1, 2. (1) Pakayni noˈadingoan a harateng samanay ko pinengneng no ˈalomanay tamdaw? (2) Oniya lalakaw wa milengo to manan a tolo a salicay?

O CECAY Kanataay fafahiyan salikaka, sanay ko sowal: “Malo noˈadingoan tamdaw matongalay ko hemek ako, hanaca noˈadingoan a harateng padamaay takowanan malaˈosi ko pisaysay to sapalifet.” Itiniay i Pracil faˈinayan salikaka, sanay ko sowal: “23 miheca mararamod kako ato fafahi lipahakay kami, samanen misaˈicelay kami malo noˈadingoan a tamdaw.” O roma, itiniay i Filiping faˈinayan salikaka mihaenay ko sowal: “Malo noˈadingoan a tamdaw pairaay to rihaday no falocoˈ ako, padamaay takowanan mala kangaˈay to cowa ka hecad ko kitiraan a salikaka.”

² Masowalay a salikaka mihaiyay to iraay ko epoc no noˈadingoan a harateng. Mihaenay, wa saan kiso a miharateng: “Samaan kako ngaˈ malo noˈadingoan a tamdaw a milifok to adihayay epoc hani?” Kawraan, malo noˈadingoan a tamdaw i salakatho cipinang to samanay ko pinengneng no Fangcalay Cudad to noˈadingoan a tamdaw. Oniya lalakaw wa milengo to tolo a salicay: (1) O maanan ko tatodong no noˈadingoan a tamdaw? (2) O maanan a ngaˈayay taˈarawan ko papadama kitanan, macakat i noˈadingoan? (3) Misaˈicel kita palahad to ‘harateng  ni Kristo,’ hano ngaˈay padama kitanan malo noˈadingoan a tamdaw?

3. Sowal no Fangcalay Cudad, ‘noˈadingoan a tamdaw’ ato ‘midoedoay to tireng a tamdaw,’ o maanan ko kasasiromaan?

³ Mitadtaday ci Pawlo to kasasiroma ‘noˈadingoan a tamdaw’ ato ‘midoedoay to tireng a tamdaw,’ padamaay konini kitanan cipinang to o maanan ko tatodong no noˈadingoan a tamdaw. (ˈOsien ko 1 Korinto 2:14-16.) O ‘midoedoay to tireng a tamdaw mafolaay ko demak no fangcalay saocor no Kawas,’ sanay cangra, caay kakahi micada, mihaenay, ‘cowa kafanaˈ toniya demak.’ Kawrira, ‘noˈadingoan a tamdaw cipinangay to maamaan,’ hanaca iraay ko ‘harateng ni Kristo’ nangra. Pakalalokay ci Pawlo to Krisciyang malo noˈadingoan a tamdaw. Cowa konini aca, noˈadingoan a tamdaw ato midoedoay to tireng a tamdaw, iraayho ko manan a kasasiromaan hani?

4, 5. O midoedoay to tireng a tamdaw iraay ko maanan a tahapinangan?

⁴ O midoedoay to tireng a tamdaw, samanay ko harateng ato waywayan hani? Oniya hekal matomesay ko mirenecay to coos no tireng a pinangan. Sowal ni Pawlo, o hatiniay pinangan oya ‘mikowanay anini i tireng no paculiay tamdaw a harateng.’ (Ifiso 2:2) Malingatay no hatiniay harateng ko ˈalomanay tamdaw, toor han ko ˈalomanay a midemak, o matatodongayto sanay ko harateng nangra. O hatiniay tamdaw misamacayay to coos no tireng, telocto toor sanay to harateng no niyah a dademak, caay pisaˈicel mitoor to palinian no Kawas a maˈorip. O midoedoay to tireng a tamdaw misamacayay to saaroˈan, micangacang to pakadafongay hafay anca misaareteng to sakangaˈay no niyah a demak.

⁵ O mirenecay to coos no tireng a tamdaw, midemakay to ‘midoedoay to tireng a waywayan.’ (Kalatiya 5:19-21) O saka cecay sapatikami ni Pawlo to Korintoay a kasakopang, somowalay to tahapinangan no midoedoay to tireng a tamdaw, tinakoen, misatekeday, palicinowasay, masasipakotkot ko salikaka tayra i hoing, caay pidofdof to limasmas no mikayatay, halikaenay haliepahay. Misiˈayaw to sakayhid i, tangsolay a mapolin i sakayhid. (Taneng 7:21, 22) Somowalay ci Yuta, o midoedoay to tireng a tamdaw, malahedaway ko sadama no fangcalay saocor no Kawas, teloc i, ‘caayto cipinang to noˈadingoan a demak.’​—Yuta 18, 19.

6. O noˈadingoan a tamdaw iraay ko maanan a tahapinangan?

⁶ O maanan ko tatodong no malo ‘noˈadingoan a tamdaw’ hani? O noˈadingoan a tamdaw ciharatengay to kalalaˈed no niyah ato Kawas, caay kahecad to midoedoay to tireng a tamdaw. Iraay ko noˈadingoan harateng a tamdaw, misaˈicelay ‘mitodong to Kawas.’ (Ifiso 5:1) Mihaenay, wa misaˈicel cangra palahad to mahecaday ni Yihofa a harateng, tano harateng ni Yihofa a minengneng to demak. O soˈlinay ko Kawas sanay minengneng cangra. Ano, o mananto ko demak misaˈicelay cangra mitoor to palinian ni Yihofa, cowa pihaen ko demak no midoedoay to tireng a tamdaw. (ˈOlic 119:33; 143:10) Iraay ko noˈadingoan harateng a tamdaw, cowa pisamacay tono tirengan a waywayan, misaˈicelay cangra ciheci to ‘minaroˈan no fangcalay saocor.’ (Kalatiya 5:22, 23) O maanan ko ‘noˈadingoan a harateng’ hani? Haratengen ko cecay sapatinako, sowal no kalo a tamdaw, o mafanaˈay misasingdi a tamdaw, iraay ko taneng a misasingdi sanay, mahecaday, o misaaretengay to noˈadingoan ato midokoay demak a tamdaw, o iraay ko noˈadingoan a harateng ningra.

7. Pakayni noˈadingoan a tamdaw, mansanay ko sowal no Fangcalay Cudad?

⁷ Masemeray ko Fangcalay Cudad to noˈadingoan a tamdaw. Sowal i Matay 5:3 sanay: ‘O mafanaˈay to cangoˈotay ko noˈadingoan i, o malemeday,  samanen citodongay cangra to kakarayan a Hongti Kitakit.’ Loma 8:6 somowalay to iraay ko manan a epoc no iraay ko noˈadingoan harateng a tamdaw, sanay ko sinael: ‘Midoedoay to tireng ko harateng, o mamapatay. Midoedoay to fangcalay saocor ko harateng i, milifok to rihaday ko ˈorip.’ Misamacay kita to noˈadingoan a demak, wa milifok to rihaday anini, ira ko ngaˈayay kalalaˈed ato Kawas, noikor wa milifok to tahadaˈocay a ˈorip.

8. Misamaanay hano misaˈicel kita ngaˈ palahad ato mitafo to noˈadingoan a harateng?

⁸ Kawrira, itiniay kita katalawan a hekal maˈorip, i taliyokay tamdaw paihekalay to midoedoay to tireng a harateng, wa misaˈicel kita ngaˈ ngaˈay palahad ato mitafo to noˈadingoan a harateng. O tamdaw ano ecato pisaareteng to noˈadinoan a demak, wa kahenay matomes i ponoˈ ningra kono midoedoay to tireng a harateng no hekal. Wa samaan kita a miliyas to hatiniay a pakayraan hani? Samaan ngaˈ macakat i noˈadingoan hani?

9. (1) Samaan ko demak ita ngaˈ ngaˈay macakat i noˈadingoan? (2) Wa milengo kita to maanan a ngaˈayay taˈarawan?

⁹ O wawa pakayniay pihapinang ato pinanam to ngaˈayay taˈarawan no wama wina a malo malohemay tamdaw, mihapinang ato minanam kita to tanoktokay i noˈadingoan a tamdaw, wa ngaˈay macakat i noˈadingoan. Safeliten, mikitini midoedoay to tireng wa mananam ita ko cowa kangaˈay demaken a demak. (1 Korinto 3:1-4) O Fangcalay Cudad wa ngaˈay padama kitaanan pasayra i ngaˈayay taˈarawan a minanam, wa mirikec kitaanan eca ka piliyaw a mararaw. Makalimay kita malo noˈadingoan a tamdaw, dotocto wa milengo to patirengan ni Yakop, Mariya aci Yis a ngaˈayay taˈarawan.

10. Samanay ci Yakop paihekal to o noˈadingoan a tamdaw ko niyah?

¹⁰ Tinakoen ci Yakop, mahecaday cingra kitanan, tahalifaay to sapalifet i nokaˈorip. O kaka ni Yakop ci Isau sapipatayaw cingranan, o malitengay ni Yakop milipalaway cingranan a matayal.  Itini taliyok ni Yakop soˈlin ira ko ‘midoedoay to tireng’ a tamdaw, kamayan cingra, ira ko noˈadingoan a harateng. Pasoˈlinay ci Yakop to sakiˈok no Kawas ci Aprahaman, pasoˈlinay cingra to kalimelaan ko saaroˈan no paro no lomaˈ no niyah i araaw ni Yihofa, hato misongilaˈay a midipot to paro no lomaˈ. (Satapangan 28:10-15) O sasowalen ato waywayan ni Yakop paihekalay to paifalocoˈan ningra ko palinian ato araaw no Kawas. Tinakoen, tiya maharateng ni Yakop to mamidokaˈ ci Isau to niyah, sanay mitolon to Kawas: “Mingitangit kako i Tisowanan . . . miketon Kiso to sowal i takowanan, ‘Palemeden Ako a palaheci ko polong no demak iso, saˈalomanen Ako ko wawa ato teloc iso a matiya o nika adihay no tafok no riyar.’” (Satapangan 32:6-12) Pasoˈlinay ci Yakop to sakiˈok ni Yihofa, makahiyay pahecad to araaw ni Yihofa a dademak.

11. Hano o noˈadingoan a tamdaw ci Mariya han aki?

¹¹ O roma, haratengen ko tinakoan ni Mariya. Hano piliˈen ni Yihofa ci Mariya toha wina ni Yis hani? Samanen o iraay ko noˈadingoan a harateng ni Mariya. Samaan a mahapinang ita konini hani? Milisoˈ ci Mariya to salawina ci Cakaliya aci Ilisapic i, paihekalay to nai falocoˈay a pakahemek to Kawas. (ˈOsien ko Luka 1:46-55.) Mikitini i sowal ni Mariya ngaˈayay mahapinang ita, maolahay cingra to sowal no Kawas, mananamay to lalakaw no Hipray Sowal Fangcalay Cudad. (Satapangan 30:13; 1 Samuil 2:1-10; Malaki 3:12) O roma, soˈlin faelohayho mararamod cingra ci Yosifan, ˈayaw no hofocen ci Yis, cowa ka dadiˈi cangra, paihekalay konini to misaaretengay cangra tatosa to araaw ni Yihofa, ecaka pirenec to kaolahan no niyah. (Matay 1:25) Misinanotayho ci Mariya to mifekaday i tireng ni Yis a demak ato nano sowal ningra, hanaca “pakifalocoˈ han konini a demak a maemin.” (Luka 2:51) Ciharatengay ci Mariya to milingatay ci Misiyaan a araaw ni Yihofa. O patirengan ni Mariya a taˈarawan pakalalokay kitaanan a miharateng, samaan a paisalakat to araaw no Kawas i nokaˈorip.

12. (1) Ci Yis aci Yihofa o manan ko kahecadan? (2) Sasamaan kita mitodong to taˈarawan ni Yis? (Nengnengen ko satapangan coka.)

¹² I likisi no tamdaw iraay ko noˈadingoan a harateng i, o sakakaay ci Yis. Hakelong no ˈorip ni Yis ato mitosilay demak paihekalay to makalimay cingra, mitodong to kakarayan Wama ningra ci Yihofaan. O harateng ni Yis, na falocoˈan ato pakayraan dademak, mahecaday ci Yihofaan, ono kaˈorip mahecaday to araaw ato palinian no Kawas. (Yohani 8:29; 14:9; 15:10) Tinakoen, palinien to samanay milengo ci Isaya aci Marko ci Yihofaan aci Yisan, mitilid ci Isaya iraay ko siniˈadaay ni Yihofa, mitiliday to ratoh cudad ci Marko paihekalay ci Yis to sidaˈitay i tamdaw sanay. (ˈOsien ko Isaya 63:9; Marko 6:34.) Ano maˈaraw ita ko papadamaen a tamdaw i, wa mitodong ci Yisan paihekal to sidaˈit a ciharateng cangranan han? Cowa konini aca, misarocoday ci Yis mirienang to mitosilay ato pasifanaˈ to tamdaw to ngaˈayay ratoh a demak. (Luka 4:43) Mikitini taˈarawan ni Yis mahapinangay, o noˈadingoan a tamdaw sidaˈitay makahiyay padama to tamdaw.

13, 14. (1) Anini mikitini i tireng no iraay ko noˈadingoan harateng a salikaka wa mananam ita ko maanan? (2) Hadaken ko tinakoan.

¹³ Cowa ko taˈarawan aca i Fangcalay Cudad, anini ˈalomanay Krisciyang paihekalay to mahecaday ni Yis a pinangan, o ngaˈayay a taˈarawan ita cangra. Tinakoen, o roma salikaka ˈifowaay a mitosil, halilafangay, iraay ko sidaˈitay falocoˈ ato roma makapahay capeling. Nikawrira, mahecaday cangra kitanan, misaˈicel palahad to mangodoay to Kawas a capeling, wa misaysayho to dangoc no niyah ato cowa kalefot a pakayraan. Itini i Pracil fafahiyan salikaka ci Miciyang, sanay ko sowal: “Salakat maolahay kako to faelohay mikiriwiˈay a riko no hekal, mansa caka sanengseng ko caˈedong ako. Kawra, minanam to soˈlinay kimad no Fangcalay Cudad padamaay takowanan malo noˈadingoan a tamdaw. Sapifalicaw to niyah cowa ko madoloay, misaˈicelay kako mihaen to  demak matongalay ko lipahak, mahelaayto ko epoc a maˈorip.”

¹⁴ Itini i Filiping fafahiyan salikaka ci Alin, cowa ka hecad ko malifetay. Pakayni saka siemelaw nokaˈorip, misamacayay cingra to ˈakawangay picudadan ato adihayay ko lifon a tayal. Sanay cingra: “Palidlid sanay kako mapawan to noˈadingoan a patosokan. Ikor mahapinang ako malahedaway ko mikikakaay to tayal a kalimelaan a dafong i kaˈorip no niyah. Mihaenay, miliyawan ako misalof ko patosokan, misamacay a mihodop ci Yihofaan.” Pasoˈlinay ci Alin to sakiˈok ni Yihofa i Matay 6:33, 34. Sanay cingra: “Pasoˈlinay kako to dadipoten ni Yihofa kako!” Itini Kasakopang iso iraay ko mahecaday a milifetan han? Oniya madimadiay a salikaka mitodongay ci Yisan, o taˈarawan nangra coko papakalalok kitanan a mihaen to demak han?​—1 Korinto 11:1; 2 Tisalonika 3:7.

15, 16. (1) Samaan ko demak ita ngaˈ mahecaday ci Kristoan hani? (2) Samaan kita ngaˈ mananam ko ‘harateng ni Kristo’?

¹⁵ Wa ngaˈay kita misamaan mitodong ci Kristoan hani? Sowal i 1 Korinto 2:16 pairaen ita ko ‘harateng ni kristo,’ sanay. Itini Loma 15:5 somowalay to pairaen ko ‘harateng ni Kristo Yis,’ sanay. Mihaenay, saka hecadaw kita ci Kristoan, cipinang to samanay ko harateng ningra, cipinangho to masakenaay a capeling ningra. Mikotodho kita to pasaripaˈan ni Kristo. O harateng ni Yis misamacayay i kalalaˈed ningra ato Kawas. Ano misaˈicel kita minanam to harateng ni Yis, wa matongal ko kangaˈay no kalalaˈed aci Yihofa. Mihaenay, palahad kita to harateng ni Yis ato waywayan, tada o kalimelaan.

¹⁶ Samaan ko demak ita ngaˈ matoor konini hani? Maˈaraway no nisawawaan ni Yis ko kafahekaˈan a demak ningra, pakatengilay to sapasifanaˈ ningra, maˈaraway to samanay cingra micada to tamdaw ato samanay mitoor to harateng no Kawas a dademak. Hato mihaenay ko sowal no nisawawaan: “O pawacayay kami to polong no demak ni Yis i Yutaya a pala ato demak Ningra i Yirusalim.” (Dmak 10:39) Soˈlin cowa pakaˈaraw kita to nano demak ni Yis, kawra sidaˈitay ci Yihofa pafeli kitanan to ratoh a cudad, padamaay koni kitanan a mafanaˈ ci Yisan. Miˈosi kita to Matay, Marko, Luka, Yohani, misimsim a midotim to lalomaˈay lalakaw, wa ngaˈay mananam ko harateng ni Kristo, wa ngaˈayho ‘mikelec a mikotod to pasaripaˈan ningra a romakat,’ mafanaˈ to sasamaan ‘pahecad to harateng ni Kristo a midipot to niyah.’​—1 Pitiro 2:21; 4:1.

17. Minanam to harateng ni Kristo, wa ira ko manan a haepoc no mita?

¹⁷ Minanam to harateng ni Kristo, wa ira ko maanan a haepoc no mita hani? Haratengen, komaen kita to cihaleday kakaenen wa ngaˈay patanoktok to tireng no niyah. Mahecaday, micerid kita minanam to harateng ni Kristo, wa mapaˈicel ko noˈadingoan. Hanaca wa palidlid sato, mafanaˈ to sasamaan tano harateng ni Kristo a misiˈayaw to masakenaay a pakayraan. Mihaen, cipinang a tano makapahay falocoˈ a misaˈosi, hanaca ngaˈay pakahemek to Kawas. Onini a epoc coko pakalimay kitaanan a ‘micaˈedong to capeling ni Yis Kristo’ han?​—Loma 13:14.

18. Pakayni malo noˈadingoan a tamdaw, mikitini toniya lalakaw o manan ko mananamay iso?

¹⁸ Oniya lalakaw padamaay kitanan a cipinang to o maanan ko tatodong no noˈadingoan a tamdaw, mahapinangay ita samaan mikitini i noˈadingoan a tamdaw a minanam. Mananamayho ita palahad to ‘harateng ni Kristo’ wa ngaˈay padama kitanan malo noˈadingoan a tamdaw. Kawraan, pakayni malo noˈadingoan a tamdaw, wa adihayho ko mamananam ita. Tinakoen, sasamaan kita a milomal to samanay ko noˈadingoan a pakayraan no niyah hokira? Wa ngaˈay kita samaan a pacakat to noˈadingoan a demak hani? O pakayraan ita i noˈadingoan samanay milingat to kaˈorip ita hani? Nengnengen ko laenoay lalakaw wa mafanaˈ to caˈof.