw to Fangcalay Cudad ikor, taˈangayay ko nika falic no nokaˈorip. Cowa ko fafahekaen kita, samanen o saka cecayay hahekalan a mapasimalay a Krisciyang,  iraay ko hatiraay a nalifetan. (ˈOsien ko 1 Korinto 6:9-11.) Misilsilay ci Pawlo to cowa ko mamilayap to Hongti Kitakit a waywayan, ikor sanay ko sowal: “Hatiraay ko romaroma namo iti:yaho.” Kawra mafalicay cangra mikitini i Sowal no Kawas ato sapadama no fangcalay saocor, tahacada to ˈicel a masongilaˈ a mafalic. Nikawrira, o romaroma nangra maharekto micada to inoˈ i, mararawayho to pakidemay a raraw. Patinakoen, somowalay ko Fangcalay Cudad to cecay mapasimalay Krisciyang, isaka cecay hahekalan, mafalahay no kasakopang, ikor patikoray minokay tayni i kasakopang sanay. (1 Korinto 5:1-5; 2 Korinto 2:5-8) Pakayniay i sapadama no Fangcalay Cudad, pakadefo ko salikaka to maamaan a pasangar, mafanaˈ tonini tada mikowaday to falocoˈ ita!

3. Onini lalakaw mamilengo to manan?

³ Tada ciˈicelay ko Sowal no Kawas, ano mipafelian ni Yihofa kita to Sowal Ningra, sangaˈayen ita mikalasaka dademak. (2 Timoti 2:15) Itini toni lalakaw mamilengo to sasamaanen ita kalasaka dademak ko ˈicel no Fangcalay Cudad, itira tora ilaenoay a pakayraan: (1) Itini i kalo nokaˈorip, (2) itini i mitosilay demak, (3) itini i kasakopang a mipasifanaˈ. Oni lalakaw mamilengo to mamisamaan a padama kitanan a matongal ko kaolah ci Yihofaan, miakoˈid to nika pasifanaˈ Ningra a ciepoc kita.​—Isaya 48:17.

4. (1) Ano miharatengay a mikalasaka dademak to Sowal no Kawas i kalo nokaˈorip i, misamaan to demak kita? (2) Sowalen hena, samaanay kiso mipalak to toki miˈosi to Fangcalay Cudad.

⁴ Ano miharatengay kita mikalasaka dademak to Sowal no Kawas i kalo nokaˈorip i, micerid a miˈosi to Fangcalay Cudad wangaˈ, ano hangangaˈay ceriden to romiˈamiˈad. (Yosuwa 1:8) Matayalay ko ˈorip no mita, adihayay ko tatamorongen a ˈinorong, kawra aka a pasalaten ko maamaanan a demakan, miˈafas to piˈosian to Fangcalay Cudad a toki iso. (ˈOsien ko Ifiso 5:15, 16.) ˈAlomanay tamdaw no Kawas, kiemelay a mipalak to toki to romiˈamiˈad miˈosi to Fangcalay Cudad, alatek to dafak, ˈayaw no fotiˈ anca romaroma a tatokian. O harateng nangra malecaday toya mitiliday to ˈOlic a tamdaw: “Tada maolah kako to rikec Iso, saromiˈamiˈad sa kako a miharateng tonini.”​—ˈOlic 119:97.

5, 6. (1) Misamaanay hano masaka limelaan ko midotimay hani? (2) Misamaan a midotim ngaˈ, malifok ko taˈangayay a epoc hani? (3) Sowalen hena, miˈosi ato midotim samaanay padama tisowanan.

⁵ Miˈosi aca to Fangcalay Cudad cowaho ka edeng, songilaˈen ita midotim ko maˈosiay a lalakaw. (ˈOlic 1:1-3) Mihaen ngaˈ, masaheci a mikalasaka dademak to taneng no Fangcalay Cudad. Ora miˈosian ita o pakaynian i mitolican cudad ha, anca pakaynian  i soci anca pingpan, o patosokan ita i, nanay mapadama no Sowal no Kawas kita a mifalic to harateng ato waywayan.

⁶ Ano miˈosi kita to Fangcalay Cudad i, misamaan a midotim ngaˈ malifok ko taˈangayay a epoc hani? Iraay ko cecay tada ciepocay a pakayraan, miˈosi to cecay fatac a sinael i, pahanhanen a misaharaterateng: Oni sinael mahapinangay ako to masamaanay a Kawas ci Yihofa han? Mikalasaka dademakan ako koni safalod i nokaˈorip han? Oha ngangaˈayho kako misamaan a misalof to demak? Songilaˈen ita misinanot kora sinael halo mitolon ci Yihofaan, wa irato ko harateng sapi kalasaka dademakaw to kimad no Fangcalay Cudad, mipaˈicel kitanan.​—2 Korinto 10:4, 5.

7. Samaanen ita kalasaka dademak ko Sowal no Kawas i pitosilan hani?

⁷ Ano mitosil kita i, samaanen ita kalasaka dademak ko Sowal no Kawas hani? Saˈayaw, ˈosien ko sinael patengil to cilomaˈay. Sanay ko sowal no cecay salikaka: “Ano cicafayay kiso ci Yihofaan paka lomalomaˈan a mitosil i, wa kiso aca ko sacaciyaw saan, caka papipasowalen iso ci Yihofa han?” Tatodong nora sowal, ano miˈosi kita to sinael i pitosilan i, o papipasowalan ci Yihofa tora cilomaˈay. Soˈlinay haw i, miˈosi to cecay matatodongay sinael, ikakaay to nika samalaymay sa ko niyah aca caciyaw. (1 Tisalonika 2:13) Licayen ko niyah: “Ano mitosil kako to ngaˈayay ratoh i, mimametan ako ko toki miˈosi ko Sowal no Kawas i tamdaw han?”

8. Misamaanay piˈosi aca to sinael i pitosilan hano cowaho ka edeng?

⁸ Manaokaniw, piˈosi aca to sinael cowaho ka edeng, samanen cowa ka fanaˈ ko ˈalomanay to Fangcalay Cudad, cowa ka fanaˈ to tatodong nora sinael. Itiniay isaka cecay hahekalan mahaenay ko pakayraan, ano aninito mahaenay. (Loma 10:2) Piˈosi aca  to sinael, wa cipinangto ko tamdaw cowa ka saan. Palaken ita ko toki mifolfol ko sinael, liyawen a somowal ato mitadtad ko tatodong no sinael, mihaen ngaˈ masemer ko falocoˈ no tamdaw.​—ˈOsien ko Luka 24:32.

9. Samaanen ita paˈaraw to sinael ko tamdaw, hongaˈ misakareteng cangra to Fangcalay Cudad? Sadaken ko tinakoan.

⁹ Ano matatodong ko pipaˈaraw ita to sinael i, wa misakareteng ko tamdaw to Fangcalay Cudad. Patinakoen, ngaˈayay haenen ita pasowal: “Pakayni toninian nengnengen ita, samaanay ko sowal no Tatapangan.” Ano cowa ko Krisciyang kora cilomaˈay i, alatek haenen ita ko sowal: “Nengnengen ita samaanay ko sowal no cudad no Kawas.” Anoca cowa ko mihakelongay ko cilomaˈay i, haenen ita milicay: “Matengilay iso ko cecay citanengay a sowal han?” Ano saharateratengen ita ko lalengawan no cilomaˈay i, wa mamafanaˈ patatodong cangranan a mifalic to pitosil.​—1 Korinto 9:22, 23.

10. (1) Sowalen hena ko cecay nalifetan no salikaka. (2) Na maˈaraway iso ko taˈangayay ˈicel no Sowal no Kawas i pitosilan han? Sadaken ko tinakoan.

¹⁰ Matinakoay no ˈalomanay salikaka, ano kalasaka dademaken ko Fangcalay Cudad i pitosilan i, taˈangayay ko pifiyor to cilomaˈay. Nengnengen ita ko cecay nalifetan. O cecay salikaka marariday a milisoˈ to cecay matoˈasay, pinaayto miheca koni matoˈasay miˈosi to casi ita. Kina cecayay, ˈayaw no papafeli kora salikaka tora Mikecolay i, miˈosian ningra ko cecay matiliday ilalomaˈ no casi a sinael. Oyaan 2 Korinto 1:3, 4, sanay kora sinael: “O karasiniˈadaay a Wama. O halihinomay a Kawas. Yo mapades kami to masamaamaanay i, mihinom Cingra i tamiyanan.” Matengil nora matoˈasay, masemeray ko falocoˈ, papiliyawan ko salikaka papiˈosi. Pasowal sato to salikaka koya matoˈasay, cingra ato fafahi tada misaaliay to sahinom. Nohatini, mangalefayto ko hemek ningra to lihaf no Fangcalay Cudad. Mankora, o Sowal no Kawas tada taˈangayay ko ˈicel i mitosilay a demak!​—Dmak 19:20.

11. Itini i kasakopang a mipasifanaˈ ko faˈinayan salikaka i, sasasinanoten ko manan?

¹¹ Maolahay kita mirienang to saˈopo ato taykay no Krisciyang. Mirienang kita to saˈopo ato taykay o sapidokoaw ci Yihofaan, mitengil to kamok milifokay kita to epoc. Pakayni i faˈinayan salikaka, mipasifanaˈ i kaˈayaw no ˈalomanay, o fadangalan kora, kawra o karetengay a ˈinorong. (Yakop 3:1) Ano pasifanaˈ ko faˈinayan salikaka i, sahecien a misalalangian ko Fangcalay Cudad. Ano tahacadaay kiso to sapanilnil, mipasifanaˈ itini kasakopang i, sasamaanen iso kalasaka dademak ko ˈicel no Sowal no Kawas hani?

12. O mikimaday salikaka sasamaanen a kalasaka dademak ko sinael midama to pikimad ningra?

¹² O sinael no Fangcalay Cudad ko sadama to kimad iso. (Yohani 7:16) Mihaenay, ano mikimad kiso i, aka saheto han o tinakoan ato sapatinako ko sowal, masawad a somowal to kalimelaan no sinael. O roma i, piˈosi aca to adihayay sinael a ecaka pitadtad, cowa ko ngaˈayay a mipasifanaˈay koni. Soˈlinay haw i, ano tada adihay ko sinael i pikimad, cowa ko mamaharateng no tamdaw ko kalimelaan. O ngaˈayay pakayraan i, piliˈen ko pina kalimelaan a sinael, maharek miˈosi tadtaden ko tatodong, halo sadaken ko tinakoan a somowal to sasamaanen a kalasaka dademak i nokaˈorip. (Nihimiya 8:8) Ano misalalangiay kiso to sapikimad a lalakaw no likakawa i, songilaˈen a miˈosi ato mipiliˈ to sinael. Haratengen to samaanay malaliting ko kalimelaan atora sinael, ikor ngaˈ alaen kora mipiliˈan a sinael. (Wa ngaˈay kiso mikitini i Sapasifanaˈ no Kawas Ciepocay Tisowanan–Pahatatanamay to Mitosilay a Cudad  saka 21-23 fedengan a mikilim to ciepocay sapaini a pakayraan.) O masaka limelaan i, tolonen ci Yihofa padama tisowanan matatodong ko nika patenak to kalimelaan no Sowal Ningra.​—ˈOsien ko Icra 7:10; Taneng 3:13, 14.

13. (1) O cecay fafahiyan salikaka matengilay ko cecay sinael i saˈopo, samaanay padama cingranan? (2) Na pakatengilay kiso to sinael i saˈopo a milifok to epoc han? Sadaken ko tinakoan.

¹³ O cecay fafahiyan salikaka i Australia, tona matengilay ko mikimaday kalasaka dademak to cecay sinael, taˈangayay ko nika falic. Oni fafahiyan salikaka na iraay ko kaadayayan a nalifetan i kaemangho, soˈlin patafangayto ci Yihofaan cingra, kawra cowa ka olah ci Yihofa takowanan sanay. Ikor, mafalicay ko harateng. O manan ko padamaay cingranan pakasoˈlin to soˈlinay maolah ci Yihofa cingranan hani? Kina cecayay, matengilay ningra ko cecay sinael i saˈopo, misimsiman ningra a miharateng ko tatodong noni sinael, halo misinanot to romaroma sinael, hato mafalicayto ko harateng ningra to niyahan. * Kiso, itini i saˈopo anca i taykay tona pakatengilay to cecay sinael, iraay ko malecaday a noka falic han?​—Nihimiya 8:12.

14. Samaanen ita patahekal to misalimelaay kita to Fangcalay Cudad?

¹⁴ Coko miakoˈiday kita ci Yihofaan pafeli to Sowal Ningra onini Fangcalay Cudad han? Sidaˈitay a Yihofa, cowa ko nika pafeli aca to Sowal Ningra, mikiˈokayho to tatatereken Ningra ko Sowal Ningra. (1 Pitiro 1:24, 25) Rariden ita miˈosi ko Fangcalay Cudad, kalasaka dademaken ko safalod nira i nokaˈorip ato mipadama to tao. Ano mihaen to demak kita patahekalay to misalimelaay toni sapakaolah, halo patahekalay to maolahay kita to papitiliday to Fangcalay Cudad a Yihofaan.