1. Samaanay pasowal ci Yihofa ci Mosian to capeling Ningra? Misamaanay hano mihaen pasowal ci Yihofa?

LASILAN no Kawas ci Mosi to ngangan no Niyah, pasowal to capeling no Niyah. Saˈayaw somowalay ci Yihofa to adayayay ato siniˈadaay Cingra, ao cowa pasowal to citanengay ato ciˈicelay Cingra. (ˈOsien ko Kasadakan 34:5-7.) Ya saalien ni Mosi ci Yihofa padama cingranan i, pasowalay ci Yihofa to adayayay siniˈadaay a Kawas Cingra, paihekalay to makalimay mipadang to sikawdan. (Kasadakan 33:13) Mafanaˈ to nika ciharateng no Kawas to tamdaw, coko masemeray ko falocoˈ iso a nimaan. O siniˈadaay a tamdaw ciharatengay ato sidaˈitay to marorayay tamdaw, sapilowanaw to roray nangra. Onini lalakaw mamilengo tonini siniˈadaay a capeling.

2, 3. (1) Misamaanay hano mafanaˈ patahekal ko tamdaw to siniˈadaay a falocoˈ? (2) Hano sinanoten ita konini siniˈadaay a capeling hani?

² Miringian i Kawas kita a sangaˈen. O siniˈadaay ci Yihofa, mankora mafanaˈay kita a siniˈada ko falocoˈ, ciharateng to sakangaˈay no tao. (Satapangan 1:27) Matiliday i Fangcalay Cudad ko patahekalay to matiniay siniˈadaay a capeling. Patinakoen,  iraay ko tatosa pacopiyaway fafahiyan, tayra miˈaraw ci Solomonan, malacongisay cangra, ‘kako ko wina nora wawa,’ sanay. Oraanto, palimoˈotan ni Solomon cangra papikalitosa tora wawa, oya soˈlinay wina tona siniˈadaay tora wawa, hayi sa pafeli tora fafahiyan. (1 Hongti 3:23-27) O roma a tinakoan i, o fafahiyan a wawa ni Falaw, paˈoripan ningra koya wawa ci Mosi, maˈaraw to wawa no Hipray cingra, o papatayen. Kawra, “siniˈada sa cingra tora wawa”, ala hanto ningra midipot malo wawa no niyah.​—Kasadakan 2:5, 6.

³ Hano sinanoten ita konini siniˈadaay a capeling hani? Samanen mitokelay ci Yihofa kitanan mitodong i Cingranan. (Ifiso 5:1) Soˈlina nisangaˈan kita a ira ko siniˈadaay falocoˈ, kawra mafiyoray no raraw ni Atam, caayto ka lefot kita, madoloay ira ko misatekeday a falocoˈ. Nolatekay, samisimisiay kita to papadamaen ko tao hokira, anca o niyah aca ko sikoren ko ngaˈay. O maanan ko papadama kitanan misikor to tao halo misikor to niyah hani? Saka 1, palaken ko toki misimsim to samaanay ci Yihofa ato romaroma madimadiay sikawdan siniˈada to tao. Saka 2, simsimen miharateng, samaanen mitodong ko taˈarawan no Kawas, ato mamisamaan to demak ngaˈ ira ko ngaˈayay minaroˈan.

4. (1) Misamaanay hano ocoren ni Yihofa ko coyoh tayra i Sotom? (2) Mikitini to demak ni Yihofa to paro no lomaˈ ni Loto, maˈaraway ita ko maanan?

⁴ Ngaˈayay itini i Fangcalay Cudad pakaˈaraw to siniˈadaay a tinakoan ni Yihofa. Haratengen ko nidemakan no Kawas ci Lotoan. O moecelay tamdaw ci Loto, maˈaraw ko nika ˈamelas ko waywayan no Sotom ato Komora tamdaw, “maroray ko falocoˈ” ningra. Saˈosian no Kawas to papalaˈafoen cangra. (2 Pitiro 2:7, 8) Ocoran no Kawas ko coyoh paˈorip ci Lotoan. Coracoran no coyoh ca Loto papiliyas tora niyaroˈ, kawra “orat sa ci Loto saferaang saan, nikawrira, siniˈada [ci Yihofa] cingraan saka, kayat hanto noya tatosaay [coyoh] ko kamay ni Loto ato fafahi ningra atoya tatosaay a fafahiyan a wawa ningra, keriden noya coyoh cangra a miliyas toya niyaroˈ.” (Satapangan 19:16) Mikitini to demak ni Yihofa ci Lotoan, maˈaraway ita, cipinangay ci Yihofa to masiˈayaway no madimadiay a sikawdan a pasangaray pakayraan.​—Isaya 63:7-9; Yakop 5:11; 2 Pitiro 2:9.

5. Mikitini 1 Yohani 3:17, misamaanay a micoloh kitanan a sinaˈada to tao?

⁵ Ci Yihofa cowa ko nika siniˈada aca to tamdaw, pasifanaˈayho to tamdaw Ningra, papipatahekal to siniˈadaay a capeling. Haratengen ko Rikec no Israil, pakayni to patampoay to rikoˈ a demak. (ˈOsien ko Kasadakan 22:26, 27.) O mariˈangay a tamdaw cowa patikor to rikoˈ no mikiyamay tamdaw, cowa ka ciharateng, ano awa ko rikoˈ nangra, wa misamaan a diheko a mafotiˈ. Cowa ka lecad ci Yihofa, pasifanaˈay to tamdaw a ira ko siniˈada no falocoˈ, aka a lietec ko falocoˈ to tamdaw, sanay. Onini a Rikec, o mamicoloh kitanan a siniˈada to tao han? Ano sapilowanaw kita to roray no salikaka, o mamakalim kita mihaen to demak han?​—Kolosay 3:12; Yakop 2:15, 16; ˈosien ko 1 Yohani 3:17.

6. Mararid ci Yihofa padama to Israil tamdaw pasasiyor, o manan ko mamananam ita?

⁶ Siniˈadaay ci Yihofa to finawlan Ningra, soˈlin mararararaw cangra, kamayanay ciharateng ci Yihofa i cangranan. O sowal no Fangcalay Cudad: “Mararid a miocor [ci Yihofa] Kawas no tatoˈasan nangra to paliˈayaway to sowal a papipasowal to  finawlan Ningra.” (2 Rayray 36:15) Cowa ka olah ci Yihofa malaˈafo ko cimacima itini i pisawkitan, pairaen ita ko malecaday a harateng, ciharateng toya papasasiyor a tamdaw, siniˈada i cangranan. (2 Pitiro 3:9) Mankora, ˈayaw no mamalaˈafo ko mariˈangay tamdaw, padadotoc kita mitenak to lihaf, padama to tamdaw mafanaˈ toya adayayay siniˈadaay a Kawas.

7, 8. Misamaanay hano pakasoˈlin ko paro no lomaˈ ni Milan, to siniˈadaay ci Yihofa cangranan?

⁷ Mikitini i nalifetan no ˈalomanay maˈaraway ita, tada siniˈadaay to tamdaw ko Kawas. Nengnengen ko cecay tinakoan. Isaka 1990 mamihecaan, cowa ka tomerep ko kalalood no Posnia ato Serpia. Ira ko cecay romiˈad, 12 ko mihcaan a faˈinayan wawa ci Milan, ato paro no lomaˈ ato romaroma Misawacayay Tamdaw ni Yihofa, midakaway to tosiya, naitini i Posnia tayra i Serpia a mitaykay, o mamicada to inoˈ ko wama wina ni Milan. Tangasa i kasalawac no kitakit i, tona o cowa ka lecad ko finacadan, repet han no sofitay ko paro no lomaˈ ni Milan, romaroma a salikaka i, padotocan a patalaˈayaw. Tosaay romiˈad rofoen cangra, ikor, oya citodongay a tapang no sofitay, patingwaay milicay to sasamaanen cangra. Itiniay ikaˈayaw nora tapang ca Milan, saka matengilay ko caˈof nora kakeridan no tapang, sowal sa: “Talapotalen cangra! Mikowang maemin!”

⁸ Ya caciyaw koya tapang to o roma sofitay ningra, iraay ko tatosa kafahalan tamdaw, miingid ca Milanan, mihawhaw to o Misawacayay Tamdaw cangra, matengilay niyam ko sowal no itosiyaay a salikaka, pakayni ca Milanan sanay. Pasowal ci Milanan ato safa, cowa ko kakingsaen ko wawa, tayra mikalic to tosiya niyam hananay. Ikor, tayra pasowal to wama wina ni Milan, papikoniyol ilalikor no pikingsaan, rakat sa tayra i lawac han cangra. Matalaway ci Milan, awaay ko pinang to sasamaanen ko demak, licay han no wama wina koya tamdaw: “Wa pataˈlifen no sofitay kami han?” Kafahekaan i, tiya mitaˈlif ko wama wina to kasalawac no kitakit i, hato cowa ka ˈaraw no sofitay cangra! Malalitemohto ko paro no lomaˈ na Milan i, mala cafayto cangra tayra i pitaykayan, saka pakasoˈlinay cangra to mitengilan ni Yihofa ko pitolon nangra. Maˈosiay ita i Fangcalay Cudad, paˈoripay a midipot to kinacecacecay ci Yihofa, cowa ka saan. (Dmak 7:58-60) Kawra, sanay ko sowal ni Milan: “Maedeng o ci Yihofa ko paˈoripay tamiyanan, miocor to coyoh mitahepo to mata noya sofitay.”​—ˈOlic 97:10.

9. Samaanay micada ci Yis to mihakelongay cingranan a tamdaw? (Nengnengen ko satapangan coka.)

⁹ Ngaˈayay minanam kita to taˈarawan ni Yis. Siniˈadaay to finawlan cingra, samanen “marawraw cangra a matiya o malafelay a siri to awaay ko pakaenay.” Samaanay siniˈada cangranan hani? “Satapang sato cingra a pasifanaˈ i cangraan to adihayay a demak.” (Matay 9:36; ˈosien ko Marko 6:34.) Cowa ka hatira to Falisay tamdaw, misalaeno to kalo a tamdaw. (Matay 12:9-14; 23:4; Yohani 7:49) Mangalayay kiso mitodong ci Yisan, mipadang toya macahiway i noˈadingoan a tamdaw han?

10, 11. (1) Ano maamaanan a pakayraan, siniˈadaen ita ko tamdaw han? (2) Pakayni to sasiniˈadaen ko tamdaw hokira, o manan ko sasinanoten ita?

¹⁰ Nikawrira, ano maamaanan a pakayraan, siniˈadaen ko tamdaw cowa ka saan. Itiniay i matatodongay a tatokian patahekal ko Kawas to siniˈada. ˈArawhan, hongti ci Sawlo, siniˈadaay to ˈada no finawlan no Kawas ci Akak, limelaay to papalaˈafoen a sangaˈayay a pinaˈorip. Micoliay ci Sawlo to Kawas, teloc, miliyasan ni Yihofa cingra,  misawad pala hongti cingranan. (1 Samuil 15:3, 9, 15) Ci Yihofa, o masadafdafay ko pisawkit, taˈeselay a minengneng to falocoˈ no tamdaw, mafanaˈay to hahacowa patahekal to siniˈada. (Mararomay 2:17: Icikil 5:11) Mangataayto ci Yihofa mitefoc toya cowa pihakelong Cingranan a tamdaw. (2 Tisalonika 1:6-10) Tangasa itiya, cowa ito ko sasiniˈada toya mariˈangay tamdaw, samanen mafanaˈay Cingra, palaˈafoen ko mariˈangay tamdaw ngaˈ, o patahekalay to siniˈada to moecelay tamdaw.

¹¹ Misawkit to tamdaw to papaˈoripen ha papatayen ha, cowa kono mita a demak. Mamisaˈicel kita padama to tamdaw. Hay, mamisamaan kita patahekal to siniˈada to tamdaw hani? Dotoc, o nanengnengen ita ko pina kalimelaan a sapaini a sowal.

12. Misamaan kiso siniˈada to tamdaw i kalo a romiˈad?

¹² Padamaen ko tamdaw i kalo a romiˈad. Todongen ita ci Yis, siniˈada to salikaka ato romaroma a tamdaw. (Yohani 13:34, 35; 1 Pitiro 3:8) Siniˈadaay hananay, iraay ko “mala cafayay a maroray”, sanay a tatodong. O siniˈadaay a tamdaw mangalayay milowan to roray no tao, mipadama cangranan misaysay to pasangar. Ano hacowa kita mipadama to tamdaw hani? Ano masamaan ko demak i, padamaen ko tamdaw matayal tono lomaˈ a tayal nangra.​—Matay 7:12.

13. Mirienang to mipadamaay to mapadesay a demak ko finawlan ni Yihofa, maˈaraway no tao ko manan a capeling nangra?

¹³ Mirienang to mipadamaay to mapadesay a demak. Ano maˈaraw ita ko mapadesay a marorayen i, siniˈadaay kita cangranan, adayayay to malifaay nangra. ˈAlomanay tamdaw mafanaˈay to makalimay mipadama ko finawlan ni Yihofa, padama to misemsemay tamdaw. (1 Pitiro 2:17) Isaka 2011 miheca, iraay ko ˈatoray ato conami i Dipong, o cecay fafahiyan salikaka taˈangayay ko nika lepat no lomaˈ. Maˈaraw ningra ko naitiniay icowacowa pala ato kitakit a salikaka tayra mipadama, patireng to lomaˈ nangra i, makowaday ko falocoˈ. Sanay cingra patikami: “Mikitini tonini demak, mahapinangay ako to ciharatengay ci  Yihofa ato romaroma salikaka tamiyanan. Icowacowa a salikaka mitolonay saki tamiyanan.”

14. Misamaan kiso mipadama to adadaay ato matoˈasay tamdaw?

¹⁴ Mipadama to adadaay ato matoˈasay tamdaw. Ano maˈaraw ita ko nika caka lefot ko tireng a adada ko tamdaw i, siniˈadaay cangranan a adayay cangranan. Makalimay kita to aawato ko adada ato malitengay a demak, mansa, micangacangay kita to sakairaaw no Hongti Kitakit no Kawas, hanaca, kiemel a mipadama to cisaaliay a tamdaw. Iraay ko cecay mitatiliday to cudad a tamdaw, ci Yang Poen ko ngangan, ciadadaay to masiwalaay adada no malitengay ko wina ningra. Somowalay ci Poen, to cecay romiˈad maˈisiay no wina ko rikoˈ. Tatodong sa ira tayra ko tatosa Misawacayay Tamdaw, marariday cangra milisoˈ tora malitengay. Licay han nora fafahiyan salikaka to ngangaˈay mipadama cangra hokira, sato ko sowal no wina ni Poen: “Kangodoanto, hay padamaenho kako,” han ningra. Patadoento no salikaka micingkiyat, ikor mala cafayay komaen to ociya. Mafanaˈto ci Poen i, tada miakoˈiday cangranan. Sanay mitilid cingra: “Tada misakaretengay kako to Misawacayay Tamdaw ni Yihofa, matooray nangra ko sowal nangra, kalasaka dademakan nangra ko mitosilan nangra.” Kiso i, siniˈadaay to adadaay ato matoˈasay tamdaw, kiemel a mipadama cangranan han?​—Filipi 2:3, 4.

15. O mitosilay demak ita, hano iraay ko epoc to tamdaw hani?

¹⁵ Itini i noˈadingoan mipadang to tamdaw. Maˈaraw ita macariraw ko kaˈorip no tamdaw i, sapipadamaaw kita i cangranan, o sangaˈayay pakayraan i, pasifanaˈen cangra to Kawas ato papalaˈosien no Hongti Kitakit a demak. O roma i, padamaen cangra midoedo to palinian no Kawas a maˈorip. (Isaya 48:17, 18) Mitosil kita o papaˈodingar ci Yihofaan, halo ngangaˈay patahekal to siniˈadaay i tao. Mihaenay haw i, licayen ko niyah, o ngangaˈay kako mararid a mirienang to mitosilay demak hokira?​—1 Timoti 2:3, 4.

16. Patahekal to siniˈadaay, hano ciepoc tisowanan hani?

¹⁶ O safanaˈ no mikakingkiway to falocoˈ a tamdaw, ano patahekal ko tamdaw to siniˈada ciepocay to sakatanoktok no tireng sanay, pacakat to nika lalaˈed no niyah ato tao. Ano mipadama to marorayay tamdaw, papadama tisowanan a lipahak ko falocoˈ, cowa ko mamatoˈol anca matoled ko falocoˈ. Patahekal to siniˈadaay, tada ciepocay i tisowanan! (Ifiso 4:31, 32) O mahemekay mipadama to tamdaw a Krisciyang tingalaway ko falocoˈ, samanen, mafanaˈay to kiemelay ko niyah, midemak to kahemekan a demak no Kawas. Mamala ngaˈayay wama wina, raramod ato widang kita. Ano lipahak kita patahekal to matiniay capeling, ira sato ko saali no mita, o mamakahi mipadama ko tao kitanan.​—ˈOsien ko Matay 5:7; Luka 6:38.

17. Misamaanay hano papatahekal kita to siniˈadaay to tamdaw?

¹⁷ Nikawrira, cowa ko nika ciepocay to niyahan saan a patahekal kita to siniˈadaay. Mihaen kita to demak tona sapipaˈodingaraw ci Yihofaan, makalim mitodong to ciolahay ato siniˈadaay a Kawas. (Taneng 14:31) Patirengay Cingra to malefotay a taˈarawan, kakiemelen ita mitodong Cingra! Nanay padadotoc kita patahekal to siniˈadaay, mihaen o rarihaday a kala cafay ato tao, tangongol ko nika lawidang ato salikaka.​—Kalatiya 6:10; 1 Yohani 4:16.