1, 2. (1) O taˈarawan ni Nowa, Taniil aci Yopu Misamanay hano pafeli kitaanan to timoloay hani? (2) Itiniay i masamaanay a pakayraan mitiliday ci Icikil to Icikil 14:14 hani?

MISIˈAYAWAY kiso to adada, cangoˈot no sakaˈorip anca saroero han? Harateng iso, sapadotocaw mahemek a mihodop ci Yihofaan, cowa ko madoloay hokira? Ano mahaenay ko harateng iso, o taˈarawan ni Nowa, Taniil aci Yopu wangaˈay pafeli to timolo iso. Cowa ko malefotay cangra, mahecaday kitanan misiˈayaw to adihayay pasangaray, latekay o katalawan no ˈorip. Soˈlin hatira, kamayan cangra a madimadi, mansaan o taˈarawan ita cangra i pasoˈlin no falocoˈ ato midoedoay saan ko pinengneng no Kawas.​—ˈOsien ko Icikil 14:12-14.

² Iˈayaw ni Yis to 612 miheca, itiniay ci Icikil i Papilon mitilid to lalangian a sinael noniya lalakaw. * (Icikil 1:1; 8:1) O finawlan no Yirusalim  cowa ka madimadi to Kawas, mangataayto ko saka laˈafoaw noniya niyaroˈ. Ikor no lima miheca, soˈlinay malaˈosi ko sapairasol no Fangcalay Cudad. Cowa ka ˈaloman ko paihekalay to mahecaday ci Nowaan, Taniil aci Yopuan a pinangan, hato makonisay ko sakaˈorip a tahapinangan. (Icikil 9:1-5) Oniya tamdaw mahaopay ci Yirimiya, Paruk, Ipitmilik ato ngasaw no Rikap.

3. Oniya lalakaw mamilengo to maanan?

³ Anini, itini pinengneng ni Yihofa, edeng o mahecaday ci Nowaan, Taniil aci Yopuan awaay ko rarikecen, ngaˈ ngaˈay i ˈayaw no hererekan noni lekakawa ko mamilifok to sakaˈorip a tahapinangan. (Paˈarawan 7:9, 14) Dotocto lengoen ita to samanay hano o moecelay a taˈarawan han ni Yihofa minengneng koniya madimadiay sikawdan. Itini pilengo to malifetay nangra i, wa sinanoten ita to: (1) Masiˈayaway nangra ko maanan a sapalifet ato (2) wa samaan kita a mitodong cangranan, paihekal to pasoˈlinay falocoˈ ato midoedoay.

4, 5. Misiˈayaway ci Nowa to maanan a sapalifet? Madimadi to Kawas cingra hano cowa ko madoloay hani?

⁴ Masiˈayaway ni Nowa a sapalifet: Itini romiˈad no fofo ni Nowa ci Inok, cowa ka ngodo ko tamdaw to Kawas, “pasowal to tatiihay a sowal a paculi i Kawas.” (Yuta 14, 15) Halafinto i, mataˈlif ko toki, matongamatonglay ko mariˈangay a demak. Tahira i romiˈad ni Nowa, ‘adihayay miedefay ko mariˈangay a demak icowacowa.’ Mala tamdaway ko kaloykoy, cifafahiay to tamdaw, mihofocan nangra ko mariˈangay a wawa. (Satapangan 6:2-4, 11, 12) Cowa ka hecad ci Nowa, sowal no Fangcalay Cudad: ‘Nikawrira, maolah ni Yihofa ci Nowaan . . . Awaay ko patelac ni Nowa, o dengan a ngaˈayay a tamdaw cingra itiya, mangaˈay ko kakapot ningra ato Kawas.’​—Satapangan 6:8, 9.

⁵ Sinanoten koniya sinael. ˈAyaw no Taˈangayay Lenlen, o kalacafayan ni Nowa ato Kawas a romiˈad i mariˈangay hekal, cowa ka hecad to kalo a tamdaw 70 anca 80 miheca a kamotoˈ, maedeng 600 miheca! (Satapangan 7:11) O roma i, cowa ka hecad ci Nowa kitaanan, o romiˈad ningra awaay ko pidokoan to Kawas a kasakopang, hanaca o kaka safa ningra itini i midokoay a demak cowa pidama cingranan. *

6. O maanan a pakayraan paihekal to timolo ni Nowa hani?

⁶ Cowa ka ciharateng ci Nowa to saemelay a nokaˈorip. Timoloay a “patenakay to moecelay a demak no Kawas” cingra, pasowalay to pihakelongan no niyah i ˈalomanay tamdaw. (2 Pitiro 2:5) Sowal no tarokos ci Pawlo, ci Nowa pakayni ‘pasoˈlinay falocoˈ misaˈosi to raraw no tamdamdaw.’ (Hipray 11:7) Micadaay ci Nowa to kalikaf ato pisafelit no tamdaw, alatek tano mariˈangay a pakayraan maroero no tamdaw cingra, kawra, ‘cowa ka talaw to tamdaw’ ci Nowa. (Taneng 29:25) Iraay ko sapafeli ni Yihofa ci Nowaan a timolo.

7. Misangaˈ ci Nowa to tamina i, misiˈayaway to manan a pasangaray hani?

⁷ Mikapotay ci Nowa ato Kawas ikor no 500 miheca, palimoˈotan ni Yihofa cingra misangaˈ to tamina, pakayni ko sapidipot to ˈorip no tamdaw ato ˈaˈadopen. (Satapangan 5:32; 6:14) Pakayni ci Nowaan, o pasangaray koniya tayal! Cowa ka hatini aca, mafanaˈay cingra ano misangaˈ to tamina wa adihayay ko salikaf ato pisafelit. Soˈlin hatira, kamayan midoedo ci Nowa to Kawas, pakayni pasoˈlinay falocoˈ a midemak. Sowalen no Fangcalay Cudad: “Saka doedo hanto ni Nowa ko sowal no Kawas a milaheci a midemak.”​—Satapangan 6:22.

8. Samaanay ko demak ni Nowa, paihekal to pakasoˈlinay cingra to papafelien ni Yihofa ko saali ningra hani?

⁸ Cowa ko madoloay ci Nowa midipot to paro no lomaˈ. I ˈayaw no Taˈangayay Lenlen, marorayay ko tamdaw a maomah, ngaˈ ira ko milidongan, mahecaday ci Nowa. (Satapangan 5:28, 29) Soˈlin hatira, kamayan ci Nowa misamacay to demak no Kawas i nokaˈorip, cowa ko pakadafongay.  Ano itini misangaˈ to tamina i 40, 50 miheca, misamacayay cingra to noˈadingoan a demak. Ikor no Taˈangayay Lenlen, itini lalomaˈ no 350 miheca, padotocay ci Nowa ˈifowa ko falocoˈ midoko to Kawas. (Satapangan 9:28) Itini i paihekal to pasoˈlinay falocoˈ ato midoedoay, patirengay ci Nowa to mikiriwiˈay a taˈarawan no mita!

9, 10. (1) Wa ngaˈay kita misamaan mitodong ci Nowaan, paihekal to pasoˈlinay falocoˈ ato midoedoay? (2) Wa samaan ko picada no Kawas to midofdofay to palinian Ningra a tamdaw hani?

⁹ Wa samaan kita mitodong ci Nowaan, paihekal to pasoˈlinay falocoˈ ato midoedoeay hani? O pakayraan i midofdof to moecelay palinian no Kawas, cowa kono hekal ni Satan, padotoc micangacang to Hongti Kitakit. (Matay 6:33; Yohani 15:19) Mafanaˈay kita cowa pihayi ko ˈalomanay to pakayraan ita a maˈorip. Samanen, midofdof kita to sarikec no Kawas, mahaopay ko madadiˈiay ato raramoday a sarikec, mansa malikafay ato mapoˈiay no roma tamdaw. (ˈOsien ko Malaki 3:17, 18.) Ano samaanto, wa mahecad kita ci Nowaan, mangodo a matalaw ci Yihofaan, cowa ko tamdaw. Mafanaˈay kita, edengan ko Kawas papafeli to tahadaˈocay ˈorip no tamdaw.​—Luka 12:4, 5.

¹⁰ Mihaenay haw i, wa samaan ko demak iso hani? Ano malikaf no tao kiso i, wa padotoc a ‘mikapot to Kawas’ han? Ano misiˈayaw to saroero no sakaˈorip i, tangongolay pakasoˈlin iso to papafelien ni Yihofa kiso to misaalian iso han? Todongen iso ci Nowa paihekal to pasoˈlinay falocoˈ ato midoedoay, mihaen i, wa ngaˈay pasoˈlin to dadipoten ni Yihofa kiso.​—Filipi 4:6, 7.

11. Ci Taniil ato tatoloay widang ningra misiˈayaway to maanan sapalifet itini Papilon? (Nengnengen ko satapangan coka.)

¹¹ Masiˈayaway ni Taniil a sapalifet: Maholiway ci Taniil tayra i Papilon, itira i adihayay ko samiyay ato miangangay a niyaroˈ maˈorip. Cowa ka hatini aca, misakahemaway ko Papilon a tamdaw minengneng to Yutaya a tamdaw, marariday milikaf cangranan ato Kawas nangra ci Yihofa. (ˈOlic 137:1, 3) Oya mahecaday ci Taniilan madimadi a Yutaya a tamdaw, adadaay ko falocoˈ nangra tonini! O roma, ci Taniil ato tatoloay widang ningra ci Hananiya, Misali, aci Acariya, o kasemeran no ˈalomanay, samanen ˈakawangay ko saaroˈan nangra i lomaˈ no hongti, hanaca mikiriwiˈay ko kakaenen. Mihaenay i, tangsolay misiˈayaw ci Taniil to sapalifet i kakaenen, caay kakahi cingra to ‘mapakadit ko niyah’ i kakaenen.​—Taniil 1:5-8, 14-17.

12. (1) Paihekalay ci Taniil to maanan fangcalay a pinangan hani? (2) Samaanay ko pinengneng ni Yihofa ci Taniilan?

¹² Misiˈayawayho ci Taniil to cowa ka hapinang a sapalifet, milingatay to ineneng ningra konini. Mikiriwiˈay ko inaneng ningra hato karetengay ko ˈinorong. (Taniil 1:19, 20) Kawra cowa pisatakaraw cingra a misateked ko harateng, padotocay misapoener ko falocoˈ a panokay to ˈodingar ci Yihofaan. (Taniil 2:30) Soˈlinay to, kaemangho ci Taniil o taˈarawan sanay ci Yihofa minengneng, mahecaday ci Nowaan aci Yopuan a moecel ko demak. Pasoˈlinay ko Kawas to tatanoktok ci Taniil a madimadi, soˈlinayto, hakelong no kaˈorip ni Taniil midoedoay to Kawas, tahiraay i patay ko kamadimadi ningra. Mihaenay, mangata 100 ko mihecaan ningra i, damsayay a pasowal ko coyoh no Kawas cingranan: ‘Taniilaw, tada o kalimelaan a tamdaw kiso.’​—Taniil 10:11.

13. Misamaanay hano ngaˈay ci Taniil padama to finacadan no Yutaya?

¹³ Padamaan no Kawas ci Taniil, itini pikowan no Papilon ato Mitiya-Pirsiya i akawangay ko saaroˈan ningra. (Taniil 1:21; 6:1, 2) Alatek, tano ninian a pakayraan ko sapikayat ni Yihofa to demak, pakayni ci Taniilan padama to finawlan Ningra, mahecad piocor Ningra ci Yosifan tayra i Icip, paitinien i Pirsiya ci Istir aci Mortikay. * (Taniil 2:48) Maˈaraw no maholiway tayra i Papilon a Icikil ato Yutaya tamdaw, tano hatiniay a pakayraan  ko pikayat ni Yihofa to demak, tada masayaray cangra!

14, 15. (1) O manan a pakayraan ko kahecadan ita aci Taniilan? (2) Sasamaan minanam ko wama wina to wama wina ni Taniil hani?

¹⁴ Wa samaan kita pitodong ci Taniilan, paihekal to pasoˈlinay falocoˈ ato midoedoay hani? Anini, oniya hekal mafiyoray no Taˈangayay Papilon ko waywayan ato noˈadingoan, o Taˈangayay Papilon o polong a mararaway pihakelongan noniya hekal, mahecaday o ‘kitiraan no kaloykoy.’ (Paˈarawan 18:2) Mahecaday kita o palafangay a tamdaw toniya hekal, samanen cowa ka hecad kita to ˈalomanay tamdaw, alatek malo lalikafan no tamdaw kita. (Marko 13:13) Soˈlin haw i, pahecaden ita ci Taniilan, miingid to Kawas ita ci Yihofaan. Ano misapoeneray ko falocoˈ ita midoedo to Kawas, misarocod to falocoˈ mitiˈer Cingranan, o kalimelaan a tamdaw wa saan ko pinengneng no Kawas kitaanan.​—Hakay 2:7.

¹⁵ Anini, sasamaan minanam ko wama wina to wama wina ni Taniil hani? Itiya o ˈalomanay Yutaya tamdaw tatiihay ko demak, oya kaemangho a Taniil kamayanay palahad to olah i Kawas. Cowa ko fahal sanay konini, o napasifanaˈan no wama wina ci Taniil a mafanaˈ to Kawas. (Taneng 22:6) Tatodong noni Taniil a ngangan i, o ‘misawkitay ako ko Kawas,’ mahapinangay ita, mangodoay to Kawas ko wama wina ningra. Mihaenay i, o wama wina a tamdaw, hadidien a pasifanaˈ ko wawa, aka a pisawad cangra. (Ifiso 6:4) Kalacafayen iso ko wawa mitolon, patadoen cangra a mitolon. Ano saˈicelen iso mirinaˈ i falocoˈ no wawa ko soˈlinay kimad, wa matomes ko sapalemed ni Yihofa tisowanan.​—ˈOlic 37:5.

16, 17. Ci Yopu itini karihadayan ato kapadesan misiˈayaway ko maanan a sapalifet?

¹⁶ O masiˈayaway ni Yopu a sapalifet: Taˈangayay ko kafalic no kaˈorip ni Yopu, na rihadayay cingra, na tahalifaay to madadotocay a pades. ˈAyaw no mifekad ko pades, ci Yopu ‘itini kakawalian a tamdaw . . . O sakakaˈay cingra.’ (Yopu 1:3) Cihafayay ko lomaˈ ni Yopu, ato cinganganay cingra, hanaca o tada kangodoan no tamdaw cingra. (Yopu 29:7-16) Kawraan, cowa pisatakaraw cingra a misawad to Kawas. Soˈlinay i, panganganan ni Yihofa ci Yopu to ‘sikawdan ako,’ halo pasowal cingranan ‘o moecelay ko demak, mangodoay to Kawas, miliyasay to tatiihay a demak,’ sanay.​—Yopu 1:8.

¹⁷ Itini kamotoˈay a toki taˈangayay ko kafalic no kaˈorip ni Yopu. Misiˈayaw to pakidemay nikaw ato adada cingra, oniya kihecod oyaan pakokotay a Satan ko palaˈosiay. Makaniway ci Satan a mikokot ci Yopuan, o pakayniay sakangaˈay no  niyah ko pidoko ningra to Kawas sanay. (ˈOsien ko Yopu 1:9, 10.) Kawra, mihayian ni Yihofa ci Satan mihadak to sakokot, ho ira ko toki ni Yopu misawacay to kamadimadi no niyah, paihekal to pidoko no niyah o matatodongay a harateng cowa ko misatekeday ko araaw.

18. (1) O Paihekalan ni Yopu a madimadi samaanay a mitemer to falocoˈ iso? (2) O picada ni Yihofa ci Yopuan paihekalay to masamaanay a Kawas Cingra hani?

¹⁸ Mifekadan ni Satan ko madadotocay a saˈdes ci Yopuan, ho miroroh ci Yopu to Kawas sanay. (Yopu 1:13-21) Dotoc, iraay ko tatoloay widang sapihinomaw ci Yopuan, kawra somowalay to midokaˈay a sowal cingranan, sowal nangra, mahaen ko micadaan ni Yopu i Kawas tatodongto no raraw ningra sanay! (Yopu 2:11; 22:1, 5-10) Soˈlin hatira, padotocay ci Yopu mitafo to madimadi. Nolatekay, pakinaliay ko sowal ni Yopu, kawra cipinangay ci Yihofa to roray no falocoˈ ningra. (Yopu 6:1-3) Mafanaˈay ko Kawas to matoleday ci Yopu, samanen pasemseman ni Satan cingra, palafoanho ni Satan. Nikawrira, cowa piliyas ci Yopu ci Yihofaan. Ikor maharek ko sapalifet i, palifonan ni Yihofa ci Yopu, ikakaay ko adihay to salakatay, paˈoripanho to 140 miheca ningra. (Yakop 5:11) Hano mafanaˈ kita to tahiraay i patay ko pisarocod no falocoˈ ni Yopu a maolah ci Yihofaan hani? Samanen ikor no mapatay ci Yopu to pina hahekalan, mitilidan ni Icikil ko lalangian sinael noniya lalakaw.

19, 20. (1) Misamaan kita mitodong ci Yopuan, paihekal to pasoˈlinay falocoˈ ato midoedoay hani? (2) Samaan kita mitodong to Kawas, paihekal to siniˈadaay falocoˈ i tamdaw?

¹⁹ Wa ngaˈay kita misamaan mitodong ci Yopuan, paihekal to pasoˈlinay falocoˈ ato midoedoay hani? Ano samaanto ko pakayraan, paisalakaten ita ci Yihofa itini kaˈorip, misarocod to falocoˈ a mitadiˈec ato midoedo Cingranan. Soˈlinay i, ikakaay ko kaadihay no lalangian ita mihaen to demak ci Yopuan, samanen adihayay to kafanaˈan ita a demak pakayni ci Satanan ato talakal ningra. (2 Korinto 2:11) Mikitini ci Yopuan mafanaˈay kita to hano hayien no Kawas ko pades a materek. O roma, mafanaˈay kita o Hongti Kitakit no Kawas ci Kristo Yis ko mamikowan toniya cikiw. (Taniil 7:13, 14) Oniya Hongti Kitakit cato ka halafin wa palahedaw to kihecod a pades.

²⁰ O malifetay ni Yopu pahapinangay kitaanan, o tahapadesay a Krisciyang o paihekal kita to siniˈada. Nolatekay, o tahapadesay a salikaka mahecaday ci Yopuan pakinaliay ko sasowalen. (Patnakay 7:7) Ano mahaen i, hamaan patelas a misawkit cangraanan, tanamen miharateng ko roray nangra siniˈada cangraanan. Mihaen ko demak ita, o mitodongay toya ciolahay ato sidaˈitay a Wama i kakarayan ci Yihofa.​—ˈOlic 103:8.

21. O malifetay ni Nowa, Taniil aci Yopu, iraay ko manan a kalaliting to 1 Pitiro 5:10?

²¹ Soˈliˈlin ci Nowa Taniil aci Yopu coka hecad ko kaˈoripan nangra a lintad ato pakayraan, kawra tahasiˈayaw cangra to sapalifet kamayan a tanoktok a mihadidi. Malifetay nangra maharatengay ita ko sowal no tarokos ci Pitiro: “Iikor no nika pades namo to pasamoay i, songilaˈen no Kawas kamo a patanektek a pafeli to ˈicel. Nawhani o karasiniˈadaay Cingra.”—1 Pitiro 5:10.

22. Itini dotoc a lalakaw, wa milengo to manan?

²² Pakaynian ni Yihofa i sowal ni Pitiro a pahapinang kita, pasoˈlinay Cingra to patanoktok a ciˈicel ko sikawdan no niyah. Anini, cowa ka falic ko pinengneng ni Yihofa to finawlan Ningra. O cecacecay midokoay to Kawas a tamdaw, makalimay cangra pakayni ci Yihofaan a ciˈicel, tanoktok a mihodop ci Yihofa. Mihaenay, saˈosien ita ko falocoˈ mitodong ci Nowaan, Taniil aci Yopuan, paihekal to pasoˈlinay falocoˈ ato midoedoay! Itini dotoc a lalakaw, wa mananam ita, oniya tatolo a tamdaw tanoktokay mitafo to madimadi, samanen soˈliˈlinay mafanaˈ cangra ci Yihofaan. Mahaen o sowal no sinael, ngaˈay cangra ‘mihapinang’ to saali ni Yihofa. (Taneng 28:5) Ano minanam kita to taˈarawan nangra i, wa mahecad cangranan soˈliˈlinay a mafanaˈ ci Yihofaan.