1-3. Pakayni i maanan masiˈayaway a pasangar tomangicay kita alatek?

 IHACOWAAY a tatokian kiso a tomangic hani? Nolatekay tahalosaˈay kita a mahemek, kawra marariday kita pakayni i kasomad a tomangic, tinakoen ano mapatay ko kaolahan ita a paro no lomaˈ ongong sanay a tomangic alatek. Itini i Padaka iraay ko cecay fafahiyan salikaka ci Loilay *, sanay cingra: “Ano maharateng ako ko patay no fafahiyan wawa i, tada adadaay ko falocoˈ ako a tomangic, ano samaanto cowa pilifok to sahinom. Oniya mapelaˈay a masomaday a falocoˈ ako, hano ngaˈayho padadotoc a tatemik hani?”

² Alatek wa pakayni i roma lalangian a tomangic kita. Itini i Dipong iraay ko cecay misakafahay fafahiyan salikaka ci Hiromi, sanay cingra: “Samanen mitosil i malitemohay a tamdaw caka olah a mitengil, tada marariday kako a matoled ko falocoˈ. Nolatekay tomangicay kako, pasayraho ci Yihofaan micangacang padama takowanan mahela ko mikilimay to soˈlinay kimad a tamdaw.”

³ Iraay ko kahecadan iso to i fafekangay a salikaka han? Kita ˈalomanay tamdaw iraayto. (1 Pitiro 5:9) Makalimay kita ‘kalipahak a midoko ci Yihofaan,’ kawra nolatekay tahatangicay tahalosaˈay kita midoko Cingranan. Samanen mapatay ko salawina ato widang, matoleday ko falocoˈ, anca tahacadaay to sapalifet ko ka madimadi, alatek tahalosaˈay kita. (ˈOlic 6:6; 100:2) Ano ira ko mahaenay a harateng ita, ngaˈay samaan ko pidemak hani?

4. Onini a lalakaw mamilengo to maanan hani?

⁴ Ngaˈayay kita mikitini i taˈarawan ni Yis adihay ko mananamay. Nolatekay cowa pakaˈemet to falocoˈ cingra, ‘marowisay ko losaˈ.’ (Yohani 11:35; Luka 19:41; 22:44; Hipray 5:7) Onini a  lalakaw mamilengo to icowaay a kitiraan cilosaˈ cingra, nengnengen mikitini ngaˈay mananam ita ko maanan. Mamananamho ita sasamaan misiˈayaw to pakasomaday palosaˈay kitaanan a demak.

5. Mikitini i Yohani 11:32-36 a maˈoningay, mamahapinang ita o masamaanay a tamdaw ci Yis?

⁵ Kongyen 32 miheca kasienawan, ngaˈayay widang ni Yis ci Lacarus adadaay mapatayay, tatosaay fafahiyan salikaka ningra ci Marta aci Mariya tada adadaay ko falocoˈ a tomangic. (Yohani 11:3, 14) Tada maolahay ci Yis to paro no lomaˈ nangra. Ikor no mapatay ci Lacarus, tayraay cingra i niyaroˈ nangra i Pitani. Matengil ni Marta ko sowal tayniay to ci Yis, comikayay a militemoh cingranan, sowal sa: ‘Tapangaw, ano narikayay kiso a tahini i, cowa ko mamapatay ko salikaka ako.’ (Yohani 11:21) Wa ngaˈay haratengen iso itiya hakowaay ko kasomad ni Marta han? Ikor militemohay ci Mariya ci Yisan, maˈaraw ni Yis cingra ato romaroma a tamdaw tomangicay, ‘rowis sanayto ko losaˈ.’—ˈOsien ko Yohani 11:32-36.

6. Hano tomangic ci Yis hani?

⁶ Itiya hano tomangic ci Yis hani? Sapicalep Mafanaˈ to Fangcalay Cudad sanay ko sowal: “Mapatayay ko ngaˈayay a widang ni Yis ci Lacarus, mararomay ko kaka ato safa ni Lacarus, maˈaraw ni Yis masomaday ko falocoˈ, ‘rowis sanayto ko losaˈ.’” * Maharatengay ni Yis alatek, o ngaˈayay a widang ci Lacarus pakayni i adada tada marorayay, ato samanay ko nafalocoˈan ningra i ˈayaw no mapatay. Roma i, maˈaraw ni Yis ci Marta aci Mariya pakayni i patay no salikaka tada adadaay ko falocoˈ, maedeng tada masomaday ci Yis. Ano iraay ko mapatayay a salawina iso, mamalecad ko nafalocoˈan iso, dotoc nengnengen ita ngaˈay kiso mikitini tonini a demak mananam ko maanan tolo a kalimlaan.

7. Pakayni ci Yihofaan, mikitini kita i kacilosaˈ ni Yis pakayni i widang, ngaˈay mahapinang ko maanan?

⁷ Cipinangay ci Yihofa to nafalocoˈan iso. Ci Yis ko ‘misongilaˈay a patalahkal to pinangan no Kawas.’ (Hipray 1:3) Mihaenay o noka  cilosaˈ ni Yis a demak pahapinangay kitaanan, ano mapatay ko salawina ita i, samaanay ko harateng ni Yihofa. (Yohani 14:9) Ano malahdaway ko salawina iso, papakasoˈlin kiso, mafanaˈay ci Yihofa hakowaay ko adada no falocoˈ iso, patadoayho tisowanan a masomad. O roma i, makalimay Cingra misayar to adada no falocoˈ iso.—ˈOlic 34:18; 147:3.

8. Hano ngaˈay kita pakasoˈlin papatikolen ni Yis paˈorip ko kaolahan ita a tamdaw?

⁸ Makalimay ci Yis patikol paˈorip to kaolahan iso a tamdaw. ˈAyaw no tomangic ci Yis i, mikiˈokay cingra ci Martaan: ‘O papatikol a maˈorip ko salikaka iso.’ Pakasoˈlinay ci Marta tonini. (Yohani 11:23-27) O madimadiay midoko ci Yihofaan a tamdaw cingra, maedeng mafanaˈayto ˈayaw no pina soˈot miheca na patikolan ni Iliya aci Ilisa paˈorip ko pina mapatayay a tamdaw. (1 Hongti 17:17-24; 2 Hongti 4:32-37) O roma i, tahatengilay cingra to pipatikol ni Yis paˈorip to mapatayay tamdaw. (Luka 7:11-15; 8:41, 42, 49-56) O ngangaˈay pakasoˈlin kiso, o mamiliyaw kiso a malacafay to mapatayay a salawina. Mikitini tonini a maˈoningay mahapinang ita, soˈlin mafanaˈay ci Yis to papatikolen no niyah paˈorip ci Lacarus, kawra mihinom ci Yis to masomaday a widang i kamayan marowis ko losaˈ, misawacayay konini to makalimay cingra patikol paˈorip to mapatayay a tamdaw.

9. Sasamaan kiso mitodong ci Yisan, padama to malahdaway ko salawina a tamdaw hani? Tinakoen mitadtad.

⁹ Ngaˈay kiso padama to malahdaway ko salawina a tamdaw. Ci Yis cowa ko kalacafay aca ci Martaan aci Mariyaan a tomangic, mihadidiayho a mitengil mihinom cangranan. O ngangaˈay kita mihaen a padama to malahdaway ko salawina a tamdaw. Itini Awtariya o cecay malohemay malitengay ci Taen, sanay cingra: “Ikor no mapatay ko fafahi i, tada misaaliay kako to sapadama no tao. Iraay ko papina mararamoday marariday mipalak to toki malacafay takowanan, ano hacowato a tatokian, makahiay cangra mitengil to sowal ako. Ano tada marawraw ko falocoˈ ako i, ngaˈay itini i kaˈayaw nangra tomangic, cowa ko mamangodo cangra. Pafeliay cangra takowanan to adihayay a sapadama, tinakoen, ano cowato kangaˈay kako misawsaw to tosiya, micakay to dafong anca mitangtang i, padamaay cangra takowanan midemak tonini a demak. O roma i, marariday cangra malacafay takowanan a mitolon. O soˈliˈlinay a widang ako cangra, o ‘malacafay misiˈayaw to pades’ a salikaka.”—Taneng 17:17.

10. Tadtaden ko maˈoningay a demak i Luka 19:36-40, ato dotoc mamifekad a demak.

¹⁰ Kongyen 33 miheca Nisan folad 9 romiˈad, tayraay ci Yis i Yirusalim. ˈAyaw no micomod cingra i niyaroˈ i, ˈalomanay ko tamdaw misikal to rikoˈ itini sera militemoh cingranan, mihayi to minilnilan no Kawas a hongti cingra. Tada lipahakay ko ˈalomanay tamdaw itiya. (ˈOsien ko Luka 19:36-40.) Mihaenay cowa ka harateng no nisawawaan ni Yis ko mamifekad a demak alatek. Sowal no Fangcalay Cudad: “Yo mangatato ni Yis ko Yirusalim i, tangic sa cingra a minengneng toya niyaroˈ.” Cilosaˈay cingra pairasol to finawlan no Yirusalim mamisiˈayaw to taˈangayay a padiing.—Luka 19:41-44.

11. Hano pakayni i finawlan no Yirusalim a tomangic ci Yis hani?

¹¹ Tada adadaay ko falocoˈ ni Yis, samanen mafanaˈay cingra, soˈlin ˈalomanay tamdaw lipahakay a militemoh cingranan, kawra ˈalomanay a finawlan cowa ka picada to milasilan ningra a lihaf no Hongti Kitakit. Mihaenay, o mamalaˈafo ko Yirusalim, o maˈosaway a tamdaw o mamalaholiw. (Luka 21:20-24) Ka adayayan i, mahaenay ko mifekaday a demak, ˈalomanay tamdaw mifalahay cingranan. Ano mitosil kiso i, samaanay ko harateng no malitemohay a  tamdaw hani? Ano cowa ka ˈaloman ko tamdaw minanam to soˈlinay kimad, ngaˈay kiso mikitini i kacilosaˈ ni Yis minanam to maanan hani? Iraay ko tolo a kalimlaan.

12. Pakayni ci Yihofaan, mikitini noka cilosaˈ ni Yis to finawlan a demak, mananam ita ko maanan?

¹² Tada ciharatengay ci Yihofa to tamdaw. O kacilosaˈ ni Yis pahapinangay kitaanan tada ciharatengay ci Yihofa to tamdaw, ‘cowa ka kahi Cingra malaˈafo ko cecay tamdaw, mitokelay pasasiyor ko cecacecay a tamdaw.’ (2 Pitiro 3:9) Ano ira ko cowa pisateked a harateng ita, padadotoc a padama to tao mafanaˈ to ngaˈayay lihaf, o paihkalayto kita soˈlinay a ciharateng cangranan.—Matay 22:39. *

13-14. Tada siniˈadaay ci Yis to tamdaw, mihaenay samaanay ko pidemak ningra? Ngaˈay kita samaan a minanam cingranan?

¹³ Misaˈicelay ci Yis a mitosil. Maolahay ci Yis to tao, mansa mimetmetay to toki pasifanaˈ cangranan. (Luka 19:47, 48) Hano misaˈicel cingra hani? Samanen siniˈadaay cingra to tamdaw. Nolatekay, ˈalomanay ko tamdaw mitengil to sowal ningra, telocto ‘awaay ko toki ni Yis ato nisawawaan a komaen.’ (Marko 3:20) Kinacecayay, iraay ko tamdaw itini i dadaya mikilim cingranan, makahiay cingra micada tonini a tamdaw. (Yohani 3:1, 2) Soˈlinay i, ˈalomanay mitengilay to pitosil ni Yis a tamdaw cowa pikotod cingranan, kawra misongilaˈan ni Yis misawacay ko kahacecay a tamdaw. Anini, makalimay kita patengil to ngaˈayay lihaf i tamdamdaw. Mihaenay o mamahecad kita ci Yisan makahi a mifalic to pakayraan no niyah a mitosil.—Dmak 10:42.

¹⁴ Makahi a misalof. Ano eca ka pifalic kita to toki a mitosil, papasangar malitemoh ko maolahay to lihaf a tamdaw. O misakafahay ci Matieta, sanay cingra: “Kako ato faˈinay itiniay cowa ka lecad a toki mitosil. Papacem tayraay kami i misasingdiay a kilac a mitosil. Tahira kalahokan, ˈalomanay ko tamdaw i maci, tano sapisawacay a paliding a misawacay kami. To dadaya, pakalomalomaˈay kami a mitosil, samanen oniya tatokian ˈalomanay ko tamdaw i lomaˈ.” Aka o kangaˈayan aca no niyah a tatokian ko piliˈen ita a mitosil, ao mamakahi a misalof, mipiliˈ to madoloay malitemoh ko  tamdaw a tatokian a mitosil. Ano mihaen ko demak ita, tada papakahemek ci Yihofaan.

15. Mikitini i Luka 22:39-44, itini ˈayaw no mapatay saikoray a dadaya midemakay to maanan ci Yis?

¹⁵ Kongyen 33 miheca Nisan folad 14 romiˈad a dadaya, tayniay i Kisimani ci Yis, mihadak to nafalocoˈan to kakarayan a Wama. (ˈOsien ko Luka 22:39-44.) ˈAyaw no mapatay cingra i salikoray a dadaya, itini tonini a pasangaray a tatokian, ‘ongong sa cingra a tomangic, micangacang a mitolon.’ (Hipray 5:7) O maanan ko micangacangan ningra i Kawas hani? Micangacangay cingra ci Yihofaan pafeli to ˈicel cingranan ho mitafo to madimadi, padama cingranan masongilaˈ ko pidoedo to araaw no kakarayan Wama a midemak. Matengilay ni Yihofa ko karoray no wawa a micangacang, orato miocoray to cecay a coyoh paˈicel cingranan.

16. Itini ci Yis i Kisimani i, hano ongong sa a tomangic?

¹⁶ Itini ci Yis i Kisimani a mitolon ongong sanay a tomangic o cecay lalangian i, maharatengay ningra o pakaditay to Kawas ko niyah sanay ko pinengneng no tao, tada pakasomaday konini cingranan. O roma a lalangian i, sapikoracaw to mapakaditay a ngangan no kakarayan Wama tada o karetengay a ˈinorong, taˈangayay ko saroero ci Yisan. Ano misiˈayaway kiso to sapalifet i, ano pasangaren kiso padadotoc madimadi ci Yihofaan, ngangaˈay kiso mikitini i kacilosaˈ ni Yis minanam to maanan hani? Dotoc nengnengen ita ko tolo a kalimlaan.

17. Pacaˈofan ni Yihofa ko mikifalocoˈay a pitolon ni Yis, mikitini tonini mananamay ita ko maanan?

¹⁷ Pacaˈofan ni Yihofa ko mikifalocoˈay a picangacang iso. Pacaˈofan ni Yihofa ko mikifalocoˈay a pitolon ni Yis, misamaanay hani? Samanen o kaciharatengan ni Yis i, o papadotoc madimadi ci Yihofaan, ato mikorac to mapakaditay a ngangan no Kawas. O kaciharatengan ita i, ano onini a tosa a demak, o papacaˈofen ni Yihofa ko satolon no mita.—ˈOlic 145:18, 19.

18. Ci Yis hano o mafanaˈay to harateng ita a widang han ko sowal?

¹⁸ Tada siniˈadaay ci Yis kitaanan. Ano macariraw eca ka rihaday kita i, ano ira ko mafanaˈay to harateng ita a widang i tatihi, maedeng o mamahemek kita. Onini a widang ano tahalifaay to malecaday a sapalifet, o ngangaˈay to malifok ita ko sahinom. O mahaenay  a widang ci Yis. Ihkalay ko kafanaˈ ningra ano malonay anca misaali to sapadama o masamaanay a nafalocoˈan. Cipinangayho cingra to iraay ko maanan a dangoc ita, o aitini ‘pisaalian ita to sapadama a tatokian’ padama kitaanan. (Hipray 4:15, 16) Itini ci Yis i Kisimani i, micadaay to sapadama no coyoh, malecaday cacadaen ita ko sapadama ni Yihofa kitaanan. Ano pakaynianto i cudad, ika, kimad, anca malohemay malitengay ato matenesay a widang padama kitaanan, o mamakahi kita a micada.

19. Ano micada to sapalifet ko madimadi iso i, o maanan ko papadama tisowanan tanektek a misiˈayaw? Tinakoen a mitadtad.

¹⁹ Papafeli ci Yihofa to “rihaday” tisowanan. Ano mitolon kita i, ‘papafeli ko Kawas to mataˈlifay no maharatengay no tamdaw a rihaday.’ Parihaday to falocoˈ ita, ihkal ko maharatengay, ngaˈayay patanektek. (Filipi 4:6, 7) Na iraay ko mahaenay a matinakoay ni Los, sanay cingra: “Marariday kako matoˈol, o hatiniay nafalocoˈan cowato ka olah ci Yihofa takowanan sanay ko harateng. Toniya tatokian, tangsolay kako pasowal to nafalocoˈan ako Cingranan. O satolon soˈlinay padama takowanan miˈimer to harateng no niyah.” O nalifetan ni Los paihkalay, o satolon ngaˈay padama kitaanan milifok to rihadayay.

20. Mikitini i kacilosaˈ ni Yis mananamay ita ko maanan kalimlaan a kimad?

²⁰ Mikitini i kacilosaˈ ni Yis adihayay ko mananamay ita kalimlaan a kimad, tada mitemeray to falocoˈ. Mananamay ita, ano malahdaw ko salawina no salikaka i, o mamihinom kita cangranan, ano malahdaw ko salawina ita i, pakasoˈlinen to mamidama ci Yihofa aci Yis kitaanan. Tada siniˈadaay ci Yihofa aci Yis to tamdaw, mihaenay papairaen ita ko siniˈadaay a falocoˈ misaˈicel mitosil pasifanaˈ to tamdaw. Mafanaˈ to cipinangay ci Yihofa aci Yis to nafalocoˈan ita, siniˈada to kalonay ita, hanaca o papadama kitanan padadotoc a mihadidi, mafanaˈ tonini a soˈlinay kimad tada parihadayay to falocoˈ ita. Nanay padadotoc kita misaka dademak to mananamay, tahira pisongilaˈan ni Yihofa palaˈosi to sakiˈok no Niyah, itiya o sasisiten Ningra ko ‘kahacecay a losaˈ’ no mita.—Paˈarawan 21:4.