1. Sasamaan kita ngaˈay mipalak to toki kalacafay ci Yihofaan hani?

 MAOLAHAY ko kahacecay tamdaw mipalak to toki kalacafay to ciharatengay to niyah a tamdaw. Tinakoen, makakaolahay a raramod makahiay mipalak to toki malacafay, o kapah maolahay malacafay to ngaˈayay a widang no niyah, maolahayho kita to kalacafayan to salikaka a tatokian. Kawra o sakakaay kaolahan ita a pipalak to toki kalacafay to Kawas ci Yihofaan. Pasayra Cingranan mitolon, micekiw to Kimad Ningra, hanaca midotim to araaw Ningra ato makapahay a capeling Ningra. O kalacafayan ci Yihofaan a tatokian soˈlinay o kalimlaan konini!—ˈOlic 139:17.

2. Misiˈayaway kita to maanan a pasangaray?

² Soˈlin maolahay kita mipalak to toki kalacafay ci Yihofaan, kawra cowa ko madoloay mihaen to demak. O kaˈorip ita tada ˈifowaayto, mansa mamisaˈicel ngaˈ ngaˈay milimasmas to toki mirienang to midokoay to Kawas a tayal. Katayalan, ˈinorong no paro no lomaˈ ato roma adihayay a dademaken a tayal maˈafasay ko adihayay a toki ita, telocto pasangaray to kita mihadak to toki mitolon, micekiw ato midotim.

3. Iraayho ko maanan a demak mamiˈafas to toki ita hani?

³ Roma i, o roma demak hato cowa ko mararaway, kawra ano eca ka pinaˈon kita, mamiˈafas to toki ita, onini a toki na saka dademaken a miingid ci Yihofaan. Tinakoen, marariday kita mifalic to pakayraan a maˈorip, mirienang to pina ngaˈayay a lawla, ngaˈay pasinoway to tireng ato falocoˈ ita. Kawra ano adihay ko toki ita a milawla, wa cangoˈot ko toki ita miingid to Kawas. Haratengen, o lawla cowa ko kalimlaan ita i nokaˈorip.—Taneng 25:27; 1 Timoti 4:8.

4. Onini a lalakaw mamilengo to maanan hani?

 ⁴ Onini a lalakaw mamilengo to hano mamihapinang kita to kalimlaan. Mamilengoho kita sasamaan ko demak ngaˈay misongilaˈ misaka dademak to toki miingid ci Yihofaan, ato mihaen to demak ngaˈay milifok to maanan a epoc.

5. O sapalimoˈot no Ifiso 5:15-17 hano ngaˈay padama to kapah mipiliˈ to sangaˈayay a lalan no kaˈorip?

⁵ O sangaˈayay a lalan no kaˈorip ko mipiliˈan. O kapah tamdaw makalimay lipahak ko kaˈorip no niyah. Roma i, o picudadan a singsi ato cowa pidoko to Kawas a paro no lomaˈ mitokelay cangranan micangacang to ˈakawangay a picudadan, mihaen ngaˈay mietan to adihayay a payci tonini hekal. Kawra micangacang to ˈakawangay a picudadan mamiˈafas to adihayay a toki. Roma i, o Krisciyang a wama wina ato salikaka i kasakopang pakalalokay to kapah patafang to hakelong no kaˈorip no niyah matayal ci Yihofaan. O maolahay ci Yihofaan a kapah sasamaan ngaˈ inaneng ko mipiliˈan hani? Ngaˈay cingra minengneng to Ifiso 5:15-17. (ˈOsien.) Itini pidotim i licayen ko niyah: “O maanan ko araaw ni Yihofa hani? O maanan ko piliˈen ako ngaˈay pakahemek ci Yihofaan hani? Mipiliˈ to maanan a lalan ngaˈay misongilaˈ misaka dademak to toki hani?” Haratengen, aniniay a lintad tada mariˈangay, o mikowanan ni Satan a hekal cato ka halafin mamalaˈafoto. Mihaenay, ano songilaˈen no kapah misaka dademak to kaˈorip no niyah palahad to tangongolay a kalawidang aci Yihofaan, o inanengay a mipiliˈan.

6. O maanan ko mipiliˈan ni Mariya? O mipiliˈan ningra hano inanengay hani?

⁶ Hapinangen ko kalimlaan. Nolatekay, o midemakan ita a demak cowa ko mararaway, kawra matatodong ko mipiliˈan ita ngaˈ ngaˈay misongilaˈ misaka dademak to toki. Itini ci Yis i lomaˈ ni Marta aci Mariya palafang a tatokian mifekaday a demak ngaˈay mitadtad tonini. Hinapaladaˈay a Martaan mahemekay micada ci Yisan, orato ˈifowaay a misaday to kadofahay a kakaenen. Kawra mametay to toki ci Mariya maroˈ i kaˈayaw ni Yis mitengil to sapasifanaˈ ningra. Ngaˈayay ko harateng ni Marta, kawra ‘mipiliˈay to safangcalay’ ci Mariya. (Luka 10:38-42) Ikor mapawanayto ci Mariya o maanan ko mikaenan a kakaenen itiya alatek, kawra caay ka mapawan cingra to mananamay ci Yisan a kimad. Misalimlaay ci Mariya to kalacafay ci Yisan a tatokian. Malecaday misalimlaay kita to kalacafayan ci Yihofaan a tatokian. Mihaenay, sasamaan ko demak ita ngaˈ ngaˈay misongilaˈ misaka dademak tonini a tatokian hani?

7. O mitolon, micekiw ato midotim hano tada kalimlaan hani?

⁷ Haratengen, mitolon, micekiw ato midotim sahtoay o kalimlaan a demak midoko. Tada maolahay ci Yihofa kitaanan, ano mitolon kita o masasowalay Cingranan. (ˈOlic 5:7) O pipowalan no taneng Cingra, ano micekiw kita i, o minanamay to pakayniay Cingranan a sifanaˈ. (Taneng 2:1-5) Ano midotim kita i, mamisongilaˈ miharateng to kasemeran a capeling Ningra, ato kasapaan a araaw Ningra i kahacecay a tamdaw ato polong a tamdaw. Midemak kita tonini a demak, o misongilaˈayto misaka dademak to toki. Mihaenay, samaan ko demak ita ngaˈay i cowa ka adihay a tatokian milifok to taˈangayay a epoc hani?

8. Mikitini nalifetan ni Yis i kohkoh ngaˈay kita minanam to maanan hani?

⁸ Mipiliˈ to awaay ko adeses a kitiraan.  Nengnengen ko taˈarawan ni Yis. ˈAyaw no misatapang midemak to mitosilay a tayal i, cecayay cingra itini kohkoh to 40 romiˈad. (Luka 4:1, 2) Itini i awaay ko adeses a kitiraan, pasayraay ci Yihofaan mitolon cingra, hanaca micalepay misimsim to araaw no kakarayan Wama cingranan. Mihaen to demak maedeng padamaay cingranan misaday misiˈayaw to aira a sapalifet. Mananamay ita ko maanan? Ano itiniay kita i taˈangayay a paro no lomaˈ maˈorip, pasangaray mahela ko awaay ko adeses a kitiraan alatek. Toniya tatokian, ngaˈay kita itini i papotal mikilim to matatodongay a kitiraan. Ano mitolon ci Coli ci Yihofaan i, mihaenay ko demak. Cingra ato faˈinay itiniay i Frans mimingay a lomaˈ, pasangaray ira ko toki a cecay awa ko mikalisangaay. Sanay cingra: “To romiˈamiˈad tayraay i kongyen kako romakat. Mihaen, ngaˈayto kako cecay misarocod pasayra ci Yihofaan mitolon.”

9. Soˈlin tada ˈifowaay ci Yis, kawra samaanay cingra paihkal to tada misaaretengay cingra minengneng to kalalaˈed aci Yihofaan?

⁹ Tada ˈifowaay ko kaˈorip ni Yis. Itini fafekang no sera cingra midemak to mitosilay a tayal i, ano talacowato, iraay ko taˈangayay ˈopo a tamdaw mihakelong cingranan, makalim mipalak cingra to toki padama cangranan. Kinacecayay, polong a finawlan no niyaroˈ tayraay ci Yisan, ‘malisopsopay i kaˈayaw no fawahan.’ Soˈlin mahaen ko pakayraan, kamayan ci Yis mipalak to toki pasayra ci Yihofaan mitolon. Ecaho ka taengad ko romiˈad lomowaday to cingra, “miliyas to lomaˈ a masadak,” mihaen ngaˈayto cingra cecay a kalacafay ci Yihofaan.—Marko 1:32-35.

10-11. Mikitini Matay 26:40, 41, itini i Kisimani ci Yis palimoˈotay to nisawawaan samaan ko pidemak hani? Kawra samaanay ko teloc hani?

¹⁰ ˈAyaw no mahererek ko mitosilay a tayal i, miliyaway ci Yis mikilim to awaay ko adeses a kitiraan, mamisongilaˈ mitolon ato midotim. ˈAyaw no mapatay cingra i salikoray a dadaya, tayraay cingra i Kisimani. (Matay 26:36) Itiya, pasayraay cingra i nisawawaan mihadak to milingatay to mitolonay a kalimlaan a limoˈot.

¹¹ Haratengen ko mifekaday a demak itiya. Tahira cangra i Kisimani i o dadayato, mataˈlifay to ko lafii alatek. Pasowalan ni Yis ko tarokos malacafay cingranan a “mikecol,” ikor tayraay i ngata a pala mitolon. (Matay 26:37-39) Kawra itini pitolon ningra i, mafotiˈay ko tarokos. Maˈaraw ningra mafotiˈay cangra, miliyaw palimoˈot cangranan ‘ka padadotoc mikecol, padadotoc mitolon.’ (ˈOsien ko Matay 26:40, 41.) Mafanaˈay cingra taˈangayay ko saroero no tarokos, hanaca tada marorayay. Patadoay cangranan miharateng cingra, sanay: ‘Faedetay ko falocoˈ, kawra malonayay ko tireng.’ Ikor, kinatosaay aca ci Yis mitolon, kawra ano patikol cingra i maˈaraway ko kafotiˈ nangra, cowa ka pitolon.—Matay 26:42-45.

12. Ano taˈangayay ko saroero saan ko harateng ita anca tada marorayay hato awaay ko pakayraan mitolon, sasamaan ko demak hani?

 ¹² Piliˈen ko matatodongay a toki. Nolatekay taˈangayay ko saroero saan ko harateng ita anca tada marorayay, telocto awaayto ko pakayraan a mitolon. Ano mahaenay kiso i, aka matoled, ˈalomanay a salikaka misiˈayaway to malecaday a pasangaray. Ngaˈay kiso samaan ko pidemak hani? O roma tamdaw na mananamay itini ˈayaw no mafotiˈ mitolon, ano cowa ka tada maroray i, kahnay a mitolon ci Yihofaan ikakaay ko kangaˈay. Mahapinangay no roma tamdaw, ano mitolon i, mipiliˈ to matatodongay a pakayraan papadama cangranan misamacay ko falocoˈ. Roma i, ano pakidemay ko cariraw anca matoled kiso awaay ko pakayraan mitolon, sasamaanto aki? Pasowalen ci Yihofa to polong a nafalocoˈan iso. Aka calemcem, o siniˈadaay to tamdaw a kakarayan Wama mafanaˈay to roray iso.—ˈOlic 139:4.

13. Itini micekiw, mitolon ato masaˈopo o lalosidan no tingnaw hano mamikalisanga to falocoˈ ita alatek?

¹³ Ano micekiw i liyasen ko mikalisangaay. O mitolonay cowa ko edengan a pakayraan patanektek to kalawidang ita aci Yihofaan, micekiw to Kimad no Kawas ato mirienang to saˈopo no kasakopang wa ngaˈay padama kitanan miingid Cingranan. Sasamaan kita misaka dademak to picekiwan ato masaˈopo a toki hani? Ngaˈay licayen ko niyah: ‘Itini micekiw ato masaˈopo o maanan a demakan kahnayay mikalisanga to falocoˈ ako hani?’ O soci iso anca roma tingnaw a lalosidan macadaay ko tingwa, tikami anca lihaf hokira? Anini, pinaay poloˈ a ok a tamdaw iraay ko hatiniay a lalosidan. O roma mikakingkiway a tamdaw sanay, ano sapisamacayaw kita i, ano ira itatihi ko soci, madoloay makalisanga ko falocoˈ. O cecay mikakingkiway to nafalocoˈan a singsi sanay: “Toniya a tatokian o harateng ato falocoˈ iso cowato ko tayal ko miharatengan, ao romato a demak.” ˈAyaw no misatapang ko kamok no taykay, miceriday kita micada to sapatalipaˈelal, hamaan pahonien ko soci ato roma lalosidan, hoeca ka makalisanga ko tao. Ano cecay kiso i, ngaˈay kiso mihaen to demak han? Mihaenay, o tingnaw a lalosidan cowato ko mamikalisanga to kalacafay iso aci Yihofaan a tatokian.

14. Mikitini Filipi 4:6, 7, sasamaan ci Yihofa padama kitanan padadotoc misamacay?

¹⁴ Micangacang ci Yihofaan padama kitanan  padadotoc misamacay. Ano micekiw ato mirienang to saˈopo i, mahapinang to makalisangaay ko falocoˈ no niyah, cangacangen ci Yihofa padama kitaanan. Ano matomesay to cariraw ko falocoˈ ita, papasangar misamacay ko harateng mirienang to midokoay a demak. Kawra tonini a tatokian tada kalimlaan misamacay to harateng, mansa mamicangacang kita ci Yihofaan pafeli kitanan to rihaday, o hatiniay a rihaday mamidipot to “falocoˈ ato ponoˈ” ita.—ˈOsien ko Filipi 4:6, 7.

15. O maanan ko cecay a epoc mipalak to toki kalacafay ci Yihofaan?

¹⁵ Tongalen iso ko toki masasowal ci Yihofaan, mitengil to sowal Ningra, ato miharateng to milingatay Cingranan a demak, mamalifok ko adihayay a epoc. Iraay ko maanan a epoc hani? Saka 1, inaneng ko misaˈosian iso. Sowal no Fangcalay Cudad: ‘Kalacafay to citanengay a tamdaw i, o cacitaneng.’ (Taneng 13:20) O taneng mikitiniay ci Yihofaan, micerid kiso kalacafay Cingranan mamatongal ko ka citaneng, mamatongal ko kacipinang to masamaanay a saˈosi papakahemek Cingranan, eca ka pakasomad Cingranan.

16. Tongalen ita ko toki kalacafay ci Yihofaan hano ngaˈay malo sangaˈayay a singsi no Fangcalay Cudad?

¹⁶ Saka 2, mamalo sangaˈayay a singsi no Fangcalay Cudad kiso. Ano misikay kita to pacekiwan i, o cecay kalimlaan a patosokan o papadama to pacekiwan miingid ci Yihofaan. Ano micerid kita masasowal ci Yihofaan, matongal ko olah Cingranan, matongal ko kafanaˈ to sasamaan padama to pacekiwan palahad to olah ci Yihofaan. Mihaenay ko demak ni Yis. Ano milengo cingra ci Yihofaan i, matinakoay no nisawawaan, o matomesay ko olah ato damsayay a Wama ci Yihofa, mihaenay matongalay ko tangongol no olah nangra ci Yihofaan.—Yohani 17:25, 26.

17. Mitolon ato micekiw hano ngaˈay padama kitanan tanektek ko pakasoˈlin hani?

¹⁷ Saka 3, mamatongal ko tanektek no pakasoˈlin iso. Ano mitolon kiso micangacang to Kawas pafeli to sakayat, sahinom ato sadama ikor, maˈaraw to samaanay Cingra pacaˈof tisowanan, mamatongal ko tanektek no pakasoˈlin iso i Cingranan. (1 Yohani 5:15) Ngaˈayho kiso samaan ko pidemak patanektek to pakasoˈlin no niyah hani? Pakaynien i picekiw, samanen ‘o sasalakat ko tamdaw tahatengil to lihaf, ngaˈ pakasoˈlin.’ (Loma 10:17) Kawra sapalahadaw to tanektekay a pakasoˈlin, o pinanam aca to sifanaˈ cangoˈotayho. Mamidemakho kiso to maanan hani?

18. Patinako mitadtad hano misaaliay kita to mamidotim hani?

¹⁸ Misaaliay kita misongilaˈ midotim to mananamay  no niyah a sifanaˈ. Nengnengen ko nalifetan no mitiliday to ˈOlic 77 fedengan. Tada marorayay cingra, samanen cowa to pihayda ko Kawas cingranan ato finawlan ningra a Israil tamdaw saan ko harateng ningra. Tada macariraway cingra, itini dadaya pasangaray mafotiˈ. (2-8 sinael) Sasamaan cingra hani? Pasowalay cingra ci Yihofaan: ‘Midotim kako to midemakan Iso a maemin, miharateng to kahacecay midemakan Iso.’ (12 sinael) Soˈlin ihkalay cingra mafanaˈ to nano demak ni Yihofa isaˈayaw to finawlan no Niyah, kawra kamayan cingra macariraw, sanay miharateng: ‘Mapawanay ko Kawas paihkal to sidaˈit, pakayni i kaketer eca to ka siniˈada to tamdaw han?’ (9 sinael) Ikor, misongilaˈay cingra miharateng to midemakan ni Yihofa, ato samaanay ci Yihofa siniˈada to finawlan no Niyah isaˈayaw. (11 sinael) Padamaay konini cingranan pakasoˈlin, cowa ko mamifalah ci Yihofa to finawlan no Niyah. (15 sinael) Malecaday, ano misongilaˈ kiso miharateng to nano demak ni Yihofa i finawlan no Niyah ato tisowanan i, papatongal to tanektek no pakasoˈlin iso.

19. Mipalak to toki kalacafay ci Yihofaan pairaayho to maanan a epoc kitanan hani?

¹⁹ Saka 4, o sakakaay i papadadotoc matongal ko olah iso ci Yihofaan. Palalinien to roma capeling, o olah ikakaay ko pipakalalok kitanan midofdof ci Yihofaan, matongal ko kalim ita pakayni sapakahemekaw Cingranan makahi a kinafalah, ato miemem to kihcod a pasangaray. (Matay 22:37-39; 1 Korinto 13:4, 7; 1 Yohani 5:3) Pakayni kitaanan o ngaˈayay kalawidang aci Yihofaan o sakakaay kalimlaan!—ˈOlic 63:1-8.

20. Sasamaan ko pidemak iso, ngaˈay misaka dademak to toki kalacafay ci Yihofaan?

²⁰ Haratengen, mitolon, micekiw, midotim o kalimlaan a demak midoko. Ngaˈay kita malecad ci Yisan mikilim to awaay ko adeses a kitiraan midemak tonini a demak. Aka makalisangaˈ ko falocoˈ, mitolonho ci Yihofaan micangacang to sapadama kitaanan misamacay ko harateng mirienang to midokoay a demak. Ano mihaen kita misongilaˈ misaka dademak to toki, o papalifonen ni Yihofa kita, itini faelohay a hekal mamilayap kita to tahadaˈocay a ˈorip.—Marko 4:24.