O TAMDAW mitokelay to lipahakay a nokaˈorip, kawra itini toni salikoray a ˈawaled, tahalifaay ko kahacecay tamdaw to ‘pasangaray siˈayawen’ a demak. (2 Timoti 3:1) Patinakoen, o caay ka sadafdaf a demak, adada, awa ko katayalan, mararom ko falocoˈ ato romaroma a pasangar, o mahaenay demak marawraway ato makesemay kita, teloc i, palidlid sato malahedaw ko lipahak. Ano, o sikawdanto no Kawas, latek pakayniay i noka ˈisang no falocoˈ a pasokiyaw ko lipahak. Ano tahalifaay kiso to matiniay a demak, wa ngaˈay kiso misamaan miliyaw a lipahaken ko falocoˈ hani?

To sapacaˈofaw toni salicay, salakat mafanaˈ kita to maanan ko lipahak hananay, ato misamaanay hano kamayan a lipahak ko romaroma tamdaw ano mapalifet cangra. Dotoc, nengnengen ita misamaan a mitafo to lipahak, hongaˈ matongal ko hemek.

ˈArawhan i, soˈlinay lipahak hananay, cowa ko hemek anca acang aca no falocoˈ. Misamaanay hani? Patinakoen: O malasangay no epah a tamdaw, alatek caka tomerep a matawa, mafasawto ko epah, patikorto i nokaˈorip i, mamisiˈayawho to kahirahira a pasangar ato roray, awaato ko tawa ningra. O matiniay apotoay a acang cowa ko soˈlinay a lipahak.​—Taneng 14:13.

Soˈlinay a lipahak o ikemoday no falocoˈ a capeling. Tona malifokayto ko maanan anca matoorayto ko nihalakaan a demak a lipahaken. Ano kangaˈayanto anca katatiihanto, lipahakayho ko falocoˈ. (1 Tisalonika 1:6) Soˈlinto marawraw ko falocoˈ pakayni to maanan a demak, kawra o kemod no falocoˈ ngaˈayayho a lipahaken. Patinakoen, masetiˈ ko tarokos to nika pitenak to ngangan ni Kristo i, cangra “salipahak sato masadak to Pilaocan, o nisaˈosian no Kawas kami to matatodongay a mapakangodo tona mitoor kami ci Yisan,” saan. (Dmak 5:41) Saka, lipahak cangra cowa ko nika masetiˈ, ao nika madimadi nangra to Kawas.

Nikawrira, o lipahak cowa ko hofoc han iraayto. Samanen, o heci no fangcalay saocor ko lipahak. Itini i sapadama no fangcalay saocor, ho ngaˈay kita palahad to “faelohay pinangan,” mahawpay ko lipahakay a capeling. (Ifiso 4:24; Kalatiya 5:22) Ano palahad kita to lipahakay, o papadama kitanan pakaremo to maamaan a saroero nokaˈorip.

O araaw ni Yihofa toni cikiw i, o papatomesen ko fangcalay a demak, kawra nohatini matomesay ko mariˈangay a tatiihay demak. Nikawrira, cowa pasalaten no Kawas koni tatiihay tamdaw, tatiihay demak a mipasokiyaw to lipahak Ningra. Sowal no Fangcalay Cudad: “Matomes no ˈicel ato lipahak ko Pitaˈongan a Lomaˈ Ningra.” (1 Rayray 16:27) Cowa koninian aca, o malaheciay a fangcalay demak no madimadiay a sikawdan no Kawas ‘palipahakay to falocoˈ ni Yihofa.’​—Taneng 27:11.

O taˈarawan no mita a mitodong ci Yihofa, ano caka hatira o niharatengan no niyah ko demak i, aka pakinali a cariraw. Samacayen ita  miharateng ko iraayto a sapalemed no niyah, halo mihadidi a mitala to kaˈayaway a hatokel. *

Itini Fangcalay Cudad mamahela ita ko ˈalomanay a madimadiay a ngaˈayay taˈarawan, soˈlina misiˈayaway cangra to pasangaray pakayraan, kamayanayho mitafo to lipahak. Patinakoen, ci Apraham, tahalifaay cingra to mamapatay ko ˈorip, halo miememayho to pairaan no tao a pasangar i cingranan. (Satapangan 12:10-20; 14:8-16; 16:4, 5; 20:1-18; 21:8, 9) Soˈlin tahasiˈayaw to matiniay a saroero, kamayanay matomes ko lipahak ni Apraham. Samaanay cingra pakadangar hani? Tona ihekalay mafanaˈ cingra, aaira ko hatokel no niyah maˈorip i pikowan ni Misiya. (Satapangan 22:15-18; Hipray 11:10) O sowal ni Yis: “Halamham no tatoˈasan namo ci Apraham to katalahekalan ako a romiˈad. Maˈaraw ningra konini i, salipahak sa cingra.” (Yohani 8:56) Todongen ita ci Apraham, dotimen miharateng ko noikoran a sapalemed.​—Loma 8:21.

Matira ci Aprahaman, tarokos ci Pawlo aci Silas samacayan ko falocoˈ i sakiˈok ni Yihofa. Tanoktok ko nika pakasoˈlin nangra, cowa pakomira han ko tatiihay sapalifet a mipalak to lipahakay falocoˈ. Patinakoen, pekpeken no tao misetiˈ, paliten i pirofoan, ˈarawhan “tenok no lafii, mitolon, romadiw ci Pawlo aci Silas,” pakahemek to Kawas. (Dmak 16:23-25) Mikitiniay i noikoran a hatokel a milifok to ˈicel ci Pawlo aci Silas, mafanaˈay tona pakayniay i ngangan ni Kristo ko pisemsem, mansa lipahaken ko falocoˈ nangra. Todongen ita ko taˈarawan ni Pawlo aci Silas, haratengen ko macadaay a sapalemed noya madimadiay midoko ci Yihofaan a tamdaw.​—Filipi 1:12-14.

Anini, tahasiˈayaw ko ˈalomanay salikaka to sapalifet i, lipahakayho ko falocoˈ, o ngaˈayay a taˈarawan no mita. Patinakoen, isaka 2013 miheca ka 11 folad, pakidemay ko nika taˈangay a faliyos, misongtolay to Filiping, pinaay a caˈol a Misawacayay Tamdaw ni Yihofa, malahedaway ko lomaˈ. Itini i Takolopan mahadefekay maemin ko pala, ci Cilo itiraay ko aroˈ, sanay ko sowal: “Soˈlin tahalifa toni kihecod, lipahakayho ko salikaka, awaay ko pakayraan a somowal to matiniay a lipahak.” Ano tahalifa kita to pakidemay a sapalifet i, pairaen ko miakoˈiday falocoˈ, simsimen a miharateng ko nano demak ni Yihofa i kitaanan, mihaen a mitafo kita to lipahak. Iraayho ko maanan a lalangian ita a lipahaken ko falocoˈ hani?

Ngaˈayay a mala widang kita aci Yihofa, iraayho ko maanan lalangian to mikikakaay tonini a lipahaken ko falocoˈ ita hani? Haratengen hena, mafanaˈ kita toya satakaraway a Tatapangan, o Kawas ita, o Wama ita, halo o Widang ita Cingra.​—ˈOlic 71:17, 18.

Pafelian ni Yihofa kita to ˈorip, rihaked ko ˈorip, o sasalimelaen ita koni sapakaolah. (Patnakay 3:12, 13) Cowa koninian aca, ngaˈayay miingid kita ci Yihofaan, mafanaˈ to araaw Ningra pakayni i kitaanan. (Kolosay 1:9, 10) Hato iraayto ko soˈlinay tatodong nokaˈorip. Kawraan, cowa ka fanaˈ ko ˈalomanay tamdaw to tatodong nokaˈorip. Ihekalay ci Pawlo somowal toninian, sanay cingra: “‘O caayho ka ˈaraw, o caayho ka tengil, o caayho ka harateng no tamdaw a demak,’ nikawrira, pakaynien no Kawas i [fangcalay saocor] ko pipahapinang i titaanan to pakakemoday a demak Ningra.” (1 Korinto 2:9, 10) Mafanaˈ kita to araaw ni Yihofa, coko lalipahak ko falocoˈ no mita han?

Iraayho ko maanan a nidemakan ni Yihofa saki tamdaw Ningra hani? Masododay ko raraw ita, coko lalipahak ko falocoˈ no mita han? (1 Yohani 2:12) Pakayniay i sidaˈit no Kawas, iraay ko hatokel ita maˈorip i faelohay hekal. (Loma 12:12) Anini, pafelian ni Yihofa kita to masacefangay a salikaka i paro no kakarayan. (ˈOlic 133:1) Mikiˈokayho ko Fangcalay Cudad, o papaˈoripen ni Yihofa kita miliyas ci Satanan ato kaloykoy. (ˈOlic 91:11) Ano sinanoten ita miharateng ko masamaamaanay a sapalemed ni Yihofa kitaanan i, o mamatongal ko lipahak.​—Filipi 4:4.

O lipahakayto a Krisciyang o ngangaˈayho a mitongal to lipahak han? Sanay ko sowal ni Yis: “O nika somowal ako i tamowanan tonini i, ngaˈay matiya o lipahak ako ko lipahak namo ato sakatadamaan no lipahak namo.” (Yohani 15:11) Hay, o ngangaˈay a mitongal kita to lipahak. Haenen o nika likat no namal, mitongal to kasoy ngaˈ marengreng ko namal. Mahecaday, padadotocen iso macakat i noˈadingoan hongaˈ matongal ko lipahak no falocoˈ. Haratengen, o fangcalay saocor no Kawas malecaday o kasoy, mamirengreng to lipahak no falocoˈ. Mihaenay haw i, rariden iso a mingitangit ko sapadama no fangcalay saocor ni Yihofa, halo midotim a miharateng to Kimad no Kawas, o mamatongal ko lipahak iso.​—ˈOlic 1:1, 2; Luka 11:13.

Ano matayal kiso to kahemekan a demak ni Yihofa i, o mamatongal ko lipahak iso. (ˈOlic 35:27; 112:1) Hano hatira hani? Samanen misangaˈ ko Kawas to tamdaw i, “kangodoen ko Kawas, kaˈimeren a midoedo ko limoˈot Ningra, onini ko lalahecien no tamdamdaw a demak,” sanay. (Patnakay 12:13) Mihaenan no Kawas a misafaco kita to mamidofdof to araaw Ningra. Mankora, ano midoko kita ci Yihofaan i, o mamatongal ko lipahak ita. *

Ano padadotoc kita palahad tonini capeling i, o mamatanam ko adihayay a epoc, mitaˈlifay to niharatengan ita ko nika adihay. Patinakoen, maˈaraw no kakarayanay Wama ci Yihofa kita, ano masamaamaanto ko pakayraan, lipahakenho a midoko Cingranan, o mamahemek Cingra. (Limoˈot 16:15; 1 Tisalonika 5:16-18) Hanaca, ano ira ko soˈlinay lipahak ita, o papakacoˈay to pasadafongay a nokaˈorip, makahi a kinafalah to niyah, misaˈicel a micangacang to Hongti Kitakit no Kawas. (Matay 13:44) Ano maˈaraw ita ko epoc no lipahak i, o mamatongal ko lipahak ita, marenecen ko harateng, rihaday ko falocoˈ, hanaca o mamahemeken ko tao.​—Dmak 20:35; Filipi 1:3-5.

Itini i Niporas a taykak no Padaka o cecay mikakingkiway, o sowal ningra: “Ano mahemeken marenecen kiso to kaˈorip iso nohatini, o tatanoktok ko tireng iso ano ikor,” sanay. Mahaenay ko sowal no Fangcalay Cudad: “O lipahakay a falocoˈ, matiya o ngaˈayay a sapaiyo a patanektek to tireng.” (Taneng 17:22) Ano mahemek ko ˈorip iso i, o tatanektek ko tireng iso.

Itiniay maˈorip kita i adihayay ko saroero a lintad, kawra ano mitolon kita, micekiw to Fangcalay Cudad, misimsim a miharateng to Kimad ni Yihofa i, o mamalifok ko fangcalay saocor no Kawas, ira ko soˈlinay a lipahak, maredoay ko matiniay a lipahak. Ano haratengen ita ko sapalemed no niyah, mitodong toya patahekalay to pakasoˈlinay to Kawas a tamdaw, halo misaˈicel a midofdof to araaw no Kawas, o lalipahaken ko falocoˈ. Mihaen o mamatanam ko sowal no ˈOlic 64:10: “O mamitiˈer [ci Yihofaan] ko moecelay a tamdaw, o lalipahak cangra to pakayniay i Cingraan, o papahemek i Cingraan ko moecelay a tamdaw a maemin.”