1. O kimad i 1935 miheca samanay mifiyor to cecay kapah a tamdaw hani?

1926 MIHECA, cecay kapah micadaay to paputisem, 18 ko mihecaan ningra itiya. O wama ato wina ningra o Micekiway to Fangcalay Cudad a Tamdaw (O ngangan no Misawacayay Tamdaw ni Yihofa itiya), tatoloay ko faˈinayan wawa nangra, tatosaay ko fafahiyan wawa. Paro no lomaˈ nangra midokoay ci Yihofaan, mikotoday ci Yis Kristoan. Malecad o Micekiway to Fangcalay Cudad a Tamdaw, oniya kapah itini Lafi no Tapang a Saˈopo komaenay to epang ato epah. Kawra, itini kimad i 1935 miheca mafalicay ko hatokel ningra. Oniya kimad o salikaka ci Rosofo ko mihadakay itini Padaka cecay taykay, lalangian i “Taˈangayay ˈopo Tamdaw.” Oniya kapah itini taykay matengilay ko maanan hani?

2. Salikaka ci Rosofo itini kimad mitadtaday to maanan kahemekan a kimad hani?

² Itini i kimad, mitadtaday ko salikaka ci Rosofo to masowalay i Paˈarawan 7:9 a “taˈangayay ˈopo tamdaw” cima ko mitoroˈan. ˈAyaw nonini, harateng no finawlan no Kawas wa tayra i kakarayan ko taˈangayay ˈopo tamdaw, o midotocay ko saaroˈan, samanen cowa ka tada madimadi cangra sanay. Misaka dademakan no salikaka ci Rosofo ko Sinael mitadtad, cowa ka piliˈen no Kawas ko taˈangayay ˈopo tamdaw tayra i kakarayan. O ‘roma lopayˈay siri’ ni Kristo cangra. Wa milakowit cangra to “taˈangayay padiing,” tahadaˈoc maˈorip i Lakoing. (Paˈarawan 7:14) Sowal ni Yis: ‘Ira ko roma lopayˈay siri ako, caay ko nonini a pasirian a siri. Wa keriden ako cangra. O mamitengil cangra to ngiha ako. Ta malacecay ko kasafelaw no siri, cecayto  ko pakaenay.’ (Yohani 10:16) Oniya lopayˈay siri o madimadiay ci Yihofaan, malo misawacayay Cingranan a tamdaw, iraay ko tokel nangra tahadaˈoc maˈorip i Lakoing. (Matay 25:31-33, 46) Kalimlaan koniya faelohay pitadtad, o hatokel noya kapah ato ˈalomanay Krisciyang mafalicayto.—ˈOlic 97:11; Taneng 4:18. *

3-4. Itini taykay no 1935 miheca, ˈalomanay salikaka mafanaˈay to manan a hatokel noniyah? Misamaanay?

³ Itini pitaykayan mifekaday ko kahemekan a demak. Pasowalan no mikimaday ko maedeng 20,000 a mitengilay: “Polong mitokelay tahadaˈoc maˈorip i fafekang no sera a tamdaw, ka tomireng!” Mirienangay to taykay a tamdaw itiya sanay ko sowal, maedeng mataˈlifay ko kalitosa a tamdaw tomirengay. Dotoc, sanay ko sowal no salikaka ci Rosofo: “Nengnengen! Taˈangayay ˈopo tamdaw!” Mawahoway ko ˈalomanay. Oya tomirengay a tamdaw mafanaˈay cangra cowa ka nilnil no fangcalay saocor ko niyah, mansa coko tatayra i kakarayan ko hatokel nangra. Saka tosa romiˈad, 840 tamdaw ko micadaay to paputisem, i lalomaˈ nangra ˈalomanay ko roma lopayˈay a siri.

⁴ Maharek mitengil toniya kimad, ya masowalay i fafekang a kapah ato ˈalomanay salikaka, cowato ka komaen to epang ato epah itini Lafi no Tapang. Cecay misapoeneray ko falocoˈ a salikaka sanay mihadak to harateng, sowal ningra: “Itini 1935 miheca saikorayto a komaen kako to epang ato epah itini Piharatengan a Saˈopo. Cowa ka pakaynien ni Yihofa i fangcalay saocor pafeli takowanan to sakatayra kakarayan a hatokel. O tokel ako wa itini fafekang no sera maˈorip, hanaca malacafay to roma tamdaw pala lakoing toniya cikiw.” (Loma 8:16, 17; 2 Korinto 1:21, 22) Mikitiya misatapang, matongal matongalay ko ˈaloman no taˈangayay ˈopo tamdaw. Malacafayay cangra toya manilnilay no fangcalay saocor maˈoripayho i fafekang no sera a Krisciyang a matayal saki Kawas.

5. Samanay ko pinengneng ni Yihofa toya cato ka komaen to epang ato epah a tamdaw hani?

⁵ Pakayra toya cowa to komaen to epang ato epah a tamdaw i ikor no 1935 miheca, samanay ko pinengneng ni Yihofa cangraanan hani? Anini, ano ira ko Krisciyang komaenay to epang ato epah i Lafi no Tapang, kawra ikor mafanaˈay cowa ka nilnilen no fangcalay saocor ko niyah, wa samaan ko pinengneng no Kawas cangraanan hani? (1 Korinto 11:28) O roma tamdaw komaen to epang ato epah mararaway ko piharateng to tatayra i kakarayan hatokel noniyah. Kawra, ano pasasiyor cangra a mihai to raraw, ecato kakomaen to tahapinangan a dafong, hanaca padadotoc madimadi midoko ci Yihofaan, o pinengneng no Kawas cangraanan o roma lopayˈay a siri wa saan. Soˈlin cato ka komaen to epang ato epah cangra, wa mirienangho cangra to Piharatengan to Kinafalah ni Yis a Saˈopo. Samaanen tangongolay ko piakoˈid nangra to nano demak ni Yihofa aci Yis cangraanan.

6. Palimoˈotay ci Yis to coyoh samaan ko demak hani?

⁶ Itiniay to i kaˈayaw ko taˈangayay padiing, nengnengen ita ko pitadtad no Paˈarawan saka 7 fedengan toya manilnilay no fangcalay saocor a Krisciyang, ato masalalomaˈay no roma lopayˈay siri a taˈangayay ˈopo tamdaw, wa mitemer ko falocoˈ. Palimoˈotan ni Yis ko coyoh, metmeten koya icowacowaay  papalaˈafo a fali, aka papifiyoken to sera, tahira kalahecian malinaˈ ko manilnilay no fangcalay saocor a Krisciyang, salikor to milifok to pihayda ni Yihofa. (Paˈarawan 7:1-4) Padotocay a madimadi ko salikaka ni Kristo, mansa milifokay to sapalifon, tayra i kakarayan malacafay ci Kristoan a mala hongti ato mala saysi. (Paˈarawan 20:6) Itiniay kakarayan taˈangayay a paro no lomaˈ no Kawas maedeng makalimay pakaˈaraw toniya 144,000 a tamdaw milifok to sapalifon.

7. Sowal no Paˈarawan 7:9, 10, maˈaraway ni Yohani i mapolosi ko maanan tamdaw? Midemakay cangra to maanan? (Nengnengen papotalay a coka.)

⁷ Dotoc, maˈaraway ni Yohani ko kasemeran a sasing. Iraay ko taˈangayay ˈopo a tamdaw milakowitay to Armakiton. Cowa ka lecad i saˈayaway a 144,000 tamdaw, ˈalomanay koni taˈangayay ˈopo tamdaw, hanaca cowa ka saˈosi ko ˈaloman. (ˈOsien ko Paˈarawan 7:9, 10.) ‘Cirikoˈay cangra to kohcalay a rikoˈ,’ paihkalay konini padotocay cangra madimadi to Kawas aci Kristoan, cowa ka mapakadit no hekal ni Satan. (Yakop 1:27) Mawahoay cangra a somowal, o sakalidong no niyah pakayniay nano demak ni Yihofa ato tofor a siri ci Yis i cangraanan. Itini toniya tatokian, mitatoyay cangra to sarengad, paihkalay konini marenecay ko falocoˈ a lipahak, pakapapotal a mihai o minilnilan ni Yihofa a hongti ci Yis.—Nengnengen ko Yohani 12:12, 13.

8. Sowal itini Paˈarawan 7:11, 12 maˈaraway ni Yohani ko maanan a sasing?

⁸ ˈOsien ko Paˈarawan 7:11, 12. Dotoc, maˈaraway ni Yohani ko maanan hani? Mitadtad cingra, o taˈangayay ˈopo tamdaw masadak pakahemek to Kawas, maˈaraw no kakarayan taˈangayay paro no lomaˈ ni Yihofa tada lipahakay. Noikor, ano malaˈosi ko maˈaraway ni Yohani a mapolosi, milakowit ko taˈangayay ˈopo a tamdaw to taˈangayay padiing i, maedeng tataˈangay ko lipahak no taˈangayay paro no lomaˈ ni Yihofa itini kakarayan.

9. Mikitini pitadtad no Paˈarawan 7:13-15 ngaˈayay mahapinang, midemakay to maanan ko taˈangayay ˈopo tamdaw anini hani?

⁹ ˈOsien ko Paˈarawan 7:13-15. Sowal no sinael, o taˈangayay ˈopo a tamdaw ‘tano ˈirang no tofor a siri mikorac pala kohcalay to rikoˈ no niyah,ˈ tatodong nonini iraay ko makoracay makapahay falocoˈ nangra, o moecelay tamdaw sanay ko pinengneng no Kawas. (Isaya 1:18) Maherekayto patafang micada to paputisem a Krisciyang cangra, pakasoˈlinay to kinafalah ni Yis, iraay ko ngaˈayay kalalaˈed ci Yihofaan. (Yohani 3:36; 1 Pitiro 3:21) Mihaenay, milifokay cangra to pihayda no Kawas, ngaˈay itini fafekang no sera saromiˈad salafii midoko Cingraanan. Soˈlinayto, adihayay a tayal milasil to Hongti Kitakit ato padama to tamdaw malo Krisciyang, o cangra ko milaheciay. Tada fanekfekay cangra, pinengneng nangra to tayal no Hongti Kitakit no Kawas ikakaay to niyah a masakalimlaan.—Matay 6:33; 24:14; 28:19, 20.

10. Milifokay to manan sakiˈok ko taˈangayay ˈopo tamdaw, wa maˈaraw nangra ko kalaˈosi no maanan a sakiˈok?

¹⁰ Mikiˈokay ko Kawas wa padadotoc midimokos to mahadakay i taˈangayay padiing a taˈangayay ˈopo tamdaw. O sowal no Fangcalay Cudad: ‘Ya maroˈay i tadamaanay a kamaroˈan a Kawas micelakay to kopang midipot cangranan.’ Mihamhamay ko roma lopayˈay siri to pidemak no Kawas to ilaenoay a sakiˈok: ‘Wa sisiten no Kawas ko losaˈ nangra, awato ko patay, awato ko adada, tangic, pisemsem. Noikor, wa maˈaraw nangra ko kalaˈosi noninian a sakiˈok.’—Paˈarawan 21:3, 4.

11-12. (1) Sowal itini Paˈarawan 7:16, 17, noikor wa milifok ko taˈangayay ˈopo a tamdaw to maanan a sakaraheker? (2) Iitini Piharatengan a Saˈopo o roma lopayˈay siri wa ngaˈay midemak to maanan? Hano mahaen ko demak nangra?

¹¹ ˈOsien ko Paˈarawan 7:16, 17. Anini,  pakayni lalood, pasangar ko nokaˈorip ato sasifod no lekakawa, macahiway ko roma finawlan no Kawas, o roma tamdaw pakayni pihakelongan mapalitay. Kawra mafanaˈay ko taˈangayay ˈopo a tamdaw, ikor no malaˈafo ko ciraraway a hekal, o kakaenen ato sapirenec to falocoˈan a kakaenen wa kadofah. Ano palaˈafoen no Kawas koniya mikowanan ni Satan a hekal i, cowa ko mamisemsem ko taˈangayay ˈopo a tamdaw to “sano namalay” a keter no Kawas. Maherek ko taˈangayay padiing, wa keriden ni Yis cangra “patayni pipowalan no sakaˈorip a nanom.” Hatiraayto, tada mikiriwiay ko tokel no taˈangayay ˈopo a tamdaw: Itini lalomaˈ no maˈoripay fafekang no sera masacaˈolay soˈot efan a tamdaw, edengan cangra ko iraay ko tokel cowa ko tatahalifa to patay ngaˈay tahadaˈoc a maˈorip!—Yohani 11:26.

¹² Ira ko kasapaan a hatokel noniyah o mamiakoˈid ko roma lopayˈay siri to Kawas aci Kristoan. Soˈlin coka piliˈen no Kawas cangra tayra i kakarayan, cowa ko masakalimlaan i pinengneng no Kawas cowa ka saan konini. Ano o manan to hatokel no tamdaw, wa ngaˈay pakahemek to Kawas aci Kristoan. Cecay pakayraan i, mirienang to Piharatengan to Kinafalah ni Yis a Saˈopo.

13-14. O tamdamdaw hano mamirienang to Piharatengan to Kinafalah ni Yis a Saˈopo hani?

¹³ Itini Piharatengan a Saˈopo, lalomaˈ no 1,000 a tamdaw, o komaenay to epang ato epah coka pakaala to 1 tamdaw. Itini adihayay kasakopang, awaay ko komaenay to tahapinangan a dafong. O tokel no ˈalomanay a tamdaw itiniay fafekang no sera a lakoing. Ano hatiraay i, hano mirienang cangra to Lafi no Tapang hani? O lalangian i malecaday to pirienang to pakaetimay no widang. Mirienang kita to pakaetimay, samanen sapaihkalaw to olah ato pidama toya faelohay mararamoday. Malecaday, mirienang to Piharatengan a Saˈopo ko roma lopayˈay siri, samanen sapaihkalaw cangra to olah ato pidama ci Kristoan ato salikaka ni Kristo. Roma i, mirienang toniya saˈopo ko roma lopayˈay siri, paihkalay to piakoˈid to kinafalah ni Yisan. Pakayniay kinafalah ni Yis, mansa ira ko toki nangra tahadaˈoc a maˈorip.

¹⁴ O roma kalimlaan a lalangian i midofdofay cangra to limoˈot ni Yis. Itini saka cecay pisikay to Lafi no Tapang, pasowalan ni Yis ko madimadiay tarokos saan: ‘Ka padadotoc kamo mihaen to demak a miharateng  takowanan.’ (1 Korinto 11:23-26) Mihaenay, ano iraho maˈorip ko salikaka ni Kristo toniya hekal, o roma lopayˈay siri padadotoc mirienang to Lafi no Tatapangan. Cowa konini aca, wa mitahidangho cangra to roma tamdaw malacafay a mirienang.

15. Wa ngaˈay kita samaan ko demak, itini Piharatengan a Saˈopo pakahemek to Kawas aci Kristoan?

¹⁵ Itini Piharatengan a Saˈopo, romadiw mitolon kita, wa ngaˈay pakahemek to Kawas aci Kristoan. Lalangian no aniniay miheca a kimad “Koˈiden ko Nano Demak no Kawas aci Kristo Tisowanan,” oniya kimad mamitongal to piakoˈid ita ci Yihofaan aci Yisan. Ano parakat to epang ato epah i, songilaˈen a miharateng, oniya tahapinangan a dafong mitaypiyaway to ˈirang ato tireng ni Yis. Miharatengho kita, tada maolahay ci Yihofa kitaanan, makahi pakayni kitaanan kinafalah to kaolahan a wawa Ningra, paira to tahadaˈocay a ˈorip ita. (Matay 20:28) Polong maolahay ci Yihofaan aci Yisan a tamdaw makalimay mirienang to Piharatengan a Saˈopo.

16. O manilnilay no fangcalay saocor a Krisciyang ato roma lopayˈay siri itini manan a pakayraan o malecaday hani?

¹⁶ Pakayni i Kawas, o manilnilay no fangcalay saocor a Krisciyang ato roma lopayˈay siri malecaday masakalimlaan, malecaday sano odoˈay. Hatiraay to, o mihadakan no Kawas a sapilidong toni tosa ˈopo tamdaw a sapiˈaca o malecaday, o ˈorip no kanonoˈan wawa Ningra. O sasiroma no tosa ˈopo a tamdaw coka hecad ko hatokel, misaaliay cangraanan madimadi to Kawas aci Kristoan. (ˈOlic 31:23) Haratengen, o pidemak no fangcalay saocor no Kawas i tireng no polong a tamdaw malecaday, sakoniya sowal, ano manan toko hatokel ita, pafeliay ci Yihofa kitaanan to misaalian ita a fangcalay saocor.

17. O maˈoripayho toniya hekal a manilnilay no fangcalay saocor a Krisciyang mihamhamay to maanan?

¹⁷ O manilnilay no fangcalay saocor a Krisciyang coka hofochan makalimay to tayra i kakarayan maˈorip. Oniya tokel o sapafeli no Kawas cangraanan. Wa micerid cangra miharateng to tokel noniyah, pakayni toniya tokel a mitolon, makalim milifok to sapalifon i kakarayan. Kawra wa samaan ko tireng nangra noikor, awaay ko pakayraan nangra miharateng. (Filipi 3:20, 21; 1 Yohani 3:2) Soˈlin mahaen, tada halamhamay cangra pakaˈaraw ci Yihofaan, ci Yisan, coyoh ato romaroma manilnilay no fangcalay saocor a Krisciyang, mihamhamayho to saaroˈan noniyah a matayal itini kakarayan no Hongti Kitakit.

18. Mihamhamay ko roma lopayˈay siri to maanan hani?

¹⁸ Misalimlaay ko roma lopayˈay siri to tokel no niyah tahadaˈoc maˈorip i fafekang no sera, hakelong no ˈorip no tamdaw iraay toko  hatiniay a kalim. (Patnakay 3:11) Mihamhamay cangra pala lakoing to polong no cikiw, mihamhamayho patireng to lomaˈ, mawmah to omah, palahad to wawa, tanektek toko tireng lipahak a lomahad ko wawa. (Isaya 65:21-23) Mihamhamay cangra sapihapinangaw toni serayan, minengnengto ˈakawangay a lotok, malohlohay a colin ato kakahaday a riyar, micekiw to misangaˈan ni Yihofa a maamaan. Sakakaay i, makalimay cangra sapitongalaw to kafanaˈ ci Yihofaan, matongal ko piingid cingraanan.

19. (1) Itini i Piharatengan to Kinafalah ni Yis a Saˈopo pairaay to toki no kahacecay a tamdaw samaan ko demak? (2) Aniniay miheca oniya saˈopo, wa ihacowa a tatokian misikay?

¹⁹ O kahacecay midokoay ci Yihofaan a tamdaw, iraay ko sapafeli Ningra makapahay a hatokel. (Yirimiya 29:11) Pakayniay ci Yihofaan aci Yisan, hato ngaˈay kita ira ko tahadaˈocay a ˈorip. Piharatengan to Kinafalah ni Yis a Saˈopo paira to hatoki no polong a Krisciyang, ngaˈay pakahemek Cangraanan, miakoˈid to demak Nangra kitaanan. Pakayni i polong a Krisciyang, o Piharatengan a Saˈopo o kalimlaan a saˈopo i lalomaˈ no cecay miheca. Itini 2021 Miheca, oniya saˈopo wa itini saka 3 Folad 27 Romiˈad Pieneman ikor no micerem ko cidal a misikay. Itini i cowacowa pala, iraay ko pasalat no ˈalomanay mirienang toniya kalimlaan a saˈopo, kawra micadaay to pisafelit ko roma tamdaw. O roma i itiniay i kapalitan mirienang toniya saˈopo. Ano samaanayto ko pakayraan ita, nanay haratengen ita o cecacecay a tamdaw, ci Yihofa, ci Yis, ato itiniay i kakarayan taˈangayay paro no lomaˈ no Kawas ciharatengay kitaanan. Nanay kahacecay kasakopang, kahacecay kapot, kita kahacecay tamdaw, kadofah a milifok to epoc to aniniay miheca a Piharatengan a Saˈopo.