1-3. (1) Sasamaan ko demak ita ngaˈ madimadi to Kawas itini salikoray romiˈad? (2) Mikitini toniya lalakaw wa mananam ita ko manan?

MANGATAAYTO ko salikoray romiˈad, o tatiihay tamdaw mahecad “o lahad no talod,” padotoc a matongal. (ˈOlic 92:7) Cowato pidofdof ko ˈalomanay tamdaw to palinian no waywayan, cowa ka fahekaˈ kita tonini. Mahaen ko pakayraan i, samaan kita itini tatiihay a demakan ‘malo kaemangay,’ itini sapihapinang a inaneng ‘malo matoˈasay’ hani?​—1 Korinto 14:20.

² O caˈof itiniay i lalangian a sinael noni lalakaw, sanay ko sinael: ‘Milongocay ci Yihofaan i, cipinangay to maamaan.’ (Taneng 28:5) Sowal itini ‘cipinangay to maamaan,’ tatodong i milongocay ci Yihofaan a tamdaw cipinangay to samaan ko demak pakahemek to falocoˈ ni Yihofa. O Taneng 2:7, 9 paihekalay to mahecaday a harateng, somowalay ko sinael ci Yihofa, ‘padamaen Ningra ko moecelay ko falocoˈ a tamdaw, minaˈang to soˈlinay taneng,’ mihaen i ‘cipinangto cangra to moecelay demak, masadafdafay, moecelay, cipinangto polong a ngaˈayay demak.’

 ³ Ci Nowa, Taniil aci Yopu iraay ko mikitiniay i Kawas a taneng. (Icikil 14:14) Anini, o finawlan no Kawas iraay ko mahecaday a taneng. ‘Cipinangay kiso to sasamaan pakahemek to falocoˈ ni Yihofa han? Sapihaenaw to demak soˈliˈlin a mafanaˈ ci Yihofaan ngaˈ. Mikitini toni lalakaw mamananam ita (1) ci Nowa, Taniil aci Yopu samanay a mafanaˈ to Kawas, ato (2) mafanaˈ to Kawas iraay ko maanan a epoc nangra, (3) samaan kita mahecad cangranan palahad to tanoktokay pasoˈlin no falocoˈ.

4. Samaanay ci Nowa mafanaˈ to Kawas? Mafanaˈ to Kawas iraay ko maanan a epoc ningra?

⁴ Samaanay ci Nowa mafanaˈ to Kawas? Itini satapangan no likisi no tamdaw, o madimadiay a faˈinayan fafahiyan, samaanay mafanaˈ to Kawas hani? Mikitini i tolo pakayraan: Mihapinang to masangaˈay no Kawas a maamaan ato micawmaˈ to mangodoay to Kawas a tamdaw, milifet to epoc no midofdofay to Kawas. (Isaya 48:18) Ci Nowa pakayni i pihapinang to masangaˈay a maamaan, adihayay ko maˈaraway a wacay, paihekal to iraay ko Kawas a materek, hato mafanaˈay to masakenaay capeling no Kawas, mahaen “o midaˈocay a ˈicel ato nika o Kawas Cingra.” (Loma 1:20) Mihaen ko demak ni Nowa, palahaday to tanoktokay pasoˈlin a falocoˈ i Kawas.

5. Nai cowaay ci Nowa mafanaˈ to araaw no Kawas pakayni i tamdaw hani?

⁵ Loma 10:17 sanay: ‘Salakat tahatengil to lihaf ngaˈ mapaˈicel ko pasoˈlinay falocoˈ.’ Hatiraay, mikicowaay ci Nowa, ‘tahatengil’ to pakayniay ci Yihofaan a demak hani? Halatek mikitiniay i salawina ningra, tinakoen o wama ningra ci Lamik. (Nengnengen ko satapangan coka.) Ci Lamik, o pasoˈlinay to Kawas a tamdaw, hanaca tiya maˈorip cingra iraayho ci Atam. O roma iraayho ko fofo ni Nowa ci Mitusila ato fofo no fofo ci Yarit, 366 ko mihecaan ni Nowa patay sanayho ci Yarit. * (Luka 3:36, 37) Halatek mikitiniay ci Nowa i lalitengan ato fafahi nangra, minanam to samanay masadak ko tamdaw, cipinangayho to tokel no Kawas mamalenak ko moecelay tamdaw, miledef toniya cikiw. O roma, mafanaˈay ci Nowa misafelitay a demak i Itin, o teloc no misafelitay malifaay ni Nowa. (Satapangan 1:28; 3:16-19, 24) Oniya matengilay ni Nowa a demak mitemeray to falocoˈ ningra, misaˈosi ko falocoˈ ningra a mihodop ci Yihofaan.​—Satapangan 6:9.

6, 7. Misamaanay hano paˈicel ko tokel to pasoˈlinay falocoˈ ni Nowa?

⁶ O tokel ngaˈayay paˈicel to pasoˈlinay falocoˈ. Samaanay ko tatodong? Tinakoen ci Nowa, tatodong no ngangan ningra, ‘paselaˈ ato mihinom’ sanay, iraay ko hatokel nonini. Itini sapatemer ni Yihofa, somowalay ci Lamik toniya sowal: “O niˈkakan [ni Yihofa] ko sera saka maroray kita a matayal, oninito a wawa [ci Nowa] ko sakahinom no roray ita,” sanay. (Satapangan 5:29) Mafanaˈ ci Nowa tonini, matomesay ko tokel i Kawas, paˈicelay to pasoˈlinay falocoˈ. Hanaca mahecaday cingra to lalitengan ci Apil aci Inokan, pasoˈlin to paˈayawan no Kawas a “teloc” wa misetiˈ a mipesiˈ to fongoh no ˈoner.​—Satapangan 3:15.

⁷ Soˈlin cowa ka cipinang ci Nowa to Satapangan 3:15 a sapairasol, kawra mahapinangay ningra to iraay ko sakalidong a hatokel. O roma, o milasilan ni Inok a lihaf, mahecaday toniya sapairasol, paˈayaway cingra to sasawkiten no Kawas ko tatiihay tamdaw. (Yuta 14, 15) O lihaf ni Inok wa tahira to Armakiton ngaˈ malaˈosi maemin, oniya lihaf paˈicelay to pasoˈlin no falocoˈ ni Nowa, ihekalayto ko hatokel.

8. Soˈlin a mafanaˈ to Kawas iraay ko maanan a epoc ni Nowa?

⁸ Soˈliˈlin a mafanaˈ to Kawas iraay ko maanan haepoc ni Nowa? Samanen soˈlinay ci Nowa mafanaˈ to Kawas mansa ira ko pasoˈlin no falocoˈ ato taneng, midipotay koni cingranan, mangalef madipot i noˈadingoan. Samanen “mikapotay to Kawas” ci Nowa, caay picawmaˈ to cowa kangodo to Kawas a tamdaw. O roma, mala tamdaway a tatiihay coyoh  saka dademakay to ˈicel milipalaw to cangoˈotay ko pasoˈlin a tamdaw, halatek kala samiyanan no tamdaw a midoko, kawra cowa ka malipalaw ci Nowa. (Satapangan 6:1-4, 9) Mafanaˈay ci Nowa saali ni Yihofa, malenak ko teloteloc no tamdaw, maledef i cikiw. (Satapangan 1:27, 28) Mihaenay, cipinangay cingra mararamod ko fafahiyan ato malatamdaway a coyoh, cowa ko matatodongay, mikitini mihofocan nangra a tataˈang teloteloc, ngaˈayay mahapinang to misafelitay to safalod no Kawas. Ikor, pasowalan ni Yihofa ci Nowa to mamitefad Cingra to lenlen, palaˈafo to tatiihay tamdaw. Pasoˈlinay ci Nowa to mamatoor ko sowal no Kawas, hato misangaˈay to tamina malidong ko paro no lomaˈ.​—Hipray 11:7.

9, 10. Samaan kita mahecad ci Nowaan palahad to tanoktokay a pasoˈlin no falocoˈ?

⁹ Samaan kita mahecad ci Nowaan palahad to tanoktokay a pasoˈlin no falocoˈ? Malalok kita a micekiw to sowal no Kawas, naˈangen i falocoˈ ko mananamay, micadaho to pisalof ato sakayat no sifanaˈ. (1 Pitiro 1:13-15) Ira ko pasoˈlinay falocoˈ ato taneng ita, ecato ka lipalaw no halaka ni Satan, ngaˈay madipot ko niyah eca ka denga no harateng no hekal. (2 Korinto 2:11) Ano madenga no tatiihay harateng ko tamdaw, wa maolah to mariˈangay ato malafoay a demak, wa samacay saan mirenec to coos no tireng. (1 Yohani 2:15, 16) O harateng no hekal palonayay to noˈadingoan no tamdaw, caka pakahapinang to mangataayto ko taˈangayay romiˈad no Kawas. Na pasowalay ci Yis, o romiˈad ita iraay ko kahecadan to romiˈad ni Nowa, kawra, limoˈot ni Yis to nisawawaan, cowa ko mariˈangay ato malafoay a demak, ao aka a pisilikor to noˈadingoan a demak.​—ˈOsien ko Matay 24:36-39.

¹⁰ Licayen ko niyah: “O kaˈorip ako paihekalay to soˈlinay kako mafanaˈ ci Yihofa han? Maocoray no pasoˈlinay falocoˈ kako, cowa ko pidoedo aca to moecelay palinian no Kawas a maˈorip, o mamilasilayho to palinian no Kawas i tamdaw han?” Nanay o pakayraan ita maˈorip paihekalay to soˈlinay ko niyah mikapot to Kawas.

11. (1) Maolah to Kawas koya kaemangay a Taniil, samanen micadaay to masamanay a sapasifanaˈ? (2) O maanan a pinangan ni Taniil ko kaolahan iso a minanam?

¹¹ Samaanay ci Taniil mafanaˈ to Kawas? Ngaˈayay ko pasifanaˈ no wama wina ci Taniilan, minanam a maolah ci Yihofaan ato kimad Ningra, hanaca hakelong no ˈorip ni Taniil, cowa ka lahedaw koniya olah. Sowal no Fangcalay Cudad matoˈasto ci Taniil, malalokayho a micekiw to kimad no milolodan a Fangcalay Cudad. (Taniil 9:1, 2) Tangongolay ko kafanaˈ ni Taniil to Kawas, ihekalay a mafanaˈ to samanay ko picada no Kawas to Israil tamdaw. Itini Taniil 9:3-19 matiliday ko naifalocoˈay a pasasiyoray a satolon ni Taniil, tora lalakaw mahapinangay to soˈlinay cingra a mafanaˈ ci Yihofaan. Ngaˈayay palaken ita ko toki a miˈosi ato misimsim toniya maˈoningay, licayen ko niyah: “O masamaanay a tamdaw ci Taniil hani?”

12-14. (1) Iraay ko nai Kawasay a taneng ni Taniil, hano mihaen ko sowal hani? (2) Timoloay ci Taniil madimadi to Kawas, samanay ko teloc?

¹² Soˈliˈlin a mafanaˈ to Kawas iraay ko maanan haepoc ni Taniil? Pakayni i madimadiay a Yutaya, maˈorip itini i mararaway pidoyongan a Papilon o taˈangayay sapalifet. Kawra, pasowalay ci Yihofa to Yutaya tamdaw: “Pitolon kamo itira to saki pilaplapan Ako i tamowanan a niyaroˈ a milongoc i Takowanan to sakalemed,” sanay. (Yirimiya 29:7) Kawra, misaaliay ci Yihofa to finawlan, misacecay a maolah Cingranan. (Kasadakan 34:14) Mihaenay, samanay ci Taniil a mitoor toniya tosa saali hani? Mikitiniay i Kawas a taneng padamaay cingranan, wa salakat cingra midoedo ci Yihofaan, dotoc midoedo to mirikecay. Ikor no pina soˈot miheca, pasifanaˈan ni Yis ko nisawawaan to mahecaday safalod.​—Luka 20:25.

¹³ Na misiˈayaway ci Taniil to saconged, oniya saconged i lalomaˈ no 30 romiˈad, hamaan pasayra i roma kawas anca tamdaw a mitolon. (ˈOsien ko Taniil 6:7-10.) Na ngangaˈay ci Taniil misawad to nanaman mitolon to cecay liyad, halatek mihaen ko sowal: “30 aca romiˈad!” Hanaca, milimek  cingra a mitolon, hamaan paˈarawen ko tao. Kawraan, cowa pakayni toniya saconged a sawad, saan ci Taniil a midofdof to salimoˈot no Kawas. Mitolon cingra romiˈamiˈad, o kafanaˈan no ˈalomanay, soˈlin ira ko katalawan no ˈorip, kawra kamayanay cingra midemak to matatodongay demak, hoeca ko misawaday cingra i pihakelongan saan ko pinengneng no tao.

¹⁴ Ci Taniil paihekal to timolo a madimadi to Kawas, mansa midemak ci Yihofa to kafahekaˈan a demak milidong cingranan. Pairaay koni to maanan ngaˈayay minaroˈan hani? Polong no Mitiya-Pirsiya Kitakit mafanaˈay to ci Yihofa ko milidongay ci Taniilan.​—Taniil 6:25-27.

15. Samaan kita mahecad ci Taniilan palahad to tanoktokay a pasoˈlin no falocoˈ?

¹⁵ Samaan kita mahecad ci Taniilan palahad to tanoktokay a pasoˈlin no falocoˈ? Cowa ko piˈosi aca ita to Fangcalay Cudad, wa ‘cipinangho’ to lalakaw, ngaˈ palahad to tanoktokay pasoˈlinay falocoˈ. (Matay 13:23) Saka cipinangaw kita to safalod no sinael ato pinengneng ni Yihofa, malalok a midotim to miˈosian a lalakaw. Miceridho kita mikifalocoˈ a mitolon, mangalef ano tahasiˈayaw to sapalifet anca pasangaray a pakayraan tongalen ko pihaen to demak. Ira ko pasoˈlin no falocoˈ ita a milongoc ci Yihofaan pafeli to taneng ato ˈicel, cowa ko mamaˈidi Cingra a pafeli kitanan.​—Yakop 1:5.

16, 17. Samanay ci Yopu mafanaˈ to Kawas?

¹⁶ Samaanay ci Yopu mafanaˈ to Kawas? Cowa ko Israil tamdaw ci Yopu, cowa ko ingataay a salawina ni Apraham, Isak, Yakop cingra, pasifanaˈan ni Yihofa cangra Cingranan, pasifanaˈho cangranan to araaw Ningra i tamdaw. Caay ka fanaˈ kita to samanay ci Yopu mafanaˈ to demak ni Yihofa, kawra adihayay ko mananamay ningra a soˈlinay kimad. (Yopu 23:12) Na pasowalay cingra ci Yihofaan: “Iˈayaw matengilto ako ko sowal no tao to pakayniay i Tisowanan [a demak.]” (Yopu 42:5) O roma, milengo ci Yopu to demak ni Yihofa i, matatodongay maemin sanay ci Yihofa.​—Yopu 42:7, 8.

¹⁷ Mikitini ci Yopu i masangaˈay a maamaan a mafanaˈ to capeling no Kawas. (Yopu 12:7-9, 13) Na misaka dademakan ni Ilihu aci Yihofa ko masangaˈay a maamaan patalipaˈelal ci Yopuan, palalinien to kasapaan a Kawas mimi:ngay ko tamdaw. (Yopu 37:14; 38:1-4) Matemeray no sowal ni Yihofa ci Yopu, sapoeneray ko falocoˈ a somowal: “Mafanaˈayto kako to nika maedeng Kiso a midemak to maamaan, maedeng Kiso a milaheci to nisahalakaan Iso a maemin. Orasaka . . . aroˈ sato kako i sera ato i ˈafoˈafoan a mifalic to falocoˈ,” han ningra.​—Yopu 42:2, 6.

18, 19. Hano mafanaˈ kita to soˈlinay ci Yopu mafanaˈ to Kawas hani?

 ¹⁸ Soˈliˈlin a mafanaˈ to Kawas iraay ko maanan haepoc ni Yopu? Cipinangay ci Yopu to harateng ato safalod no Kawas, soˈlinay cingra mafanaˈ ci Yihofaan, mitooray to mananamay a sifanaˈ a dademak. Tinakoen, mafanaˈay ci Yopu ano maolahay kako to Kawas saan ko sowal no tamdaw, o sasiniˈada a micada to finacadan. (Yopu 6:14) Mihaenay cowa pisatakaraw cingra, ciharatengay to tao, ato damsayay a padama to manikaway a tamdaw, mahaen ko sowal ningra: “Oya misangaˈay takowanan a Kawas i, caay ko misangaˈay cingraan saw? O misangaˈay tamiyanan i, caay koyananto a Kawas saw?” (Yopu 31:13-22) Mahapinangay, soˈlin adihayay ko hafay ni Yopu, kawra cowa pisatakaraw ko niyah a misakahemaw to tao. O waywayan ni Yopu, cowa ka hecad to romaroma cihafayay a tamdaw.

¹⁹ Saˈosiay ko falocoˈ ni Yopu eca ka pisakawas to maamaan a demak, mahaopay ko mararaway a pihakelongan ato micangacang to sakacihafay a patosokan, mafanaˈay cingra mihaen to demak mahecaday, “o mihakenoay kako to isatakaraway a Kawas.” (ˈOsien ko Yopu 31:24-28.) O roma, o fangcalay ko raramod no faˈinayan ato fafahiyan sanay ko pinengneng ningra, maherekto kako a miketon to falocoˈ to sakaecaaw ka imah a minengneng to kaying. (Yopu 31:1) Haharatengen i, mihaiyay ko Kawas adihay ko fafahi no tamdaw itiya, mihaenay ano ciharateng ci Yopu to saka tosa fafahi i, cowa ko mararaway. * Kawraan, mitooran ni Yopu kono mararamoday a limasmas no Kawas i Itin, cecay aca ko fafahi. (Satapangan 2:18, 24) Ikor no 1,600 miheca, pasifanaˈan ni Yis Kristo ko nisawawaan midofdof to safalod ato palinian no mararamoday.​—Matay 5:28; 19:4, 5. 

20. Soˈliˈlin a mafanaˈ kita ci Yihofaan ato palinian Ningra, wa mipiliˈ to samaanay a widang ato lawla?

²⁰ Samaan kita mahecad ci Yopuan palahad to tanoktokay a pasoˈlin no falocoˈ? Mahecaday ko pakayraan, soˈliˈlin a mafanaˈ ci Yihofaan, itini kaˈorip tooren ko pinengneng no Kawas a dademak. Tinakoen, pasowalay ci Tafiti, ˈintehay ci Yihofa to ‘maolahay to mariˈangay a tamdaw,’ patalipaˈelalay ko Fangcalay Cudad kitanan hamaan micawmaˈ to “misakaniway a tamdaw.” (ˈOsien ko ˈOlic 11:5; 26:4.) Mikitini kiso i sinael no ˈOlic, mananamay ko manan a harateng no Kawas hani? Mafanaˈ to harateng no Kawas, wa ngaˈay kiso pafafidaˈ to o manan ko kalimelaan a demak han? Oniya sinael samaan padama tisowanan misolap to wangcan, mipiliˈ to masamaanay a widang ato lawla hani? Miharateng toniya salicay wa ngaˈay mafanaˈ to hakowaay ko tangongol no kafanaˈ no niyah ci Yihofaan. Ano sapitooraw kita to palinian no Kawas maˈorip toniya masasifoday ato ciraraway a hekal, pahatatanamen ko ‘sakacipinang a ˈicel’ no niyah. Mahaen cowa ko pafafidaˈ aca to ngaˈayay tatiihay, wa mafanaˈho to sasamaan ko demak ngaˈ iraay ko taneng.​—Hipray 5:14; Ifiso 5:15.

21. Samaan ko demak ita ngaˈ “cipinang” to sapakahemek to falocoˈ ni Yihofa a pakayraan?

²¹ Ci Nowa, Taniil, Yopu misarocod to falocoˈ a milongoc ci Yihofaan, pasifanaˈan ni Yihofa koniya madimadiay a sikawdan mafanaˈ Cingranan, halo padama cangranan “cipinangan” to samaan ko demak ngaˈay pakahemek to falocoˈ Ningra. Mihaenay, minengneng ko Kawas ci Nowaan, Taniil aci Yopuan, o moecelay tamdaw, patirengay to taˈarawan no mita, lipahakay ciepocay ko kaˈorip nangra. (ˈOlic 1:1-3) Licayen ita ko niyah: “Mahecaday kako ci Nowaan, Taniilan, aci Yopuan a mafanaˈ ci Yihofaan han?” Anini, taengad a taengad a matedi ko soˈlinay kimad, wa ngaˈay kita ikaka cangranan ko kafanaˈ ci Yihofaan. (Taneng 4:18) Mihaenay, wa padotoc kita mikadkad to sowal no Kawas, misimsim a midotim to sinael, ato tolonen ko Kawas pafeli to fangcalay saocor kitanan, mihaen i, wa ngaˈay ko kalalaˈed ita to kakarayan a Wama, itini toniya cowa kangodo to Kawas a hekal ngaˈay pafafidaˈ to demak ira ko taneng a dademak.​—Taneng 2:4-7.