1, 2. Mahapinangay no cecay faˈinayan salikaka to malawaay no niyah ko maanan? Ikor to samaanay ko demak ningra?

CI LOPOTE 15 ko mihecaan micada to inoˈ, kawra cowa pisakareteng to soˈlinay kimad. Sowal ningra: “Soˈlin cowa ka raraw kako, kawra o midokoay a demak o nanaman aca. Mirienangay kako to maemin a saˈopo, cecay miheca kinapinaay a pangangan to padamaay misakafahay, hato noˈadingoan a tamdaw nengnengen, ˈarawhan malawaay ko kalimelaan a demak.”

² Ikor no ciraramod ci Lopote, mahapinangay ko dangoc no niyah. Nolatekay misalama cingra ato fafahi pakayniay i Fangcalay Cudad a malalicay. O noˈadingoan a tamdaw ko fafahi ningra, saheto o matatodongay ko caˈof ningra, ˈarawhan ci Lopote cowa kafanaˈ pacaˈof, mangodoay cingra. Sanay cingra: “Harateng ako awaay ko kafanaˈan no niyah, pasowalen ako ko niyah: ‘Ano sapikayataw kako i noˈadingoan, mafalic ngaˈ ngaˈay.’” Matooray ni Lopote a midemak, sowal ningra: “Pacalepay kako micekiw to Fangcalay Cudad, palidlid han palaliting ko sifanaˈ no Fangcalay Cudad. Cowa ko cipinang aca to soˈlinay kimad, kalimelaan i patirengay to ngaˈayay kala widang ako aci Yihofa.”

3. (1) Mikitini milifetan ni Lopote mananamay ita ko maanan? (2) Wa milengo kita to maanan a tolo salicay?

 ³ Mikitini milifetan ni Lopote mananamay ita, iraay ko sifanaˈ ita to Fangcalay Cudad halatek, hanaca miceriday masaˈopo ato mitosil, mihaen to demak o noˈadingoanto a tamdaw sai awaay ko pinang. Halatek misaˈicelay to kita i noˈadingoan, kawra ano hapinangen ita ko niyah i, iraayho ko sasalofen. (Filipi 3:16) Pakayni sapadotocaw macakat no niyah, wa sinanoten ita ko tolo salicay toniya lalakaw: (1) Samaan mihapinang to noˈadingoan a pakayraan no niyah? (2) Samaan matongal ko kacakat i noˈadingoan? (3) Ira ko noˈadingoan harateng i, wa ira ko maanan a epoc i kaˈorip ita?

4. O cima ko mamitengil a midofdof to Ifiso 4:23, 24 a limoˈot hani?

⁴ Misatapang kita mihodop to Kawas i, maharekayto mifalic to kaˈorip, hanaca maharek micada to inoˈ padotocay a misalof to niyah. Sowal no Fangcalay Cudad: ‘Safaelohen ko kaikoray no harateng namo a ˈicel.’ (Ifiso 4:23, 24) Itini Kirisiya sowal, mitoroˈan no ‘safaelohen’ o padotocay a demak. Mihaenay, oha padotoc misafaeloh to kaikoray no harateng a ˈicel. Cowa ko malefotay kita, wa padotoc a macakat, soˈlin halafinayto midoko ci Yihofaan a Krisciyang, wa misaˈicel a midipot to ngaˈayay kalalaˈed ci Yihofaan.​—Filipi 3:12, 13.

5. O manan a salicay wa ngaˈay padama kitaanan mihapinang to pakayraan no niyah i noˈadingoan hani?

⁵ Pakayni saka tanoktokaw i noˈadingoan, kifalocoˈen a mihapinang ko niyah. Ano matoˈasayto, kaemangayto, ngaˈay licayen ko niyah: “Matongalay ko noˈadingoan a harateng ako han? O pinangan ako matongalay ko kahecad ci Yisan han? Itini i saˈopo o waywayan ako paihekalay to noˈadingoan a tamdaw kako han? Mikitini i sasowalen ako, paihekalay to o manan ko misakaretengan no niyah hani? O nanaman ako a micekiw, caˈedong, ato picada to sarikec paihekalay to masamaanay tamdaw kako aki? Misiˈayaw to sakayhid wa samaan ko demak ako? O matenesay a Krisciyang kako han?” (Ifiso 4:13) Haratengen koniya salicay papadama kitanan mihapinang to hakowaay ko kacakat i noˈadingoan no niyah.

6. Iraayho ko manan a pakayraan, ngaˈay padama kitaanan mihapinang to noˈadingoan no niyah hani?

⁶ Nolatekay, misaaliay kita to sadama no tao, ngaˈ cipinang to pakayraan no niyah i noˈadingoan. Paihekalay ko tarokos ci Pawlo, midoedoay to tireng a tamdaw, coka hapinang to kapiliˈan no Kawas ko demak no niyah. Nikawrira, cowa ka hecad ko noˈadingoan a tamdaw, tano harateng no Kawas ko pinengneng nangra to demak, mafanaˈay to o manan a waywayan ko midoedoay to tireng. (1 Korinto 2:14-16; 3:1-3) O malohemay malitengay iraay ko harateng ni Kristo, kahenayay mahapinang to midoedoay to tireng ko harateng no salikaka. Ano mihadak to sarikec ko malohemay malitengay kitaanan, wa micada kita a misalof han? Ano mihaen ko demak ita i, paihekalay to makalimay matongal ko kacakat i noˈadingoan no niyah.​—Patnakay 7:5, 9.

7. Makalim kita malo noˈadingoan ko harateng a tamdaw, o kaira aca no sifanaˈ to Fangcalay Cudad, hano cangoˈotayho hani?

⁷ Makalim kita malo noˈadingoan ko harateng a tamdaw, o kaira aca no sifanaˈ to Fangcalay Cudad cangoˈotayho. O hongti ci Solomon ihekalay a mafanaˈ ci Yihofaan, o sowal ningra masalalomaˈay no Fangcalay Cudad, kawra palidlid sanay malahedaw ko noˈadingoan a harateng ningra, telocto i, cowato kamadimadi ci Yihofaan. (1 Hongti 4:29, 30; 11:4-6) Mihaenay, cowa ko kaira aca no sifanaˈ to Fangcalay Cudad, wa samaanho ko hademak hani? Wa padotoc a macakat i noˈadingoan. (Kolosay 2:6, 7) Wa samaan ko hademak ita hani?

8, 9. (1) Sasamaan ko demak ita ngaˈ matongal macakat i noˈadingoan hani? (2) O manan ko patosokan ita a micekiw ato midotim hani? (Nengnengen ko satapangan coka.)

⁸ Pakalalokay ci Pawlo to saka 1 hahekalan a  Krisciyang, ‘macakat pasayra i malohemay a patosokan.’ (Hipray 6:1) Hatiraay i, wa samaan kita misaka dademak toniya sowal ni Pawlo anini hani? O cecay kalimelaan a pakayraan i micekiw to “Ka Matelek Kamo i Olah no Kawas.” Ano maharek a miˈosi toni cudad, wa mahapinang iso to sasamaan misaka dademak i kaˈorip to safalod no Fangcalay Cudad. Ano maharekayto micekiw toni cudad, ngaˈayay mikilim to roma a cudad paˈicel to pasoˈlinay falocoˈ iso. (Kolosay 1:23) Misimsimay kiso to minanaman a soˈlinay kimad, halo picangacang to sadama ni Yihofa kisowanan a misaka dademak han?

⁹ Ano micekiw ato midotim kita i, haratengen o patosokan ita o palahad to midofdofay to Kawas a falocoˈ, pakahemek Cingranan. (ˈOlic 40:8; 119:97) O roma, micekiw wa ngaˈay padama kitanan miconged to mamipalak to saka tanoktok i noˈadingoan a demak.​—Titus 2:11, 12.

10. Samaan ko demak no kaemangay tamdaw wa ngaˈay matongal a matenes i noˈadingoan hani?

¹⁰ Ano o kaemangay a tamdaw kiso, iraay ko patosokan iso i noˈadingoan han? O cecay matayalay i Pitil a salikaka mirienang to kasakilac taykay i, ˈayaw no misatapang ko kamok milicayay to mamicada to inoˈ a kaemangay, iraay ko patosokan i noˈadingoan hokira. Sowal no ˈalomanay, maherekayto cangra miharateng to sasamaan a matayal i ci Yihofaan, mirienang to misakafahay anca tayra i misaaliay to mitosilay a kilac. Kawrira, mafokilay pacaˈof ko roma kaemangay, alatek hamaan patireng to patosokan i noˈadingoan sanay ko harateng nangra. Kaemangay tamdaw, ngangaˈay licayen iso ko niyah: “Mirienang kako to noˈadingoan a demak, samanen o saali no wama wina ko sapihaen ako han? Misaˈicelay kako mitongal to kalalaˈed ci Yihofaan, malo widang Ningra hokira?” Soˈlinay haw i, cowa ko kaemangay aca a tamdaw, kita maemin o papatireng to noˈadingoan a patosokan, mihaen ko demak wa padama kitanan matenes i noˈadingoan.​—Patnakay 12:1, 13.

11. (1) Ano mamalo noˈadingoan a tamdaw i, wa samaan ko hademak ita? (2) Wa ngaˈay kita minanam to taˈarawan no nima?

¹¹ Ano mahapinang ita to ngangaˈay a macakat ko niyah, tangsol a midemak. Kalimelaan ko pihaen to demak, samanen milingatay to ˈorip ita koni. (Loma 8:6-8) Nikawrira, matenes i noˈadingoan cowa ko misaaliay to mamalefot, cowa pisaali ci Yihofa to mamalefot kita, oha papakayni i fangcalay saocor padama kitaanan a macakat. Nawhani, wa misaˈicel kita ngaˈ ngaˈay. Isaˈayaw, o Kasacefang no Mikayatay a Malohemay Malitengay i Congpo salikaka ci Yohani Paer, milengo to Luka 13:24 i sanay: “Caka laˈosi ko ˈalomanay, samanen cowa patanoktok to noˈadingoan cangra.” Nanamen ita ci Yakop, fanekfekay cingra malalefo to coyoh, tahira i palemed no coyoh cingranan. (Satapangan 32:26-28) Micekiw kita to Fangcalay Cudad mamisadak to ˈicel. Soˈlin o kahemekan a demak koni, kawra miˈosi to Fangcalay Cudad hamaan haenen sano tawcikel ato milawlaay a miˈosi. Micekiw kita to Fangcalay Cudad, o mamikarkar to sano ˈodoay a kimad, ho ngaˈay malo noˈadingoan a tamdaw ko niyah.

12, 13. (1) O manan ko papadama kitaanan misaka dademak to Loma 15:5 han? (2) Mikitini kita i tinakoan ato sapalimoˈot ni Pitiro wa mananam ko maanan? (3) Samaan ko demak ita ngaˈay a matongal ko katenes i noˈadingoan? (Nengnengen ko sapatongal lalakaw “ O Sakacakat i Noˈadingoan a Pakayraan”)

¹² Misaˈicel kita palahad to noˈadingoan a capeling, wa padamaen ni Yihofa kita mifalic to harateng, saka dademaken Ningra ko fangcalay saocor, ho malingad ko kahecad no harateng ita ci Kristoan. (Loma 15:5) Cowa ka hatini aca, wa padama ko fangcalay saocor kitaanan mifaˈenot to mararaway a harateng, palahad to kahemekan no Kawas a capeling. (Kalatiya 5:16, 22, 23) Soˈlin ano marariday kita miharateng to pakadafongay ato lawlaay a demak i, aka a pisawad. Padotocen micangacang ci Yihofa pafeli to fangcalay saocor kitanan, papadama Ningra kita misalof to harateng,  ho misamacay kita to moecelay a demak. (Luka 11:13) Haratengen ko tinakoan ni Pitiro, latekay cangoˈotay ko noˈadingoan a harateng ningra. (Matay 16:22, 23; Luka 22:34, 54-62; Kalatiya 2:11-14) Kawra cowa pisawad cingra. Itini sapadama ni Yihofa, palidlid sanay ci Pitiro palahad to harateng ni Kristo. Mahecad kita ci Pitiroan misaˈicel mifalic to harateng, wa ngaˈay to malo noˈadingoan a tamdaw.

¹³ Ikorto, milengoay ci Pitiro to hacapeling no Krisciyang. (ˈOsien ko 2 Pitiro 1:5-8.) ‘Misarocod to ˈicel’ kita palahad toniya capeling, mahaen o pakaˈmetay a falocoˈ, mihadidiay, kasasiolah to salikaka, wa ngaˈay padotoc macakat i noˈadingoan. Ngaˈay licayen ita ko niyah to romiˈamiˈad: “Wa misaˈicel kako anini paihekal to maanan a capeling, ho matongal ko katenes no niyah i noˈadingoan han?”

14. Ano iraay ko noˈadingoan a harateng i, wa misamaan ko hademak no mita hani?

¹⁴ Ano iraay ko harateng ni Kristo ita, wa paihekal i sasowalan ato waywayan, hanaca itini i katayalan ato picudadan mamitodong ci Kristoan, ano misaˈosi to romiˈamiˈad i, wa misimsim to samanay ko pinengneng ni Yis, pakayni i misaˈosian a paihekal to misaˈicelay ko niyah a mikotod to taˈarawan ni Yis. O noˈadingoan a tamdaw, cowa sapipalakan to kalalaˈed no niyah ato kakarayan a Wama, ira ko harateng ni Kristo wa padama kitanan miconged to sakayhid. ˈAyaw no misaˈosi kita licayen ko niyah: “O maanan a safalod no Fangcalay Cudad ko papadama takowanan matatodong ko misaˈosian? Ano misiˈayaw ci Yis to hatiniay a pakayraan, wa samaan ko pisaˈosi ningra? Samaan ko demak ngaˈay pakahemek to falocoˈ ni Yihofa?” Sapalahadaw toniya pinangan a miharateng, dotoc i, nengnengen ita ko romaroma a pakayraan, halo sinanoten ko safalod no Fangcalay Cudad, misamaan a padama kitaanan citaneng ko misaˈosian.

15, 16. Ira ko harateng ni Kristo wa samaan padama kitanan (1) i mipiliˈ to raramod? (2) i mipiliˈ to widang?

¹⁵ Mipiliˈ to raramod: Milingatay a safalod itiniay i 2 Korinto 6:14, 15. (ˈOsien.) Mahapinang ita i sowal ni Pawlo, noˈadingoan a tamdaw ato midoedoay to tireng a tamdaw, cowa ko rarihaday a malacafay. Samaan kiso misaka dademak toniya safalod itini i pipiliˈ to raramod hani?

¹⁶ Mipiliˈ to widang: Sinanoten ko 1 Korinto 15:33. (ˈOsien.) O mangodoay to Kawas a tamdaw, cowa ko mamicerid micawmaˈ to mamifasaw to pasoˈlinay falocoˈ no niyah a tamdaw. Sasamaan kita misaka dademak toniya safalod hani? Licayen ko niyah to pina salicay, tinakoen: “Misaka dademak to sapicawmaˈ malawidang a wangcan i, patalipaˈelalay koniya sinael takowanan to maanan hani? O safalod no sinael samanay padama takowanan, ano kalacafay to kafahalan a tamdaw itini i wangcan a misalama, wa ngaˈay han?”

17-19. Ira ko noˈadingoan a harateng wa samaan padama kitanan i (1) miliyas to mamipalak to tanoktok noˈadingoan a demak? (2) patireng to patosokan noˈadingoan? (3) misaysay to lacongis?

¹⁷ Mamipalak to tanoktok noˈadingoan a demak: Mihadakay ci Pawlo to sapirikec i Krisciyang. (ˈOsien ko Hipray 6:1.) Itini i sinael masowalay  ningra fafalahen ko ‘saka patay a waywayan,’ o manan ko pitoroˈan hani? O mamicongedaw ita macakat i noˈadingoan a maamaan a demak kora. Cipinang toniya safalod wa padama kitanan pacaˈof to malifaay a salicay i kaˈorip, tinakoen: “Mirienang toniya demak wa mikayhid takowanan a midoedo to tireng han? Wa ngaˈay kako mirienang toni misasingdiay a halaka han? Hano cowa ka ngaˈay kako mirienang to micoliay to mikowan no sifo a demak?”

¹⁸ Patosokan noˈadingoan: ‘O pasifanaˈ i lotok’ ihekalay ci Yis mitadtad to papatirengen no tamdaw a patosokan. (Matay 6:33) Noˈadingoan a tamdaw wa isalakat micangacang to Hongti Kitakit no Kawas. Paifalocoˈen ita koniya safalod, wa ngaˈay to pacaˈof to ilaenoay a salicay: “Wa micangacang kako to takaraway picudadan han? Wa cadaen ako koniya tayal han?”

¹⁹ Mifekad ko lacongis: Mihadakan ni Pawlo a limoˈot i kasakopang no Loma, wa samaan padama kitaanan misaysay to lacongis hani? (Loma 12:18) Malo Krisciyangay, ka “pisaˈicel kamo to sakararihaday namo ato tamdamdaw.” Ano mifekad ko lacongis i, wa samaan ko demak ita hani? Wa pasangar kita a misodod han? Anca mafanaˈay ko ˈalomanay to “pararihadayay a tamdaw” kita han?​—Yakop 3:18.

20. Misamaanay hano sapisaˈicelaw kiso macakat i noˈadingoan?

²⁰ Mikitini lalakaw mahapinangay ita, ano misimsim to safalod no Fangcalay Cudad wa padama kitaanan matatodong ko misaˈosian, ngaˈ paihekalay to o noˈadingoan a tamdaw kita. Ira ko noˈadingoan a harateng ita, matongal ko lipahak nokaˈorip, matongal ko karenec no falocoˈ. Masowalay i satapangan no lalakaw ci Lopote, sanay ko sowal: “Ikor no mapatireng ako ko soˈlinay kalawidang ci Yihofaan i, malo faˈinay malo wama matongalay ko kangaˈay ako, tada marenecay ko falocoˈ ako.” Mahecad kita cingranan, misaˈicel macakat i noˈadingoan, wa milifok to adihayay a sapalemed. Malo noˈadingoan a tamdaw kita, wa matongal ko lipahak anini, noikor wa milifok to “soˈlinay a ˈorip”.​—1 Timoti 6:19.