O sakakaay ko salikaka ci Roken i sasepat a malikaka, itiniay i kaetip no Awtariya a niyaroˈ ko lomaˈ nangra. Pasangar ko sakaˈorip i saka 20 hahekalan 30 miheca i, mafanaˈayto cangra to soˈlinay kimad. Palidlid sanay palahad cingra to olah ci Yihofaan, 14 ko mihecaan micadaay to paputisem. Caka halafin mananamay ningra aka pinaˈay to sapatorod no Kawas a tayal. Kaemangho cingra i, iraay ko salikaka papiasipay cingranan to Mikecolay i kasaˈopoan, awaayho ko tatodong ako sanay cingra, hato minaˈayay. Kawra pasowalay ko salikaka cingranan: “Itini likakawa ni Yihofa ano ira ko tamdaw papidemak tisowanan, maedeng o iraay ko tatodong iso!”—2 Korinto 3:5.

Itiniay i Ikok kako ato wina ato fafahiyan kaka micada to soˈlinay kimad, salakat misafelitay ko wama, mataˈlif ko koˈdaway toki, ngaˈ micadaay cingra to soˈlinay kimad. Soˈlin caka pihai ko wama, kawra 10 ko mihecaan ako micadaayto paputisem. Patirengay kako to patosokan malo misakafahay, dotoc malo mikiriwiˈay manilnil a mitosilay. Kawra, ˈayaw no 21 ko mihecaan ako cowa pihai ko wama malo misakafahay, cowa ka sapitalaaw kako, itini 16 ko mihecaan, mihaiyayto ko wama, malinahay tayra i Awtariya malacafay to fafahiyan kaka maˈorip. Malinahayto cingra tayra. Ikor, 18 ko mihecaan, misatapangay kako misakafah.

 Itini Awtariya mafanaˈ kako to salikaka ci Rokenan, iraay ko malecaday patosokan niyam, mamalo mikiriwiˈay manilnil a mitosilay, matayal saki Yihofaan. 1951 miheca, mararamoday kami. Ikor no malacafay kami misakafah to tosa miheca, misatapangay to milisoˈay a tayal. O kilac niyam mahawpay ko kaetip no Awtariya, marariday kami milakowit to kakahaday awaay ko tamdaw a hadhad.

1954 miheca, matahidangay kami mirienang to 25 liyad a Kiliyat picudadan, o saka malo mikiriwiˈay manilnil mitosilay a tokel niyam, mamalaˈosito. Mikalic kami to tamina tayra i Niwyok, misatapang micudad, micalep a micekiw to Fangcalay Cudad. Oniya pihatatanam mahawpay ko pinanam to Sipanya a sowal, pakaynien i salikaka ci Rokenan, cowa ko madoloay, samanen cowa pakaala cingra to ‘r’ sanay a ngiha.

Itini picudadan a tatokian, pasowalay ko singsi to micudaday, cima ko maolah tayra i Dipong a matayal, ngaˈayay pangangan minanam tono Dipong a sowal. Harateng niyam o likakawa ni Yihofa ko misaˈosi to tatalacowa kami a matayal, mansa caka pangangan kami. Caka halafin, o singsi no Kiliyat ci Aipot Slawte mafanaˈay to cowa pangangan kami, sanay pasowal tamiyanan: “Saharateratengenho namo.” Cisasaay kami to cecay liyad. Ikor pasowalay aca ko salikaka ci Slawte: “Kako ato roma singsi patadoay tamowanan a pangangan, minengneng wa mafanaˈ ko sema namo somowal tono Dipong a sowal.” Soˈlinayto, madoloay ci Roken minamnam tono Dipong a sowal.

Itini 1955 miheca tahira kami i Dipong, itiya 500 ko mitosilay. 26 ko mihecaan ni Roken, 24 ko mihecaan ako. Maocoray kami tayra i ciminatoay a niyaroˈ no Senho, itira 4 miheca malo mikiriwiˈay manilnil mitosilay. Ikor, lipahakay kami miliyaw to milisoˈay to kasakopang a tayal. O kasakilac niyam itiniay i ngata no Mingkoo. Maolahay kami toniya katayalan, maolahay to itiraay salikaka, ˈaredetay kakaenen ato makapahay pala. Kawra caka halafin, iraay aca ko toki niyam paihkal to cowa pinaˈay ci Yihofaan.

Malo milisoˈay ko tayal niyam ikor no 3 miheca, milicayay ko Fenpo no Dipong tamiyanan makahi tayra i Taiwan hokira, padama to Amis a Yincumin. Itiya, iraay ko misafelitay to kimad a ˈicel, o Fenpo no Taiwan misaaliay to malaymayay tono Dipong a sowal a salikaka padama misaysay  toniya pasangaray. * Maolahay kami itini Dipong matayal, mansa o pasangaray koniya sasaˈosien. Kawra maharekayto ko salikaka ci Roken minanam eca pinaˈay to sapatorod ni Yihofa cingranan a tayal, mansa misaˈosiay kami tayra i Taiwan.

Itiniay kami 1962 miheca 11 folad tahini i Taiwan. Itiya 2,271 ko mitosilay, ˈalomanay o Amis a salikaka. O saka cecay hademak niyam minanam tono Kowaping a sowal. Soˈlin cecayay aca ko sapinanam niyam a cudad ato cowa ka fanaˈ tono Padaka sowal a singsi, kamayan mafanaˈ kami.

Tahini i Taiwan caka halafin, manilnilay ko salikaka ci Roken malo sikawdan no Fenpo. Itiya cowa ka taˈangay ko Fenpo, cowa ko pisaysay aca no salikaka ci Roken to tayal no Fenpo, to folafoladan ngaˈayayho malacafay to Amis a salikaka matayal to tolo a lipay. Roma i, ciˈinorongayho cingra tono kasapala kantok a tayal, mahawpay mikimad i pitaykayan. Tano Dipongen a sowal mikimad ko salikaka ci Roken, mafanaˈay ko Amis salikaka mitengil. Kawar, misaˈosiay ko sifo dengan tano Kowaping ko hasowal masaˈopo sanay. Mansa, Soˈlin cowa ka malaymay ci Roken tono Kowaping, tano Kowapingayho a mikimad, pacafayay ko salikaka mihongyak sano Amis.

Itiya makecengay ko Taiwan, milifok to pihayda no sifo ko salikaka ngaˈ ngaˈay misikay to taykay. Kawra, sapilifokaw to pihayda cowa ko madoloay, hanaca padeteng sanay ko dimeng a minayal, eca pafeli to pihayda a minkiw. O pitaykayan a tatokian ano caho kaala ko pihayda a minkiw, aaroˈ sanay ko salikaka ci Roken i dimeng mitala. Miharateng ko dimeng papitatala han ko roma kitakit a tamdaw, kangodoan sanay, mihaenay tada ciepocay koniya pakayraan.

Malacafay kami to salikaka matayal i pina lipay, marariday macokacok i lotok ato milakec to nanom, kalowa rakat cecayay anca pinaay tatokiyan. Maharatengayho ako sakina cecay macokacok i lotok. Caloh sanay malanam kami, ikor mikalic to lima kalitosa ko toki parakat a faso, tayra i mara:ayay a niyaroˈ, dotoc mitaˈlif to kakahaday a ˈalo, macokacokho i cecay lotok. Oniya lotok tada ˈapilisay, mansa o waˈay no kaˈayaway salikaka itiniayto i ˈaˈayaw no mata ako.

Toya papacem, malacafayay ci Roken to salikaka a mitosil, cecayay kako i kaemingay niyaroˈ misawacay, ono Dipong ko sowal no itiraay tamdaw. Tahini kalahokan cecay ko toki, mangata masekaˈ kako, samanen pinaayto a tatokian cowa ka komaen to dafong. Tiya malalitemoh kako ato salikaka ci Rokenan i, awaay ko roma salikaka i tihi ningra. Mialaay cingra to tolo mantaˈay a fitaˈol, tano casian a mifalic. Paˈarawayho cingra, itini tadimocokan no fitaˈol miofang, ikor selipen ko salang no fitaˈol. Soˈlin cowa ka samaan kaenen, mitooran ako midemak. Oya saka tolo a fitaˈol cimato ko komaenay hani? Kakoto, samanen mafanaˈay ko salikaka ci Roken, ano masekaˈ kako to cahiw, awaay ko ˈicel ningra mifafa takowanan malikelon i lotok.

Kinacecayay, ˈayaw no mirienang to kasakilac a taykay, malifaay ako ko mikiriwiˈay a  sapalifet. Milafinay kami i lomaˈ no salikaka, itiniay tihi no Hongti Kitakit kasaˈopoan. Harateng no Amis tamdaw kalimlaan ko maynoˈay a demak, mansa o fafahi no kasakilac kantok patadoay takowanan misaday to sakaynoˈ a lalosidan. ˈIfowaay ko salikaka ci Roken, kako ko saˈayaw a maynoˈ. Misadayan no fafahiyan salikaka ko cecay paetang kietecay nanom, cecay paetang ko faedetay nanom, iraho ko cecay fintang. Cowa ka harateng i, mitelian no salikaka i potal no fawahan koniya dafong, misiˈayaway to kasaˈopoan. Itiya ˈifowaay ko salikaka i kasaˈopoan misaday to tayakay. Misalian ako ko salikaka to cecay mengli, ˈarawhan o pafeseray maˈaraw a soka kiladom. Harateng ako malinah tayra lalikor no lomaˈ, calemcemay kako masadak ko kaciw mikalat takowanan. Ikor saan kako miharateng: “ˈIfowaay ko faˈinayan salikaka, cato ka pasayni minengneng to maynoˈay. Ano caka maynoˈ kako, cowa ko mamahemek ko salikaka. Inoˈ hanto!” Orato maynoˈayto kako.

Mahapinangay no salikaka ci Roken, pasangaray macakat ko Amis a salikaka i soˈlinay kimad, samanen cowa ka fanaˈ to tilid ko ˈalomanay nangra, hanaca awaay ko no Amis a cudad. Samanen satapang sanayho tano Lomaci to Amis a sowal, mihaenay salakatenho pasifanaˈ ko salikaka miasip. Pasangaray koniya tayal, kawra saikor mafanaˈayto ko salikaka miasip to cudad. Itini 1966 miheca, iraayto kono Amis mitepangan a cudad. Tahini 1968 miheca, misatapangay mitepang tono Amis a Mikecolay.

Kawra, mikecengay ko sifo to cowa kono Kowaping a cudad. Sapiliyasaw to fangafang, mitepangay kita to masasiromaay no Amis a Mikecolay. Tinakoan, ira ko cecay liyad, mitepangay kami to matatiriˈay no Kowaping ato no Amis a cudad, ano nengnengen i, hato pasifanaˈay tono Kowaping a tilid. Mikitiya misatapang, adihayayto ko mitepangan no likakawa no Kawas no Amis a cudad, padama to Amis a tamdaw minanam to Fangcalay Cudad.—Dmak 10:34, 35.

Adihayay a mihecaan, ˈalomanay Amis a salikaka cowa pitoor to palinian no Kawas a maˈorip. Samanen cowa ka songilaˈ ko kacipinang nangra to safalod no Fangcalay Cudad, o roma tamdaw  malafoay ko kaˈorip, milalasangay, mitamakoay, ato miˈicepay. Adihayay ko milisoˈan no salikaka ci Roken a kasakopang, misarocod a padama to salikaka samanay ko pinengneng ni Yihofa to mahaenay a waywayan. Itini cecay a pilisoˈ to kasakopang i, malifaay ko misowalan i ˈaˈayaw a pakayraan.

O misapoeneray ko falocoˈ a salikaka makahiay mifalic, ka adayayan i, cowa kakahi mihaen ko ˈalomanay tamdaw, telocto itini lalomaˈ no 20 mihecaan, o mitosilay no Taiwan mikitini 2,450 tamdaw, matefaday tahini 900 tatamdawan, tada ka adayayanto konini. Kawra mafanaˈay kita, cowa ko papalemeden ni Yihofa ko cowa kakorac a likakawa. (2 Korinto 7:1) Ikorto, cowato pidemak ko kasakopangay a tamdaw to mararaway a demak. Itini pipalemed ni Yihofa, o mitosilay no Taiwan no hatini mataˈlifayto ko 11,000 a tamdaw.

Ikor no 1980 miheca, malingaday ko kangaˈay no kasakopang no Amis, mansa ngaˈayto ko salikaka ci Roken adihay ko toki midimokos to kilac no Kowaping. Lipahakay cingra padama to faˈinay no fafahiyan salikaka malo Misawacayay Tamdaw ni Yihofa. Maharatengay ako, o pacekiwan no salikaka ci Roken sakinacecay mitolon ci Yihofaan i, tada mahemekay ci Roken. Malikoay kako ngaˈay padama to ˈalomanay maolahay to kimad a tamdaw miingid ci Yihofaan. Ikor malacafayay kako to faˈinayan ato fafahiyan a wawa no pacekiwan i salakat matayal i Fenpo no Taiwan, tada palipahakay takowanan.

Nikawrira, mapatayayto ko faˈinay ako nohatini. O kaolahan ako a faˈinay misemsemay to ekang to cecay liyad, saikor mapatayay i 2010 miheca 1 folad 1 romiˈad. Miemin cingra to toki matayal saki Yihofaan maedeng 60 miheca, mararamod kami madeng 59 miheca. Kamayan maˈilol kako cingranan, kawra kahemekan ako i, ngaˈay kami mararamod itini tosa kasemeran a kitakit matayal saki Yihofaan, micowat to mitosilay tayal. Mafanaˈay kami to tosa pasangaray nanamen a sowal no Asiya, idahiyay ko salikaka ci Roken, cowa ko somowal aca ningra, mafanaˈayho a mitilid.

Ikor no pina miheca, o Malohemay Malitengay i Congpo miharateng to katoˈas ako, malinah kako tayra i Awtariya, o sakangaˈay ako sanay. Salakatay maharatengay ako i, cowa ka sapiliyasaw kako to Taiwan. Kawra maharatengay ako ko sowal no salikaka ci Roken, tahadaˈoc aka pinaˈay to sapafeli no likakawa no Kawas a katayalan, mansa cowa pinaˈay kako. Ikor, mahapinangay ako tada inanengay koniya saˈosi.

Nohatini, itiniay kako i Katimol a Taypiyang Fenpo matayal. Pilipayan i, malacafayay kako to itiniay kasakopang mirienang to midokoay a tayal. Itini Pitil, mahemekay kako tano Dipong ato no Kowaping a sowal mikerid to tayniay minengneng a tamdaw. Mafanaˈay kako o mamaharateng ni Yihofa, oya tahadaˈoc cowa pinaˈay Cingranan a salikaka ci Roken, fanekfekay kako mihamham to pipatikolan ningra a maˈorip a romiˈad, miliyaw a malacafay cingranan.—Yohani 5:28, 29.