Isaka 1937 miheca, itiniay i kitakit no Kirekistan a Tokmok, pipolongan a nociyo a hofocen kako. O Kirekistan a tamdaw ko wama wina, ono Kirekistan ko sowal nangra, nai dafak tangasa dadaya a matayal i nociyo cangra. Itiya, palilaman to kakaenen ko maomahay tamdaw, kawra cecay a miheca ngaˈ palifonan to payci cangra. To sapidipotaw ko wina takowanan ato fafahiyan a safa, marorayay cingra a matayal, limaay a miheca ko picudad ako, ikor misaromiˈadayto maomah i nociyo.

Itira i kitiraan ako, manikaway ko tamdamdaw, malotayay a matayal ko tamdaw toha sakaˈorip. Kaemangho kako itiya, cowa ka ciharateng to tatodong nokaˈorip, ato noikoran ako. Caay ka harateng to mamifalic to kaˈorip ako ci Yihofa ato kimad Ningra. Misamaanay a matenak ko lihaf no Hongti Kitakit tayni i Kirekistan hani? O masaka semeran a tawcikel koni, mikitiniay i niyaroˈ ako a misatapang, itiraay i kakaˈamisan no Kirekistan a misatapang.

Isaka 1950 mamihecaan, o soˈlinay kimad ni Yihofa misatapangay cilamit i Kirekistan. Nikawrira, itiya o Suwiay makomoday a kasakitakit ko mikowanay toni pala, mankora o soˈlinay kimad mamilowid to Kiwsanto wangaˈ. Itini i Suwiay, misatenokay ko saaroˈan no Misawacayay Tamdaw ni Yihofa. (Yohani 18:36) Mihaenay kala ˈadaan no mikowanay no  Suwiay cangra, mihakokay cangranan. ˈArawhan, ano mafiyorayto no masamaanay harateng ko tamdaw, o kimad no Kawas o mamitemer to falocoˈ no moecelay tamdaw. Tikolen a minengneng ko hakelong no ˈorip ako, mananamay ako a kalimelaan i, “mafilo no Kawas ko masamaamaanay a demak.”​—Marko 10:27.

Nawhani mahakokay ko Misawacayay Tamdaw ni Yihofa, mangalefay ko nika cowat a matenak ko soˈlinay kimad no Fangcalay Cudad. Hano hatira ko sowal hani? O Sipoliya nao mikowanan no Suwiay, tayraan no kitakit milaplap ko mapalitay tamdaw. O romaroma matedalayto a Misawacayay Tamdaw ni Yihofa ikor tayniay i Kirekistan, saka mihaenay a matenak ko soˈlinay kimad. O cecay malaplapay tayra i Sipoliya i, o ci Emil Yancen, isaka 1919 miheca a hofocen cingra. Mapatayniay i pipolongan a pisakolian ci Emil, itiraay malitemoh ko Misawacayay Tamdaw ni Yihofa halo micada to soˈlinay kimad. Isaka 1956 miheca, minokay tayni i Kirekistan ci Emil, itiraay i Sukuluk ko ˈaro, mingataay i niyaroˈ ako. Isaka 1958 miheca, mapatirengay ko saka cecay a kasakopang no Sukuluk.

Ikor no cecay miheca, ci Wiketo Winter malinahay tayni i Sukuluk. Oni madimadiay a salikaka pakayniay i misatenokay a saaroˈan a tahacada to pisemsem to pina a miheca, kinatosaay a mapalit to tolo a miheca, ikor miliyaway a mapalit to 10 a miheca, dotoc malaplapay to 5 a miheca. Soˈliˈlin mapakidemay a mahakokay, soˈlinay a pidoyongan padadotocay a macowat.

Isaka 1963 miheca, maedeng 160 ko Misawacayay Tamdaw i Kirekistan, o ˈalomanay naitiniay i Towic, Okeran, Rowasiya cangra. Lalomaˈ nangra o ci Atewa Warte, itiniay i Towic cingra micada to inoˈ. Saka 1940 mamihecaan, mapalitay no Naci a yofayof i pitepengan a tapalitan ci Atewa, ikor no pina a miheca milaplapan no Kiwsanto no Rowasiya tayra i Sipoliya. Isaka 1961 miheca, oni madimadiay a salikaka malinahay tayni i Kante, oniya pala mingataay to niyaroˈ ako.

O roma madimadiay a fafahiyan salikaka o ci Ilisapic Fote, itiniay i Kante ko ˈaro, o mitataˈisay to rikoˈ, matanengay ko tayal ningra, mansa romaroma ising ato singsi maolahay a papisangaˈ cingranan to rikoˈ. Iraay ko cecay lafang ci Akesamay Sutaaliwa, o faˈinay ningra o matayalay i howing a tapang. Papisangaˈan ni Akesamay ci Ilisapic to rikoˈ, halo milicayay to adihayay a salicay, samaanay ko tatodong nokaˈorip no tamdaw, ato mapatay ko tamdaw samaamaanayto, misalalangian ni Ilisapic ko Fangcalay Cudad a pacaˈof cingranan. Ikor, malo ˈifowaay a mitosilay cingra.

Maedeng toya laliyadan, ci Nikola Kimpoays naitiniay i Moletowa malo kasakilac a kantok, maedeng 30 miheca a milisoˈ to kasakopang cingra. Cowa pilisoˈ aca to kasakopang ci Nikola, mitolicayho ato palilamayho to cudad no Fangcalay Cudad cingra. Minengnengan no tayring ko demademak ningra. Mankora, haen hananay ni Atewa Warte pasowal cingra: “Aka matalaw, ano miliclic ko tayring tisowanan i, nengneng han ko mata ningra, patodicek han pasowal to naitiraay i Prokelin a congpo kora cudad.”​—Matay 10:19.

Caho ka halafin, mitahidangan ci Nikola patayra i congpo no KGB. Sanay a somowal ci Nikola to mafekaday demak itiya, sowal sa: “Licayan no tayring no KGB kako, to naicowaay kora cudad, naitiraay i Prokelin hananay ako, fokil sato cingra a pasowal, papiliyas sanayto takowanan. Ikor cowato mitahidang takowanan.” Orira timoloay a salikaka minaˈonay ko  demak, padadotoc patenak to ngaˈayay lihaf i niyaroˈ ako. Tangasa isaka 1980 mamihecaan, matengilayto no paro no lomaˈ niyam ko kalimelaan a soˈlinay kimad, o saˈayaway pakatengilay i, o fafahi ako ci Mairampupu.

O niyaroˈ ni Mairampupu itiniay i Narin a Kilac no Kirekistan, isaka 1947 miheca ka faloan folad sakina cecay a malalitemoh kami, itiniay i lomaˈ no fafahiyan safa ako maˈaraw cingra. Tangsolay maolah kako cingranan, toya romiˈad mararamodayto kami.

Isaka 1981 miheca ka cecayan folad, matira toya nisowalan i salakat noni lalakaw, itini i pasu ko fafahi ako pakatengil to kasasowal no tao. Nikawrira, sakafanaˈaw cingra to adihayay, saka licay hananay koya fafahiyan to ngangan ato ciwsiw ningra, itini i 1980 a mamihecaan, makecengayho no mikowanay ko demak no Misawacayay Tamdaw. Minokayto ko fafahi ako tangsolay pasowal to manan ko mafekaday a demak.

Sanay pasowal ko fafahi takowanan: “Matengilay ako ko mikiriwiˈay a demak! O sowal no cecay fafahiyan, ano ikor cowa ko mamapatay ko tamdaw, ano o mariˈangayto a ˈaˈadopen o mamala lopayˈayto,” sanay. Tengil han ako hato ono wawa a tawcikel, saka haen han ako ko sowal: “Tala han no mita tayni mitadtad cingra, itiya sato kita misaˈosi.”

Ikor no tolo folad, irato ci Apuen a milisoˈ tamiyanan. Ikor iraay ko romaroma fafahiyan salikaka micerid a milisoˈ tamiyanan, saka itiyaay a mafanaˈ to ˈalomanay salakatay a Misawacayay Tamdaw, kalasaka dademakan nangra ko Naitira Kalahedawan no Lakoing Tangasa Kairaan no Lakoing * a cudad, pasifanaˈ tamiyanan to fangcalay a soˈlinay kimad ni Yihofa, ato araaw Ningra pakayni i tamdamdaw. Kawriraan, itini i Tokmok cecayay aca ko Lakoing a cudad, hato mitilidan niyam midoedo kora cudad to hano niyah a cudad.

Saˈayaway mananamay a soˈlinay kimad i, oya sapairasol i Satapangan 3:15. Oniya sapairasol o papakaynien i hongti no Misiya Kitakti a mapalaˈosi, o masaka limelaan a lihaf koni toha tatengilen no tamdamdaw! Mihaenay haw i, misetekay kami to falocoˈ a mitenak tonini lihaf. (Matay 24:14) O soˈlinay kimad no Fangcalay Cudad kalikiay a mifalic to kaˈorip niyam.

Kina cecayay, o salikaka i Tokmok mipohayay tamiyanan mirienang to pakaetimay. Kako ato fafahi  mahapinangay niyam to cowa ka lecad ko Misawacayay Tamdaw to kalo a tamdaw, samanen na mirienangan niyam a pakaetimay iti:yaho, to hatiniay malasangay ko lafang, kaacekanto ko sasowalan, ˈamelas ko waywayan. ˈArawhan, awaay ko epah ano pakaetim ko Misawacayay Tamdaw, hanaca masolimetay ko limasmas no demak.

Mirienangay kami to saˈopo no Tokmok, ano ngaˈay ko romiˈad i, itiniay i lalomaˈ no kilakilangan a masaˈopo. Mafanaˈay ko salikaka to mihokhokay a minengneng ko tayring tamiyanan, mansa iraay ko salikaka tomireng a milaoc. Ano o kasienawan i, itiniay i lomaˈ kami masaˈopo. Kina pinapinaay tayra i lomaˈ a miliclic ko tayring, mimaanay kamo sanay. Isaka 1982 miheca ka pitoan a romiˈad, ya micada kako ato fafahi to inoˈ i, misanaˈonaˈonay kami to demak. (Matay 10:16) Masasiwatikay ko papinapina salikaka micomod i kilakilangan a mirienang to taykay, mapolong kami romadiw to Hongti Kitakit a radiw, mitengil to kimad no painoˈay.

Isaka 1987 miheca, papilisoˈay ko salikaka to cecay mahemekay to soˈlinay kimad a tamdaw i Palikeci. Naitini i lomaˈ ako sepatay ko tatokian a mikalic to kasoling tangasa i Palikeci. To kina pinapina mitosil itira, mahelaay niyam ko ˈalomanay sapinanamaw to Fangcalay Cudad a tamdaw. Tada o ngaˈayay a toki koni a micowat to mitosilay a demak itira.

Kako ato fafahi ci Mairampupu to lipalipay tayraay i Palikeci, mitosil ato masaˈopo itira. ˈAdihayay ko saali no itiraay to cudad no Fangcalay Cudad, tano pawtian no kongaˈ a micoroˈ to cudad. Tosa a pawti a cudad ngaˈ maedengay ko saali nangra. Midakaw kami to kasoling tayra i Palikeci i, misawacayan niyam ko mikalicay tamdaw .

Isaka 1995 miheca, ikor no 8 miheca tona katayra niyam, mapatirengayto ko kasakopang i Palikeci. Tora pina a mihecaan, mikalic to kasoling naitini i Tokmok tahira i Palikeci adihayay ko mapalakay a payci. Itiya, cowa ka hakowa ko payci niyam, samaanan niyam misalof kora demak hani? Iraay ko cecay salikaka marariday pafeli to payci tamiyanan. Mahapinangay ni Yihofa to makalimay kami to mitosilay a demak, pakayni i tamiyanan a mifawah “to sasingaran no kakarayan.” (Malaki 3:10) Tada miakoˈiday kami to nika mafilo ni Yihofa ko masamaamaanay a demak!

Isaka 1992 miheca mapanilnilay kako malo malohemay malitengay, o saka cecay a Kirekis a tamdaw kako to malo malohemay malitengay. Itini i Tokmok a kasakopang, adihayay ko tayal ako. Tayraay kami picudadan malalengo to papina kaemangay to Fangcalay Cudad, ilalomaˈ nangra o cecay malo iingayto no fenpo nohatini, o tatosa malo mikiriwiˈay a misakafahay. O roma i, isaka 1990 a mamihecaan, tano Rowasiya sowal a cudad no Fangcalay Cudad, misikay to saˈopo, nikawrira, ˈalomanayto ko Kirekis tamdaw i kasakopang, hato mipadangay kako a micoyak to saˈopo, toha sakacipinangaw cangra to soˈlinay kimad.

To sapidimokosaw to paro no lomaˈ, tada matayalay kako ato fafahi, samanen ˈalomanay ko wawa niyam. ˈOrongan niyam cangra mitosil ato masaˈopo.  Maharatengayho ako tiya 12 ko mihecaan ni Kolsayra i, maolahayto cingra mitosil to ilalanay a tamdaw. Maolahay ko wawa ako miasip to sinael ato paiharatengen. Misaˈicelay kami ira ko ngaˈayay pifiyor to wawa, o wawa ato fofo niyam ˈifowaay mirienang to demak no kasakopang, 9 ko wawa 11 ko fofo, lalomaˈ nangra 16 ko midokoay ci Yihofaan, anca mitoor to wama wina nangra masaˈopo.

Isaka 1950 mamihecaan a misatapangay to mitosilay demak a salikaka, cowa ka harateng nangra to mamahaen ko nika cowat. Naitini isaka 1990 a mamihecaan misatapang, iraayto ko pasalat niyam a mitenak to ngaˈayay lihaf, hanaca ngaˈayayto malisopsop a masaˈopo.

Isaka 1991 mamihecaan, kako ato fafahi tayniay kami i Alamoto no Hacakestan mirienang to taykay, o sakina cecay niyam mirienang to ˈalomanay salikaka koni. Isaka 1993 miheca, iraay ko taykay i Kirekistan, itiraay i Ontociw no Spatak i Piskek. ˈAyaw no taykay cecayay lipay ko salikaka miasik tora ontociw. Mangaˈayay ko pinengneng no citodongay tora ontociw a tamdaw, teloc cowa ito papayci kami micaliw tora ontociw.

Isaka 1994 miheca, sakina cecay a masadak kono Kirekis sowal a cudad no Fangcalay Cudad, pisatapangan noka cowat noˈadingoan a demak. Anini, itiniay i Piskek a fenpo, iraay ko mihahongyakay tono Kirekis sowal a kapot. Isaka 1998 miheca, o Misawacayay Tamdaw ni Yihofa i Kirekis mihaydaanto no holic no kitakit. Padadotocay macakat ko mitosilay. Tahanini mataˈlifayto ko 5,000 tamdaw. Nohatini 83 ko kasakopang ato 25 kapot, mahawpay ko Kowaping, Padaka, Kirekis, Rowasiya, maikaway sowal no Rowasiya, Tureky, Wikhur, Ucpik a sowal. Soˈliˈlin cowa ka hecahecad ko lalengawan no salikaka, kawra makedecay a midoko ci Yihofaan. Hatini ko nika cowat no demak, edengan ci Yihofa ko papakafilo a midemak.

Ci Yihofa ko mifalicay to nokaˈorip ako. Itiniay i maomahay a paro no lomaˈ a lomahad kako, limaay aca miheca ko picudad, kawraan kalasaka dademakan ni Yihofa kako malo malohemay malitengay, pakafanaˈ to ikakaay ko picudadan a tamdaw, mafanaˈ to kalimelaan a soˈlinay kimad. O ci Yihofa ko pakafiloay to masamaamaanay a demak i tireng ako, toha ngangaˈay kako padadotoc madimadi to Kawas, misawacay to tamdaw a pasowal: “Mafilo no Kawas ko masamaamaanay a demak”​—Matay 19:26.