1. Milengo to matomesay ko siniˈadaay a tamdaw, mamaharateng ita ko manan hani?

MILENGO to matomesay ko siniˈadaay a tamdaw, wa maharateng ita ko cecay tamdaw o sidaˈit, fanekfekay, iraay ko siniˈadaay a falocoˈ hanaca maolahay padama to tamdaw. Maharatengay ita koya misowalan ni Yis ngaˈayay a Samariya tamdaw alatek. Oniya Samariya tamdaw paihkal to siniˈadaay a falocoˈ i Yutaya tamdaw, itini i lalan maˈaraw konini a Yutaya tamdaw sakapatayaw sanay a masetiˈ no mariˈangay tamdaw, ‘tada siniˈadaay cingranan,’ cowa ko paˈorip aca cingranan, milimasmasayho to tamdaw midimokos cingranan. (Luka 10:29-37) Oniya tawcikel papadama kitanan mihapinang to o manan ko siniˈadaay. Siniˈadaay o ciolahay a waywayan, o makapahay a capeling ni Yihofa, to romiˈamiˈad Cingra tano masakenaay a pakayraan paihkal to siniˈadaay i kitaanan.

2. O manan ko roma siniˈadaay to tamdaw a pakayraan hani?

² O roma siniˈadaay to tamdaw a pakayraan, ano iraay ko lalangian o ngangaˈay sododen ko mararaway a tamdaw, ci Yihofa mihaenay micada kitaanan. Sowal no mitiliday to ˈOlic: “Caay pidoedo Cingra to lalayapen ita a mitefoc i titaanan.” (ˈOlic 103:10) Kawra latekay o pakidemay a pakayraan ko sapirikec ni Yihofa to mararaway a tamdaw.

3. Oniya lalakaw mamilengo to maanan salicay?

³ Oniya lalakaw mamilengo to tolo a salicay: Ci Yihofa hano paihkal to siniˈadaay i tamdaw? Mirikec ato siniˈadaay iraay ko maanan kalaliting hani? O manan ko ngangaˈay padama kitaanan paihkal to siniˈadaay i tamdaw? Nengnengen ita samanay ko Fangcalay Cudad pacaˈof toniya tolo a salicay.

4. Ci Yihofa hano siniˈadaay to tamdaw?

⁴Ci Yihofa iraay ko olah, mansa siniˈadaay to tamdaw. Sowal  ni Pawlo, ‘matomesay ko siniˈadaay’ no Kawas. Ngaˈay kita mikitini fafekangay ato laenoay a lalakaw mihapinang, sowal itini o siniˈadaay ko Kawas to cowa ka lefot a tamdaw, paira to tokel nangra tayra i kakarayan maˈorip. (Ifiso 2:4-7) Kawra ci Yihofa cowa ko manilnilay aca no fangcalay saocor ko paihkalan to siniˈada. O mitiliday to ˈOlic ci Tafiti sanay: ‘Sidaˈitay ci Yihofa to tamdamdaw, o kihcod midemakan Ningra patalahkalay to siniˈadaay Cingra.’ (ˈOlic 145:9) Maolahay ci Yihofa to tamdamdaw, mansa ano iraay ko lalangian, papaihkal Cingra to siniˈadaay i tamdaw.

5. Hano mafanaˈ ci Yis to iraay ko siniˈadaay ni Yihofa?

⁵ ˈAyaw no tayni i fafekang no sera ci Yis halafinay kalacafay ci Yihofaan i kakarayan maˈorip, mansa ikakaay to romaroma tamdaw a cipinang to hakowaay ko siniˈada ni Yihofa. (Taneng 8:30, 31) Maˈaraway ningra kinapinaay ci Yihofa paihkal to siniˈadaay i mararaway a tamdaw. (ˈOlic 78:37-42) Mansa pasifanaˈ cingra to tamdaw i, miceriday misaˈicel toniya makapahay capeling no kakarayan Wama.

6. Misamanay ci Yis padama kitanan mihapinang, makahiay ko kakarayan Wama paihkal to siniˈadaay falocoˈ i tamdaw?

⁶ Malecad to misowalan no fafekangay a lalakaw, ci Yis tano malafelay wawa a tawcikel pasifanaˈ kitanan tada makahiay siniˈada to tamdaw ci Yihofa. Oniya wawa miliyas to lomaˈ ikor “eminen ningra a milaˈom ko payso ningra itira a patahtah a maˈorip.” (Luka 15:13) Ikor, pakayni i raraw no niyah a pasasiyor ko harateng ningra, orato misapoeneray, minokay tayra i lomaˈ no wama. Sasamaan ko harateng no wama hani? Cowa ka halafin mamafanaˈ cingra. Sanay ci Yis: ‘Yo i ra:ayho no lomaˈ cingra i, maˈaraw no wama ningra cingra. Saka, sasiniˈada sa koya wama a minengneng cingraan. Ta cikay sa koya wama a miraod i cingraan a mitakec a mihangot.’ O wama cowa pakangodo ko wawa, hanaca misododay cingranan, mahemekay mihamham cingranan minokay i lomaˈ. Soˈlin pakidemay ko raraw no malafelay wawa, kawra samanen soˈliˈlinay cingra pasasiyor, misododan no wama cingra. O sapatinako a sidaˈitay wama mitaypiyaway ci Yihofaan, ci Yis tano kasemeran a tawcikel pacipinang kitanan, tada makahiay ko kakarayan Wama misodod toya soˈliˈlinay pasasiyor a mararaway a tamdaw.—Luka 15:17-24.

7. O siniˈadaay ni Yihofa ato taneng Ningra iraay ko maanan kalaliting hani?

⁷O taneng ni Yihofa awaay ko pakaliniay, mansa paihkal to siniˈadaay i tamdaw. O taneng ni Yihofa cowa ko kietecay, awaay ko olah a  capeling. Sowal no Fangcalay Cudad: ‘Nai fafekangay a taneng . . . o matomesay to siniˈada, kadofahay ko ngaˈayay a minaroˈan.’ (Yakop 3:17) O sidaˈitay a Wama ci Yihofa, mafanaˈay Cingra paihkal to siniˈadaay i wawa ngangaˈay paira to epoc cangranan. (ˈOlic 103:13; Isaya 49:15) Samanen siniˈadaay ci Yihofa to finawlan Ningra, mansa ira ko ˈodingaray a hanonoˈ nangra. Matomesay to taneng ci Yihofa, mihaenay ano ira ko lalangian, makahiay Cingra paihkal to siniˈadaay i tamdaw, kawra mafanaˈay Cingra hacowa tatokian caay pihaen to demak. O siniˈadaay Ningra cowa ko pakiyadi saan to mararaway.

8. Sasamaan kita micada to mararaway tamdaw nolatekay? Misamanay hani?

⁸ O cecay midokoay ci Yihofaan a tamdaw ano padeteng mararaw, sasamaan ko demak ita hani? Itini sakayat no Kawas ci Pawlo sanay: ‘Hamaan macacawmaˈ cingranan.’ (1 Korinto 5:11) Mararaway tamdaw eca ka pasasiyor, o kasakopang mamifalah cingranan, mihaen ngaˈay midipot to madimadiay a salikaka, wa ngaˈayho misawacay to o makoracay a Kawas ci Yihofa. Kawra harateng no roma tamdaw, mafalah ko cecay tamdaw paihkalay to cowa ka siniˈada ko Kawas cingranan. Soˈlinay mahaen han? Nengnengen ita.

9-10. O mifalahay o siniˈadaay to tamdaw a waywayan hano saan ko sowal? Tano sapatinako mitadtad. (Hipray 12:5, 6)

⁹ Ano matengil ita ko salasil i, o kafanaˈan ita ato kaolahan a faˈinayan salikaka anca fafahiyan salikaka cowato ko Misawacayay Tamdaw ni Yihofa, maedeng tada masomaday kita. Sanay ko harateng ita alatek: “Hahaenen a mifalah koniya tamdaw han? O mifalahay to cecay tamdaw o siniˈadaay a waywayan han?” Hai. Ano misaali ko cecay tamdaw to sarikec, o kasakopang eca ka pirikec cingranan, mihaen o cangoˈotay to siniˈadaay falocoˈ a waywayan, mihaen ko demak cowa ko citanengay, awaay ko olah. (Taneng 13:24) O cecay tamdaw ano mararaw eca ka kahi pasasiyor, mifalah cingranan o sasoˈlin ngaˈay padama cingranan pasasiyor a misafaeloh han? Hai. ˈAlomanay pakidemay ko raraw a salikaka sanay, o mifalahay a limasmas padamaay cangranan patalipaˈelal, pasasiyor a misafaeloh, patikol tayni i tatihi ni Yihofa.—ˈOsien ko Hipray 12:5, 6.

¹⁰ Nengnengen ita ko cecay sapatinako. Adadaay ko cecay siri, mafanaˈay ko pakaenay tamdaw miadah to hatiniay adada, paliyasen cira ato roma siri. Kawra o siri o masafelaway a pinaˈorip, ano paliyasen wa cariraw ko harateng. Mihaen ko demak no pakaenay tamdaw awaay ko olah hokira? Cowa! Mafanaˈay cingra ano adadaay siri paterek i lalomaˈ no siri, o roma siri mamadenga, edengan paliyasen ko adadaay a siri ngangaˈay midipot to roma siri.—Nengnengen ko Lifi 13:3, 4.

11. (1) Mafalahay a tamdaw hano malecad o adadaay a siri hani? (2) Ngaˈay cangra midemak to manan hani? Ngangaˈayho milifok to maanan sapadama?

¹¹ O mafalahay tamdaw malecaday o adadaay a siri, samanen mapalakay ko kalalaˈed ningra aci Yihofaan. (Yakop 5:14) Malecad o adadaay a tamdaw mamidenga ko adada to tao alatek, mapalakay ko kalalaˈed aci Yihofaan a tamdaw tatatiih ko pifiyor to tao alatek. Mansa, mifalah toniya tamdaw i kasakopang. Hatiniay a pirikec misawacayay to tada maolahay ci Yihofa to madimadiay a salikaka i kasakopang, wa ngaˈayho padama to mararaway tamdaw mafanaˈ to tada pakidemay ko raraw no niyah, miocor cingranan pasasiyor. O cecay tamdaw ikor no mafalah, ngaˈayay mirienang to saˈopo, mihaen wa ngaˈay cingra micada to sapasifanaˈ nai Fangcalay Cudad, miliyaw patireng to pakasoˈlinay falocoˈ i Kawas. Ngaˈayho cingra milifok to mitepangan no likakawa a lalakaw, miˈosi to i lalomaˈay lalakaw, wa ngaˈay minengneng to JW  Tilifi a kamok. Ano maˈaraw no malohemay malitengay ko kacakat ningra, papafeli cingranan to roma sapaini ato sakayat, padama cingranan misalof to kalalaˈed aci Yihofaan. Mihaen, wa miliyaw cingra macada no kasakopang alatek, miliyaw malo Misawacayay Tamdaw ni Yihofa. *

12. Ano ira ko tamdaw pakidem ko raraw ecaho ka kahi pasasiyor, samaan ko demak no malohemay malitengay o paihkalay to olah ato siniˈadaay hani?

¹² Haratengen, edengan o cowa ka kahi pasasiyor a mararaway tamdaw ko mamafalah no kasakopang. Mafanaˈay ko malohemay malitengay oniya demak kalimlaan, mansa ˈayaw no misaˈosi wa misongilaˈ misimsim. Cipinangay cangra ci Yihofa wa ‘matatodong ko pirikec’ to tamdaw, hanaca mitokel cangranan mihaen ko demak. (Yirimiya 30:11) Maolahay ko malohemay malitengay to salikaka, cowa ka kahi midemak to mipalakay to kalalaˈed nangra ato Kawas a demak. Kawra nolatekay, mifalah to mararaway a tamdaw o ciolahay ato siniˈadaay to tamdaw a pakayraan.

13. I Korintoay a kasakopang hano mamifalah toniya tamdaw hani?

¹³ Nengnengen ita, mararaw ko tamdaw eca ka kahi pasasiyor i, samaanay ko pisaysay ni Pawlo. Korinto a kasakopang o cecay tamdaw madadiˈiyay to fafahi no wama, o waywayan ningra tada kaacekanto! Mafanaˈay ci Pawlo na palimoˈotan ni Yihofa ko nolitengan a Israil tamdaw: ‘O cima madadiˈi to fafahi no wama, o pakangodoay to wama. O papatayen a tatosa.’ (Lifi 20:11) Manaokaniw, cowa kangaˈay ci Pawlo palimoˈot to Korinto a kasakopang a salikaka mipatay toniya tamdaw. Kawra palimoˈotan ningra cangra mifalah toniya tamdaw, samanen o tatiihay a demak noniya tamdaw mifiyoray to romaroma tamdaw i kasakopang, harateng no roma tamdaw cowa ka pakidem ko raraw noniya tamdaw sanay.—1 Korinto 5:1, 2, 13.

14. Samanay ci Pawlo paihkal to siniˈadaay i cecay mafalahay a tamdaw? Hano mihaen ko demak ningra hani? (2 Korinto 2:5-8, 11)

¹⁴ Ikorto, mafanaˈ ci Pawlo taˈangayay ko kafalic noniya mararaway a tamdaw, soˈliˈlinay a pasasiyor. Soˈlin na mipalakay koniya tamdaw to ngangan no kasakopang, kawra pasowalan ni Pawlo ko malohemay malitengay aka pakidem ko saali toniya tamdaw, sanay cingra: ‘Kifalocoˈen namo a misodod cingra, hinomen cingra.’ Misamanay hani? Sanay ci Pawlo: ‘Ho eca pakidem ko kasomad ningra, cato piliyaw a talifak.’ Siniˈadaay ci Pawlo toniya pasasiyoray a  tamdaw, eca ka ciharateng pakidem ko kasomad ningra, hawad sato a micangacang to sasodod ni Yihofa.—ˈOsien ko 2 Korinto 2:5-8, 11.

15. Sasamaan ko malohemay malitengay tanektek a midemak to sapirikec, hanaca paihkal to siniˈadaay hani?

¹⁵ O malohemay malitengay malecaday ci Yihofaan makalimay paihkal to siniˈadaay i mararaway tamdaw, ano ira ko lalangian, misarocoday cangra mihaen to demak. Kawra ano kalimlaan i, o tatanektek cangra a midemak to sapirikec, ano eca i, o pakiyadiay to tatiihay a demak. Ano mahaenay i, itini kasakopang dengan ko malohemay malitengay ko papaihkal to siniˈadaay han?

16. Mikitini Taneng 21:13, ci Yihofa sasamaan micada to cowa ka siniˈada to tao a tamdaw hani?

¹⁶ Kihcod a Krisciyang o mamisaˈicel a mitodong ci Yihofaan, paihkal to siniˈadaay i tamdaw, misamanay hani? Cecay lalangian i, ano eca ka siniˈada kita to tao, cowato ko mamitengil ci Yihofa to pitolon ita. (ˈOsien ko Taneng 21:13.) Caay ka olah kita mihaen ci Yihofa micada kitaanan, mihaenay o mamisaˈicel kita eca ka pakidem ko saali to tamdaw. O micadaay to roray a salikaka ano misaali to sapadama ita, aka a talimaan saan, ka pitengil to ‘pingitangit no sasafaay a tamdaw.’ Haharatengen ita ko limoˈot no Fangcalay Cudad: ‘Cowa ka siniˈada to tao i, ano masawkit ko niyah cowa ko mamilifok to siniˈada.’ (Yakop 2:13) Ira ko misapoeneray a waywayan ita, miharateng kita to misaaliay ko niyah to siniˈada, o mamadoloto paihkal to siniˈadaay a falocoˈ i tao. Pakayra i soˈliˈlinay pasasiyor, miliyaway patikol i kasakopang a tamdaw o ngangalefen ita mihaen ko demak.

17. Samaanay ci Tafiti paihkal to siniˈadaay a falocoˈ i tamdaw hani?

¹⁷ Itini tinakoan no Fangcalay Cudad ngangaˈay padama kitaanan palahad to siniˈadaay a falocoˈ, miliyas to awaay ko olah a waywayan. Haratengen ci Tafiti, marariday cingra paihkal to siniˈadaay a falocoˈ i tamdaw. Tinakoen, soˈlin sapipatayaw ci Sawlo ci Tafitian, kawra siniˈadaay ci Tafiti toniya minilnilan no Kawas a Hongti, cowa piharateng to sapiˈodisaw ato midokaˈ cingranan.—1 Samuil 24:9-12, 18, 19.

18-19. Ci Tafiti itini maanan tosa demakan cowa ka paihkal to siniˈadaay a falocoˈ hani?

¹⁸ Nolatekay, ci Tafiti cowa paihkal to siniˈadaay a falocoˈ i tamdaw. Tinakoen, mariˈangay a Napal kasimaan sanay ko sowal, manaˈayay pafeli ci Tafitian ato sikawdan ningra to kakaenen, tada maketeray ci Tafiti, misaˈosiay to sapipatayaw ci Napalan ato polong faˈinayan no paro no lomaˈ ningra. O fafahi ni Napal ci Apikail o ngaˈayay iraay ko mihadidiay a tamdaw, tangsolay cingra talaˈayaw midemak, hato cowato ka citadah ci Tafiti tono ˈirang a tadah.—1 Samuil 25:9-22, 32-35.

¹⁹ Kinacecayay, pairasolay a Natan pasowalay ci Tafitian to cecay demak, sowal sa ira ko cecay cihafayay miˈafasay to siri no manikaway a tamdaw. Tada maketeray ci Tafiti, saan: ‘Ngaˈay misawacay ko midaˈocay maˈorip a Yihofa, o papatayen ko midemakay tonini a tamdaw!’ (2 Samuil 12:1-6) Mafanaˈay ci Tafiti to rikec ni Mosi o mitakaway to siri a tamdaw papatefoc to sepat tingloh. (Kasadakan 22:1)  Soˈlin cowa ko sakapatay ko raraw nonini a tamdaw, tada pakidemay ko pisawkit ni Tafiti. Soˈlinay i, o misangaˈan aca ni Natan a tawcikel konini padama ci Tafitian mihapinang, palalinien toya cihafayay, ikakaay ko pakidem no raraw ni Tafiti. Soˈlin mahaen, kadofahay ko siniˈada ni Yihofa, misododay ci Tafitian. Palalinien, tada cangoˈotay ko siniˈada ni Tafiti toya cihafayay a tamdaw!—2 Samuil 12:7-13.

20. Ngaˈay kita mikitini tinakoan ni Tafiti minanam to maanan?

²⁰ Misaˈosiay ci Tafiti mipatay ci Napalan ato paro no lomaˈ ningra a faˈinayan, samanen itiya cingra tada maketeray, kawra mitengil cingra to tawcikel ni Natan ikor sowal sa oniya cihafayay a tamdaw o papatayen, hano mahaen hani? Tocerid o sidaˈitay ci Tafiti, hano midemak to awaay ko olah a pisawkit hani? Haratengen ko pakayraan ni Tafiti itiya, misemsemay ko makapahay a falocoˈ ningra. Mikitini mahapinang ita, o cecay tamdaw ano pakidemay ko pisawkit to tao, paihkalay konini to mapalakay ko kalalaˈed ningra aci Yihofaan. Ci Yis na misongilaˈay a patalipaˈelal to nisawawaan sanay: ‘Aka patelas misawkit to tamdaw, ta caay ka sawkit no Kawas kamo. Nawhani ano masamaan ko pisawkit namo to tamdaw i, hatira ko pisawkit no Kawas i tamowanan.’ (Matay 7:1, 2) Mihaenay ka piliyas kita to pakidemay ko saali a waywayan, misaˈicel a mitodong to ‘matomesay ko siniˈadaay’ a Kawas.

21-22. Ngaˈay kita tano maanan a pakayraan paihkal to siniˈadaay a falocoˈ i tamdaw hani?

²¹ Ano siniˈada kita to tao, cowa ko siniˈada aca cangranan, o tatalaˈayaw midemak padama cangranan. Misongilaˈ kita mihapinang to o cima ko misaaliay to sadama i lomaˈ, i kasakopang, i kilac, mamakilim ko adihayay a toki paihkal to siniˈada i tamdaw. Iraay ko tamdaw misaaliay to sahinom han? Ngangaˈay kita mihadak to ciepocay a sapadama, tinakoen pafeli cangranan to kakaenen, anca midemak to pina demak padihko cangranan han? Miliyaway cadaen no kasakopang a salikaka misaaliay to sapakalalok no ngaˈayay widang hokira? Ngangaˈay kita pasowal to tao to ngaˈayay lihaf no Fangcalay Cudad, pafeli cangranan to sahinom han? Onini o ngaˈayay a pakayraan paihkal to siniˈadaay i tamdaw.—Yopu 29:12, 13; Loma 10:14, 15; Yakop 1:27.

²² Misinanot kita to saali no tao, mamakilim ko adihayay a toki, paihkal to siniˈadaay i tamdaw. Misaˈicel kita mihaen to demak, papakahemek to ‘matomesay ko siniˈadaay’ a Wama ita i kakarayan!