TO mihecahecaan ˈalomanay kalimlaan a siri patikolay tayra i kasakopang ni Yihofa, onini tada pakahemekay to kakarayan. Ano masalalomaˈay kiso i, ngaˈay pakasoˈlin ci Yisan, o coyoh aci Yihofa tada mahemekay pakaˈaraw tisowanan patatikol. (Luka 15:7, 10) Kawra, miliyaw patireng to kalawidang aci Yihofaan cowa ko madoloay alatek. Tatahalifa kiso to manan pasangaray hani? Sasamaan miremo hani?

ˈAlomanay patikolay i kasakopang a tamdaw misaaliay to sapiremoaw to matoleday a harateng. Malecaday ko harateng iso ci Tafitian alatek, macada ko sasodod ni Yihofa ikor sanay cingra: ‘Mapaekelay no adihayay a raraw kako, awaayto ko hatokel ako.’ (ˈOlic 40:12; 65:3) O cecay tamdaw patikol i tatihi ni Yihofa pina miheca ikor, padotocayho matoled anca mangodoay alatek. Na mafalahay ci Isapie *, miliyas to kasakopang 20 miheca, sanay cingra: “Pasangaray kako pakasoˈlin to soˈlinay ci Yihofa misodod takowanan.” Ano tada matoleday kiso, o kalawidng iso aci Yihofaan mamiliyaw malonay alatek. (Taneng 24:10) Mamisaˈicel a miliyas to pifekad no hatiniay a pakayraan.

O roma tamdaw tada taˈangay ko saroero sanay ko harateng, samanen miliyaw patireng to kalawidang aci Yihofaan macapiday ko adihayay a demak. Patikol i kasakopang ci Antowan sanay: “Mahapinangay ako mapawanay ko niyah to adihayay minanaman a demak isaˈayaw, ato midemakan i malo Krisciyangho isaˈayaw.” Oniya matoleday a harateng cowato kangaˈay ko roma tamdaw misarocod mirienang to midokoay ci Yihofaan a demak.

Tinakoen, o kaolahan no cecay tamdaw a lomaˈ mapalakay no faliyos, maharateng ningra sapiliyawaw patireng to lomaˈ misaaliay to adihayay a toki ato ˈicel, tada taˈangay ko saroero saan miharateng alatek. Malecaday, o raraw iso isaˈayaw mipalakay to kalalaˈed iso aci Yihofaan, nohatini sapiliyawaw patireng  to kalawidang misaaliay to taˈangay a ˈicel, mihaen cowa ko madoloay saan ko harateng iso alatek. Kawra, cowa ko matoˈolay kiso awa ko padamaay.

Sanay ko sowal ni Yihofa: ‘Ka tayni kamo, misaysay to pasangaray i kalalaˈed ita.’ (Isaya 1:18) Taˈangayay ko mihadakan iso a ˈicel misaysay to pasangaray no niyah aci Yihofaan, mansa tada maolahay ci Yihofa tisowanan. Haratengen hena, patikolayto kiso i tatihi ni Yihofa, mansa ngaˈayay Cingra tano tinakoan iso pacoli to sakokot ni Satan.—Taneng 27:11.

Patikol kiso i tatihi ni Yihofa, o talaˈayaway miingid Cingranan, mikiˈokay Cingra o mamiingid tisowanan. (Yakop 4:8) Kawra, cowa ko pasifanaˈ aca to tao miliyaway cadaen no kasakopang kiso, papadotocho kiso mitongal to kaolah ci Yihofaan. O kakarayan a Wama iso Cingra, o widangho iso. Ngangaˈay kiso samaan ko demak hani?

Patirengen ko matatodongay a patosokan. Iraayho ko taˈeneran no pakasoˈlinay falocoˈ iso alatek, maharatengayho iso pakayni ci Yihofaan ato faelohay hekal a taˈeneran no soˈlinay kimad. Kawra nohatini misaaliay kiso miliyaw a minanam to kaˈorip no Krisciyang, malecaday miliyaw patireng to falat no lomaˈ. Mahawpay ko picerid a milasil to ngaˈayay lihaf, mirienang to saˈopo no Krisciyang, ato macacawmaˈ to salikaka. Onini laenoay o ngaˈayay saˈicelen iso a patosokan.

Micerid masasowal ci Yihofaan. Mafanaˈay ko kakarayan Wama, ano padotocay kiso makesem ko falocoˈ, papasangar pasayra Cingranan a mitolon. (Loma 8:26) Kawra sowal no Fangcalay Cudad ‘ka padadotoc a mitolon,’ mansa papasowalen iso ci Yihofa tada makalimay kiso malo widang Ningra. (Loma 12:12) Sowal ni Anteli: “Na tada makesemay kako, kawra ano maharek mitolon, malowanay ko makesemay a falocoˈ, rihadayayto ko falocoˈ.” Ano cowa ka fanaˈ kiso o manan ko hasowal ci Yihofaan, ngaˈayay nengnengen ko pasasiyoray a satolon ni Tafiti itini ˈOlic saka 51 ato 65 fedengan.

Micerid micekiw to Fangcalay Cudad. Mihaen ko demak iso mamatongal ko pitadiˈec ato maolah ci Yihofaan. (ˈOlic 19:7-11) Sowal ni Felipi: “Samanen isaˈayaw awaay ko ngaˈayay a nanaman ako micekiw mansa malonay, telocto taˈangay ko raraw. Caay to ka ciharateng kako miliyaw patoled ci Yihofaan, mansa misetek ko falocoˈ micerid micekiw.” Ngaˈayay kiso mihaen ko demak. Ano cowa ka fanaˈ kiso micalep a micekiw to manan lalangian, ngaˈayay licayen ko cecay matenesay a widang.

Miliyaw patireng to kalawidang ato salikaka. O roma tamdaw patikol tayni i kasakopang i, calemcemayho to tao ira ko tatiihay a pinengneng i cangranan. Sowal ni Lalisa: “Tada mangodoay to kako, tangongolay ko pidokaˈ no niyah to salikaka saan ko harateng, tada patoleday cangranan. O hatiniay a harateng halafinay a tatokian.” Aka calemcem, o malohemay malitengay ato matenesay a salikaka tada makalimay sapipadamaaw tisowanan miliyaw patireng to kalawidang aci Yihofaan. (Nengnengen ko sapatongal lalakaw “ Sasamaan ko Demak no Malohemay Malitengay?”) Tada mahemekay cangra pakaˈaraw tisowanan minokay, mitokelayho tisowanan matinako ko dihko i kasakopang.—Taneng 17:17.

Sasamaan kiso paingid to kalalaˈed ato salikaka hani? Mirienang to kihcod a saˈopo, micerid malacafay to salikaka mitosil. Mihaen ko demak hano iraay ko sadama hani? Sowal ni Filikes: “Tada mahemekay ko salikaka maˈaraw kako minokay, matinakoay ako ko olah nangra. Itini sadama nangra, miliyaway mahela ako to masalalomaˈay no kasakopang saan ko harateng, pakasoˈlinay ko niyah milifokay to sasodod ni Yihofa, ngaˈayayto padadotoc a talaˈayaw.”—Nengnengen ko sapatongal lalakaw “ Sasamaan ko Demak Iso?”

Itini piliyaw iso patireng to kalawidang aci Yihofaan i, ci Satan padadotocay miafad tisowanan, paira to adihayay a “pades” iso. (Luka 4:13) Mihaenay, nohatiniho songilaˈen patanektek ko pakasoˈlinay falocoˈ no miso, patanoktoken patireng ko “lomaˈ.”

Pakayni kalimlaan a siri Ningra, mikiˈokay ci Yihofa: ‘Mahidayay i, kakilimen Ako, moraraway i, o kakeriden Ako a panokay, o madokaˈay i, o tatafoen Ako, o malonayay i, patalifaken Ako.’ (Icikil 34:16) Padamaay ci Yihofa to ˈalomanay salikaka miliyaw malawidang Cingranan, makilimay padama tisowanan mihaen ko demak. Papatongalen Ningra ko piingid iso Cingranan!