1. Misiˈayaway ci Tafiti to maanan pasangaray?

 MILALIWAY ci Tafiti, samanen o hongti no Israil ci Sawlo sapipatayaw cingranan. Itini pilaliw awaay ko kakaenen ni Tafiti, orato micomoday i niyaroˈ no Nop micangacang to saysi pafeli to lima a epang cingranan. (1 Samuil 21:1, 3) Ikor, ci Tafiti ato sikawdan milimekay i cecay ofang no lotok. (1 Samuil 22:1) Hano sahatini sato ko pakayraan ni Tafiti hani?

2. Ci Sawlo hano o niyah ko mikidatay to sakatekop hani? (1 Samuil 23:16, 17)

² Maolahay ko finawlan ci Tafitian, marariday pakalowid milood, pakayniay ko kaˈinap ni Sawlo ci Tafitian. Mafanaˈay ci Sawlo, pakayniay pitowakang ningra hato mifalahan ni Yihofa cingra, hanaca mipiliˈ ci Tafitian mikotay cingranan malo hongti no Israil. (ˈOsien ko 1 Samuil 23:16, 17.) Kawra, o hongti ho no Israil ci Sawlo itiya, iraay ko ciˈicelay a sofitay ningra, ˈalomanayho ko midamaay cingranan, mansa milaliw ci Tafiti. Harateng ni Sawlo wa ngaˈay ko niyah misafelit to araaw ni Yihofa, eca pala hongti ci Tafitian han? (Isaya 55:11) Cowa ka somowal ko Fangcalay Cudad, kawra ngaˈayay pakasoˈlinen, mihaen ko demak ni Sawlo mikidatay to sakatekop no niyah, samanen o mitowakangayho ci Yihofaan a tamdaw, saikor o papasokiyaw maemin.

3. Soˈlin pasangar ko pakayraan, kawra iraay ko maanan a nafalocoˈan ni Tafiti hani?

³ Ci Tafiti cowa ko maˈanofay ko falocoˈ a tamdaw. Cowa ko cingra ko makalimay mala hongti no Israil tamdaw, o ci Yihofa ko mipiliˈay cingranan mala hongti. (1 Samuil 16:1, 12, 13)  Kalaˈada hananay ni Sawlo ci Tafiti a minengneng. Kawra cowa ka piloloh ci Tafiti ci Yihofaan paira to katalawan ningra, cowa ka pakayni ka awa no kakaenen ato itini saan i ofang no lotok ko kitiraan a ngaliwngiw. Cowa ka hatini aca, o ˈOlic 34 fedengan ci Tafiti ko mitiliday i ofang no lotok alatek. Ilalomaˈ mahawpay ko lalangian a sinael nonini a lalakaw: ‘Milongocay ci Yihofaan a tamdaw, cowa ka cangoˈot ko sapalemed.’—ˈOlic 34:10.

4. Onini lalakaw mamilengo to maanan a salicay? Onini a pina a salicay hano masakalimlaan?

⁴ Anini na tahalifaay ko ˈalomanay salikaka to kacangoˈot no kakaenen ato sakaˈorip, mangalef itini kalifongan a tatokian. * Mangatamangataay ko ‘taˈangayay padiing,’ aikaka ko mamalifa ita a pasangaray. (Matay 24:21) Mihaenay o haharatengen ita ko laenoay a salicay: Hano pasowal ci Tafiti ‘cowa ka cangoˈot ko sapalemed?’ Hano maminanam kita mafanaˈ a marenec ko falocoˈ? Hano ngaˈay pakasoˈlin kita to dadimokosen ni Yihofa kita? Sasamaan kita talaˈayaw misaday to hanoikor?

5-6. Sowal ni Tafiti o sikawdan no Kawas ‘cowa ka cangoˈot ko sapalemed,’ o ˈOlic 23:1-6 samanay padama kitaanan cipinang to tatodong nonini a sowal?

⁵ Sowal ni Tafiti o sikawdan ni Yihofa ‘cowa ka cangoˈot ko sapalemed,’ o maanan ko tatodong nonini hani? Itini ˈOlic 23 fedengan iraay ko malecaday a sowal, asipen ita konini a ˈOlic o mamahela ko caˈof. (ˈOsien ko ˈOlic 23:1-6.) Itini satapang no ˈOlic 23 fedengan sanay ci Tafiti: ‘Ci Yihofa o pakaenay takowanan, awaay ko kacangoˈotan ako.’ Dotoc somowalay ci Tafiti, samanen iraay ci Yihofa malo pakaenay no niyah adihayay ko malifokay a sapalemed, onini a sapalemed tada ciepocay ino kaˈorip ningra. Tinakoen mikayatan ni Yihofa cingra ‘romakat to moecelay a lalan,’ ano ngaˈay anca tatiihay ko pakayraan madimadiay a midama cingranan. Mihaiyay ci Tafiti, soˈlin itini ‘kandaway ko rengos a omah’ ni Yihofa a maˈorip cowa ka dipayal.  Latekay matoleday cingra, malecaday o ‘romakatay i toˈemanay a fideloan.’ Roma i, ˈintehay ko ˈada cingranan. Kawra o pakaenay ningra ci Yihofa, mansa ‘cowa ka talaw madokaˈ’cingra.

⁶ Nohatini cipinangayto kita sowal ni Tafiti ‘cowa ka cangoˈot ko sapalemed’ ningra, o maanan ko tatodong? Cowa pisaali cingra to adihayay dafong ngaˈ lipahak, ano hakowato ko sapafeli ni Yihofa cingranan, marenecay cingra. Pakaynien ci Tafitian ko sowal, sakakaay i, milifok to sapalifon ato sadipot ni Yihofa, hanaca ngaˈay padotoc miingid ci Yihofaan. Tonini a pakayraan soˈlinay awaay ko kacangoˈotan ni Tafiti.

7. Mikitini Luka 21:20-24, saka 1 hahekalan itiniay Yutiya a Krisciyang misiˈayaway to maanan a sapalifet?

⁷ Mikitini i sowal ni Tafiti mahapinangay ita, ira ko matatodongay pinengneng to pakadafongay tada kalimlaan. O ngangaˈay kita misaka dademak to dafong no niyah, kawra cowa ka ngaˈay malo sakakaay i nokaˈorip ita. Pakaynien i saka 1 hahekalan a Yutiya Krisciyang ko sowal, cipinang tonini o kalimlaan. (ˈOsien ko Luka 21:20-24.) Na mirikecay ci Yis, o ‘mamaˈaraw nangra ko sofitay pakopang i taliyok no Yirusalim niyaroˈ,’ itiya ‘o mamilaliw cangra tayra i lotok.’ Mihaen ko demak nangra o mamadipot ko ˈorip, kawra o mamifalah to adihayay a dafong. Sowal no Mikecolay i saˈayaw sanay: “Hayi sanay cangra miliyas to omah ato lomaˈ, cowa ka pinokay milosimet to dafong. Tanektekay ko pakasoˈlin nangra o papafeli ci Yihofa to sadipot ato sadama cangranan, hanaca makahi paisalakat to midokoay Cingranan a demak itini kihcod a demakan.”

8. Mikitini nalifetan no saka 1 hahekalan Yutiyaay Krisciyang mananam ita ko maanan?

⁸ Mikitini nalifetan no saka 1 hahekalan Yutiyaay Krisciyang mananam ita ko maanan? O masowalay i fafekang a lalakaw no Mikecolay sanay: “Pakayni pinengneng ita to dafong, o aira ko sapalifet noikor. O pakadafongay o kalimlaan han? Anca o sakalidong no midopoay to Kawas a tamdaw ko ikakaay kalimlaan? Hatiraayto, sapidofdofaw to limoˈot a milaliw, o mamihadidi kita to adihayay roray alatek. Itini saka 1 hahekalan, tanektekay ko paihkalan no salikaka ita a harateng, mikitini Yutiya milaliw tayra i lawac no Yortan ˈAlo a Pilia. Ano kitato cowa ko tatangoˈol to dafong, tatangsol a mitengil to limoˈot ni Yis.” *

9. Mikitini sapalimoˈot ni Pawlo to Hipray Krisciyang malifok iso ko maanan sapakalalok?

⁹ Ngaˈay maharateng iso ko itiyaay a Krisciyang mamifalah to kihcod, misatapang to faelohay a kaˈorip hakowaay ko pasangar han? Misaaliay cangra to tanektekay a pakasoˈlin, hoeca ka cisasa to mamidimokos ci Yihofa to sakaˈorip nangra. Kawra, itini tonini a demak milifokay cangra to sapadama. Itini ˈayaw no miˈalikot ko sofitay no Loma to Yirusalim to lima miheca, mihadakay ci Pawlo to kalimlaan sapaini i Hipray a Krisciyang, sanay cingra: “Aka kao maˈanofay to payso ko demak namo, maedeng kako tonini a iraay a dafong ako han ko falocoˈ. Na somowalay ko Kawas: ‘Caay pifalah Kako tisowanan, caay piliyas Kako tisowanan.’ Mihaenay, ngaˈay timolo kita a somowal: ‘Ira ci Yihofa padama takowanan, caay ko mamatalaw kako. Ngaˈay ko tamdaw misamaan takowanan saw?’” (Hipray 13:5, 6) O midofdofay to limoˈot ni Pawlo a Krisciyang, maedeng madoloay kantang ko kaˈorip i faelohay kitiraan, samanen pakasoˈlinay cangra o papafeli ci Yihofa to kihcod sakaˈorip nangra. Anini,  wa ngaˈay kita mikitini sowal ni Pawlo milifok to sapadama, palahad to malecaday a pakasoˈlin.

10. Pasowalay ci Pawlo kitaanan to maanan pakayraan a midemak?

¹⁰ Na mihadakan ni Pawlo ci Timotian ko malecaday a sapalimoˈot, onini a sapalimoˈot ciepocay kitaanan. Sanay ci Pawlo: ‘Mihaenay, ano ira ko rikoˈ ira ko kakaenen, karenecto.’ (1 Timoti 6:8) Sakoniya sowal cowa ka ngaˈay kita komaen to ˈaredetay kakaenen, makapah ko lomaˈ, aka mararid micakay to faelohay rikoˈ han? Cowa ka mahaen ko tatodong ni Pawlo. O tatodong ningra i, ano hakowato ko iraay no mita, o mamarenecen. (Filipi 4:12) Onini ko ‘pakayraan a midemak’ ni Pawlo. Pakaynien kitaanan, sakakaay kalimlaan a hafay o kalawidang ita ci Yihofaan, cowa ko iraay ita a dafong.—Hapakuk 3:17, 18.

11. Pakayni marenecay mikitini i sowal ni Mosi to Israil tamdaw mananam ita ko maanan?

¹¹ Pakayni o maanan ko kalimlaan a dafong, o harateng ita cowa kalecad toni Yihofa alatek. Malafel ko Israil i kohkoh to 40 miheca ikor i, pasowalan ni Mosi cangra, sanay cingra: ‘O Kawas iso ci Yihofa itini kihcod nano demak iso maharekayto palemed tisowanan. Mafanaˈay Cingra samanay kiso romakat tonini a kakahaday kohkoh. Tonini a 40 miheca, o Kawas iso ci Yihofa padotocay mikapot tisowanan, awaay ko kacangoˈotan iso.’ (Limoˈot 2:7) Itini 40 miheca, pafelian ni Yihofa ko Israil tamdaw to kakaenen a mana, oya miˈorongan nangra nai Icip a rikoˈ cowa ka macicih.  (Limoˈot 8:3, 4) Harateng no roma tamdaw cowa ka adihay ko sapafeli ni Yihofa sanay, kawra patalipaˈelalan ni Mosi cangra, iraayto maemin ko misaalian nangra. Ano mafanaˈay a marenec kita, soˈlin caka adihay ko sapafeli no Kawas a dafong, o mamiakoˈid ko falocoˈ ita, minengneng tonini o mikitiraay Cingranan a sapalemed. Mihaen, o lalipahakto ko falocoˈ Ningra.

12. Hano mafanaˈ kita ci Yihofa ko mitadiˈecan ni Tafiti, cowa ko niyah hani?

¹² Mafanaˈay ci Tafiti o madimadiay a Kawas ci Yihofa, tada ciharatengay to maolahay Cingranan a tamdaw. Mitilid ci Tafiti to ˈOlic 34 fedengan i, katalawan ko pakayraan, kawra pakayni pakasoˈlin, maˈaraway ningra ko ‘coyoh ni Yihofa’ itiniay i taliyok ningra ‘pakopang.’ (ˈOlic 34:7) Palinian ni Tafiti ko coyoh to pakopangay i papotal a sofitay alatek, onini a sofitay miceriday misinanot to kasadak no ˈada. Soˈliˈlin o timoloay a sofitay ci Tafiti, mikiˈokayho ci Yihofa mamala hongti cingra noikor, kawra cowa pitadiˈec cingra to pacingko anca o fonos a milowid to ˈada. (1 Samuil 16:13; 24:12) Mitadiˈecay ci Tafiti ci Yihofaan, pakasoˈlinay o mamilidong ko coyoh to mangodoay ci Yihofaan a tamdaw. Manaokaniw cowa ko mamilongoc kita midemak ci Yihofa to kafahkaan a midipot kitaanan nohatini, kawra mafanaˈay kita o mitadiˈecay ci Yihofaan a tamdaw soˈlin mapatay nohatini, o mamilifok to midaˈocay ˈorip noikor.

13. Ano miˈodis ko Makok a Kok i, nengnengen kita hano kantangay lowiden? Kawra hano cowa ko mamatalaw kita? (Nengnengen ko papotalay a coka.)

¹³ Cato ka halafin noikor, o pakasoˈlin ita to Kawas mamicada to pakidemay a sapalifet. O Makok a Kok (o makomoday a kalo kitakit) mamiˈodis to finawlan no Kawas. Itiya, iraay ko katalawan no ˈorip wa saan kita miharateng alatek. Kawra pakasoˈlinen ita iraay ko ˈicel no Kawas hanaca o mamilidong kitaanan. Itini pinengneng no kalo kitakit, malecaday kita o awaay ko midipotay a lopayˈay siri. (Icikil 38:10-12) Awaay ko sapilood a lalosidan, cowa ka fanaˈ milood, harateng no kalo kitakit sapilowidaw kitaanan o madoloay saan. Cowa pakasoˈlin cangra to Kawas, cowa pakahapinang itiniay i tatihi ita ko coyoh pakopang, misadayay a midipot kitaanan, mihaenay ano mihadak to kamay ko coyoh a milidong kitaanan i, tataˈangay ko kacekid nangra.—Paˈarawan 19:11, 14, 15.

14. Sasamaan kita talaˈayaw misaday to hanoikor?

¹⁴ Nohatini sasamaan kita talaˈayaw misaday to hanoikor hani? Salakat ira ko matatodongay pinengneng to pakadafongay, samanen noikor o fafalahen ita ko kihcod alatek. Minanamho kita marenec, misaˈicel mitongal to kalawidang ci Yihofaan, hanaca mikitini milifok to sataˈangayay a lipahak. Ano matongal ko kafanaˈ ita to Kawas mamatongal ko pakasoˈlin, ano miˈodis ko Makok a Kok i, o mamidipot ko Kawas kitaanan.

15. O maanan a nalifetan padamaay ci Tafitian pakasoˈlin to cowa ko papatoleden ni Yihofa cingra?

¹⁵ Liyawen ita miharateng ko nalifetan ni Tafiti, sanay ci Tafiti: ‘Katayni mitanam to sidaˈit no Tatapangan, o mamafanaˈ to ngaˈayay ci Yihofa, o milongocay to sadipot Ningra a tamdaw tada malemeday!’ (ˈOlic 34:8) Mitadtaday konini a sowal, hano pakasoˈlin ci Tafiti to mamidama ci Yihofa cingranan. Padotocay ci Tafiti mitadiˈec ci Yihofaan, ci Yihofa saan cowa pakatoled cingranan. Tinakoen, kaemangay a Tafiti milood ci Koliyatan i, pasowalay cingranan: ‘Anini a romiˈad,  papafelien ni Yihofa kiso i kamay no mako.’ Telocto, soˈlinay malowid ningra konini a ciˈicelay Filistin a tamdaw. (1 Samuil 17:46) Ikor matayal ci Tafiti saki Sawloan i, kinapinaay sapipatayaw ci Sawlo cingranan, kawra ‘mikapotay ci Yihofa ci Tafitian’ mansa cowa ka laˈosi ci Sawlo. (1 Samuil 18:12) Onini a nalifetan padamaay ci Tafitian a pakasoˈlin, o papadamaen ni Yihofa cingra miremo to malifaay a sapalifet.

16. ‘Sapitanamaw’ kita to kangaˈay ni Yihofa, sasamaan ko pidemak?

¹⁶ Ano mararid kita pasayra ci Yihofaan milongoc to sakayat nohatini, mamatongal ko pakasoˈlin ano misiˈayaw to sapalifet noikor i, iraay ko ˈicel Ningra padama kitaanan. Tinakoen, sapirienangaw kita to taykay, anca adihay ko pitosil ato mirienang to polong saˈopo, misaali to tawki misalof to katayalan ita a toki, toniya tatokian misaaliay kita to tanektekay a pakasoˈlin, hanaca makahi a mitadiˈec ci Yihofaan. Ano eca pihayi ko tawki, pasawad kitaanan a matayal, papakasoˈlin kita ci Yihofaan, cowa ko mamifalah kitaanan, miliyas kitaanan, pakasoˈlin Cingranan o mamidimokos to sakaˈorip no mita han? (Hipray 13:5) ˈAlomanay mieminay to toki matayal a salikaka tahatinakoay, itini pisaalian nangra a tatokian samaanay padamaay ci Yihofa. O madimadiay a Kawas ci Yihofa, cowa ko papakatoled Cingra kitaanan.

17. O pakamihecaay sinael 2022 miheca o maanan? Onini a sinael patalipaˈelalay kitaanan samaan ko pidemak?

¹⁷ Ini itihi ci Yihofa, ano o maananto a demak ko mifekaday noikor, cowa ko mamatalaw kita. Edeng padadotoc kita isalakat micangacang to Hongti Kitakit, cowa ko mamiliyas ci Yihofa kitaanan. Sapatalipaˈelalaw kitaanan talaˈayaw misaday to mamalifa a sapalifet noikor, o papakasoˈlin to cowa ko mamiliyas ci Yihofa kitaanan, o Malohemay Malitengay i Congpo mipiliˈay to ˈOlic 34:10 malo 2022 pakamihecaay a sinael: ‘Milongocay ci Yihofaan a tamdaw, cowa ka cangoˈot ko sapalemed.’