1, 2. (1) Iraay ko manan kalimelaan a ˈinorong ni Solomon? (2) Misamaanay hano patado ci Tafiti calemcem ci Solomonan?

PATORODAN ni Yihofa ci Solomon papikerid to patirengay to tada masaka limelaan a misangaˈay a demak, misangaˈ to fangcalay sefi i Yirusalim. Oniya fangcalay sefi, o “tadamaanay a ekim, o cacingangan itini i hekal konini a pitaˈongan.” Ora sakakaay i, oniya fangcalay sefi o “pitaˈongan a lomaˈ [ci Yihofaan] a Kawas.”​—1 Rayray 22:1, 5, 9-11.

² Hongti ci Tafiti pakasoˈlinay to papadamaen no Kawas ci Solomon, kawra, “o kapahho cingra, awaayho ko nilifetan ningra.” Wa ira ko timolo ni Solomon, mitamorong toni misangaˈay to fangcalay sefi a demakan han? To nika awa no nilifetan, cato pakafilo toni ˈinorong cingra han? Ano hasapi laheciaw ci Solomon toni ˈinorong i, timolo a misafaˈinaˈinayan cingra ngaˈ, misatapang a midemak.

3. Alatek naitiniay i wama ci Solomon minanam to manan?

³ Alatek naitiniay i wama ci Solomon minanam to timolo. Kaemangho  ci Tafiti i, miˈodotay to tomay a midipot to siri no wama. (1 Samuil 17:34, 35) Timoloayho cingra misiˈayaw a milowid ci Koliyatan, oya mararidayto milood a takaraway a tamdaw. Itini i sapadama no Kawas, tano cecay a rimadacay fakeloh, tekol han ningra mipatay ci Koliyat.​—1 Samuil 17:45, 49, 50.

4. Misamaanay hano papatahekal to timolo ci Solomon?

⁴ O nika timolo ni Tafiti mikowaday ci Solomonan patahekal to timolo, misangaˈ to fangcalay sefi. (ˈOsien ko 1 Rayray 28:20.) Ano awaay ko timolo ni Solomon, wa sawad sato cingra to nika talaw, ikaka ko nika tatiih to caka laheci masangaˈ ko sefi.

5. Misamaanay hano papatahekal to timolo kita?

⁵ Matira ci Solomonan, o mamisaali kita to sapadama ni Yihofa ngangaˈay a patahekal to timolo, milaheci to demak. Mihaenay haw i, sinanoten ita ko taˈarawan no madimadiay a sikawdan, haratengen to mamisamaan kita timolo a milaheci to sapatorod ni Yihofa a demak.

6. Pakayni ci Yosifan, o manan ko mamananam ita?

⁶ Ya kayhiden no fafahi ni Potifar ci Yosif to sakadadiˈiaw i, patahekalay to timolo cingra. Mafanaˈay ci Yosif to tatatiih cingra, ano lalangen ningra kora fafahiyan. Soˈliˈlin hatira, cowa ka yoyang ci Yosif, timoloay a mitatoy to demak.​—Satapangan 39:10, 12.

7. Sowalen hena misamaanay patahekal to timolo ci Rahap. (Nengnengen ko satapangan coka.)

⁷ Ci Rahap, o roma a timoloay a taˈarawan.Ya tangasa i lomaˈ ni Rahap koya misolapay no Israil i, o ngangaˈay cingra milaplap cangranan a caka pipadang. Nikawrira, mitiˈeray ci Yihofaan ci Rahap, saka timolo cingra a misimed toya tatosa misolapay, halo padama cangranan a dipayal a milaliw. (Yosuwa 2:4, 5, 9, 12-16) Pakasoˈlinay ci Rahap to soˈlinay Kawas ci Yihofa, hanaca pakasoˈlinay to papafelien Ningra ko Israil toni a pala. Cowa ka talaw ci Rahap to hongti no Yiriko, anca romaroma tamdaw a caka timolo a misaˈosi. Mitatoyay cingra to matatodongay a demak, teloc mapaˈoripay ko niyah ato polong no paro no lomaˈ.​—Yosuwa 6:22, 23.

8. Patahekal to timolo ci Yis, samaanay a mifiyor to tarokos?

⁸ Madimadiay a tarokos ni Yis patirengay to taˈarawan no timoloay. Maˈaraway nangra ko timolo ni Yis. (Matay 8:28-32; Yohani 2:13-17; 18:3-5) Mankora, ya tahasiˈayaw to saroero no Satukay cangra i, kamayanay padadotoc a pakayni i ngangan ni Yis a pasifanaˈ to tamdaw.​—Dmak 5:17, 18, 27-29.

9. Itini i 2 Timoti 1:7, padamaay kitanan a mafanaˈ to cima ko pafeliay to timolo?

⁹ Ci Yosif, Rahap, ci Yis ato tarokos, patahekalay to timolo, onini ilalinikay a ˈicel, mansa matatodong ko demak nangra. Ora timolo nangra cowa ko pakinaliay a noka fanekfek no falocoˈ, ao mitiˈeray ci Yihofaan. Ano kitato, o mamihaen a patahekal to timolo, kawra cowa ko niyah ko mitiˈeran, ao mamitiˈer ci Yihofaan. (ˈOsien ko 2 Timoti 1:7.) Dotoc, lengoen ita ko tosa a pakayraan patahekal to timolo: Itini i lomaˈ ato kasakopang.

10. Misamaanay hano papatahekal to timolo ko kaemangay Krisciyang?

¹⁰ Itini i adihayay pakayraan, kaemangay Kriciyang papatahekal to timolo, hongaˈ madofdof ko limoˈot ni Yihofa. Ci Solomon matatodongay ko pisaˈosi, milaheci to fangcalay sefi a demak. Anini, o kaemangay ngaˈayay todongen ko taˈarawan ningra. Cadaen ko sapasifanaˈ no wama wina, papikayaten ko wama wina. Kawra, itini i adihayay kalimelaan a demak, o mamisaˈosi ko kaemangay tono niyah a demak. (Taneng 27:11) O mamisaˈosi ko kaemangay to sasamaan mipiliˈ to widang ato ciepocay a lawla, anca misamaan mitafo to makoracay waywayan, ato mamicada to inoˈ hokira. Ano misangaˈ to matiniay a saˈosi  i, tatimolo ko kaemangay tamdaw, samanen mihaen cangra, o micoˈayay ci Satanan.

11, 12. (1) Samaanay patahekal to timolo ci Mosi? (2) O kaemangay sasamaan mitodong to taˈarawan ni Mosi?

¹¹ O kaemangay mamisaˈosi to karetengay demak, mahawpay to papatireng to patosokan nokaˈorip. Itini i roma kakitakitan, maroeroay ko kaemangay to sapicomodaw to ˈakawangay picudadan, anca mikilim to adihayay ko lifon a katayalan. O roma itini cowa ka kadofah a kitakit, misaˈicelay ko kaemangay to sapietanaw to payci a midama to paro no lomaˈ. Ano tahasiˈayaway kiso tora matiraay pakayraan, haratengen ko taˈarawan ni Mosi. Midipotan no fafahiyan wawa ni Falaw ci Mosi malo wawa ningra, oha ngangaˈay misamacay micangacang to saka cinganganaw ato hafay, hanaca, o Icip a paro no lomaˈ ningra, singsi ato matanengay tamdaw ningra, alatek miroeroay cingranan papihaen! Soˈliˈlin hatira cowa ka sawi ci Mosi, timoloay mitatoy to demak mipiliˈ a midoko ci Yihofaan. (Hipray 11:24-26) Mihaen ci Mosi misaˈosi mapalemeday ni Yihofa, ano ikor, o papafelienho ni Yihofa to adihayay a sakaraheker cingra.

¹² O kaemangay tamdaw ano timolo a patireng to noˈadingoan a palinian, isalakat micangacang to Hongti Kitakit, o papalemeden ni Yihofa cangra. Soˈlin ano ciˈinorongay cangra papaririˈ to paro no lomaˈ, o papadotocen ni Yihofa padama cangra. Isaka cecay hahekalan, kaemangay a Timotian misarocoday a micangacang to noˈadingoan a palinian, oha ngngaˈay kiso mihaen to demak. *​—ˈOsien ko Filipi 2:19-22.

13. O cecay fafahiyan salikaka samaanay patahekal to timolo, matoor ningra ko noˈadingoan palinian?

¹³ O cecay fafahiyan salikaka i Alapama no Padaka, mamipalahad to timoloay, hongaˈ matoor ko noˈadingoan a palinian ningra. Sanay ko sowal: “Nano kaemangho, o maomoyay kako. Itini i kasaˈopoan cowa pisacaciyaw kako to tamdaw, mitosil to kafokilan tamdaw mangalefay ko talaw.” Ikor, padamaan no wama wina ato romaroma salikaka, matooray ningra ko noˈadingoan palinian, malo miceriday misakafahay. Sanay ko sowal noni salikaka: “O hekal ni Satan miowingay to tamdaw ˈakawang ko picudadan, saka cinganganaw ato adihay ko payci. Kawra, o matiniay a palinian cowa ko mamadangar, pairaay aca to adihayay saroero ato roray. ˈArawhan, midoko ci Yihofaan mamilifok to adihayay a hemek ato raheker.”

14. Itini i masamaanay a pakayraan, o Krisciyang a wama wina papatahekal to timolo?

¹⁴ O Krisciyang a wama wina, o papatahekal to timolo. Patinakoen, papiciyapanen no tawki kiso, kawra, ora tatokian oha sapicekiw no paro no lomaˈ, pitosilan a toki ato mamisaˈopo. Ano tahalifa to matiraay a pakayraan i, ira ko timolo nangra ngaˈ, pakalalang to saali no tawki, mihaen to demak, o ngangaˈay patireng to taˈarawan no wawa. Alatek, o romaroma wama wina pasalatay to wawa nangra, mirienang to manan a demak, kawra, cowa ko mamakahi kiso papirienang to wawa iso. Kawriraan, ora towa wama wina milicay tisowanan, hano caka papirienangen iso ko wawa wa saan. Itini tora pakayraan, papatahekal kiso to timolo a matatodong ko pitadtad tora lalangian han?

15. ˈOlic 37:25 ato Hipray 13:5, samaanay padama ko wama wina patahekal to timolo?

¹⁵ Ano pakalaloken no wama wina ko wawa patireng to noˈadingoan palinian, padama cangranan mitoor to palinian, o papatahekal to timolo cangra. O romaroma wama wina samisimisiay ko falocoˈ pakalalok to wawa patireng to noˈadingoan palinian, patinakoen misakafahay demak, tayra i misaaliay to ˈalomanay mitosilay a kilac, matayal i Pitil anca patireng to kasaˈopoan. Ora wama wina calemcemay, ano malitengto cangra cima ko mamidipot cangranan.  Nikawrira, o citanengay a wama wina, o papatahekal to timolo, pasoˈlin to mamidipot ci Yihofa to tamdaw Ningra. (ˈOsien ko ˈOlic 37:25; Hipray 13:5.) Patahekal ko wama wina to timolo, mitiˈer ci Yihofaan i, o mamapadama ko wawa mitodong to taˈarawan nangra.​—1 Samuil 1:27, 28; 2 Timoti 3:14, 15.

16. O roma wama wina misamaanay padama to wawa, patireng to noˈadingoan a palinian? Mihaen to demak cangra, wa ira ko manan a epocan?

¹⁶ O cecay mararamoday i Padaka somowalay, to misamaanay padama cangra to wawa, patireng to noˈadingoan a palinian, sanay ko sowal no faˈinay: “Caho ka romakat caciyaw ko wawa i, misatapanganto niyam pasowal cangra, malo misakafahay ato matayal to demak no kasakopang, tada kahemekan hananay. Taˈangayto ko wawa malo palinianto nangra kora. Ano patireng ko wawa halo micangacang to noˈadingoan a palinian i, papadama cangranan micoˈay to saroero no hekal ni Satan, misamacay midoko ci Yihofaan.” O roma tatosaay ko wawa a wama, sanay ko sowal: “O ˈalomanay wama wina toha sakaˈakawangaw ko picudadan no wawa, itini miontoay anca romaroma a demakan, mikiˈayaw to tao, oha mamipalak to adihayay toki ato payci. Kawra, o sangaˈayay i, kiemelen padama ko wawa pakatoor to noˈadingoan a palinian, hongaˈ ira ko ngaˈayay ngangan nangra i kaˈayaw ni Yihofa. Mahemekay kami maˈaraw ko wawa pakatoor to noˈadingoan palinian nangra, kala cafay cangranan mihaen to demak tada kalipahakan.” Awaay ko sasa, o papadamaen no Kawas koya mipadangay to wawa a wama wina.

17. Misamaanay hano papatahekal to timolo ko Krisciyang itini i kasakopang? Sadaken ko tinakoan.

¹⁷ Itini i kasakopang, o papatahekal ko Krisciyang to timolo. Patinakoen, o malohemay malitengay, o tatimolo hongaˈ pakasaysay to iingkay demak i kasakopang, anca, ano macaloh ko salikaka a mipaising i, mipadang cangra. O romaroma tayraay i tapalitan milisoˈ to mapalitay minanam to Fangcalay Cudad, o papatahekal to timolo. O cowaho ciraramod a fafahiyan salikaka, o tatimolo cangra ngaˈ adihay ko demak saki Yihofa, mirienang to misakafahay, malinah tayra  misaaliay to mitosilay a kilac, mirienang to misafacoay patireng to kasaˈopoan, anca mirienang to SKE. O romaroma fafahiyan salikaka mirienangay to Kiliyat a Picudadan.

18. O matoˈasay fafahiyan salikaka, mamisamaan patahekal to timolo?

¹⁸ O matoˈasay fafahiyan salikaka ngaˈayay ko demak nangra itini i kasakopang, hanaca misalimelaan no salikaka cangra. Soˈliˈlin, o romaroma nangra cato ka adihay ko demak saki Kawas, kawra ngaˈayay patahekal to timolo cangra, padama to kasakopang. (ˈOsien ko Titus 2:3-5.) Patinakoen, alatek saalien no faˈinayan salikaka ko cecay matoˈasay fafahiyan salikaka, papipasowal to kaemangay fafahiyan salikaka pakayni i caˈedong, o tatimolo cangra wangaˈ makahi mihaen to demak. Manaokaniw, cowa ko kakapoˈien kora kaemangay, kawra ngaˈayay pakalalok cingranan papiharateng to sasamaan a mifiyor ko caˈedong to tao. (1 Timoti 2:9, 10) Mihaen cangra ciharateng to tamdaw, wa ira ko ngaˈayay pifiyor to kasakopang.

19. (1) O micadaayto to inoˈ a faˈinayan salikaka, mamisamaan patahekal to timolo? (2) Filipi 2:13 ato 2 Korinto 4:7, samaanay padama to faˈinayan salikaka patahekal to timolo?

¹⁹ O micadaayto to inoˈ a faˈinayan salikaka papatahekal to timolo. Timolo a mitamorong to adihayay ˈinorong, o sakalemed no kasakopang. (1 Timoti 3:1) ˈArawhan, o romaroma salikaka, calemcemay to manan hato cato ka timolo micangacang to fangcalay tayal. Patinakoen, o cecay salikaka alatek na mararaway iti:ya, miharateng to awaayto ko tatodong no niyah malo padamaay sikawdan anca malohemay malitengay. O roma alatek cowa ko papakaremo kako milaheci to tayal saan a miharateng. Ano iraay ko hatiraay harateng iso, pasoˈlinen ci Yihofa to papadama tisowanan ira ko timolo. (ˈOsien ko Filipi 2:13; 2 Korinto 4:7.) Aka mapawan, ci Mosi na mihaenay miharateng to niyahan to cowa ko papakadangar to demak no Kawas. (Kasadakan 3:11) Ikor, tahacadaay ci Mosi to sapadama ni Yihofa, saka timoloayto milaheci to ˈinorong. O micadaayto to inoˈ a faˈinayan salikaka, ano sapihaenaw ci Mosian a timolo, tolonen ko Kawas, halo micerid miˈosi to Fangcalay Cudad, sinanoten ko taˈarawan nolitengan a madimadiay sikawdan. Misapoener to falocoˈ a misaali to malohemay malitengay papipahatatanam cangranan, hanaca mikiˈayaw a mipadang to salikaka. Pakalaloken niyam ko micadaayto to inoˈ a faˈinayan salikaka, patahekal to timolo, mikiemel a matayal saki kasakopang.

20, 21. (1) Samaanay paˈicel to falocoˈ ni Solomon ci Tafiti? (2) Pakasoˈlinay kita to manan?

²⁰ Hongti ci Tafiti patalipaˈelalay ci Solomonan, o kakapoten ni Yihofa cingra, tangasa kalahecian no pisangaˈ to fangcalay sefi. (1 Rayray 28:20) Paifalocoˈan ni Solomon ko sowal no wama, cowa ka noka kaemangho awa ko nalifetan, matalaw a dademak. Patahekalay ci Solomon to taˈangayay timolo, itini sapadama ni Yihofa, pitoay ira ko kalitosa miheca milaheci a patireng to tadamaanay a fangcalay sefi.

²¹ Padamaan ni Yihofa ci Solomon, o papadama tisowanan itini i kihecod a nokaˈorip patahekal to timolo, misiˈayaw to masakenakenaay a pakayraan. (Isaya 41:10, 13) Ano timolo kita midoko ci Yihofaan, o papakasoˈlin to papadotoc a palemed kitanan. Mankora, “safaˈinaˈinayan saˈicelen ko falocoˈ . . . a matayal.”