1, 2. (1) Ano caka pakaˈmet to tireng, iraay ko maanan a teloc? (2) Misamaanay hano sinanoten ita ko pakaˈmetay to tireng a capeling?

PAKAˈMETAY TO TIRENG o kaolahan no Kawas a capeling. (Kalatiya 5:22, 23) Ci Yihofa malefotay pakaˈmet to tireng, kawra caka lefot ko tamdaw, mamisaˈicel ngaˈ pakaˈmetay to tireng. Soˈlinay haw i, malifaay no tamdaw a pasangar, milingatay to nika ecaka pakaˈmet to tireng. Ano caka pakaˈmet to tireng, matayal sa saˈodaˈodang sanay, itini picudadan anca i katayalan, awaay ko minaroˈan. Nolatek pairaay to tatiihay a teloc, patinakoen malapoiˈ, malasang no epah, miˈodot, malacinowas ko raramod, cikiyam, mapalit, mararom ko falocoˈ, mapaytok, caho ka ciramod mapoyapoyto.​—ˈOlic 34:11-14.

² Caka pakaˈmet to tireng marariday midokaˈ to niyah ato tao. Itini i 1940 a lalintadan, mikingkiway ko tamdaw toniya demak, kawra patahekalay ko makingkiway anini, mangalefay cowa pakaˈmet to tireng ko tamdaw nohatini, sanay. O micekiway to Fangcalay Cudad a tamdaw cowa ka fahekaen, samanen paliˈayawayto ko Fangcalay Cudad, toni “saikoikoray” a romiˈad, o tamdaw, “caay pakaˈmet to tireng,” sanay.​—2 Timoti 3:1-3.

3. Misamaanay hano papalahad ko Krisciyang to pakaˈmetay to tireng a capeling hani?

 ³ Misamaanay hano papalahad kita to pakaˈmetay to tireng a capeling hani? Tosaay ko lalangian. Saka 1, o mahaenay tamdaw pakaˈmetay to keter, cowa ka tangsol mangolaw a mararawto ko demak. Fanekfekay ko falocoˈ, ngaˈayay ko kalalaˈed ato tao, cowa ka haliketer, marawraw ko falocoˈ. Saka 2, ano sapahemekaw ci Yihofaan, palahad to hatiniay capeling, tada o masaka limelaan, mikitini i raraw ni Atam aci Ifa mahapinangay koni demak. (Satapangan 3:6) Mikitiya misatapang tahanini, cowa pakaˈmet to tireng a tamdaw, awaay ko ngaˈayay teloc.

4. Ano caay ka dolo a miˈmet to tireng i, o manan ko papakalalok cangranan?

⁴ Cowa ka lefot a tamdaw, awaay ko pakayraan malefot a patahekal to pakaˈmetay to tireng a capeling. Mafanaˈay ci Yihofa toninian, miharatengay to sapadamaaw to sikawdan Ningra, pakaˈmet to ciraraway a pinangan. (1 Hongti 8:46-50) O romaroma tamdaw makalimay sapidokoaw ci Yihofaan, kawra caay ka dolo a miˈmet to tireng, ciharatengay ci Yihofa cangranan, mahaenay o widang Cingra pakalalok cangranan. Nengnengen ita ko malefotay taˈarawan ni Yihofa, ngaˈayay ato tatiihay tinakoan i Fangcalay Cudad. Saikor, lengoen ita ko ngaˈayay sapaini a sowal, paˈicel kitanan pakaˈmet to tireng.

5, 6. Itini manan a demakan, patahekalay to pakaˈmetay to tireng ci Yihofa hani?

⁵ Itini i maamaanan a demak, malefotay ci Yihofa, saka malefotay a patahekal Cingra toni capeling. (Limoˈot 32:4) Soˈliˈlin, cowa ka lefot kita, kamayan ngaˈay a mitodong ci Yihofaan. Ano simsimen ita ko taˈarawan ni Yihofa, o papaˈicel kitanan a pakaˈmet to tireng. Hay, o manan ko mamananam ita ci Yihofaan hani?

⁶ Haratengen, ya misafelit ci Satan ci Yihofaan i, malefotay a patahekal ci Yihofa to pakaˈmetay a capeling. Madimadiay a coyoh, maˈaraw ko nika pakokot ni Satan to Kawas, maedeng maketeray. Ano maˈaraw ita ko kihecod a pades nohatini, alatek, mamahaen to coyoh ko piharateng. Nikawrira, cowa ka fawfaw ci Yihofa, ˈayaw no mamidemak, misongilaˈay a miharateng to matatodongay pakayraan. Misaysay to picoli ni Satan, cowa ka patelas sa maketer Cingra, masadafdafay ko pidemak. (Kasadakan 34:6; Yopu 2:2-6) Pakaˈmetay ci Yihofa a mihadidi a mitala, samanen, cowa ka olah malaˈafo ko cecacecay a tamdaw, “mangalay Cingra to sakasasiyoraw no falocoˈ no tamdaw a maemin a miliyas to raraw.”​—2 Pitiro 3:9.

7. Mikitini ci Yihofaan, mananamay ita ko maanan?

⁷ Mikitini ci Yihofaan mananamay ita, sinanoten ko hasowal, aka mafirang a dademak. Ano tahasiˈayaw kita to pakidemay a demak i, haratengenho to sasamaanen ko demak, tolonen ko Kawas, mingitangit to taneng, ho mafanaˈ kita to sasamaanen ko sowal ko demak. (ˈOlic 141:3) Ano mangolaw ko tamdaw, marariday caka tatodong ko demak. Nolatekay, somowalay to cowa ko sasowalen anca, midemak to cowa ko dadademaken, telocto i, pacekosay ko falocoˈ!​—Taneng 14:29; 15:28; 19:2.

8. (1) Icowa kita mikilim to taˈarawan no ngaˈayay a capeling? (2) O manan ko padamaay ci Yosifan pakacoˈay to sakayhid no fafahi ni Potifar? (Nengnengen ko satapangan coka.)

⁸ O manan taˈarawan no Fangcalay Cudad somowalay to nika masaka limelaan no pakaˈmetay to tireng hani? Wawa ni Yakop ci  Yosif, o cecay a taˈarawan. Ya matayal cingra i lomaˈ ni Potifar i, patahekalay cingra to pakaˈmetay to tireng a capeling. Itiya, ci Yosif, “makapahay, tanektekay ko tireng,” maimahay ko fafahi ni Potifar, sapidiˈiaw cingranan. Samaamanen no fafahi ni Potifar, mikayhid ci Yosif, hano caka masolot cingra hani? Samanen, misimsimay miharateng cingra, ano caka pinaˈon cingra, wa ira ko manan a teloc. Ya repet han noya fafahiyan cingra i, liyas sanay ci Yosif a milaliw a talapotal. Saan cingra a pasowal: “Maanen ako ko pidemak to matiniay a tatiihay a ciraraw i kaˈayaw no Kawas saw?”​—Satapangan 39:6, 9; ˈosien ko Taneng 1:10.

9. Samaanen iso misaday ko niyah, ho pakacoˈay to sakayhid?

⁹ O manan ko mamananam ita i taˈarawan ni Yosif hani? O cecay a kalimelaan i, liyasen ita ko mamikayhid kitanan misafelit to rikec no Kawas a pakayraan. O roma tamdaw tiya, ˈayaw no mala Misawacayay Tamdaw ni Yihofa i, misaˈicelay misawad to tatiihay pinangan, mahaenay, o pakidemay ko kakomaen, haliepahay, mitamakoay, mihelip to ciwarakay, anca maˈodangay. Soˈlinto micada to inoˈ, makayhidayho nolatek. Ano, tahasiˈayaway kiso to matiniay pakayraan, simsimen a miharateng, ano caka coˈayen iso ko ˈanof no falocoˈ, mamisamaan mipalak to kalalaˈed iso ato Kawas. O roma i, saharateratengen iso, ano tahasiˈayaw to maanan a sakayhid i, sasamaanen iso a miliyas ko ngaˈay. (ˈOlic 26:4, 5; Taneng 22:3) Ano sasoˈlin sato makayhid kiso, tolonen mingitangit ci Yihofa pafeli tisowan to taneng ato ˈicel a pakacoˈay to sakayhid.

10, 11. (1) Itini i picudadan, ˈalomanay kapah misiˈayaway to manan a pakayraan? (2) O manan ko papadama to kapah a Krisciyang pakacoˈay to sakayhid?

¹⁰ O ˈalomanay kaemangay Krisciyang, tahasiˈayaway to malecaday ni Yosif a sapalifet. Nengnengen ko tinakoan ni Kimy. O ˈalomanay cafacafay ni Kimy a micudad, cinalifetayto to madadiˈiay a demak, nolatekay masasi pasengisengiay cangra. Ano malalengo ko cafacafay i, cowa pirienang ci Kimy cangranan. Tona caka lecad to cafacafay, latek matoˈolan nanay cingra, anca katawaan no cafacafay to nika awa no faˈinayan a widang cingra. Nikawrira, citanengay ci Kimy, samanen mafanaˈay cingra to madoloay makayhid ko kaemangay a madadiˈi to tao. (2 Timoti 2:22) Marariday licayen no cafacafay to limecedanho cingra hokira, itiya ˈaˈmetan ni Kimy koni toki a mitadtad, hano cowa ka saolatekay saan cingra madadiˈi to tao. ˈAlomanay kaemangay Krisciyang misetekay to saka ecaaw madenga no romaroma, ˈayaw no raramod midiˈito to tao, malikoay ko salikaka i cangranan, ci Yihofa malikoan nanay cangranan!

¹¹ Itini Fangcalay Cudad matiliday ko tinakoan no caka pakaˈmet to tireng a maˈodang ko waywayan. Maˈaraway itini, ano caka pakaˈmet to tireng, wa ira ko masamaanay kadayayan a teloc. Ano tahalifaay kiso to matiraay ni Kimy a demak, haratengen koya malifaay noya kapah i saka 7 fedengan no Taneng, ato nidemakan ni Amnon samaanay a tatiih ko teloc. (2 Samuil 13:1, 2, 10-15, 28-32) Itini i picekiw no paro no lomaˈ, ngaˈayay kalasaka dademaken no wama wina kora tinakoan padama to wawa, pasifanaˈen cangra ano minaol to faˈinayan anca fafahiyan i, misamaan a pakaˈmet to tireng, malo citanengay a tamdaw.

12. (1) Tiya cato pakaˈ met ci Yosif to ˈiwil no falocoˈ ikaˈayaw no kaka i, misamaanay cingra? (2) Itini i masamaanay a pakayraan, mamiˈmet to tireng kita?

¹² Ci Yosif itiniay i roma a pakayraan patahekal to pakaˈmetay to niyah. Ya tayra ko kaka ni Yosif i Icip micakay to kakaenen i,  to sapihapinangaw to falocoˈ no kaka, misimedan ni Yosif ko tatirengan no niyah. Ikor cato pakaˈmet ci Yosif to ˈiwil no falocoˈ, liyas sanay cingra, ongong sato tomangic. (Satapangan 43:30, 31; 45:1) Ano mararaw ko salawina anca salikaka ita i, todongen ci Yosif a miˈmet to niyah, ho caka mafirang a mangoraw. (Taneng 16:32; 17:27) Ano ira ko mafalahay salawina, o mamiˈmet to niyah ko Krisciyang, ho caka sapinaolaw cangranan. Soˈlin cowa ko madoloay konini, kawra, ano tengilen no Krisciyang ko sapalimoˈot ni Yihofa, mitodong to taˈarawan Ningra i, o papaˈicel cangranan a pakaˈmet to tireng.

13. O manan ko mamananam ita, itini nalifetan ni Tafiti?

¹³ O maˈoningay pakayni ci Tafitian, o ngaˈayay a tinakoan. Soˈliˈlin taˈangayay ko fadangalan ningra, kawra, cowa kasimaan a kalasaka dademak to ˈicel no niyah, tiya mapaketer ni Sawlo aci Simi, cowa ka keter cingra. (1 Samuil 26:9-11; 2 Samuil 16:5-10) Ano hacowato pakaˈmetay to tireng ci Tafiti, cowa ka saan, mafanaˈay kita to nika ˈodang ningra aci Patsipa, ato mafirangay to ˈanof ni Napal. (1 Samuil 25:10-13; 2 Samuil 11:2-4) Nikawrira, ngaˈayay minanam kita nai ci Tafitian. Saka 1, o kantok a tamdaw, mamisaˈicel a miˈmet to niyah, ho caka patelas sa kalasaka dademak to fadangalan. Saka 2, kita maemin aka pakinali a pakasoˈlin to cowa ko mamakayhid ko niyah.​—1 Korinto 10:12.

14. O manan ko nalifetan ni Liwky? Ano misiˈayaw kiso to malecaday a pakayraan, pakaˈmet to keter hano masaka limelaan hani?

¹⁴ Misamaan kiso paˈicel to pakaˈmetay to tireng hani? Sinanoten koni malifaay no cecay salikaka. Iraay ko cecay paliding misongtolay ilalikor to paliding ni Liwky, ora tamdaw ko mararaway, ˈarawhan miceliˈay mikapoˈi sapisetiˈaw ci Liwkyan. Tangsolay mitolon ci Liwky ci Yihofaan padama cingranan a miˈmet to niyah, mitanam a misaysay to keter ningra, kawra, cowa ka pitengil kora tamdaw, oraanto tilid hananay ni Liwky ko paya no paliding nora tamdaw, liyas sanayto ci Liwky. Ikor no cecay lipay, milisoˈay ci Liwky to cecay fafahiyan, maˈaraw to o faˈinay noni fafahiyan koya parakatay toya paliding! Mangodoan nanay cingra, patingwa sato to pawsiyen a kosi ni Liwky, papisakaliki to patefocay a demak. Ikor, mirienangay cingra to nika lalengo to Fangcalay Cudad ato fafahi ningra, mihayay to kimad no Fangcalay Cudad. Mikitini toniya demak, mahapinangay ni Liwky tada masaka limelaan ko miˈmetay to keter, ano caka pakaˈmet cingra itiya i, cowa ko mamahaen ko teloc.​—ˈOsien ko 2 Korinto 6:3, 4.

15, 16. Micekiw to Fangcalay Cudad mamisamaan padama tisowanan ato paro no lomaˈ palahad to pakaˈmetay to tireng hani?

¹⁵ Misongilaˈ a micekiw to Fangcalay Cudad, papadama kitanan palahad to pakaˈmetay to tireng. Hananay pasowal no Kawas ci Yosuwa: “Kararid kiso a miasip a patengil tonini a matiliday a rikec. Hapinangen a mikadkad to romiˈamiˈad to dadayadaya konini a rikec to sakasongilaˈaw iso a midoedo tonini a matiliday i cudad a sowal a maemin. Ano haenen iso i, malaheci ko nidemakan iso.” (Yosuwa 1:8) Micekiw to Fangcalay Cudad mamisamaan padama tisowanan palahad to pakaˈmetay to tireng hani?

¹⁶ Maˈaraway ita ifafekang, ihekalay pasowal ko Fangcalay Cudad, o sasowalan ato waywayan ita, papaira to maanan a ngaˈayay ato tatiihay a teloc. Iraay ko tatodong ni Yihofa papitilid toniya demak. (Loma 15:4) Ano miˈosi toni matiliday i, songilaˈen a midotim a mikadkad! Tanamen a mihapinang  to sasamaanen iso kalasaka dademak i tisowanan, ato paro no lomaˈ iso. Ano mahapinangay iso to cangoˈotayho kiso, siˈayawen koni demak a mitolon, misaˈicel a misalof. (Yakop 1:5) Kilimen ko lalakaw i mitepangan no likakawa no Kawas, mamatama iso ko misaalian iso a lalakaw, paˈicel a pakaˈmet kiso to tireng.

17. Samaanen no wama wina padama ko wawa palahad to pakaˈmetay to tireng hani?

¹⁷ Samaanen no wama wina padama ko wawa, palahad to pakaˈmetay to tireng hani? Cowa ka hofoc han ko wawa, iraayto ko pakaˈmetay to tireng ato romaroma fangcalay capeling, toha sapadamaaw to wawa, patireng ko wama wina to taˈarawan nangra. (Ifiso 6:4) Ano caka pakaˈmet ko wawa to keter i, haratengen ko niyah to patirengay to ngaˈayay taˈarawan no wawa hokira. Marariday kiso mitosil, masaˈopo ato misikay to paro no lomaˈ a noka picekiw han? Aka pisakahemaw to ngaˈayay noka pifiyor to wawa. Ano sapilalangaw to saali no wawa i, aka matalaw a pasowal! Ci Yihofa patirengay to sarikec ci Ataman aci Ifaan, orira sarikec padamaay cangranan misakareteng to fadangalan ni Yihofa. Malecaday, o taˈarawan no wama wina, o papadama to wawa mafanaˈ miˈmet to niyah. O sangaˈayay sapatelong to wawa i, pasifanaˈen cangra maolah ci Yihofaan, misakareteng to fadangalan ato palinian Ningra.​—ˈOsien ko Taneng 1:5, 7, 8.

18. Ngaˈayay a widang hano o papaira to ngaˈayay epoc kitaanan hani?

¹⁸ Soˈlinay haw i, ano, o wama wina kita hokira, anca cowa, o mamisinanot mipiliˈ to widang. O ngaˈayay widang mamikowad tisowanan, micangacang to ciepocay a patosokan, hanaca papadama tisowanan a miliyas to fangafang, o sasawidangen ita ko matiniay a tamdaw. (Taneng 13:20) Mahecaday to Kawas ko pinengneng a tamdaw, wa ngaˈay ko pifiyor i tisowanan, paˈicel tisowanan a pakaˈmet to tireng. Manaokaniw, o ngaˈayay a waywayan ita, o mamikowad to widang ita. Patahekal to pakaˈmetay tada masaka limelaan, mihaen to demak o papahemek ci Yihofaan, lipahak ko kaˈorip, hanaca makalim a mipadang to tao.